Juda na Tamaar \ref 1 Kur 2.3-15; Dǝt 25.5-10; Ru 4
38
1 Ga bɔɔlera, Juda lee ɔɔ õkũusɔra a jal too kuun bɩɛlɩkɛ wɩ n wenɩ Hɩra, ɔɔ pa. Adulamɩdaar gɩ. 2 Le Juda yɩ khebir bɩɛl, Kanãadaar bɩɛlɩkɛ wɩ n wenɩ Sua, ɔɔ bikhɛr gɩ; dɩ gbaa dɩ do khɛr da n cɔnaa. 3 Dɩ khɛrra hananɛ pɛmɛr a kɔ̃ kũubir dɩ Juda haa ire Ɛɛr. 4 Dɩ a bire hana pɛmɛr wo, a kɔ̃ kũubir a haa ire Ɔnã. 5 Dɩ a bire hana gɩ wo a kɔ̃ kũubir a haa ire Sela. Kejibi dɩɩra Juda kɔɔ ha sɩ dɩ kɔ̃ ɔɔ biile. 6 Dɩ Juda gbaar khɛr bɩɛlɩkɛ wɩ n wenɩ Tamaar a ha Ɛɛrɩkɛ dɔnɩ ɔɔ caca bi. 7 Sɩ Ɛɛr, Judaa caca bi kɔɔ puurore na sobɔr dɩ Thãgba Kɔ̃tɩn cʋgʋʋ dɩ khi. 8 Le Juda so Ɔnana: «Gba afɩ õkuuni khikhɛr a kɔna mǝlle a hana afɩ õkuun khĩdii.» 9 Mɔ̃ Ɔnã jɩnɩ dɩ mǝlleele na do ɔɔda ga, ɔbɔɔkɛ wɩ phɩnɩ kha na khɛr dɩ sel bɔɔ na dã, dɩ sel dɩ faa thɩɩra gɩ do nɔɔ a na n kɔ̃ mǝlle a ha ɔɔ õkuuna'. 10 Dɩ cʋʋ pa caarɩle kpalɛ Thãgba Kɔ̃tɩnna ka, dɩ cʋgʋʋ dakha dɩ khi. 11 Dɩ le Juda so ɔɔ bikuunni khɛr Tamaarra: «Kɔna tɔɔ afɩ thɩɩ cɔ a na pɩɛrɛ phaphapha ɩ̃ bikuun Sela n khɔ̃.» Sɩɩ do maar fʋɔnɛɛ mɔ̃ Sela na khini dakha ɔɔ õkũusɔɔ kha. Dɩ Tamaar kɔ̃ ɔɔ thɩɩ cɔ a too.12 Gɩ pʋɔrɛ jɔɔ sɩ Suaa bikhɛr, kɛ dɔnɩ Judaa khɛr khi. Ɔbɔɔkɛ Judaa ha ƴɔlnɩ, a jaal Tɩmɩna na Hɩra ɔɔ kuunikɛ dʋɔnɩ Adulamɩdaar, a hɩɩn wɩrɛ n khabanɩ ɔɔ bana sũu. 13 Dɩ wɩ jal so Tamaarra aa, ɔɔ koo thɩ hale da n jal Tɩmɩna a khabɩ bana suune. 14 Le Tamaar for ɔɔ khikhɛr kẽkẽsɔ, sa gba kẽkẽ hǝlǝ a kɛɛ, a parna tomɩr a toona Enayɩm dɩ lõfonʋɔra, kɛ hanɩ Tɩmɩna hʋɛra gɩdonɩ a yɩɛrɛ dɩɩ do Sela khʋ̃ɔ pɩ sɩ, wa tu Sela n hɩa'.
15 Dɩ Juda yɩɩ a ka jɩna thetoo gɩ, gɩdonɩ a kɛɛrɛ ƴɩɛ. 16 Dɩ Juda lɛ̃ pʋɔraa a sʋʋraa: «Dɔ sɩ phɩ̃ kha.» Aa kɔɔ jɩ ɔɔ bikuunni khɛr ga. Dɩ bulee: «Aɲe fa ha mɩ sɩ sa phɩ̃ kha?» 17 Dɩ Juda sʋʋraa: «Ma fʋrɛ bʋ ɓol bɩɛl na thɔna na ha fɩ.» Dɩ birsee: «Sɩ dɔ fɩ kɔɔ ha mɩ barãdaa ɓo, ma n pɩɛrna bɔɔkɛ fa thɔnanɩ.» 18 Dɩ Juda bulee: «Aɲee barãda ca fɩ n ƴaal ɩ̃ ha fɩ?» Dɩ sʋʋraa: «Ha mɩ afɩ jẽ kpɛ̃bu na ɔɔ pɔ̃ na gbolbirikɛ fɩ fʋrɔnɩ ɲɔ̃kɔɔ.» Dɩ Juda haa, sɩ dɩ wɩ phɩ̃ kha, dɩ gba bɩnɛ. 19 Dɩ Tamaar ɩɩr a kɛr bir kɔ̃ a for ɔɔ kẽkẽ gborõbi hǝlǝ, sa bir to ɔɔ khikhɛr kẽkẽsɔ.
20 Dɩ Juda thɔna ɔɔ kuun Adulamɩdaar bʋ ɓolʋ, a hana khɛr, sa tearaa ɩnɩɩ barã thɩ̃. Sɩ ɔɔ kuun na yɩa'. 21 Dɩ kuunnile bule dɩdara ayɩ: «Kana thetoo khɛrɩkɛ n tɔɔnɩ kɩɛr Enayɩm hʋɛra ha?» Dɩ wɩ birsee: «The too na kɔɔ ha kɩɛr kpɩɩraka'.» 22 Dɩ kɛr bir a so Judara: «Ma 'liǝ'. Dɩ leledara sorakɛ aa, thetoo na kɔɔ ha liir kpɩɩraka'.» 23 Dɩ Juda so: «A tɔɔna gɩrɛ a hananɩle. Sa n ka yicuruǝ'. Mɩ 'lire thɔnanɛ ɔɔ bʋ ɓol sɩ fa 'liǝ'.»
24 A sɩpora yẽthersɔ ka na pɩ, wɩ jaal mɩɛ Juda ayɩ: «Afɩ bikuuni khɛr Tamaar cʋʋrɛ khaarkhaar, dɩ yɩɛ le na pɛmɛr ɔɔ khaarkhaar cʋʋrara.» Dɩ Juda so: «Nɩ kpaa thɛna, a pɩɛraa dɔɔ a hɩ̃.» 25 Mɔ̃ wɩ kpaanɩ wa n thena khuirǝ, a thʋ̃ɔ so ɔɔ koo thɩra: «Ʋrɛɛkɛ hɩnanɩ thɩ̃beekɛ, ɔr hɩna pɛmɛr. Mɩ n bɩɛl fɛr, jɛ ntɛ hɩnanɩ jẽ kpɛ̃buukɛ na ɔɔ pɔ̃ na gbolbirikɛ.» 26 Dɩ Juda jɩ thɩ̃be a so: «Ɔr ka telẽ a jɔ mɩ, gɩdonɩ mɩ kɔɔ teenanɛ ɩ̃ hanaa ɩ̃ bikuun Sela, sɩ ma haa ga.» Dɩ aa bir phɩnaa bã.
27 Ɔbɔɔkɛ a danɩ bi kʋ̃ɔ, wɩ yɩɛrɛ dɩɩ do biƴɔna gɩ. 28 Mɔ̃ a n walnɩ, bɩɛl thenanɛ ɲɔ̃ɔ; dɩ bitɛ khɛr fʋ a gburo kẽkẽ wi sɩɛ sa so: «Ʋrɛ n kɔɔ thɛ caca.» 29 Sɩ a bire hal ɲɔ̃ɔ a lona, sɩ ɔɔ õkuun the. Le bitɛ khɛr so: «Kaar fɩ khɛr koe!» Dɩ Juda haa ire Perɛsɩ, kɩrʋ dʋɔn kaar khɛrra. 30 Agɩpɩ ɔɔ õkuunikɛ kɔɔ hananɩ kẽkẽ wi sɩɛ ɲɔɔna the, dɩ wɩ haa ire Jera.