Jojɛfɩɩ dee thɔ̃ Potɩfaarɩ cɔ. \ref Eki 7.26; Sokp 6.20; Jɔb 31.1-2; Ja 1.12
39
1 Dɩ Madɩ̃adaraale jalnanɛ Jojɛfɩ a dolõ kuun bɩɛlaakɛ wɩ n wenɩ Potɩfaar. Ejipitidaar bɩɛl gɩ, kɛ dɔnɩ Faarɔ̃ɔ gardɩsɔɔ kɔ̃tɩ̃, a do ɔɔ thɔ̃ hɩ̃daar. Ɔr thɛ Jojɛfɩ Ɩsɩmayɛldararaakɛ kɔɔ pɔnaanɩ. 2 Thãgba Kɔ̃tɩn kɔɔ har kha na Jojɛfɩ dɩ ɔɔ thɩ̃ fɛʋʋkɛ a n cʋʋnɩ na n bɔr. Ɔɔ kɔ̃tɩ̃ Ejipitidaarɩ cɔ a kɔɔ ha. 3 Ɔɔ kɔ̃tɩ̃ yɩɛrɛ dɩɩ do Thãgba Kɔ̃tɩn har kha na ɔr dɩ thɩ̃ɛ fɛʋʋkɛ a n cʋʋnɩ na n bɔr. 4 Dɩ Jojɛfɩɩda da ɔɔ kɔ̃tɩnnaakɛ a n doronɩ thɔma na sobɔr, dɩ pɩɛraa dɩ do ɔɔ cɔ hɩ̃ɩdaar, a gbana ɔɔ thɩ̃ fɛʋʋkɛ a hɩnɩ a faaraa da n hɩɩn. 5 Bɔɔkɛ Potɩfaar pɛrnɩ Jojɛfɩ dɩ do ɔɔ cɔ hɩ̃ɩdaar, na thɩ̃ɛ fɛʋʋkɛ a hɩnɩ na pɩ, Kɔ̃tɩn bɔnanɛ Ejipiti kuunilee cɔ dɩɩ do Jojɛfɩ dɔ nɔɔ. Thãgba Kɔ̃tɩnɩ bɔna dɛɛnɛ gɩrɛ fɛʋraakɛ a hɩnɩ, cɔ thɩ̃ɛ a gbana lɛ thɩ̃ɛ ɓibi. 6 Potɩfaar faarɛ thɩ̃ɛɛkɛ a hɩnɩ ɓibirakɛ Jojɛfɩra da n hɩɩn. Aa n therna dɩkha saagado ɔɔ dikookɛ a n khona' ga. Jojɛfɩ kɔɔ khʋɔn a bɔr ka.7 Mɔ̃ ga pʋɔrnɩ gbe, ɔɔ kɔ̃tɩ̃ɩ khɛr hɩɩnʋʋnɛ waa sa sʋʋraa: «Phɩna na mɩ» 8 Dɩ Jojɛfɩ bo sa so ɔɔ kɔ̃tɩ̃ɩ khɛrra: «Fɩ jɩrɛ mɩ hanɩ kɛ, ɩ̃ kɔ̃tɩ̃ na n therna dɩkharakɛ cʋɔrɔa'. Mɛrɛ a pɛr thɩ̃ɛ fɛʋʋkɛ a hɩnɩ ma n hɩnɛ. 9 Tibil na hakɛ cʋɔrɔɔkɛ a kɔ̃tɩ̃ jɔ ma'. Aa pɩɛr mɩ dɩkhara kpɩɩrakɛ saagado fɛrara gɩ dɩbara gaa ga, gɩdonɩ ɔɔ khɛr ha fɩ. Mɔ̃ ma bir na jɩɩl sɩ na cʋʋ puu kʋkʋʋ thale, ɩ̃ cʋʋ sopuu Thãgbara?» 10 Wire wo wire, ga thɩmɩɩra a n mɩɩ Jojɛfɩra sɩ a n pɛ ɔɔda nũu gɩ ho wa har kha dɩkharakɛ a na ba phɩ̃ kha ga. 11 Wi bɩɛl Jojɛfɩ lʋʋn cʋɔrɔ a do ɔɔ thɔ̃. Tibil bɩɛlakɛ na kɔɔ hale cʋɔrɔa'. 12 Dɩ khɛrɩle fʋ Jojɛfɩ kẽkɩɩn sa so: «Phɩna na mɩ». Dɩ Jojɛfɩ for kẽkɩɩn pɩɛraa ɲɔ̃kɔɔ sa ca the phiilo. 13 Ɔbɔɔkɛ khɛrɩle yɩɛnɩ dɩ for kẽkɩɩn pɩɛraa ɲɔ̃kɔɔ sa ca the phiilo, 14 a wer ɔɔ cɔdara a mɩɩ wɩ ayɩ: «Nɩ yɛ kɛ Ebirǝǝkɛ ɩ̃ ko ɩnanɩ pɛ sar da n hǝrǝ sɩ. A lõ marɛ ɩnɩ n phɩ̃ na mɩ, dɩ̃ be hulẽbire dɩɩ khɩɩr ka.» 15 Dɩ mɔ̃ a yɩɛnɩ dɩ ma n hulẽ nɔkhɩɩr mɛ̃, a faa marɛ kẽkɩɩn, sa ca the phiilo. 16 Dɩ a gbaar Jojɛfɩɩ kẽkena a thɩɩn ɔɔ pa da n pɩɛrna phaphapha dɩ ɔɔ ko kɛr a pɔ cʋɔrɔ. 17 Le a mɩgʋʋ thalera ayɩ: «Ebirǝ dee kuunɩkɛ fɩ ɩnanɩ faa sar, a ɩnɛ ɩnɩ n phɩna mɩ na fãga. 18 Dɩ mɔ̃ mɩ benɩ hulẽbire dɩɩ khɩɩr ka, dɩ faa mar kẽkɩɩn sa ca the phiilo. 19 Thale afɩ dee konna cʋʋ mɩ. Ɔbɔɔkɛ a nɩɛnɩ ɔɔ khɛrɩ thɩmɩɩsɔ pɩ, 20 nĩkhii hor ga lɩɛrʋʋrɛ. Dɩ pɛr dɩ wɩ fʋ Jojɛfɩ a to khaɩra, kãakɛ wɩ n khaanɩ jamanaa khaɩdara. Liir Jojɛfɩ too khaɩra.
Jojɛfɩ khaɩra \ref Khɩ 105.18-19; 1 Pɩ 2.19-20; Jǝn 39.20-23, 41.1-32; Sok 7.13-14
21 Thãgba Kɔ̃tɩn kɔɔ har kha na Jojɛfɩ da n cʋgʋʋ bɔɔ. A cʋgʋʋrɛ dɩ da khaɩ cɔ kɔ̃tɩn haar wo. 22 Dɩ khaɩ cɔ kɔ̃tɩn pɩɛraarɛ a na n hɩnɛ khaɩdara fɛʋʋkɛ hanɩ khaɩra. Jojɛfɩ n thɔɔ thɩ̃ɛ fɛʋʋkɛ teananɩ gɩ cʋɛ. 23 A khaɩ cɔ kɔ̃tɩn 'li pɛr Jojɛfɩra thɩ̃ɛ da hɩɩn, aa n dɛna gɩ bã, gɩdonɩ Thãgba Kɔ̃tɩn kɔɔ haan kha na Jojɛfɩ, dɩ cʋʋ gɩrɛ fɛʋʋkɛ a n cʋʋnɩ dɩ ga n bɔr.