Faarɔ̃ɔ thɔ̃dara yenyɔɔ dǝǝl \ref Jǝn 39.20-23; 41.1-32; Sok 7.13-14
40
1 Mɔ̃ ga pʋɔrnɩ gbe, Faarɔ̃ɔ ta sɛdaraa kɔ̃tɩ̃ na buru hɩdaraa kɔ̃tɩ̃ cʋʋrɛ awɩ kɔ̃tɩ̃ Ejipiti jamana dɩkhaa puu. 2 Dɩ nĩkhii fʋrɛ Faarɔ̃ ɔɔ cɔ hɩ̃ɩdara yeɲɔraale. 3 Dɩ pɛr, dɩ wɩ fʋlɛ wɩ a khãa khaɩra, kãakɛ wɩ khaanɩ Jojɛfɩ. 4 Dɩ khaɩ cɔ kɔ̃tɩn pɛr Jojɛfɩ a na n hɩnɛ wɩ. Dɩ wɩ gbaar bɔɔ gbe le khaɩra.5 Dɩ dɩtɩ̃ bɩɛlala, Ejipiti jamanaa ta sɛdaraa kɔ̃tɩ̃, na buru hɩdaraa kɔ̃tɩ̃ɩkɛ wɩ khaanɩ khaɩra, dǝǝlle wɛr yeɲɔ fɛw, dɩɩ hana kɩrra dɩɩdɩɩ. 6 Dɩ Jojɛfɩ pɔr duuro ɩnɩ n hɩɩn wɩ, a yɩ wɩ dɩ wɩ gbobi jɔɔ ka. 7 Dɩ Jojɛfɩ bule wɩ: «Aɲe gɩ dɩ nɩ kʋɛ ƴɩɛ nĩ thaa?» 8 Dɩ wɩ birsee: «Dǝǝle sɩ dǝǝl, sɩ tibil na hakɛ a na mɩɛ sɩ kɩrʋa', gɛr gɩ.» Dɩ Jojɛfɩ so war: «Ga do Thãgbara dǝǝl kɩr tir n tha'? Nɩ mɩɛnɛ mɩ anɩ dǝǝllǝ.»
9 Dɩ ta sɛdaraa kɔ̃tɩ̃ mɩɛ Jojɛfɩ ɔɔ dǝǝl, a sʋʋraa: «Ɩ̃ dǝǝllǝ, dɩvɛ̃ thɩr kɩrraa mɩ yɩ ɩ̃ ƴɛra. 10 Dɩ dɩvɛ̃ thɩr kɩrraale kɔɔ hananɛ jɛ̃ɛ yẽther. Ɔbɔɔkɛ a thɔɔnɩ a pher; a se dɩvɛ̃ jaarrɛsɔ, dɩ be bɩ̃. 11 Dɩ Faarɔ̃ɔ ɲɔ̃kpõ ha ɩ̃ ɲɔ̃kɔɔ. Dɩ̃ɩ khʋ̃ dɩvɛ̃ bera a khɩmɩ pɛ ɔɔ ɲɔ̃kponana, a gba thɛbʋʋ ɲɔ̃kɔɔ.» 12 Dɩ Jojɛfɩ sʋʋraa: «Yɛkɛ kɩrʋ: Jɛ̃ɛ yẽtherɩle, wire yẽther gɩ. 13 Kɩɛr na wire yẽther, Faarɔ̃ na ɩɩr fɛr a na bir na pɛ fɩ afɩ thɔna. Fa bire fa n ha Faarɔ̃ taan wo mɔ̃kɛra fɩ n kɔɔ cʋʋnɩ bɔɔraakɛ fɩ kɔɔ donɩ ta sɛdaraa kɔ̃tɩ̃. 14 Sɩ jɛna mɩ ɔbɔɔkɛ thɩ̃ɛ na bɔ farnɩ. Mɩ n bɩɛl fɛr, mɩa na ha bulole a pɛ mɩ. Jaga Faarɔ̃na a jɩna mɩ. Cʋɛ mɩ ɩ̃ the khaɩraakɛ, 15 gɩdonɩ fãga wɩ kɔɔ fʋna mɩ Ebirǝ dɩɩra a ɩna kɩɛr. Dɩ kɩɛr wo, ma cʋʋ thɩ̃ bɩɛllakɛ dɩɩ teena wɩ pɛ mɩ khaɩra ga.»
16 Mɔ̃ buru hɩdaraa kɔ̃tɩ̃ yɩɛnɩ dɩɩ do dǝǝl kɩrʋ daarrɛ, a sor Jojɛfɩra: «Me wer, mɩ dǝǝlle dakha a heen buru bulona na kpɛ̃kpɛrɛ̃ minǝ yẽther ɩ̃ yʋɔ. 17 Dɩ Faarɔ̃ɔ diko caar fɛʋʋkɛ teananɩ hale kpɛ̃kpɛrɛ̃ bi ʋrɛraakɛ hanɩ ƴũu. Sɩ 'lominǝ na n kho gɩ le ɩ̃ yʋra ƴũu.» 18 Dɩ Jojɛfɩ birsee: «Yɛkɛ kɩrʋ: kpɛ̃kpɛrɛ̃ minǝ yẽtherɩle, wire yẽther gɩ. 19 Kɩɛr na wire yẽther, Faarɔ̃ na kpɩr fɛr yʋʋ. A na pɛrɛ dɩ wa ju fɩ thɩrʋra dɩ 'lominǝ na kho afɩ nʋ̃.»
20 Dɩ balãther wirerara ger, Faarɔ̃ cʋʋrɛ ɔɔ kɔ̃ wi jɩna ɓol, a gbɛbɩrɩ diko kɔ̃tɩ̃ɩ a wena ɔɔ thɔ̃dara fɛw. Dɩ a kpa ta sɛdaraa kɔ̃tɩ̃, na buru hɩdaraa kɔ̃tɩ̃ thena ɔɔ thɔ̃daraa thɩ̃thɩɩn. 21 Dɩ a bire pɛ ta sɛdaraa kɔ̃tɩ̃ ɔɔ thɔna dɩ bir da n haa taan, 22 sa pɛr dɩ wɩ ju buru hɩdaraa kɔ̃tɩ̃ thɩrʋra mɔ̃kɛra Jojɛfɩ kɔɔ mɩɛ wɩnɩ kɩrʋ. 23 Sɩ ta sɛdaraa kɔ̃tɩ̃ na jɩna Jojɛfa'. A diinǝǝne.