Ɩjakɩ bɔnanɛ ɔɔ bikuun Jakɔbɩ \ref Jǝn 25.21-24; Ebi 11.20; 12.16-17; 48.14, 17-20.
27
1 Ɩjakɩ tɩnɛ dɩ yinǝ vɔɔ, aa n yɩ bã. Dɩ a wer ɔɔ bikuun kɔ̃tɩ̃: «Ɩ̃ bi wei!» Dɩ Ejayu tu: «Mɛr kaa!» 2 Dɩ Ɩjakɩ sʋʋraa: «Mɩ tɩnɛ, ma jɩ wireekɛ ma khinǝ'. 3 Gba afɩ cɔ̃cɔl thɩ̃be, tʋʋ na thaa, a jalla hʋɔnɔ a ƴaalɛ nʋʋn ɛna. 4 Gbɛba bɔɔbɔɔ mɔ̃ mɩ n nanɩ a ha mɩ ɩ̃ kho sɩ ɩ̃ bɔna fɩ, sɩ a ɩ̃ bɔ dã ɩ̃ khi.» 5 Jaa Rebeka nɩɛrɛ gɩrɛ Ɩjakɩ n mɩɩnɩ ɔɔ bikuun Ejayu. Mɔ̃ Ejayu gbanɩ jal hʋɔnɔ a ƴaal nʋʋn a ɩna, 6 Rebeka sor ɔɔ bikuun Jakɔbɩra: «Mɩ nɩɛrɛ afɩ thɩ da n mɩɩna afɩ õkuun Ejayu aa: 7 a jalla ƴaalɛ nʋʋn ɛna a cɩa bɔɔbɔɔ mɔ̃ ɩnɩ n nanɩ, a ha nɩ ɩnɩ n kho sɩ ɩnɩ n bɔnaa Thãgba Kɔ̃tɩnɩ ƴɛra, sɩ a ɩnɩɩ bɔɔ dã ɩnɩ n khi. 8 Ɩ̃ bikuun, gɩrɛ ma so farnɩ nɛnɛ̃ pɛ nũu a cʋɛ otirǝ. 9 Jala fɔ bʋ ɓol bɔy yeɲɔ a ɛna ɩ̃ gbɛbɩ mɔ̃kɛra afɩ thɩ n nanɩ, 10 fɩ jalna fɩ ha afɩ thɩ a kho sɩ a bɔna fɩ sɩ a ɔɔ bɔ dã a khi.» 11 Dɩ Jakɔbɩ birse ɔɔ nɩ Rebeka: «Sobɔr gɩ wer, sɩ ɩ̃ õkuun Ejayu dor sũudaar, sɩ mɛrɛ ma hana suunǝ'. 12 Agakpaana' ɩ̃ thɩ na bǝǝr mer na hɩɩn, dɩ aa jɩ mɩ, a na yɩ mɩ fɩɩl nɛr, dɩ ma gbaar sʋ̃ɔ na heen ɩ̃ɩbara, ga do bɔnanɛ gɩ 'lo bã.» 13 Dɩ ɔɔ nɩ sʋʋraa: «Sʋɔna n heene mɛrɛ yaa ɩ̃ bikuun! Afɩda dʋɔn fɩ jala fɔ bʋ ɓola a ɛna ha mɩ dɔrɔɔm.» 14 Dɩ Jakɔbɩ jal a fʋlɛ pɔna ha ɔɔ nɩ dɩ gbɛbɩ mɔ̃kɛra ɔɔ thɩ n nanɩ. 15 Agɩpɩ dɩ Rebeka gba Ejayuu kẽkẽsɔɔkɛ ɓɔnanɩ a jɔ fɛw, kɛ hanɩ le cʋɔrɔ ɔɔ kɩrɔ, a to ɔɔ bikuun bu Jakɔbɩ; 16 sa gba bʋ ɓol lʋʋsɔra a parrʋʋ ɲɛ̃ɛ na fɔ kɩrrʋʋkɛ na hananɩ suunǝ'. 17 Agɩpɩ dɩ gba nʋʋna na buruukɛ a kɔɔ gbɛbɩnɩ, a thɛbɩ ɔɔ bikuun Jakɔbɩ.18 Dɩ Jakɔbɩ gba jalna ɔɔ thɩra a wɩɩ: «Baba?» Dɩ Ɩjakɩ tu: «Mɛr kaa! Fɛr amɛ gɩ yaa ɩ̃ bi?» 19 Dɩ Jakɔbɩ birse ɔɔ thɩ: «Mɛr Ejayu gɩ, afɩ caca bikuun. Mɩ cʋʋrɛ gɩrɛra fɩ so marnɩ. Ɩrɛ tɔɔ a khɔ nʋʋna mɩ ɩnanɩ sa bɔna mɩ.» 20 Dɩ Ɩjakɩ bule ɔɔ bikuun: «Mɔ̃ fɩ cʋʋ sa 'lɛ dapara thale yaa ɩ̃ bikuun?» Dɩ Jakɔbɩ birsee: «Afɩ Thãgbaakɛra dɔnɩ Thãgba Kɔ̃tɩn, ɔr ɓana mar.» 21 Dɩ Ɩjakɩ sʋʋraa: «Tɔ dana ɩ̃ bǝǝr fɩ ɩ̃ hɩɩn ado fɛr ɩ̃ bikuun Ejayu gɩ ger ɩ̃ jɩ.» 22 Dɩ Jakɔbɩ tɔ a dã ɔɔ thɩ Ɩjakɩ dɩ bǝǝru sa so: «Wire dor Jakɔbɩɩ wi, sɩ ɲɛ̃ɛ do Ejayuu ɲɛ̃.» 23 Ɩjakɩ na jɩ Jakɔbɩ ga, gɩdonɩ suune hale ɲɛɛna mɛmɛmɛ Ejayuu kha, dɩ bɔnaa. 24 Dɩ a bire bulee wo: «Fɛr ɩ̃ bikuun Ejayu gɩ gel bɛ?» Dɩ Jakɔbɩ tu: «Ɔɔ». 25 Dɩ Ɩjakɩ so: «Cʋɛ afɩ nʋ̃, ha mɩ, ɩ̃ kho, sɩ ɩ̃ bɔna fɩ.» Dɩ Jakɔbɩ cʋʋ a haa dɩ kho, a hanaa dakha taan dɩ ɲɔ. 26 Agɩpɩ dɩ ɔɔ thɩ Ɩjakɩ sʋʋraa: «Tɔ ɩna palla mɩ yaa ɩ̃ bikuun.» 27 Dɩ Jakɔbɩ tɔ dã a palʋʋ. Dɩ Ɩjakɩ nɩɛr Jakɔbɩɩ kẽkẽ phibi a bɔnaa thakɛ ayɩ:
«Fa yaa'! Ɩ̃ bikuun phibi na n hʋ̃ a ho
lɩɛkɛ Thãgba Kɔ̃tɩn bɔnanɩ.
28 Thãgba n hana fɩ ƴũu mɩ̃ɛ
na bɔnanɛɛkɛ thɛnɩ thɩɩra,
a bɔna afɩ bile na afɩ dɩvɛ̃ pha gɩ vǝ̃vĩǝ.
29 Dɔ caar fɛw na n do far thɔma,
ca kpala fɛw na n gburõkhune afɩ ƴɛra.
Dɔ afɩ omisɔ kɔ̃tɩ̃.
Afɩ õkuun bɩnɔsɔɔrakɛ na n gburõkhure afɩ ƴɛra.
Sʋɔn n 'le ʋrɛ n sɔna fɩnɩ,
Bɔnanɛ n 'le ʋrɛ n bɔna fɩnɩ.»
30 Ɩjakɩ bɔnanɛ Jakɔbɩ a pɩ. Mɔ̃ a hanɩ na the, dɩɩ do ɔɔ õkuun Ejayu ther hɔ̃ kpaar paar a dã. 31 Dɩ a gbɛbɩrɛ dakha ɔɔ nʋ̃ mɔ̃ ɔɔ thɩ n ƴaalnɩ a jalna a sʋʋraa: «Ɩ̃ thɩ, ɩrɛ gba nʋʋna mɩ ɩnanɩ a khɔ sa bɔna mɩ.» 32 Dɩ ɔɔ thɩ bulee: «Fɛr amɛ gɩ?» Dɩ Ejayu birsee: «Mɛr afɩ caca bikuun Ejayu gɩ.» 33 Dɩ Ɩjakɩɩ kpɩɛr ɲaɲaan koo da n jẽ kpakpakpa sa so: «Dɩ fa kɔɔ ɩnɩ pa', amɛ kɔɔ ɛna nʋʋn ha mɩ ya fɛɛ? Mɩ 'lire khor nʋʋn pɩ sa bɔnaa dɩ ga hɛl bã.» 34 Mɔ̃ Ejayu nɩɛnɩ ɔɔ thɩɩ thɩmɩɩle a ber hulẽbire dɩɩ khɩɩr ka, sa so ɔɔ thɩra: «Bɔna mɩnakɛ dakha yaa ɩ̃ thɩ.» 35 Dɩ Ɩjakɩ birsee: «Afɩ õkuun ɩnɛ a fɩɩl mɩ a tee afɩ bɔna.» 36 Dɩ Ejayu so: «Jaa ɔɔ irǝ wɩ haanɩ Jakɔbɩ, sobɔra gɩ ger koe! Balaɲɔ ha gɩrɛ a fɩɩl mɩnɩ. A kɔɔ teere ɩ̃ caca bikuun hʋ hana. Nɛnɛ̃ wo dɩ bir tee ɩ̃ bɔna.» Agɩpɩ dɩ bir bule: «Dɩɩ do fa sɩ bɔnanɛna gberakɛ a thɩɩn ma'?» 37 Dɩ Ɩjakɩ birsee: «Hɩnɛ, mɩ pɩɛraarɛ dɩ 'li do far kɔ̃tɩn, a haa ɔɔ õkũusɔ fɛw, wɩ dɔ ɔɔ thɔ̃dara, a hanaa kokol thɩ̃ɛ fɛw, na dɩvɛ̃, dɩ aɲe ma puno na cʋʋ far 'lo yaa ɩ̃ bikuun?» 38 Dɩ Ejayu bir bule ɔɔ thɩ: «Bɔna bɩɛlla dɩbara fɩ hana yaa ɩ̃ thɩ? Bɔna mɩ dakharakɛ yaa ɩ̃ thɩ, sa ma da n khɩɩ sɔsɔsɔ.» 39 Dɩ ɔɔ thɩ Ɩjakɩ sʋʋraa:
«Fe wer,
afɩ too pa na 'leere bɔnanɛɛkɛ thɛnɩ thɩɩra
na ƴũu mɩ̃ɛ.
40 Afɩ bajɩna na n haanɛ fɩ.
Afɩ õkuunɩ thɔ̃daar fa do.
Sɩ a fɩ lã,
fa forre kpeleleekɛ a to fɩnɩ fʋɔrɔ na dʋna.
Ejayu gbananɛ Jakɔbɩ laarɛ.
41 Dɩ Ejayu gbana Jakɔbɩ laarɛ dɩɩ do bɔnanɛɛlera ɔɔ thɩ bɔnanɩ Jakɔbɩ dɔ kɩrʋ. Dɩ a n bʋʋnaanɛ aa a ɩnɩɩ thɩ khi dawi, foo ɩnɩ n kʋ ɩnɩɩ õkuun bu Jakɔbɩ. 42 Dɩ wɩ mɩɩrɛ Rebeka thɩmɩalera fɛw ɔɔ bikuun kɔ̃tɩ̃ Ejayu n mɩɩnɩ. Dɩ Rebeka we ɔɔ bikuun bu Jakɔbɩ a sʋʋraa: «Fa yɩ gaa, afɩ õkuun n ƴaalɛ a kʋ fɩ a tiir helu.» 43 Gɛr gɩ nɛnɛ̃ jɩɛ pɛ nũu gɩrɛ ma so farnɩ dɛ! A fɩ jɩ ca jala ɩ̃ õkuun Labãa pa, Arã dɩɩra a wɔna. 44 Tɔɔ le bɔɔ gbe afɩ õkuunɩ nĩkhi n ie. 45 Ɔbɔɔkɛ afɩ õkuunɩ nĩkhi ieni, dɩ diinǝ gɩrɛ fɩ cʋgʋʋnɩ, ma thʋ̃ɔ dɩ fa ɩ̃. Aɲera ma 'lee nɛr yeɲɔ fɛw wi bɩɛl?
Jakɔbɩ car jal ɔɔ jẽ Labãa pa Aram dɩɩra \ref Jǝn 27.41-46; 24.1-10; 26.34-35; 36.1-5
46 Dɩ Rebeka so Ɩjakɩra: «Ɩtɩ kheminǝǝda thʋnɛ yaa mɩ waa ga do kpãkpalã ga. A Jakɔbɩ bir he gaa dɩ khebi casɔɔkɛ dɔnɩ Hɛtɩɩ mǝlǝ wo, aɲe ma too dɩɩra na do 'lo?»