Thãgba bɔnanɛ Ɩjakɩ. \ref Jǝn 28.13-15; Jǝn 12.10-20; 20.
26
1 Kɔmɛr kɔɔ jire dɩɩra, a ho kɔmɛr ʋrɛ kɔɔ jenɩ Abɩrahamɩ bɔɔ. Dɩ Ɩjakɩ jal Gera, Abɩmelɛkɩɩ pa, kɛ dɔnɩ Fɩlɩsɩtɛ̃sɔɔ jamana. 2 Dɩ Thãgba Kɔ̃tɩn nɩna ɔɔbara Ɩjakɩ a sʋʋraa: «Fa n jal Ejipiti dɩɩra ga, sɩ tɔɔ dɩɩraakɛ ma so farnɩ. 3 Tɔɔ ɔ dɩrakɛra, ma har kha na fɛrɛ, ma bɔna fɛr. Fɛrɛ na afɩ mǝlsɔ ma ha dɩɩkɛ gɩdonɩ gɩrɛ mɩ ʋlfɛnanɩ afɩ thɩ Abɩraham ma cʋʋrɛ ɔmɛna. 4 Ma cʋʋrɛ afɩ mǝlsɔ dɩ wa ler na ho mɔ̃ ƴepǝlǝ̃be hanɩ ƴũu; afɩ mǝl ma ha dɩɩsɔɔkɛ koo. Afɩ mǝlsɔɔra caar fɛw thɩɩraakɛ na 'lɛ bɔnanɛ; 5 gɩdonɩ Abɩraham nɩ mɛr nũu, a hɩɩna ɩ̃ so, na ɩ̃ thɩmɩɩsɔ, na ɩ̃ jɔfʋsɔ.» 6 Dɩ mɛ̃ Ɩjakɩ too le Gera.7 Ɔbɔɔkɛ dɩdara n buleenɩ aa, ɔɔ khɛr ha Rebeka ya? Dɩ so, ɩnɩɩ õkhɛr gɩ. Aa n 'la na so ɩnɩɩ khɛr ga. Maar fʋɔnɛɛ mɔ̃ dɩdaraale na kʋʋnɩ, gɩdonɩ Rebeka thʋnɛ bɔr ka. 8 Mɔ̃ Ɩjakɩ toonɩ le da n pʋɔr, Abɩmelɛkɩ, Fɩlɩsɩtɛ̃sɔɔ jamana na hɩɩnɛ wi bɩɛl na fɛnɛtɩrɩ a yɩɩ da n ɓolna ɔɔ khɛr Rebeka. 9 Dɩ Abɩmelɛkɩ wɩɩ a sʋʋraa: «Jaa afɩ khɛr gɩ koe! Mɔ̃gɩdo dɩ fɩ kɔɔ so yɩ afɩ õkhɛr gɩ?» Dɩ Ɩjakɩ birsee: Maar kɔɔ fɔ mɩ dɩ̃ so, a mɛ̃ ga wa kʋ mɛr khaar ɔɔ sora.» 10 Dɩ Abɩmelɛkɩ sʋʋraa: «Aɲe fɩ cʋʋ sɩ thaa gɩ dɔ? Gbe fɩɩʋ sɛra, sɩ gɩ do ɩ̃ tibil ʋkha kɔɔ gbaar afɩ khɛr, gɩ dora dɩpa kʋkʋʋ fɩ to sɩ.» 11 Liir Abɩmelɛkɩ thɔna thɩmɩɩ khɩɩr ɔɔ toora fɛw ayɩ: Tibil wo tibillikɛ na tharnɩ kuunnaakɛ na ɔɔ khɛra, wɩ kʋɔ.
12 Ɩjakɩ kʋʋlɛ ɔ dɩraalera a toonɩ a gba thɩ̃ɛ ga yɛ dɩɩ vǝ̃vĩǝ gɩdonɩ Thãgba Kɔ̃tɩn bɔnaanɛ. 13 Mɛna a n 'lɛ thɩ̃ɛ bɔɔ fɛw a thʋ̃ ɩ̃ a do lẽledaar kpɩɛ. 14 Ɩjakɩ hananɛ nʋma jɔɔ ka; nʋ̃ yɩra na nʋ̃ kɔ̃tɩna fɛw, a hanana dakha thɔ̃dara tǝ̃tǝ̃tǝ̃, dɩ Fɩlɩsɩtɛ̃sɔ tha thʋnɔ sa gbanaa gbugi.
15 Biresɔɔkɛ ɔɔ thɩ Abɩrahamɩ thɔ̃dara kɔɔ kpeni, Fɩlɩsɩtɛ̃sɔ jaal a kpa thɩn a ɓɔrna fɛw a faa. 16 Le Abɩmelɛkɩ so Ɩjakɩra: «Thɛ asɩ dʋɔ gɩdonɩ fɩ thʋnɛ 'lɛ fãga a jɔ sɩ fĩi.» 17 Dɩ Ɩjakɩ ther le a jal dʋ ɔɔ kẽkẽ wa Gera ɓɛlɛnɔ a tooro le. 18 Dɩ Ɩjakɩ bir khɩɛl biresɔɔkɛ wɩ kɔɔ kpeni ɔɔ thɩ Abɩrahamɩ bɔɔ, gɩdonɩ bɔɔkɛ Abɩraham khini pɩ, Fɩlɩsɩtɛ̃sɔ jaal a ɓɔr faa. Dɩ a khɩɛlɛ a bir 'laa i tɩnaakɛra ɔɔ thɩ Abɩraham kɔɔ 'laanɩ. 19 Bɔ bɩɛl, Ɩjakɩɩ thɔ̃dara bire kpe bir bɩɛl ɓɛlɛnɔ a cu mɩɩ nɔɔra. 20 Dɩ Gera nʋ̃ khedara na n ƴaal Ɩjakɩɩ nʋ̃ khedara sʋʋ aa, ɩnɛr hɩna ɲʋɔn, dɩ Ɩjakɩ 'laa bireelee i: «Esɛkɩ», dɩɩ do sʋʋlera wɩ ƴaalʋʋnɩ dɔ kɩrʋ. 21 Dɩ Ɩjakɩɩ thɔ̃dara bir kpe bir kpɩɩ wo, dɩɩ bir hana sʋʋra wo. Dɩ Ɩjakɩ 'laa ire: «Sɩtɩna.» 22 Dɩ Ɩjakɩ ɩɩr le a jal pa kpɩɩ a kpe bir bɩɛl, kɛ na hananɩ sʋʋ bã, dɩ so: «Thãgba Kɔ̃tɩn cʋʋ sɛr dɩ sɩ yɩ nɛ lãasɛ paar, sɩ thʋ̃ sɩ hɩɩr dɩɩra dɩphã mɛ̃. Dɩ 'laa ire: «Rehobɔtɩ.» 23 Dɩ a ther le a jal Bɛɛrseba dɩɩra. 24 Dɩ Thãgba Kɔ̃tɩn nɩnaa ɔɔbara ga dɩtɩnɔɔle a sʋʋraa:
«Mɛr dʋɔn afɩ thɩ Abɩrahamɩ Thãgba.
Fa n do maar n fʋ fa; gɩdonɩ mɩ har kha na fɛrɛ.
Ma bɔna fɛr, ma cʋʋrɛ dɩ afɩ mǝlsɔ na ler a na jɔr
gɩ do ɩ̃ thɔ̃daar Abɩraham dɔ kɩrʋ».
25 Dɩ Ɩjakɩ mɩ liir bonɩ ji paar a we Thãgba Kɔ̃tɩnɩ i. Dɩ a dʋrɛ liir ɔɔ kẽkẽ wasɔ, dɩ ɔɔ thɔ̃dara bir kpe bir kpɩɩ wo.
Ɩjakɩɩ nɔ bɩɛl ʋlfɛ na Abɩmelɛkɩ, Gera jamana \ref Khɩ 112.1-3; Jǝn 21.22-34; Sokp 16.7; Mat 5.5
26 Dɩ Abɩmelɛkɩ the Gera na ɔɔ kuun Ahuja, na ɔɔ sɔrasɩsɔɔ kɔ̃tɩ̃ Pɩkɔl a jal Ɩjakɩɩ pa. 27 Dɩ Ɩjakɩ bule wɩ: «Kana nɩ the mar wo, ner n laar mɩnɩ a wee mɩ anɩ dʋɔ?» 28 Dɩ wɩ birsee: «Sɩ jɩrɛ Thãgba Kɔ̃tɩn har kha na fɛrɛ gɛr gɩ dɩ sɩ so gɩ bɔrɛ ʋlfɛrɛ n ha asɩ thɩ̃thɩɩn, fɛrɛ na sɛrɛra. Gɛr gɩ dɩ sɩ ɩ̃ sɩ ʋlfɛnɛ kha nɔ bɩɛl ʋlfɛrɛ. 29 Ʋlfɛnɛ yɛ fa cʋʋ sɩ puurǝ', gɩdonɩ sɛrɛ dakha sa kɔɔ cʋʋ fɩ puurǝ'. Sɩ kɔɔ cʋʋ fɛr bɔɔ a faa fɩ dɩ fɩ jal na ha ɩɩ. Fɛr dʋɔn ʋrɛɛkɛ Thãgba Kɔ̃tɩn bɔnanɩ vʋ̃ʋ. 30 Dɩ Ɩjakɩ cʋʋ wɩ fɛtɩ dɩ wɩ kho dɩkɔ a ɲɔna. 31 Dɩ wɩ mãa ɩɩrɛ duuro phiphiphi a ʋlfɛ kha, agɩpɩ Ɩjakɩ pɛ wɩ hʋɛ dɩ wɩ kɛr bir na ha ɩɩ.
32 Ga wiilera Ɩjakɩɩ thɔ̃dara pɔ a mɩgʋʋ bireekɛ wɩ kɔɔ kpenɩɩda aa, ɩnɩ 'lire ɲʋɔn. 33 Dɩ Ɩjakɩ 'laa ire: Sibea, gɛr dɔ kɩrʋ dɩ wa n we dɩɩle Bɛɛrseba a dana nĩikɛ.