30
1 Ɔbɔɔkɛ Rsɛl yɩɛnɩ dɩɩ do aa n 'lɛ bǝ', gbugi fʋʋrɛ ɔɔ õkhɛra dɩ so Jakɔbɩra: «Kɔna mar bɩsana, a mɛ̃ gaa ma khire.» 2 Dɩ nĩkhii fʋ Jakɔb Rasɛla dɩ sʋʋraa: «Mɛr dɔ Thãgba pɩɛrɛ fɩnɩ fa n kɔ̃ bǝ' ya?» 3 Dɩ Rasɛl sʋʋraa: «Ɩ̃ thɔ̃daar khɛr Bɩɩla ha ʋrɛ; gbaanɛɛ, a a kɔ̃ bi ma n hɩɩn; gɩ do ɔr dɔ nɔɔ dɩ̃ 'lɛ bɩsana mer dakha.» 4 Dɩ gba ɔɔ thɔ̃daar khɛr a ha Jakɔbɩ dɩ dʋʋraa khɛr da n cɔna. 5 Dɩ Bɩɩla hana pɛmɛr a kɔ̃ Jakɔbɩɩ bi. 6 Dɩ Rasɛl so: «Thãgba gʋʋrɛ ɩ̃da, a nɩɛrɛ ɩ̃ bɩɛl a ha mɩ kũubir.» Gɛr gɩ dɩ haa ire Dã. 7 Dɩ Rasɛlɩ thɔ̃daar khɛr Bɩɩlala, bire hana pɛmɛr wo a kɔ̃ Jakɔbɩɩ balaɲɔ bi. 8 Dɩ Rasɛl so: «Mɩ nɔɔrɛ Thãgba nɔɔrɛ na ɩ̃ õkhɛr waa sa punoo.» Gɛr gɩ dɩ haa ire Nɛfɩtalɩ.9 Mɔ̃ Lea yɩɛnɩ dɩɩ do a kɔɔ jɩɩlɛ bi kʋɔna, a gbaar ɔɔ thɔ̃daar khɛr Jɩlpa a ha Jakɔbɩ dɩ do ɔɔ khɛr. 10 Dɩ Leaa thɔ̃daar khɛr Jɩlpa kʋ̃ɔ Jakɔbɩɩ bi. 11 Dɩ Lea so: «Yɛkɛ nɔbɔɔ ɓoɓo.» Gɛr gɩ dɩ haa ire Gadɩ. 12 Dɩ Leaa thɔ̃daar khɛr Jɩlpara, bire kɔ̃ Jakɔbɩɩ balaɲɔ bi. 13 Dɩ Lea so: «Ɔɔ, daw fʋ mɛr! Khɛra na n sor mɩ dor khɛrɩkɛ hananɩ daw.» Gɛr gɩ dɩ haa ire Ajɛɛr.
14 Bile kha bɔɔ, Ribɛ̃ jaal hʋɔnɔ a yɩ mãdɩragɔɔra a kɔna ha ɔɔ nɩ Lea. Dɩ Rasɛl so Leara: «Mɩ bɩɛlɛ, te afɩ bikuuni mãdɩragɔɔrra a ha mɩ.» 15 Dɩ Lea sʋʋraa: «Fɩ teere ɩ̃ ko dɩ ga dã fa', dɩ fa n ƴaal fɩ birǝ tea ɩ̃ bikuuni mãdɩragɔɔr pɩɛr wo ya?» Dɩ Rasɛl sʋʋraa: «Ee! Dɩ a mɛ̃ gɩ, nĩ dɩtɩnɔɔkɛ, fɛr a na phɩna sɩ fɩ ha mɩ afɩ bikuuni mãdɩragɔɔr.» 16 Mɔ̃ Jakɔbɩ thenɩ hʋɔnɔ dʋɔrɔ a na ɩ̃, Lea sʋʋrarɛ: «Ɩ̃ pa fa phɩ̃ nĩikɛ wer gɩdonɩ mɩ the fer na ɩ̃ bikuuni mãdɩragɔɔr.» Dɩ Jakɔbɩ phɩnaa ga dɩtɩnɔɔle. 17 Dɩ Thãgba tu Leaa bɩɛl dɩ hana pɛmɛr a kɔ̃ Jakɔbɩɩ balamɔy kũubir. 18 Dɩ Lea so: «Thãgba ha mɛr ɩ̃ lɩmɩ mɔ̃ mɩ gbanɩ ɩ̃ thɔ̃daar khɛr a ha ɩ̃ ko.» Gɛr gɩ dɩ haa ire Ɩsakaar. 19 Dɩ Lea bire hana pɛmɛr wo a kɔ̃ Jakɔbɩɩ maadõ kũubir. 20 Dɩ Lea so: «Thãgba ha mɛr khaarda ɓʋ̃ɔ na sobɔr. Nɛnɛ̃ ɩ̃ koo ha na ha marɛ, gɩdonɩ kuuminǝ maadõ mɩ kɔ̃ haa.» Gɛr gɩ dɩ haa ire Jabʋlɔ̃. 21 Agɩpɩ dɩ kɔ̃ khebi bɩɛl a haa ire Dɩna.
22 Dɩ Thãgba kpɩɛrna Rasɛl dakha a haa hʋɛ bi kʋɔna. 23 Dɩ Rasɛl hana pɛmɛr a kɔ̃ kũubir, a so: «Thãgba ti marɛ ɩ̃ yicurrǝ.» 24 Gɛr gɩ dɩ haa ire Jojɛfɩ, gɩdonɩ a sor Thãgba n ɓana nar kũubir bɩɛl wo.
Jakɔbɩɩ nʋ̃sɔ \ref Jǝn 31.1-12, 38-39; Det 28.11
25 Ɔbɔɔkɛ Rasɛl kɔnɩ Jojɛfɩ pɩ, Jakɔbɩ sor Labana: «Sɛ mar ɩ̃ kɛr ɩ̃ bir ɩ̃ dʋɔ. 26 Ha mɩ ɩ̃ bɩsãsɔ na ɩ̃ khɛrsɔɔkɛ dɔnɩ nɔɔ dɩ̃ do far thɔma ɩ̃ kɛr ɩ̃ bir. Gɩdonɩ fɛrɛ thɛthɛrakɛ jɩrɛ thɔmaakɛ mɩ do farnɩ.» 27 Dɩ Labã sʋʋraa: «Mɩ ka nar ma n 'lɛ afɩ bɔ jɩra. Mɩ bor a jɩ dɩɩ do fɛr dɔ nɔɔ dɩ Thãgba Kɔ̃tɩn bɔna mɩ. 28 Ƴaba mɩ yemɔ̃ɔkɛ fɩ n ƴaalnɩ ɩ̃ lɩmɩ fɩ.» 29 Dɩ Jakɔbɩ sʋʋraa: «Fɛrɛ thɛthɛ jɩrɛ mɔ̃kɛ mɩ do farnɩ thɔma, na gɩrɛɛkɛ afɩ nʋ̃sɔ donɩ gɩrɛ dɩɩ do mɛr dɔ nɔɔ. 30 Gbe fɩɩʋ afɩ nʋ̃sɔ kɔɔ ha mɩ n ɩnɩ, sɩ nɛnɛ̃ wɩ lerre. A fʋna wireekɛ ɩ̃ nɛ lonɩ afɩ cɔ, Thãgba Kɔ̃tɩn bɔna fɛr. Nɛnɛ̃ɛkɛ bɔ ʋmɔ̃ ma do ɩ̃ cɔ thɔ̃ 'lo?» 31 Dɩ Labã bir bulee: «Aɲe ma ha fɩrakɛ tɔr?» Dɩ Jakɔbɩ birsee: «Fa ha mɩ thɩ̃a'. Ado fɩ ture gɩrɛɛkɛ ma so farnɩ, ma bire na hɩɩn afɩ nʋ̃sɔ ma n khe wɩ otirǝ. 32 Nĩikɛ, ma kpaarɛ afɩ nʋ̃ yɩrara fɛw na hɩɩn; bana wɩrɛ ɓaanɛnɩ pala, na wɩrɛ yɩɩrɔnɛnɩ, na wɩrɛ biironenɩ himǝ himǝ, na bʋ wɩrɛ yɩɩrɔnɛnɩ, na wɩrɛ ɓaanɛnɩ pala, ɩ̃ lee wɩ kpɩɩ; wɛr na dɔ ɩ̃ lɩmɩ. 33 Wireekɛ fa pɔnɩ na hɩɩn ɩ̃ lɩmɩ, gɛr fa jɩrɔ ɩ̃ sobɔdaar do. Bʋ wo bʋʋkɛ na ɓaanɛnɩ pala ga, na wɩrɛ na yɩɩrɔnɛna', na bana wɩrɛ na biironenɩ himǝ himǝ ga, ga dor mɩ yure.» 34 Dɩ Labã so: «Dɩ nɔ bɩɛlla gɩ, gɩ bɔrɛ.» 35 Sɩ ga wiilera Labã phiire bʋ ke wɩrɛ hanɩ kpɩrakpɩra na wɩrɛ yɩɩrɔnɛnɩ, na bʋ nɩ wɩrɛ ɓaanɛnɩ pala, na wɩrɛ yɩɩrɔnɛnɩ, na bʋ nɩ wɩrɛ ɓaanɛnɩ dabulona, na bana wɩrɛ hanɩ himǝ himǝ a ha ɔɔ bikũusɔ. 36 Agɩpɩ dɩ wɩ kpa jal ƴɔɔ fĩi dɩɩ dã wire yẽther ɩɩr paar, awɩ pa na ka Jakɔbɩ hanɩ. Sɩ Jakɔbɩ hana Labãa nʋ̃ yɩra wɩrɛ sɛnɩ da n khe.
37 Dɩ Jakɔbɩ gba thɩr caar yẽtherɩ jɛ̃ dahuu, kɛ hananɩ gbol bulo a leesɩ ɓɩ̃ɩɓɩ̃ɩ a tiir pɛ̃ɛ sa faa, dɩɩ yɩɩrɔ. 38 Dɩ a gbaar thɩr jɛ̃ɛlera a leesɩnɩ dɩɩ yɩɩrɔ a pɛ nʋmaa ɲɔ ɲɔ paarsɔɔra fɛw awɩ ƴɛbʋrɔ 'lɩmɩ, gɩdonɩ a wa pɔ ɲɔ ɲʋɔ wɩ n jʋʋnɛ kha. 39 Dɩ bɔ jʋʋnɛ kha thɩr jɛ̃ kɩrɔɔlera. Gɛr gɩ a wa kɔ̃ bii dɩ ɩkha n yɩɩrɔ, ɩkha n ɓãa pala, ɩkha n ha kpɩrakpɩra otirǝ. 40 Sɩ banaasɔ wer, Jakɔbɩ leere wɩrɛ dɔnɩ ɔɔda a cʋʋ wɩ dɩ wa n hɩɩn Labãa banasɔ, kɛ yɩɩrɔnɛnɩ, ɩkha do dahimǝ himǝsɔ. Thale a lee ɔɔ nʋ̃sɔ kpɩɩ aa faa wɩ dɩ wɩ ɲaɲaan na Labãada ga. 41 Bɔɔ fɛw, a nʋma na pɔ ɲɔ, yʋɔ dɩ nʋ̃ khena na jʋʋn kha dɔrɔɔm Jakɔbɩ n gbaar thɩr jɛ̃ɛle dɩ pɛr awɩ ɲɔ ɲɔ pasɔ awɩ ƴɛra. 42 Sɩ ɔbɔɔkɛ nʋ̃ sʋra na n jʋʋnɩ kha aa n pɛra'. Gɛr cʋɛ dɩ Labã hɩ̃ nʋ̃ sʋra, sɩ Jakɔbɩ hɩ̃ nʋ̃ khena. 43 Dɩ Jakɔbɩ thʋ̃ le ga do kpãkpalã ga. A hananɛ nʋ̃ yɩra tǝ̃tǝ̃tǝ̃. A hananɛ dakha thɔ̃daar khɛra na thɔ̃daar kona, a hanana ɲɔɔmɛ̃sɔ na kũkǝnǝ.