Jakɔbɩ dãa Labãa pa. \ref Jǝn 24.10-32; Thɩɩ 2.15-21
29
1 Dɩ Jakɔbɩ gba hʋɛ da n jal kɩrɔdaraa dʋɔ. 2 Dɩ a yɩrɛ bir bɩɛl le hʋɔnɔ dɩ wɩ khãa na boka kɔ̃tɩ̃ɩ tǝ̃ǝ, dɩ bɔ na banaasɔ hale a jɛ, jɛ paar yẽther gɛllɔ gɛllɔ gɩdonɩ ɔ birəəlera wɩ n pɛ nʋma ɲʋɔn. 3 Le nʋma fɛw n kpa a jɛ, dɩ wɩ kpuro bokaar sa pɛ war ɲʋɔn. A nʋma ɲɔ pɩ, dɩ wɩ bir kpuro bokaarra a khãa bir nʋɔra oti. 4 Dɩ Jakɔbɩ bule nʋ̃-khɛ: «Kana nɩ the yaa ɩ̃ omisɔɔ?» Dɩ wɩ birsee: «Karã sɩ the.» 5 Dɩ bule wɩ: «Nɩ jɩrɛ Nakɔɔr bikuunikɛ wɩ n wenɩ Labã bɛ?» Dɩ wɩ yɩ: «Ɔɔ, sɩ jɩɩrɛ.» 6 Dɩ bir bule wɩ: «Dɩ a khɩɩrɛ bɛ?» Dɩ wɩ yɩ: a khɩɩrɛ bɔɔbɔɔ. Ɔɔ bikhɛr Rasɛl ha ole n ɩnanɩnakɛ na banaa. 7 Dɩ Jakɔbɩ so war: «Wire kɔ̃tɩnɛ ka, ga do nʋ̃ jɛ bɔɔ ha ʋra'. Nɩ pɛ banaa ɲʋɔn sa jalana wɩ wɩ khʋʋl.» 8 Dɩ nʋ̃-khɛ sʋʋraa: «Sa punoə', gɩdonɩ nʋma na ɩ̃ fɛw pa'. A wɩ dã fɛw gɛr wɩ n kpuroro bokaar bir nʋɔra a faa, sa pɛ war ɲʋɔn dɩ wɩ ɲɔ.» 9 Jakɔbɩ na mɩɩna nʋ̃-khɛ pa', sɩɩ do Rasɛl dananɛ ɔɔ thɩɩ nʋ̃sɔ, gɩdonɩ nʋ̃-khe haa. 10 Ɔbɔɔkɛ Jakɔbɩ yɩnɩ Rasɛl, ɔɔ jẽ Labãa bikhɛr dɩ pɔna ɔɔ thɩɩ banasɔ, a tɔr dã a kpuro bokaar bir nʋɔra a faa sa pɛ Labãa banasɔɔra ɲʋɔn dɩ wɩ ɲɔ. 11 Agɩpɩ Jakɔbɩ pal Rasɛl sɩ da n khɩɩ. 12 Jakɔbɩ kɔɔ sor Rasɛla, aa ɔɔ thɩɩ kumi ha nɩ; aa Rebekaa bikuun ha nɩ. Dɩ Rasɛl ca kɔ̃ a mɩɩ ɔɔ thɩ. 13 Mɔ̃ Labã nɩɛnɩ dapaara ɔɔ kumi Jakɔbɩɩ pɔda, a ɩɩrɛ a ca caanʋ, a palʋ 'lɩmɩ, a kpaa kɔna cʋɔrɔ. Dɩ Jakɔbɩ gbaar thɩ̃ɛ fɛw a mɩgʋ. 14 Dɩ Labã sʋʋraa: «Baalɛ na hala', ɩ̃ kpɩ̃ɩ bɩnɔ ha fɩ, ɩ̃ tɔmɩna fɩ the ger.» Dɩ Jakɔbɩ too Labãa pa sɩpor bɩɛl.Jakɔbɩ thɛɛrɛ Rasɛl yɛna makoɲɔ \ref Oje 12.13; Sokp 14.10-13.
15 Agɩpɩ Labã sor Jakɔbɩra: «Ma 'larɔrɛ mɔ̃ fɩ donɩ ɩ̃ tibil sɩ ɩ̃ yɩ fɩ dɔ mar thɔma mɔlɔ ya? Sɔ mar gɩrɛ fɩ n ƴaalnɩ gɩ dɔ afɩ lɩmɩ.» 16 Sɩɩ do Labã hananɛ bikhɛna yeɲɔ: cacadaarɩ i na n do Lea, sɩ ɔɔ õkhɛr dĩi na n do Rasɛl. 17 Leaa yisɔ filele sɩ Rasɛl wer bɔr waa vʋ̃ʋ. 18 Jakɔbɩ nar Rasɛl dɩɩ kar, dɩ so Labana: «Ma thɛɛ fɛr yɛna makoɲɔ sɩ fɩ ha mɩ afɩ bikhɛr bu Rasɛl ɩ̃ he.» 19 Dɩ Labã sʋʋraa: «A mɩ ka ha fɛrɛ, ga ba ma hanɩ tɩɩ kpɩaa? Tɔɔ kɛ ɩ̃ pa.» 20 Mɔ̃ Jakɔbɩ thʋnɩ na Rasɛl mɛ̃, a thɛɛrɛ yɛna makoɲɔra sɩ ga dʋʋraarakɛ thɩ̃a', fɩ yɩ wire gbe gɩ dɩbara. 21 Agɩpɩ Jakɔbɩ so Labana: «Ɩ̃ thɛɛ thɔ̃ pɩrɛ mɛ̃, ha mɩ ɩ̃ khɛr ɩ̃ cɔna.» 22 Dɩ Labã cʋʋ he fɛtɩ dɩkɔ a wena dɩdara fɛw a jɛ. 23 Sɩ dɩtɩnɔ a ɩɩrɛ kpa ɔɔ bikhɛr Lea a jalna ha Jakɔbɩ dɩ cɔna. 24 Dɩ Labã kpar ɔɔ thɔ̃daar khebir Jɩlpa a ha ɔɔ bikhɛr Lea a dɔ ɔɔ thɔ̃daar. 25 Dɩ dɩɩ wɩl, dɩ Jakɔbɩ na hɩɩn jaa Lea gɩ. Dɩ bule Labã: «Aɲe fɩ cʋʋ mɩ thaa gɩ dɔ? Ga do Rasɛl dɔ nɔɔ dɩ̃ thɛɛ faa? Mɔ̃gɩdo dɩ fɩ fɩɩl mɩ?» 26 Dɩ Labã sʋʋraa: «Wa n cʋʋ mɛ̃ asɩ hʋra a kɔɔ 'laa õkhɛr buu sɩ õkhɛr kɔ̃tɩ̃ n pɩɩrɔa'. 27 Cɔna Lea a cana ɲɛ̃bea sɩ sɩ ha fɩ Rasɛl, sɩ fɩ bir fɩ thɛɛ mɩ yɛna makoɲɔ wo.» 28 Dɩ Jakɔbɩ tu a cɔna Lea a cã ɲɛ̃be; agɩpɩ Labã haa ɔɔ bikhɛr Rasɛl dɩ he. 29 Dɩ Labã kpa ɔɔ thɔ̃daar khebir Bɩɩla a ha ɔɔ bikhɛr Rasɛl a dɔ ɔɔ thɔ̃daar. 30 Dɩ Jakɔbɩ gba Rasɛl da n cɔna, dɩ a naarɛ a jɔ Lea. Dɩ a bire thɛɛ Labã yɛna makoɲɔ kpɩɩ wo.
Jakɔbɩɩ bɩsãsɔ \ref Khɩ 127.3; Jǝn 49.1-12
31 Mɔ̃ Thãgba Kɔ̃tɩn yɩɛnɩ dɩɩ do Jakɔbɩ na na Lea ga, a cʋgʋʋrɛ da n kɔ̃ bɩsana sɩ Rasɛl do kɔ̃bʋʋ. 32 Dɩ Lea hananɛ pɛmɛr a kɔ̃ kũubir a so: «Thãgba Kɔ̃tɩn yɩrɛ ɩ̃ dɩbara wur, nɛnɛ̃ɛkɛ ɩ̃ ko na na mɛr.» Dɩ a haarɛ ire Ribɛ̃. 33 Dɩ bir hana pɛmɛr wo a kɔ̃ kũubir, a so: «Thãgba Kɔ̃tɩn jɩrɛ ɩ̃ ko na na ma'; gɛr gɩ dɩ ha mɩ kũubir ʋrɛ wo.» Dɩ a haarɛ ire Simeyɔ̃. 34 Dɩ bir hana pɛmɛr wo a kɔ̃ kũubir a so: «Gekɛ wer dɩphã waa ɩ̃ ko na thɩɩn mɩ thɩɩra bã, gɩdonɩ kuuminǝ yẽther mɩ kɔ̃ haa». Gɛr gɩ dɩ wɩ haa ire Levɩ. 35 Dɩ bir hana pɛmɛr wo a kɔ̃ kũubir a so: «Gekɛ wer dɩphã, Thãgba Kɔ̃tɩn ma n khɩɩ mɛ̃.» Gɛr gɩ dɩ haa ire Juda, sa jɩɩl mɛ̃ aa n kɔ̃ bã.