JAKƆBƖ NA ƆƆ CƆDARAA THƖMƖƖ \ref 1 Sam 18.6-9; Jǝn 4.3-20; Sokp 18.19; Th t t 7.9; Jǝn 45.4-8; Jã 7.5
Jojɛfɩɩ dǝǝlsɔ na ɔɔ õkũusɔɔ laar
37
1 Jakɔbɩ toore Kanãa dɩɩra, kãkɛ ɔɔ thɩ kɔɔ toonɩ kpaarna. 2 Yɛkɛ mɔ̃ Jakɔbɩɩ mǝlsɔɔda hanɩ: Jojɛfɩ hananɩ yɛna yʋɔr makoɲɔ, a n kɔɔ kher nʋ̃ yɩrasɔ na ɔɔ õkũusɔ. Mɔ̃ a donɩ bɩsã buu, ɔɔ thɩɩ khɛr Bɩɩla na Jɩlpaa bikũusɔ a n hana kha. Dɩ a n gbaar awɩ thɩmɩɩ puusɔ da n mɩɛ awɩ thɩ. 3 Ɩjɩrayɛl nar Jojɛfɩ a jɔ ɔɔ bikũusɔ fɛw, gɩdonɩ ɔɔ tɩ̃ bɔɔ a 'lɩɛ. A kɔɔ haarɛ gbɔɔlɔ̃ yɩɩrʋ kpɩrakpɩra. 4 Dɩ Jojɛfɩɩ õkũusɔ yɩrɛ mɔ̃kɛ awɩ thɩ naanɩ a jɔ wɛr fɛw, dɩ wɩ gbanaa laarɛ. Wa n puno wɩ mɩɩnaa na naw bã.5 Dɩ Jojɛfɩ dǝǝlle, a gba mɩɛ ɔɔ õkũusɔ, dɩ wa n jɩɩ laarʋ dɩɩ ka. 6 A so warɛ: «Nɩ pɛ nũu dǝǝle mɩ dǝǝlni kɛ ɓoɓo. 7 Sɩ kɔɔ har lɔɔ a khabɩ bile dɩ sa n li, dɩ ɩ̃da ɩɩr jɩɩl gel, dɩ anɩ bile lisɔ jɛ diirǝǝ, a gburõkhu ɔɔ ƴɛra.» 8 Dɩ ɔɔ õkũusɔ bulee: «Fɩ n kpɩɛrɛ fɛr na dɔ sar jamana saagado fɩ n kɔɔ ƴaalɛ fɩ dɔ sar kɔ̃tɩnnaa ya?» Dɩ wɩ n jɩɛ laarʋʋ dɩɩ do ɔɔ dǝǝlsɔ na ɔɔ thɩmɩɩsɔ dɔ kɩrʋ.
9 Dɩ a bire dǝǝl, dǝǝl kpɩɩ wo, a mɩɛ ɔɔ õkũusɔ. A so warɛ: «Mɩ bire dǝǝl wo dɩ wire na sɩpor na ƴepǝlǝ̃be yʋɔr bɩɛl na n gburõkhu ɩ̃ ƴɛbʋrɔ.» 10 A mɩɛrɛ ɔɔ thɩ dakha dǝǝllela. Dɩ ɔɔ thɩ phaanʋʋ sa sʋʋraa: «Aɲee dǝǝl ca ha ole fɩ dǝǝlnɩ? Fɩ n kpɩɛrɛ mɛrɛ na afɩ nɩ, na afɩ õkũusɔ na n gburõkhure thɩɩra dikhõo afɩ ƴɛra ya?» 11 Dɩ ɔɔ õkũusɔ gbanaa gbugi, sɩ ɔɔ thɩ wer fʋrɔrɛ gelela ɔɔ hara da n jɩna gɩ.
12 Jojɛfɩɩ õkũusɔ kɔɔ jaal Sɩsɛm dɩ wa n khe awɩ thɩɩ nʋ̃ yɩra. 13 Dɩ wi bɩɛl Jakɔbɩɩkɛ dɔnɩ Ɩjɩrayɛl sor Jojɛfɩra: «Afɩ õkũusɔ har nʋ̃ khe paar Sɩsɛm. Ɩ̃ thɔ̃ fɩ fɩ jal fɩ yɩ wɩ.» Dɩ Jojɛfɩ tu: Ɔhɔ̃ɔ! 14 Dɩ Ɩjɩrayɛl sʋʋraa: «Jalla hɩnɛ afɩ õkũusɔ, na nʋma, ado wɩ khɩɩrɛ, fɩ ɩ̃ fɩ so mar. Thale a thɔ̃ Jojɛfɩ Ebʋrɔ̃ ɓɛlɛnɔ dɩ jal Sɩsɛm.
15 Dɩ kuun bɩɛl yɩɩ dɩ bu da n kpaar hʋɔnɔ. Dɩ kuunile bulee: «Aɲe fɩ n ƴaal?» 16 Dɩ birsee: «Ɩ̃ õkũusɔ mɩ n ƴaal. Mɩ n bɩɛl fɛr ado fɩ jɩrɛ ka wɩ n khenɩ awɩ nʋ̃sɔ, sɔ mar. 17 Dɩ kuunile sʋʋraa: «Wɩ ther kɩɛr, gɩdonɩ mɩ kɔɔ nɩɛrɛ dɩ wa n mɩɩ aa, ɩnɩ n jalla Dotã. Dɩ Jojɛfɩ gba awɩ nɛ ka a kpaan 'li wɩ Dotã.
18 Mɔ̃ Jojɛfɩ hanɩ ƴɔɔ aa dã wɩ pa', ɔɔ õkũusɔ 'laarɛ yɩɩ, a gʋʋr kha ɩnɩ n kʋɔ. 19 Dɩ wɩ mɩɩrɛ kha awɩ ha ayɩ: «Dǝdǝǝl kpɩɛra ha ole n ɩnanɩ. 20 Thɩmɩɩr na hale bã, sɩ kʋɔ a dɔna ɲɔ tɛ kor ʋkhara; sa sɔ nʋ̃ puu cɛcɛbɛnɛɛ; sɩ sɩ hɩɩn mɔ̃ ɔɔ dǝǝlsɔɔra na ɩnɩ na ha.» 21 Ribɛ̃ nɩɛrɛ mɔna wɩ gʋʋrnɩ da n ƴaal a taa Jojɛfɩ awɩ ɲɛna. Gɛr gɩ dɩ so, ɩna n kʋa'. 22 Sa bir so war: «Na n kʋa'. Nɩ dɔnaa ɔɔ bir kpololookɛ hanɩkɛ bǝǝnnǝ sɩ na n thaaraa ɲɔ̃a'.» A ƴaalɛ a tagʋʋ awɩ ɲɛna, a cʋgʋʋ a kɛr a bir ɔɔ thɩra gɛr gɩ.
23 Ɔbɔɔkɛ Jojɛfɩ dã wɩnɩ, wɩ fʋrɛ ɔɔ gbɔɔlɔ̃ yɩr kpɩrakpɩraakɛ a tonɩ a for, 24 sa gbaa a dʋna bir kpololo. Bir kpoloole, dakhɩɩ kɔɔ gɩ phɩphɩphɩ ɲʋɔn na hara'.
25 Agɩpɩ wɩ toore wɩ kho dikor, sɩ na hɩɩn a yɩ Ɩsɩmayɛldara dɩ wɩ cʋr a the Galadɩ dɩɩra na awɩ ɲɔɔmɛ̃sɔ. Dɩ awɩ ɲɔɔmɛ̃sɔ gba thɩ̃ caar dɩɩdɩɩkɛ n hʋnanɩ daw, kɛ wɩ n cʋʋnanɩ thɩɩsɔ dɩ wa n jalna Ejipiti: bi kakɔ na gɩrɛ wɩ n cʋʋnanɩ thɩɩsɔ na niin. 26 Le Juda so ɔɔ õkũusɔra: «Aɲe kho ca sa 'lɛ a sɩ kʋ asɩ õkuun a ker? 27 Nɩ dɔ sɩ dolõo Ɩsɩmayɛldarara, sɩ sa n thaaraa ɲɔ̃a', gɩdonɩ asɩ õkuun gɩ, tɔmɩn bɩɛlla sɩ do. Dɩ ɔɔ õkũusɔ tu ɔɔda. 28 Dɩ mɔ̃ Madɩ̃a ƴaƴaba n kanɩ, Jojɛfɩɩ õkũusɔ hallʋʋlɛ bir kpololoole a thena, a dolõ Ɩsɩmayɛldarara dɛ bulo be kpelẽ dɩ wɩ jalnaa Ejipiti.
29 Dɩ Ribɛ̃ kɛrɛ bir le bir kpololo, dɩɩ do Jojɛfɩ na hale bã. Dɩ ɓǝǝr ɔɔ kẽkẽsɔ, 30 Sa kɛr bir ɔɔ õkũusɔɔ pa a so war: «Bɩsaana na hale bir kpololo bã dɛ! Dɩ ka ma kana?» 31 Dɩ le wɩ kʋ bʋkɩɩr, a gba Jojɛfɩɩ gbɔɔlɔ̃ a mʋʋ tɔmɩna. 32 Agɩpɩ wɩ gbaar gbɔɔlɔ̃ yɩr kpɩrakpɩrara a thɔna awɩ thɩra sa sʋʋraa: «Thakɛra sɩ yɩɛ. Gba hɩnɛ ado afɩ bikuuni kẽkẽ gɩ.» 33 Dɩ Jakɔbɩ jɩ gbɔɔlɔ̃, a hulẽ: «Ɩ̃ bikuuni gbɔɔlɔ̃ gɩ. Nʋ̃ puu cɛcɛbɛnɛɛ. Dɩkha ɓǝǝre Jojɛfɩ koo yaa nɛ!» 34 Dɩ Jakɔbɩ ɓǝǝr ɔɔ kẽkẽsɔɔkɛ a tonɩ, sa gba bɔrɔ kɩ̃kɩɩn, kɛ wɩ n bɩnanɩ bɩɩ a to, a bɩ ɔɔ bikuun a cʋʋna wire yemɔ̃. 35 Dɩ ɔɔ bikũusɔ na ɔɔ bikhɛrsɔ fɛw dor bʋɔ wɩ ƴɔllʋʋ haar sɩ dɩ bo ɩna n ƴaallakɛ ha ƴɔla'. Sa yɩ, yilẽbera ɩna kpaana na 'li ɩnɩɩ bikuun le khĩdi dʋɔ». Sa ma da n bɩ ɔɔ bikuun wo. 36 Dɩ Madɩ̃adara jalnanɛ Jojɛfɩ Ejipiti a dolõ Potɩfaara, kɛ dɔnɩ Faarɔ̃ɔ gardɩsɔɔ kɔ̃tɩ̃.