Jojɛfɩɩ õkũusɔ jaal Ejipiti dɩɩra. \ref Jǝn 41.54-57; Th t t 7.11-12
42
1 Mɔ̃ Jakɔbɩ nɩɛnɩ dɩ dɩkɔ hale Ejipiti, a sor ɔɔ bikũusɔɔra: «Aɲe nɩ too na n hɩɩn kha?» 2 Mɩ nɩɛrɛ dɩ dɩkɔ har le Ejipiti, nɩ jala le a thɛ ɛna gɩ do nɔɔ sɩ hana yire, sa khiir kɔmɛra'.» 3 Dɩ Jojɛfɩɩ õkona yʋɔr jaal Ejipiti wɩ the dɩkɔ. 4 Jakɔbɩ na tu Bɛ̃jamɛ̃ɛkɛ dɔnɩ Jojɛfɩɩ õkuun n jala kha na wela', gɩdonɩ a n kpɩɛrɛ thɩ̃ɛ na daanɛ. 5 Dɩ Jakɔbɩɩ bikũusɔ daan Ejipiti na tibil ɩkhasɔɔkɛ pʋɔnɩ dakha diko thɩɩ gɩdonɩ kɔmɛr kɔɔ jire Kanãa dɩɩra dakha.6 Jojɛfɩ kɔɔ dʋɔn gobanɛr Ejipiti dɩɩra. Ɔr n dolone dɩkɔ dɩdarara fɛw. Dɩ Jojɛfɩɩ õkona daan a gburõkhu ɔɔ ƴɛra. 7 Dɩ Jojɛfɩ yɩ wɩ, a jɩ wɩ. Sɩ aa cʋʋ dɩɩ ho a jɩ wɛra'. Dɩ mɛ̃ a phã war: «Kana nɩ the?» Dɩ wɩ birsee: «Kanãa dɩɩra sɩ the, dɩ sa n ɩ̃ diko thɩɩ.» 8 Jojɛfɩ kɔɔ jɩ wɛr, sɩ we wer na kɔɔ jɩa'. 9 Liir Jojɛfɩ jɩna ɔɔ dǝǝlsɔɔkɛ a n kɔɔ dǝǝlnǝ wɩnɩ, sɩ a bir so war: «Gɩgɩla ha nɩ; nɩ ƴaalɛ nɩ jɩ dɩɩ yɔɔ pasɔ, gɛr nɩ ɩnɔ̃.» 10 Dɩ wɩ birsee: «Kpei, asɩ kɔ̃tɩ̃, sɛr afɩ thɔ̃dara, diko thɩɩ sɩ ɩ̃. 11 Sɛrɛ fɛw, thɩ bɩɛl kɔna sɩ. Sobɔr sɩ n so. Sa do gɩgɩla ga.» 12 Dɩ bir so war: «Mɩ bor; dɩɩ yɔɔ pasɔ nɩ n ƴaal nɩ jɩ gɛr nɩ ɩnɔ̃.» 13 Dɩ ɔɔ õkona birsee: «Sɛrɛ, afɩ thɔ̃dara, thɩ bɩɛlɩ bisɔ sɩ do, a the Kanãa dɩɩra. Yʋɔr yeɲɔ sɩ kɔɔ ha. Dɩ dabuu too na asɩ thɩ, sɩ bɩɛl na hale bã.» 14 Dɩ Jojɛfɩ so war: «Gɛr mɩ n kɔɔ soa'? Gɩgɩla ha nɩ.» 15 Gɩrɛ ma jɩnanɩ dɩ sobɔr tɩbɩla ha nɩ, gɛr ha gɩrɛ: «Na Faarɔ̃ɔ i, na the kɩɛr saagado anɩ õkuun bu ɩna gaa ga. 16 Nɩ thɔna tibil bɩɛl a kɔ̃ a kpa anɩ õkuun burǝ a ɩna, sɩ wɩrɛ sɛnɩ wɩ too khaɩra. Ma jʋʋrɛ anɩ thɩmɩɩr na hɩɩn ado sobɔr nɩ so. Ado mɛ̃ ga, na Faarɔ̃ɔ i, gɩgɩla ha nɩ.»
17 Dɩ a pɛrrɛ dɩ wɩ fʋlɛ wɩ a to khaɩra, dɩ wɩ cʋʋ wire yẽther. 18 Wire balãther wirera, Jojɛfɩ so warɛ: «Anɩ cʋʋ gɩrɛ ma so narnɩ, na 'lɛr yire. Mɩ n mar Thãgba. 19 Ado nɩ dor sobɔdara, nɩ dɔ bɩɛl n too khaɩra, sɩ nɩ gba dɩkɔ nɩ kɔna nɩ ha cɔdara gɩdonɩ kɔmɛr n kʋrɛ, 20 sɩ nɩ kpa anɩ õkuun burǝ nɩ ɩna, ɩ̃ jɩ dɩ sobɔr nɩ so, dɩ mɛ̃ na khiirǝ'.» 21 Dɩ wɩ tu Jojɛfɩɩ kpɩɛrɩkɛ a 'laanɩ, sɩ wa n mɩɩ kha awɩha ayɩ: «Sobɔr gɩ, sɩ kɔɔ dor tɩɩ puunǝ asɩ õkuunna; gɩdonɩ sɩ kɔɔ yɩrɛ mɔ̃ ɔɔ ha n ɩsɩnɩ ɔbɔɔkɛ a n bɩɛl sɩnɩ sɩ jɛ nɩ bʋɔra; sɩ sa kɔɔ pɩɛ nũǝ'. Dɩ gɛr gɩ dɩ gaa hel na n tiir sar nĩikɛ.» 22 Dɩ Ribɛ̃ so war: «Mɩ kɔɔ so narnɩ, na n cʋʋ bɩsaanɩlera puurǝ', nɩ kɔɔ pɛ mɛr nũu ya? Nĩikɛ nɩ yɛ ɔɔ tɔmɩn hel wɩ n lʋʋr sɩnɩ.»
23 Wa kɔɔ jɩ dɩ Jojɛfɩ n nɩrɛ awɩ thɩmɩɩr ga; gɩdonɩ thɩmɩɩ fin hale awɩ thɩ̃thɩɩn da n fi. 24 Dɩ Jojɛfɩ tɔr a phi gbe, a khɩɩ, sa bir ɩ̃ a mɩɩna wɩ. Agɩpɩ dɩ fʋ Simeyɔ̃ awɩ thɩ̃thɩɩn a pɛ khaɩra awɩ yiro. 25 Dɩ a sor, wɩ pɛ war dɩkɔ lokanana gɩ hi, sa gba awɩ mũsũsɔ a pɩɛr loka bɩnɔ, sa hana wɩ gɩrɛ wa khonɩ hʋɛra. Dɩ wɩ cʋʋ oti. 26 Dɩ Jojɛfɩɩ õkũusɔɔle liri dɩkɔ kũkǝnǝnǝ, a gba hʋɛ. 27 Dɩ mɔ̃ wɩ danɩ cɔ paar hʋɛra, bɩɛl khɛrɛ lokaar a ti hʋ̃ɔ a pɛ kũkǝnǝnǝ, a yɩ ɔɔ mũsũ, le loka nʋɔra. 28 Dɩ so ɔɔ õkonana: «A! Ɩ̃ mũsũ bire hakɛ ɩ̃ lokara.» Dɩ le haar the wɩ; dɩ wa n jẽ, wa n bulena khasɔ: «Aɲe Thãgba cʋʋ sɩ thaa?» 29 Dɩ wɩ daan awɩ thɩ Jakɔbɩɩ pa, Kanãa dɩɩra, a gba gɩrɛ fɛʋʋkɛ kɔɔ dana wɩnɩ a mɩɛɛ. 30 A sʋʋraa: «Kuunɩkɛ dɔnɩ kɔ̃tɩn le dɩɩra, a mɩɩna sɛr nɔ kheu, a sor gɩgɩla ha sɩ.» 31 Dɩ sɩ sʋʋraa: «Sobɔr sɩ so, sa do gɩgɩla ga. 32 Sɩ yɩ, yʋɔr yeɲɔ sɩ ha, a do thɩ bɩɛlɩ bisɔ. Dɩ bɩɛl na hale bã, sɩ bɩɛl too kha na asɩ thɩ, le Kanãa dɩɩra. 33 Dɩ kɔ̃tɩnnɩlera so aa, mɔ̃ ɩna jɩnɩ dɩ sobɔdara ha sɩ, sɩ faa asɩ õkuun bɩɛl a too le sɩ, sɩ gba dɩkɔ sɩ ɩna sɩ ha nɩ; gɩdonɩ kɔmɛr n kʋrɛ. 34 Aa sɩ ɩna, sa pɔ na asɩ õkuun burǝ ɩnɩ n yɩɩ. Dɩ mɛ̃ ɩna jɩ dɩ sa do gɩgɩla ga, sɩ sobɔdara sɩ do. Dɩ ɩna ha sɛr asɩ õkuun, ɩnɩ n hana sɩ hʋɛ sa n ƴabɩ dɩɩra mɔ̃ sɩ n ƴaalnɩ.
35 Ɔbɔɔkɛ wɩ n tiirni dɩkɔ, awɩ mũsũ lokasɔ hale na mũsumo oti wɛr fɛw bɩɛlbɩɛlɩ lokara. Dɩ wɩ yɩ gɛr na awɩ thɩ dɩ maar fʋlɛ wɩ jɔɔ ka. 36 Dɩ awɩ thɩ Jakɔbɩ so war: «Nɩ n pɩ mɛr bɩsana! Jojɛfɩ na hale bã, Simeyɔ̃ dakha na hale bã; dɩ na n ƴaal nɩ gba Bɛ̃jamɛ̃ wo! Mɛrara gele fɛw n ji.» 37 Dɩ Ribɛ̃ so ɔɔ thɩra: «Ha mʋʋ sɩ ma kɛrnaanɛ na ɩna na ha fɩ; a ma ɩnaa a ha fa', kʋrɛ ɩ̃ bikona yeɲɔɔkɛ.» 38 Dɩ Jakɔbɩ birsee: «Yuurəka'! Ɩ̃ bikuun na birnǝ nǝ'; gɩdonɩ ɔɔ õkuun khire sɩ dɩ sɩ dɩbara. A thɩ̃ɛ dãa hʋɛra, na cʋʋrɛ dɩ mɛr kuun kɔ̃tɩ̃ɩ na gbunǝ ha kpore khĩdi dʋɔ.»