28
1 Dɩ Ɩjakɩ wer Jakɔbɩ a bɔnaa sa kpãkpaanaa dɩɩ khɩɩr ka ayɩ: «Fa n he Kanãa dɩ khebir kpɩɩraka'. 2 Jala Padã-Aram dɩɩra afɩ thɩ kɔ̃tɩ̃ Betʋɛlɩ pa, ʋrɛ kɔnanɩ afɩ nɩ, a hɛ khɛr le, afɩ nɩɩ õkuun Labãa bikhɛrsɔra. 3 Thãgba Punone Fɛw Hɩ̃daar n bɔna fɩ, a hana fɩ bɩsana jɔɔ, fɩ le fɩ kuur fɩ do ca jɔjʋɔ. 4 Thãgba n hana fɩ Abɩrahamɩ bɔna ca, fɛrɛ na afɩ mǝlsɔ, gɩ do nɔɔ fɩ hɩ̃ dɩɩkɛra Thãgba hanɩ Abɩraham, kɛ fɩ tooronɩ gɩrɛ a ho bẽbe.» 5 Thale Ɩjakɩ cʋʋ Jakɔbɩ dɩ jal Padã-Aram, Betʋɛlɩ bikuun Labãa pa, kɛ dɔnɩ Aramɛ̃daar. Jakɔbɩ na ɔɔ õkuun Ejayuu nɩ Rebeka õkuun gɩ. 6 Ejayu yɩɛrɛ mɔ̃ Ɩjakɩ bɔnanɩ Jakɔbɩ sa cʋgʋʋ dɩ jal Padã-Aram a puno a he le khɛr; na mɔ̃ a sʋʋraanɩ aa a na n he Kanãa khebir kpɩɩraka'. 7 Dɩ mɛ̃ Jakɔbɩ nɩ ɔɔ thɩ na ɔɔ nɩ nũu a jal Padã-Aram. 8 Dɩ Ejayu yɩɛrɛ a jɩ dɩ Kanãa khɛra na n da ɔɔ thɩ Ɩjakɩra ga. 9 Dɩ le a jal Ɩsɩmayɛlɩ pa, kɛ dɔnɩ Abɩrahamɩ bikuun, a gba ɔɔ bikhɛr Mahalatɩ, kɛ dɔnɩ Nebajɔtɩɩ õkhɛr, a he, a bir ɓã wa khɛrsɔraale a kɔɔ hananɩ.Jakɔbɩ dǝǝlle a yɩ nãcelle \ref Oje 12.13; Jǝn 35.1-15; Jã 1.52; Rɔm 5.20.
10 Dɩ mɔ̃ Jakɔbɩ thenɩ Bɛɛrseba a gba da n jal Arã, 11 a daan pa bɩɛl dɩ wire lõ da n cɔ. Dɩ a phɩnɛ paarɩle sa gba boka bɩɛl a jǝǝro yʋʋ. 12 Dɩ a dǝǝlle a yɩ nãcelle dɩ gbuu thɩɩra sɩ ɔɔ yʋ jʋʋn dɩ ga n thʋ thãgbara ƴũu. Dɩ Thãgbaa thɔ̃thɔ̃ thusɔ n fʋ a jʋʋn sa kɛr na gbũ. 13 Sɩ dɩɩ do Thãgba Kɔ̃tɩn hale a jɩɩl ƴũu ɔɔ ƴɛra sa sʋʋraa: «Mɛr dʋɔn Thãgba Kɔ̃tɩn, kɛ dɔnɩ afɩ thɩ kɔ̃tɩ̃ Abɩrahamɩ Thãgba, na Ɩjakɩɩ Thãgba. Thɩɩkɛ fɩ phɩnɔnɩ, ma ha fɛr, fɛrɛ na afɩ mǝlsɔ. 14 Afɩ mǝlsɔ na ha therrera ga. Wa jɔrɛ na ho mɔ̃ thɩlãkobe n hanɩ thɩɩra. Anɩ dɩ na lɛɛrɛ na gba wi phã paar na wi lõ paar, gɩ gbana ka wire na n jalnɩ dɩ pɛ ɲɔ̃bɔɔ, na ka wire na n jalnɩ dɩ pɛ ɲɔ̃bɩlã. Fɛrɛ na afɩ mǝlsɔ na dɔ nɔɔ dɩ caar fɛw thɩɩraakɛ na 'lɛrɔ bɔnanɛ. 15 Mɛrɛ thɛthɛ hãa kha na fɛrɛ. Ma bɛr fɛr paar wo paar fɛʋʋkɛ fɩ n jalnɩ; ma bire na kɛrna fɩ na ɩna ɔ dɩɩrakɛra. Ma bo fɩ na fa ga, foo gɩrɛ mɩ so farnɩ otirǝ ma cʋʋ.»
16 Dɩ Jakɔbɩ jaa daanɔ a so: «Baalɛ na hala', Thãgba Kɔ̃tɩn har paarɩkɛ sɩ ma kɔɔ ja'.» 17 Dɩ maar fʋʋ dɩ so: «Paara n kʋrɛ maar ka! Thãgbaa cɔ gɩrakaa! Thãgbaa dɩ lõfonɔ gɩrakɛ mɛ̃!» 18 Dɩ Jakɔbɩ mãa ɩɩrɛ duuro phiphi, a gba bokaarɩlera a kɔɔ jǝǝronɩ yʋʋ, a gbuu dɩ jɩɩl gel, dɩ gba niin a deero yʋɔ. 19 Dɩ a dʋrɛ paarɩle ire Betɛl; kɩrʋ dʋɔn Thãgbaa cɔ. Sɩ cacara Luuji dɩɩle n kɔɔ do. 20 Dɩ Jakɔbɩ so nʋɔ ayɩ: «Ado Thãgba ha kha na mɛrɛ a bɛr mɩ hʋɛraakɛ mɩ gbanɩ, a ha mɩ dɩkɔ dɩ̃ kho, a ha mɩ kẽkena dɩ̃ to, 21 ado mɩ kɛr na bɔɔ ɩ̃ thɩɩ cɔ waa, Thãgba Kɔ̃tɩnna na dʋɔn ɩ̃ Thãgba. 22 Bokaarɩkɛra mɩ gbuuni gɩrɛ dɩ jɩɩl gel, ɔrra na dʋɔn Thãgbaa cɔ. Gɩrɛ fɛʋʋkɛ fa ha mɩnɩ ma tirore bɩɛl yʋɔra a na ha fɩ.