Jakɔbɩ wolone Labana da n bir Kanãa dɩɩra \ref Jǝn 30.25-43; 32.10-13
31
1 Jakɔbɩ nɩɛrɛ mɔ̃kɛ Labãa bikũusɔ n mɩɩnɩ aa, a phʋʋnɛ ɩnɩɩ thɩ fɛw. Ɩnɩɩ thɩɩ thɩ̃ a gba a lena. 2 Dɩ Jakɔbɩ jʋʋr Labãa ƴɛ a hɩɩn dɩɩ do ɔɔ cʋʋ pa na haaraa mɔ̃kɛ gɩ kɔɔ hanɩ cacara bã. 3 Le Thãgba Kɔ̃tɩn so Jakɔbɩra: «Kɛrra birǝ afɩ thɩsɔɔ dʋɔ, afɩ too pa, ma har kha na fɛrɛ.» 4 Dɩ Jakɔbɩ thɔ̃ a we Rasɛl na Lea dɩ wɩ pʋɔraa le hʋɔnɔ ka a hanɩ nʋmana. 5 Dɩ so war: «Mɩ jʋʋrɛ anɩ thɩɩ ƴɛ a hɩɩn dɩɩ do ɔɔ cʋʋ pa na ha mɔ̃kɛ gɩ kɔɔ hanɩ cacara bã. Sɩ, ɩ̃ thɩɩ Thãgba kɔɔ haan kha na mɛrɛ. 6 Nɛrɛɛ thɛthɛrakɛ jɩrɛ dɩ mɩ dor anɩ thɩ thɔma na ɩ̃ fãga fɛw. 7 Sɩ anɩ thɩ na therna ga, sa debi ɩ̃ lɩmɩ ɲɛ̃be balamɔ̃ balamɔ̃. Sɩ Thãgba na haa hʋɛ a cʋɛ mɩ puurǝ'. 8 A a yɩ, nʋ̃ paldara na dʋɔn ɩ̃ lɩmɩ, dɩ nʋma na n kɔ̃ paldarara fɛw; a a yɩ, wɩrɛ yɩɩrɔnɛnɩ na dʋɔn ɩ̃ lɩmɩ, dɩ nʋma na n kɔ̃ dayɩɩrara fɛw. 9 Thãgba taga anɩ thɩra ɔɔ nʋ̃sɔ a ha mɩ.10 Ɩ̃ dǝǝllǝ, mɩ yɩɛrɛ dɩɩ do bɔɔkɛ nʋma na n jʋʋnɩ kha; dakona kɛ n jʋnɛnɩ dakhɛra kɔɔ yɩɩrrɔrɛ, a ɓãa pallasɔ a 'lɩɛrrɔ dabulona. 11 Dɩ Thãgbaa thɔ̃thɔ̃ thue we mer dǝǝlelala ayɩ: «Jakɔbɩ», dɩ̃ tuu: «Mɛr kaa.» 12 Dɩ so mar: «Fɩ yɩ gɛra! Nʋ̃ kona fɛʋʋkɛ n jʋnɛnɩ dakhɛra yɩɩrrɔrɛ, a ɓaan pala, a 'lɩɛrna dabulona. Mɛr cʋɛ thale gɩdonɩ gɩrɛ Labã cʋʋ fɩnɩ, mɩ yɩɛrɛ. 13 Mɛr dʋɔn Thãgbaakɛra nɛna fɩnɩ ɩ̃ɩbara Betɛl, kãkɛ fɩ gbanɩ bokaar a gbuu sa so mar nʋɔ. Nɛnɛ̃, ɩrɛ thɛ dɩɩrakɛ a kɛrra birrǝ dɩɩrakɛ wɩ kɔ̃ fɩnɩ.»
14 Dɩ Rasɛl na Lea birsee: «Sɩ hananɛ dɩkha asɩ thɩɩ pa 'lo, agɩbo ɔɔ khĩdi thɩ̃ gɩ a na gba ya? 15 A a dolõ sɩ a kho pɩ sa bir gba sɩ dɩ sɩ hʋʋraa kpakpala gaa? 16 Lẽle thɩ̃ɛɛkɛra Thãgba tagɩnɩ asɩ thɩra a ha fɩ, sɛrra hɩna na asɩ bɩsãsɔ. Gɛr gɩ, cʋɛ gɩrɛra Thãgba so farnɩ.» 17 Dɩ Jakɔbɩ ɩɩr a gbɛbɩrɩ ɔɔ bɩsãsɔ na ɔɔ khɛrsɔ dɩ wɩ jʋʋn ɲɔɔmɛ̃sɔ. 18 Dɩ a kpar nʋma fɛw, a khɩɩna thɩ̃ɛ fɛʋʋkɛ a 'lɛnɩ Padã-Aram dɩɩra, a gba hʋɛ da n jal ɔɔ thɩ Ɩjakɩɩ pa Kanãa dɩɩra. 19 Labã kɔɔ jaal bana sũu kpoorʋ. Dɩ Rasɛl hɩɩnɔ sa yu ɔɔ thɩɩ cɔ bɛr thɩl. 20 Jakɔbɩ dakha fɩɩlɛ Labã Aramɛ̃daar, aa sʋʋraa sa jala'. 21 Dɩ a car na ɔɔ thɩ̃ fɛʋʋkɛ a hɩnɩ a jal seer Efɩratɩ mɩɩr sa telẽ Galadɩ gɔ̃gʋɔn da n jal.
Labã 'lor Jakɔbɩ a kpaan 'lii \ref Jɔ 33.14-17; Khɩ 105.13-15; 124; Jǝn 26.26-31
22 Dɩ balãther wirera wɩ sor Labana, aa Jakɔbɩ car. 23 Dɩ Labã kpa ɔɔ too a weena Jakɔbɩ da n kpaan. Wɩ ɩɩrɛ cɔna wire makoɲɔ sa 'lii Galaadɩ gɔ̃gʋɔna. 24 Sɩ Thãgba kɔɔ nɩnanɛ ɔɔbara Labana Aramɛ̃daarɩle dɩtɩnɔ dǝǝlela a sʋʋraa: «Jɩɛ hɩɩn dɛ! Fa n mɩɩ Jakɔbɩ puurǝ'.»
25 Labã pɔr a 'li Jakɔbɩ dɩ dʋ kẽkẽ waa Galadɩ gɔ̃gʋɔnana a tooro. Dɩ Labã na ɔɔ too dʋ awɩ kẽkẽ wa dakha. 26 Le Labã bule Jakɔbɩ aa: «Aɲe fɩ cʋʋ thaara gɩ dɔ? Aɲe dɔ kɩrʋ dɩ fɩ fɩɩl mɩ sa kpa ɩ̃ bikhɛrsɔ fa n jalna a ho mɔ̃ wɩ n fʋlɛnɩ dea kʋʋrra? 27 Aɲera fɩ wolõ fa n ca, ga hana dɩ fɩ so mar nʋa'? Ado fɩ kɔɔ so marɛ ma kɔɔ thɔɔ fɛr na bǝ̃bǝ̃ǝ na kolõjʋ̃ʋ fɩ jal na daw. 28 Fa faa mɩnakɛ dɩ̃ fʋɔr ɩ̃ bikhɛrsɔ na ɩ̃ bikhɛrsɔɔ bɩsãsɔa'! Fɩ cʋʋrɛ dǝ̃bǝǝle dɩɩ ka. 29 Mɩ hananɛ punone a na kɔɔ cʋʋna nɩ puure sɩ afɩ thɩɩ Thãgba sɔ mar de dɩtɩnɔ aa, ɩ̃ jɩɛ hɩɩn dɛ! Aa ma n mɩɩ fɩ puurǝ'.» 30 Dɩ ado afɩ thɩɩ cɔ thu fʋɔn fɩ dɩ fa n phana fɩ kɔ̃, aɲe dɔ kɩrʋ fɩ yuni ɩ̃ cɔ bɛr thɩlsɔ?»
31 Dɩ Jakɔbɩ so Labana: «Maar fʋɔn mɩ, dɩ̃ kpɩɛr a mɩ so far, agakpaana' fa taa marɛ afɩ bikhɛrsɔ. 32 Sɩ ntɛɛ paakɛ fa yɩnɩ afɩ cɔ bɛr thɩlsɔ, ga dor ntɛɛda na hɛllɔlɛ. Hɩnɛ ɩ̃ thɩ̃bisɔra fɛw asɩ tookɛɛ ƴɛra, ado afɩ thɩ̃bi hakɛ fɩ gba.» Jakɔbɩ na kɔɔ jɩrakɛ dɩɩ do Rasɛl yuonǝ'.
33 Dɩ Labã lõ Jakɔbɩ na Lea na thɔ̃do khɛra yeɲɔɔ kẽkẽ waw, a a yɩ thɩ̃a'. Sɩ a thenɩ Leaa kẽkẽ waw, Rasɛlɩ pa a lõ ɓo. 34 Jaa Rasɛl gbaanakɛ thɩlaale a to ɲɔɔmɛ̃ kulela a tooro, sɩ Labã ƴaal kẽkẽ waw fɛw aa yɩ thɩ̃a'. 35 Dɩ Rasɛl so ɔɔ thɩra: «Mɔ̃ ma punonɩ na ɩɩr afɩ ƴɛbʋrɔa', fa n gba nĩkhiǝ' lee ɩ̃ thɩ, ɩ̃ sɩpora mɩ ha gɛr gɩ.» Dɩ Labã ƴaal thɩlala a thʋnɔ aa yɩ ga.
36 Dɩ nĩkhii fʋ Jakɔbɩ da n phaan Labã a yɩ: «Aɲee dɩpa na aɲee puu ca mɩ cʋʋ dɩ fɩ wee mɩ fa n kpaan na ƴɛ bɩɩrɛ thaa ɓoɓo? 37 Fɩ wɩɛrnɩ ɩ̃ thɩ̃bi fɛw a hɩɩn, aɲe fɩ yɩ bɩɛllakɛ, kɛ dɔnɩ afɩ cɔ thɩ̃? Nɛna mɩ thɩ̃doo kɩɛr ɩ̃ too na afɩ tookɛɛ ƴɛra, wɛr n gʋʋr sɩ thɩmɩara sɛr yeɲɔɔ thɩ̃thɩɩn. 38 Hɩnɛ, yɛna kpelẽ mɩ cʋʋ afɩ pa, sɩ afɩ bana na sɩɩl dɩ afɩ bʋ gɩ a sɩɩlla', dɩ ma kho afɩ banake bɩɛllakɛ afɩ nʋ̃sɔra a yɩ ga. 39 Ma gba nʋ̃ ɓǝǝru babɩɛl a pɔna ha fɩ a yɩ dɩkha kʋa', mɛrɛ thɛthɛ n ka ji. A wɩ yu nʋmɩ, a dɩwɩlɔ gɩ ya, a dɩtɩnɔ gɩ ya, fɩ n lʋʋr mɛr. 40 Dɩwɩlʋla, ɩtʋɛ n ho ga hǝrǝ mer. Dɩtɩnɔ wo ɩɩr n ho ga lɩɛr mɛr. Ma n yɩ da daar paara'. 41 Thalera mɩ cʋʋna yɛna kpelẽ afɩ cɔ. Yɛna yʋɔr yenã mɩ thɛɛ fɩ sa 'lɛ afɩ bikhɛrsɔ yeɲɔɔkɛ, a do fɩ thɔma yɛna maadõ sa 'lɛ nʋmaakɛ; sɩ dɩ fɩ debi ɩ̃ lɩmɩ ɲɛ̃be balamɔ̃ balamɔ̃. 42 Ado ɩ̃ thɩɩ Thãgba, kɛ dʋɔnɩ Abɩrahamɩ Thãgbaakɛ Ɩjakɩ n manɩ na kɔɔ ha kha na mɛrɛa', ga dora gɩrɛ ɲɛ̃biire fa kɔɔ faana mɩ ɩ̃ kɔ̃. Sɩ Thãgba yɩrɛ ɩ̃ dɩbara wur na ɩ̃ vɔɔ, gɛr gɩ de dɩ 'lɔɔrɔ a kuur thɩmɩara.»
Jakɔbɩ na Labã ʋlfɛrɛ kha nɔ bɩɛl ʋlfɛrɛ
43 Dɩ Labã birse Jakɔbɩ: «Khɛrakɛra, ɩ̃ bikhɛrsɔ gɩ, dɩ bɩsanaakɛ, ɩ̃ bikũusɔ gɩ, dɩ nʋmaakɛ, na gɩrɛ fɛʋʋkɛ fɩ yɩnɩ ɩ̃da gɩ. Dɩ aɲe ma puno nĩikɛ na cʋʋ ɩ̃ bikhɛrsɔ agɩbo awɩ bɩsãsɔɔkɛ wɩ kɔnɩ? 44 Nɛnɛ̃ɛkɛ ɩna sɩ ʋlfɛ kha nɔ bɩɛl ʋlfɛrɛ, sojɩdaar n hale asɩ thɩ̃thɩɩn. 45 Dɩ Jakɔbɩ gba bokaar a gbuu.
46 Agɩpɩ dɩ so ɔɔ toora: «Nɩ khɩa bokana ɛna.» Dɩ wɩ gbaar bokanana a kpebi pa bɩɛl a gbɛbɩ dɩkɔ a kho bokananaale ƴũu. 47 Dɩ Labã dʋ bokanaalera wɩ kpebinɩ ire Yegar Saharduta, sɩ Jakɔbɩ wer dʋ gɩ Galɛɛdɩ na ɔɔ ca thɩmɩɩ. 48 Dɩ Labã so: «Bokanaakɛ dʋɔn gɩrɛ nĩ asɩ sojɩdaar, fɛrɛ na mɛrɛɛ thɩ̃thɩɩn dɛ!» Gɛr dɔ nɔɔ wɩ dʋnɩ bokanaale ire Galɛɛdɩ. 49 Wɩ n wer paarɩle dakha Mɩsɩpa. Dɩ Labã bir so: «Thãgba Kɔ̃tɩn na n jʋrɛ fɛrɛ na mɛrɛ adorakɛ sɩ buur kha sa n yɩ kha bã.» 50 Ado fa hʋɔl ɩ̃ bikhɛrsɔra agɩbo khɛr kpɩɩsɔ fɩ gba, ga ba tibilǝ'. Dɔ bʋrɛ, Thãgba dʋɔn yi tordaar fɛrɛ na mɛrɛɛ thɩ̃thɩɩn. 51 Dɩ Labã bir so Jakɔbɩra: «Yɛ bokanaakɛ kpebanɩ gɩrɛ, na bokaarɩkɛ mɩ gbuuni fɛrɛ na mɛrɛɛ thɩ̃thɩɩn. 52 Bokanaakɛ kpebanɩ, na boka gbuunǝǝ kɛ dʋɔn gɩrɛ jɩɩn. Ʋ na n seer bokaarɩkɛ kpɩɩrakɛ sa jal ʋʋ pa na kpɩɛr nɔ puǝ'. 53 Dɔ Abɩrahamɩ Thãgba, na Nakɔɔrɩ thãgbasɔ, na awɩ thɩsɔɔ thãgbasɔ n do so gʋʋrdaar asɩ thɩ̃thɩɩn. Sɩ Jakɔbɩ wer Thãgbaakɛ n kɔnɩ ɔɔ thɩ Ɩjakɩ maar, a ʋlfɛna.
54 Agɩpɩ, Jakɔbɩ jire bonɩɛ gɔ̃gɔ̃ yʋɔ a we ɔɔ omisɔ wɩ pɔ khɔ dɩkɔ. Dɩ wɩ khor dɩkɔɔle sa cɔ le gɔ̃gɔ̃ yʋɔ.