Dɩna na Sɩsɛmɩdaraa thɩmɩɩr. \ref 1Kor 15.33 ; Det 22.28-29 ; Sokp 26.24-26 ; Jǝn 49. 5-7
34
1 Wi bɩɛl Jakɔbɩ na Leaa bikhɛrɩkɛ wɩ n wenɩ Dɩna ther a jal ɩnɩ n hɩɩn dɩ kheminǝ. 2 Dɩ Hamɔɔr, Hevɩ̃ɛ kuunɩkɛ dɔnɩ dɩɩlee nũfe, ɔɔ bikuun Sɩsɛm yɩɩrɛ a fʋʋ a phɩna a ƴɔ̃ƴɔ̃ɔ ɩ. 3 Dɩ Jakɔbɩɩ bikhɛra thʋ̃ lʋʋn haar dɩɩ ka; dɩ naa a cʋrʋʋ a 'li 'lo. 4 Dɩ Sɩsɛm so ɔɔ thɩra: «Jalla bɩɛlnɛ khebirikɛ a ha mɩ ɩ̃ he.» 5 Dɩ Jakɔbɩ nɩɛrɛ mɔ̃ a ƴɔ̃ƴɔ̃ɔnɩ ɔɔ bikhɛr Dɩna. Sɩ gɩdonɩ ɔɔ bikũusɔ har nʋ̃ khe paar hʋɔnɔ, a pɩrɛ kɩrkɩrkɩr sɩ da n pɩɛr ɔɔ bikũusɔ n ɩ̃.6 Dɩ Sɩsɛmɩ thɩ Hamɔɔr jaal a mɩɩna Jakɔbɩ. 7 Ɔbɔɔkɛ Jakɔbɩɩ bikũusɔ thenɩ nʋ̃ khe paar a ɩ̃, a nɩɛr thɩmɩɩ caarɩle, kpɩɛrɛ ɲaɲaan wɛr koo. Dɩ wɩ ɩɩrnanɛ nĩkhii dɩɩ khɩɩr ka, gɩdonɩ Sɩsɛm phɩnanɛ awɩ õkhɛr a pɛ war yicuru. Thɩ̃ɛkɛ na dɔnɩ da cʋʋna Ɩjɩrayɛldarara kpɩɩraka'. 8 Dɩ Hamɔɔr mɩɩna wɩ a yɩ: «Ɩ̃ bikuun Sɩsɛm yɩrɛ anɩ bikhɛr da n khiro kper. Mɩ n bɩɛl nɛr nɩ dɔ bʋɔ sa hanaa a he. 9 Nɩ dɔ sɩ fʋ kha sa n he kha. Na n hana sɩ anɩ bikhɛrsɔ, sa n ha nɩ dakha asɩ bikhɛrsɔ. 10 Sɩ punone too kha. Dɩɩ na toore anɩ too. Nɩ tɔɔ a na ƴaba a 'lɛ anɩ thɛthɛɛ kũkũ thɩ̃.»
11 Dɩ Sɩsɛm thɛthɛ so Dɩna thɩra na ɔɔ õkũusɔra: «Nɩ jɛ mɩ bʋɔra sa sɔ mar gɩrɛɛkɛ nɩ n ƴaalnɩ ɩ̃ lɩmɩ. 12 Nɩ dɔ mɩ bi na gɩ vǝ̃vĩǝ na khaardaa tǝ̃tǝ̃tǝ̃; dɩ ma 'laarɛ gɩrɛɛkɛ na so marnɩ. Sɩ nɩ hana mɩ khebir wer ɩ̃ he.» 13 Dɩ Jakɔbɩɩ bikũusɔ birse Sɩsɛm na ɔɔ thɩ Hamɔɔr na fɩɩlɛ gɩdonɩ Sɩsɛm ƴɔ̃ƴɔɔnɛ awɩ õkhɛr Dɩna. 14 Dɩ wɩ so war ayɩ: «Asɩ pa ga n do mɛ̃ yuurakɛ dɩ sa gba asɩ õkhɛr a na ha kuunikɛ na kuroni khʋ̃a' ga, gɩdonɩ i kʋɛrɛ ga do sar. 15 Sa ture wer anɩ bɩɛl, sɩ dɔ kona fɛw anɩ thɩ̃thɩɩn n kur khʋ̃ʋ asɩ kha. 16 Liir dɩphã sa n ha nɩ asɩ khebirsɔ sa n gba dakha anɩ bikhɛrsɔ. Mɛ̃ sa too kha a na gbɛbɩ na do ca bɩɛl. 17 Sɩ ado na tu a pɛ sɩ nũu a na kur khʋ̃a', sɩ n teere asɩ bikhɛr na jal.» 18 Dɩ awɩ thɩmɩɩ da Hamɔɔr na ɔɔ bikuun Sɩsɛmna dɩ wɩ tu. 19 Dɩ daɓolbirile na dĩdĩǝ 'lo bã sa ɩɩr a cʋʋ, dɩɩ the mɔna Jakɔbɩɩ bikhɛr thʋnɩ lʋʋn haar ɓoɓo. Wɩ n kɔɔ cʋʋrɛ dakha a jɔ ɔɔ thɩɩ cɔdara fɛw.
20 Dɩ Hamɔɔr na ɔɔ bikuun Sɩsɛm jal dɩ lõfonʋɔra a mɩɩna awɩ dɩdara: 21 «Tɩbɩlaale hana sarrɛ kpɩɛr bʋɔ ka; wɩ tɔɔ kɛ dʋɔ a na ƴaba. Dɩɩ pɩɛrɛ ka, sɩ sɛ wɛr wɩ too mɔ̃ wɩ n ƴaalnɩ, sa n he awɩ bikhɛrsɔ, wa n he asɩ bikhɛrsɔ. 22 Sɩ tɩbɩlaale na tu na toona sɩ dɩ sa gbɛbɩ na do ca bɩɛl, sɩ a ga do sɩ ture dɩ kona fɛw asɩ thɩ̃thɩɩn kur khʋ̃ʋ mɔ̃ɔkɛ wɛr thɛthɛ hanaa ga. 23 Awɩ nʋ̃sɔ fɛw na awɩ lẽle thɩ̃sɔ, ga do sɛra na hɩna gaa? Sɩ to dɩbara gɩrɛ wɩ sonɩ gɩ do nɔɔ wɩ toona sɩ.» 24 Wɩrɛ fɛʋʋkɛ thɛnɩ le dɩ lõfonʋɔra pɛr Hamɔɔr na Sɩsɛmɩɩ thɩmɩɩ nũu. Dɩ kona fɛʋʋkɛ thɛnɩ le dɩ lõfonʋɔra kuure khʋ̃ʋ.
25 Dɩ balãther wirera mɔ̃ wɩ hanɩ khoora, Jakɔbɩɩ bikũusɔ yeɲɔ, Simeyɔ̃ na Levɩɩkɛ dɔnɩ Dɩna õkũusɔ, gbaar awɩ khalgbãsɔ a lõ dɩɩra, kɛ na kɔɔ kpɩɛrnanɩ puure na dãana', a kʋʋr kona fɛw. 26 Dɩ wɩ kʋrɛ dakha Hamɔɔr na ɔɔ bikuun Sɩsɛm, sa kpa awɩ õkhɛr Dɩna, Sɩsɛmɩ cɔ, a the. 27 Dɩ Jakɔbɩɩ bikũusɔ, wɩrɛ sɛnɩ jal a khɩɩ khee thɩ̃bi fɛw dɩɩra, gɩdonɩ wɩ kɔɔ ƴɔ̃ƴɔɔnɛ awɩ õkhɛr. 28 Dɩ wɩ kpar awɩ nʋ̃ yɩra, na awɩ nʋ̃ kɔ̃tɩ̃sɔ, na awɩ kũkǝ̃sɔ, na thɩ̃ɛ fɛʋʋkɛ hanɩ dɩ bɩnɔ, na gɩrɛ hanɩ hʋɔnɔ. 29 Dɩ wɩ khɩɩrɛ awɩ lẽle thɩ̃sɔ fɛw, a fʋlɛna awɩ bɩsãsɔ, na awɩ khɛrsɔ, na thɩ̃ɛ fɛʋʋkɛ hanɩ cɔnana.