Jakɔbɩ ther Sɩsɛm a jal Betɛl \ref Jǝn 28.10-22; 48.3-4
35
1 Wi bɩɛl Thãgba sor Jakɔbɩra a yɩ: «Ɩrɛ jala Betɛl a tɔɔ le. Mɛ le bonɩ ji paar mɛr Thãgbaraakɛ kɔɔ nɛna fɩnɩ ɩ̃ɩbara bɔɔraakɛ fɩ n kɔɔ canɩ afɩ õkuun Ejayuu ƴɛra. 2 Dɩ Jakɔbɩ so ɔɔ cɔdarara na wɩrɛ fɛʋʋkɛ hanɩ kha na ɔr: «Nɩ tiire thãgba kpɩɩsɔɔkɛ hanɩ anɩ thɩ̃thɩɩn, nɩ phʋɔlɛ anɩbara a debana anɩ kẽkẽsɔ. 3 Nɩ gbɛba sɩ jʋʋn Betɛl; ɩ̃ mɩ le bonɩ ji paar Thãgbaraakɛ tuoni ɩ̃ we, ɔbɔɔraakɛ mɩ kɔɔ hanɩ nɩwɛra, dɩ kɔɔ ha kha na mɛrɛ; na mɔ̃ a hanɩ kha na mɛrɛ paar fɛʋraakɛ mɩ kɔɔ kpaarnɩ. 4 Dɩ wɩ ha Jakɔbɩ thɩlasɔɔkɛ wɩ hananɩ na nũ tʋʋsɔ. Dɩ Jakɔbɩ gba jalna puu terebɛ̃tɩa thɩr kɩrɔ, kɛ khonanɩ Sɩsɛm. 5 Agɩpɩ dɩ wɩ jal. Ɔbɔɔkɛ wɩ jalnɩ Thãgba pɛrɛ dɩ khudarara ma kɔ̃tɩ̃ dɩ wa wee Jakɔbɩɩ bikũusɔ a kpaana'.6 Dɩ Jakɔbɩ na wɩrɛ fɛʋʋkɛ a hananɩ, daan Luuji, kɛ dɔnɩ Betɛl, Kanãa dɩɩra. 7 Dɩ a mɩɩrɛ le bonɩ ji paar, a dʋ paarɩle ire "Ɛl-Betɛl," kɩrʋ dʋɔn Betɛl Thãgba gɩdonɩ liir Thãgba nɩnaa ɔɔbara bɔɔraakɛ a n canɩ ɔɔ õkuun Ejayuu ƴɛra. 8 Deboraakɛ dɔnɩ Rebekaa tetee khire, dɩ wɩ dʋʋ Betɛl dɩ nʋɔra sɛn thɩr kɩrɔ kɛ wɩ dʋnɩ iri Yilẽbe-Sɛn.
9 Dɩ Thãgba bir nɩna ɔɔbara Jakɔbɩra mɔ̃ a thenɩ Padã-Aram a kɛr bir a bɔnaa.
10 Sa so:
«Jakɔbɩ dɔ afɩ i
sɩ wa we fɩ
Jakɔbɩ bã.
Ɩjɩrayɛl na dɔ afɩ i.»
Dɩ liir a dʋʋ ire Ɩjɩrayɛl.
11 Thãgba bir sʋʋraa:
«Mɛr dʋɔn Thãgba Punone Fɛw Hɩ̃daar.
Lerra a jʋɔnɔ.
Fɛrra, caar na ca jɔjʋɔ na the.
Jamanasɔ na hale afɩ mǝlsɔra.
12 Dɩɩkɛ mɩ hanɩ Abɩraham na Ɩjakɩ,
ma ha fɛr
Dɩ afɩ mǝlsɔɔkɛ na kpaanɛnɩ
ma ha wɛr.
13 Mɔ̃ Thãgba mɩɩnaanɩ paarɩle a pɩ, a jaal sa fagʋʋ. 14 Dɩ Jakɔbɩ gbaar bokaar a gbuu paarɩle Thãgba kɔɔ mɩɩnaanɩ, a jiro ta bonɩɛ, a deero niin. 15 Dɩ Jakɔbɩ dʋrɛ paarɩle Thãgba kɔɔ mɩɩnaanɩ ire "Betɛl"
Rasɛlɩ kʋɔn Bɛ̃jamɛ̃ sa khi. \ref Jǝn 3.16; 30.1; 49.27; 29.31-30.24
16 Dɩ wɩ ɩɩrɛ Betɛl a jal a thɔɔ Efɩrata gbe sɩ Rasɛl kɔ̃ bi. Ɔɔ bikɔna kɔɔ nɩɩrɛ ka. 17 Ɔbɔɔkɛ a n ɩlanɩ, bitɛn sʋʋraarɛ: «Fa n do maar n fʋ fa'. Fɩ 'lɛr kũubir wo.» 18 Mɔ̃ ɔɔ yi n pɩnɩ, gɩdonɩ fãga na hale bã, a dʋrɛ biile ire Bɛn-Onɩ, kɩrʋ dʋɔn ɩ̃ bɔgaar bi. Sɩ ɔɔ thɩ wɩɩ Bɛ̃jamɛ̃. Kɩrʋ dʋɔn ɲɔ̃bɔ bi. 19 Dɩ Rasɛl khi dɩ wɩ dʋʋ Efɩrata kɛ wɩ n wenɩ Bɛtɩlɛhɛm hʋɛra. 20 Jakɔbɩ gbaar bokaar a gbuu Rasɛlɩ kara; dɩɩ do Rasɛlɩ bɩbɩ boka, kɛ hanɩ lerakɛ nĩ 'lo.
21 Dɩ Ɩjɩrayɛl kɛ dɔnɩ Jakɔbɩ, the le a jal dʋ ɔɔ kẽkẽ wa gĩgĩ bilo kɛ wɩn wenɩ Mɩgɩdal-Edɛr. 22 Bɔɔkɛ Ɩjɩrayɛl toonɩ paarɩle, Ribɛ̃ gbaar ɔɔ thɩɩ khɛr Bɩɩla, a phɩna, dɩ nɩɛ. Jakɔbɩɩ bikona kɔɔ ha yʋɔr yeɲɔ.
23 Wɩrɛ dɔ Leaa bikona: Ribɛ̃, kɛ dɔnɩ Jakɔbɩɩ caca bi, Simeyɔ̃, Levɩ, Juda, Ɩsakaar na Jabʋlɔ̃. 24 Wɩrɛ dɔ Rasɛlɩ bikona: Jojɛfɩ na Bɛ̃jamɛ̃. 25 Wɩrɛ dɔ Bɩɩla, kɛ dɔnɩ Rasɛlɩ thɔ̃daa khɛr bikona: Dã na Nɛfɩtalɩ 26 Wɩrɛ dɔ Jɩlpa, kɛ dɔnɩ Leaa thɔ̃daa khɛr bikona: Gadɩ na Ajɛɛr. Wɛr dɔ Jakɔbɩɩ bikonaakɛ a kɔnɩ Padã-Aram dɩɩra.
Jakɔbɩɩ kɛr bir ɔɔ thɩ Ɩjakɩɩ pa na Ɩjakɩɩ khi \ref Jǝn 25.7-10; 49.29-33