Faarɔ̃ɔ dǝǝlsɔ na mɔ̃ Jojɛfɩ tini kɩrʋ a haa \ref Jǝn 40; Dan 2 na 3.31 a dana 4.34; Waal 3.26
41
1 Yɛna yeɲɔ kanɩ pɩ, Faarɔ̃ dǝǝle, dɩɩ do mɩɩr gẽgerena a kɔɔ ha a jɩɩl. 2 Dɩ a na hɩɩnɛ a yɩ na nɩ khɔna ɓĩiɓĩi makoɲɔ dɩ wɩ ther ɲʋɔnna dɩ wa n khʋʋl mɩɩr nʋɔra. 3 Dɩ na nɩ kpɛrɛɛ wocoloo wocoloo makoɲɔ ther dakha a kpaan cacadararaale mɩɩr nʋɔra khʋʋl paar. 4 Dɩ na nɩ kpɛrɛɛ makoɲɔɔle gbaar na nɩ khɔna makoɲɔɔle a kho. Dɩɩ do dabɔɔle Faarɔ̃ jagɩrɛ. 5 Dɩ bir daar a dǝǝl, balaɲɔ dǝǝle wo. 6 Dɩ a yɩrɛ bile caar makoɲɔ, bile mũ bɩɛla dɩɩ be jɔjʋɔɔ. Agɩpɩ, bile caar makoɲɔɔkɛ jananɩ, kɛ jɩɛɛkɛ thɛnɩ kɩrɔ ʋnɩ dɩɩ khɩ, phure dɩ ga n kpaan. 7 Dɩ bile ca gɩrɛ jananɩ, gbaar gɩrɛ bɛnɩ jɔjʋɔɔ a dɩɩ. Dɩ Faarɔ̃ bir jagɩ. Gɛr dɔ ɔɔ dǝǝlsɔ.8 Dɩ mɔ̃ dɩɩ wɩlnɩ duuro Faarɔ̃ɔ kpɩɛr ɲaɲannɛ koo. Dɩ a thʋɔn a we dɔdɔɔdara na kpɛsɛdara Ejipiti dɩɩra fɛw, a gba ɔɔ dǝǝl a mɩɛ wɩ. Sɩ tibil bɩɛllakɛ na puno a mɩɛɛ kɩrʋa'. 9 Dɩ le Faarɔ̃ɔ ta sɛdaraa kɔ̃tɩ̃ gba thɩmɩɩr a so: «Mɩ jɩnanɛ bɔɔraakɛ mɩ dɩnɩ. Gɩrɛ kanɩ ma mɩɩ nɛr nĩ. 10 Faarɔ̃ kɔɔ gbana sɛr nĩkhii mɛrɛ na buru hɩdaraa kɔ̃tɩ̃ a pɛ sɩ khaɩra. 11 Dɩ mɛrɛ na ɔr dǝǝlle dɩtɩ̃ bɩɛllala. Dɩ asɩ dǝǝlsɔɔra bɩɛl, bɩɛl kɔɔ teenanɛ gɩ hana kɩrra dɩɩdɩɩ. 12 Dɩ Ebirǝ daɓolbir bɩɛl, kɛ dɔnɩ Potɩfaarɩ dee, kɔɔ har kha na sɛrɛ. Dɩ sɩ mɩɛɛ asɩ dǝǝlsɔ dɩ ti kɩrʋ a ha sɩ bɩɛlbɩɛl. 13 Dɩ thɩ̃ɛ dã otirǝ, mɔna a mɩɛ sɩnɩ. Dɩ Faarɔ̃ bire gba mɩ ɩ̃ thɔna oti, sɩ a ju ole.»
14 Dɩ Faarɔ̃ thɔ̃ wɩ jalla kpa Jojɛfɩ. Dɩ wɩ jaal na phananɛ a kpaa, a khabʋʋ yʋʋ, dɩ debi kẽkena sa jal Faarɔ̃ɔ pa. 15 Dɩ Faarɔ̃ so Jojɛfɩra: «Mɩ dǝǝlle dǝǝl bɩɛl, sɩ tibil na puno na mɩɛ mɩ kɩrʋa'; sɩ mɩ nɩɛrɛ dɩ a wɩ mɩɛ fɩ dǝǝle fɩ n punone dɩ fɩ ti kɩrʋ.» 16 Dɩ Jojɛfɩ birse Faarɔ̃: «Ga do mɛrɛɛ thɛthɛ ga. Thãgba na 'laanɛ kɩr bʋɔ a na ha fɩ.»
17 Dɩ le Faarɔ̃ so Jojɛfɩra: «Ɩ̃ dǝǝllǝ, mɩ kɔɔ jɩɩlɛ mɩɩr gẽgerena dɩ ma n hɩɩn. 18 Dɩ mɩ yɩrɛ na nɩ khɔna ɓĩiɓĩi makoɲɔ, kɛ bʋɔnɔnɩ ka dɩ wɩ the mɩɩrra dɩ wa n khʋʋl mɩɩr nʋɔra. 19 Agɩpɩ na nɩ kpɛrɛɛ wocolo wocoloo makoɲɔ ther dakha mɩɩrrara a kpa war mɩɩr nʋɔra. Ejipiti dʋɔ, ma yɩ na dɩ kpɛrɛ a thʋ̃ puuro thaa kpɩɩraka'. 20 Dɩ na nɩ kpɛrɛɛ wocolo wocoloole gbaar caca na nɩ khɔna ɓĩiɓĩi le a kho. 21 Wɩ kho werrakɛ sɩ dɩɩ ho wa kho thɩ̃a'. Mɛ̃ wɩ kpɛrɛ a ho mɔna wɩ kɔɔ hanɩ. Dɩ̃ɩ jagɩ. 22 Mɩ bire dǝǝl wo a yɩ: bile caar makoɲɔ bile mũ bɩɛlla, dɩɩ be jɔjʋɔɔ. 23 Agɩpɩ bile caar makoɲɔ, kɛ jananɩ, kɛ jɩɛɛkɛ thɛnɩ kɩrɔ ʋnɩ dɩɩ khɩ, phure dɩ ga n kpaan. 24 Dɩ bile caar makoɲɔɔkɛ jananɩ, gbaar bile caar makoɲɔɔkɛ bɛnɩ jɔjʋɔɔ a dɩgɩ. Dɩ mɩ mɩɛrɛ dɔdɔɔdara sɩ bɩɛllakɛ na puno a mɩɛ mɩ kɩrʋa'.» 25 Dɩ Jojɛfɩ so Faarɔ̃na: «Afɩ dǝǝlsɔɔkɛ fɩ dǝǝlnɩ, dǝǝl ca bɩɛl gɩ, ga ha dɩɩdɩa'. Thãgba n nɛna fɩ gɩrɛ a na cʋʋnɩ. 26 Na nɩ khɔna ɓĩiɓĩi makoɲɔɔle n nɩnanɛ yɛna makoɲɔ; dɩ bile caar makoɲɔɔle bɛnɩ jɔjʋɔɔ n nɩnanɛ dakha yɛna makoɲɔra. Dǝǝl bɩɛlla gɩ. 27 Dɩ na nɩ kpɛrɛɛ wocolo wocoloo makoɲɔɔle, na bile caar makoɲɔɔle jananɩ yɛna makoɲɔɔkɛ kɔmɛr na kʋnɩ gɩ n nɩna. 28 Dɩ mɔ̃ mɩ kɔɔ so farnɩ, Thãgba nɛna fɩ gɩrɛ a na cʋʋnɩ. 29 Nɩ jɛ dɩ yɛna makoɲɔɔkɛ na ɩnanɩ, thɩ̃ɛ na ƴɔr Ejipiti dɩɩra fɛw. 30 Sɩ agɩpɩ, yɛna makoɲɔ kpɩɩkɛ na birǝni a na kpaan, kɔmɛr na jire Ejipiti, a na puuro na ka. Dɩ wa diinǝne thɩ̃ ƴɔ yɛnaale. Kɔmɛra na kʋɛrɛ dɩɩ koo. 31 Dɩ wa jɩna thɩ̃ ƴɔ bɔɔle kpɩɩ bã, gɩdonɩ kɔmɛra na puurore na ka. 32 A fɩ yɩɛ dɩ dǝǝllela dɛbɩ balaɲɔ, jɛ dɩ thɩ̃ɛ gɩɩkɛ thɛnɩ Thãgbaa pa. Dɩ a na pʋɔr sɩ na cʋʋ gɩrɛra a nɩnana. 33 Nɛnɛ̃, dɔ fɩ ƴaal tibillikɛ jɩɛnɩ fɩlɛ, a kpɛsɛna bɔɔbɔɔ fɩ pɛr a na n hɩɩn Ejipiti dɩɩ fɛw. 34 Dɔ fɩ phiir thɔ̃dara fɩ pɛr Ejipiti dɩɩra fɛw, wa n ti bɩɛl yemɔɩra lɛ thɩ̃ɛsɔɔraakɛ dɩdara na gbanɩ, yɛna makoɲɔraakɛ dɔnɩ thɩ̃ ƴɔ yɛna. 35 Wɩ khɩɩ dɩkɔ wɩ thɩɩn pa bɩɛl thɩ̃ ƴɔ yɩɛrsɔraakɛ na ɩnanɩ. Dɩ dɩɩsɔɔra, dɔ wɩ khɩɩ bile na gɩrɛ fɛʋʋkɛ dɔnɩ dɩkɔ wɩ thɩɩn wa n hɩɩn. 36 Dɩkɔɔle n do dɩɩ yʋ bɛrda yɛna makoɲɔ kɔmɛrraale na jenɩ Ejipiti, gɩ do nɔɔ tɩbɩla na n khiir kɔmɛra'.
Faarɔ̃ pɛrrɛ Jojɛfɩ dɩ do kɔ̃tɩn Ejipiti dɩɩra. \ref Khɩ 105.17-22; Th t t 7.9-10; Jǝn 45.4-8; Fili 2.9-11
37 Dɩ thɩmɩɩrɩle da Faarɔ̃na na ɔɔ thɔ̃daarsɔra fɛw. 38 Dɩ so war: «Thãgbaa Thu kuunɩkɛ hana! Kana sa bir na yɩ tibil da honaa 'lo?» 39 Dɩ a sor Jojɛfɩra: «Thɩ̃ ca gɩrɛ Thãgba nɩ farnɩ dɩ fɩ jɩ gɩ, yʋ bɔ tibil na hale a bir hana kpɛsɛrɛ a ho fɩ bã. 40 Fɛrra na dʋɔn yʋʋ ɩ̃ dʋɔ, afɩ nɔ ka ɩ̃ too na n hɩɩn fɛw. Jamana too paarɩkɛ 'lẽ'lẽ'lẽ ma jɔna fɩ dɩbara.» 41 Dɩ bir so Jojɛfɩra: «Fa yɩ gaa, mɩ ha fɛr fãga Ejipiti dɩɩra koo.» 42 Dɩ Faarɔ̃ for ɔɔ jamana ɲɔ̃bi to, ɲɔ̃birera a to Jojɛfɩ, a tonaa jamana kẽkɩɩn, na dɛ lẽbuu fʋɔrɔ. 43 Dɩ a cʋʋrɛ Jojɛfɩ dɩ jʋʋn hotorookɛ dɔnɩ jamanaa khukhuu hotoro, kɛ n kpaanɛnɩ ɔɔ khiro; dɩ wɩrɛ kʋlɛnɩ ƴɩɛ na n hulẽ: «Na n gulẽganɛ!» Thale Faarɔ̃ haa fãga Ejipiti dɩɩra koo. 44 Dɩ Faarɔ̃ bir so Jojɛfɩra: «Mɛrɛ, mɛr dʋɔn Faarɔ̃; mɛr sɔ, a ga do fɛr 'laanɛ hʋɛ thɩ̃doora ga, tibil na hale Ejipiti dɩɩra a na ka nɔa'.» 45 Dɩ a dʋrɛ Jojɛfɩ ire Safɩna-Panea. A haarɛ dakha khɛrɩkɛ wɩ n wenɩ Asɩnatɩ, kɛ dɔnɩ Potiferaakɛ dɔnɩ Ɔn dɩ gbõdaarɩ bikhɛr, dɩ he. Le Jojɛfɩ the a fi Ejipiti dɩɩra fɛw a jʋʋr a hɩɩn. 46 Yɛna kpelẽ yʋɔr (30) Jojɛfɩ kɔɔ hana, ɔbɔɔkɛ wɩ jalnaanɩ Faarɔ̃ Ejipiti jamanaa ƴɛra. Dɩ a ther Faarɔ̃ɔ pa, a kpaar Ejipiti dɩɩ fɛw a hɩɩn. 47 Dɩ diko ƴɔ yɛna makoɲɔ bɔɔle, dɩɩ kɔɔ hire na dɩkɔ phi. 48 Dɩ ga yɛna makoɲɔraale, Jojɛfɩ cʋʋrɛ dɩ wɩ bɩlã dɩkɔ Ejipiti dɩɩra ɓibi a thɩɩn. Jojɛfɩ n kpaarɛ dɩ kpulõbiisɔra fɛw dɩ cʋʋ dɩ wɩ khɩɩ dɩkɔɔkɛ hanɩ le a thena dɩɩra a na bɩlã. 49 Dɩ a cʋʋrɛ dɩ wɩ bɩlã dɩkɔ dɩɩ ho gbalãkothɩn laɲɔ̃ nʋɔra. Dɩkɔ thʋnɛ vǝ̃vĩǝ, ga ha therrera dɩ wa mar a na therra'. 50 Kɔmɛr yɛna na fʋnɩ pa', Jojɛfɩɩ khɛr Asɩnatɩ kʋɔn kuuminǝ yeɲɔ. Potifera gbõdaarɩkɛ thɛnɩ Ɔn dɩɩra, ɔɔ bikhɛr gɩ. 51 Dɩ Jojɛfɩ har cacadaar ire Manase, gɩdonɩ a sor: «Thãgba cʋʋ mɛr dɩ̃ diinǝ ɩ̃ vɔɔ, na ɩ̃ lee kha na ɩ̃ thɩɩ cɔ fɛw.
52 A ha balaɲɔdaar ire Efɩrayɩm, gɩdonɩ a sor: «Thãgba ha mɛr bɩsana ɩ̃ bɔgaar dʋɔ.»
53 Dɩ yɛna makoɲɔɔlera dɩkɔ ƴɔnɩ Ejipiti dɩɩra daan khu paar mɛ̃. 54 Sɩ kɔmɛr yɛna makoɲɔɔkɛ Jojɛfɩ kɔɔ mãanɩ sor, fʋrɛ dɩ ga n nʋɔsɩ. Kɔmɛr kɔɔ ɩnɛ a ji dɩɩrasɔ fɛw, sɩ Ejipiti dɩɩra wer, dɩkɔ hale paar fɛw. 55 Ɔbɔɔkɛ kɔmɛr thʋnɩ Ejipiti dɩɩ koo, Ejipitidara jaal Faarɔ̃na dɩ wa n ƴaal dɩkɔ. Dɩ so war: «Nɩ jalla Jojɛfɩra a cʋɛ gɩrɛ fɛʋʋkɛ a na so narnɩ. 56 Dɩ kɔmɛr malalɛ dɩɩ paar fɛw. Dɩ Jojɛfɩ khɛr dɩkɔɔkɛ a kɔɔ bɩlanɩ thɩ̃ɩsɔ da n dolõ Ejipitidarara. Kɔmɛr jɩɛ khar Ejipiti dɩɩra dɩ ga n pɛr. 57 Dɩ dɩɩ wo dɩɩ fɛw, tɩbɩla n pɔr Ejipiti Jojɛfɩɩ pa diko thɩɩ; gɩdonɩ dɩɩsɔra fɛw, kɔmɛr thʋnɛ khar ga pɛ ƴɩa'.