Abɩrahamɩ khi. \ref 1 Kur 1.32-33; Jǝn 35.28-29; 49.29-33
25
1 Dɩ Abɩraham bire he khɛr bɩɛl wo da n do Ketura. 2 Dɩ Abɩraham kʋɔnaanɛ kuuminǝ, wɛr ha wɩrɛ: Jɩmɩrã, Jokɩsã, Medã, Madɩ̃a, Jisebakɩ na Sua. 3 Dɩ Jokɩsã kɔ̃ Saba na Dedã. Dɩ Dedãa məlsɔ dʋɔn Asuursɔ, Letusisɔ na Lehumɩsɔ. 4 Dɩ Madɩ̃a gba kɔ̃ Efa, Efɛɛr, Hanɔkɩ, Abɩda, na Ɛlda. Keturaa bɩsãsɔ ha wele fɛw.5 Abɩraham gbaar ɔɔ thɩ̃ fɛw a ha Ɩjakɩ. 6 Sɩ bɩsã wɩrɛ a kɔnɩ ɔɔ wɛdaarsɔra, a ha wɛr khaardaa. Agɩpɩ dɩ mãa hɛl war ɔbɔɔkɛ aa khini pa', a cʋʋ wɩ dɩ wɩ jal dɩ kpɩɩra ƴɔɔ fĩi, wi phã paar, wɩ hʋnɔna Ɩjakɩ. 7 Abɩraham yɛnɔɔkɛ a hananɩ fɛw har, yɛna tamaa na kpalãther yʋɔr yemɔy (175). 8 Agɩpɩ dɩ khi. Abɩraham kɔɔ tɩnɛ; a toore dɩɩra na daw a dã thu, sa gbũ ɔɔ thɩ kɔ̃tɩ̃sɔraakɛ kɔɔ khiireni. 9 Dɩ ɔɔ bikũusɔ: Ɩjakɩ na Ɩsɩmayɛl dʋʋ boka kaarakɛ hanɩ Makɩpela, Mamire bǝǝnnǝ, Sohaar bikuun Efʋrɔ̃ɔkɛ dɔnɩ Hɛtɩɩ mǝlɩ thɩra. 10 Ɔr dɔ lɩɛɛkɛ Abɩraham kɔɔ thenɩ Hɛtɩɩ mǝlsɔɔra. Le wɩ dʋ Abɩraham na ɔɔ khɛr Sara. 11 Mɔ̃ Abɩraham khinɩ pɩ, Thãgba bɔnanɛ ɔɔ bikuun Ɩjakɩ. Lahaɩ-Rʋaɩ bir nʋɔra Ɩjakɩ kɔɔ too.
Yɛkɛ Abɩrahamɩ bikuun Ɩsɩmayɛlɩ mǝlsɔ. \ref 1 Kur 1.28-31; Jǝn 17.20; 21.17-21 Yɛkɛ Abɩrahamɩ bikuun Ɩsɩmayɛlɩ mǝlsɔ:
12 Yɛkɛ Abɩrahamɩ bikuun Ɩsɩmayɛlɩ mǝlsɔ: Ɩsɩmayɛlɩkɛ dɔnɩ ʋrɛ Abɩraham kɔnɩ Agaarra; Saraa dee khɛr gɩɩkɛ thɛnɩ Ejipiti. 13 Yɛkɛ Ɩsɩmayɛlɩ bikũusɔɔ isɔ na awɩ thɩ kɔ̃ jɔfʋsɔ: Nebajɔtɩ dʋɔn Ɩsɩmayɛlɩ caca bikuun. Dɩ wɩrɛ kpaaraanɩ ha wɩrɛ: Kedaar, Adɩbeyɛl, na Mɩbɩsã, 14 Mɩsɩma, Duma, Masa, 15 Ada, Tema, Yetur, Nafɩsɩ na Kedɩma. 16 Wɛr dɔ Ɩsɩmayɛlɩ bikũusɔ na awɩ isɔ kpakha kpakha. Kɔ̃tɩna yʋɔr yeɲɔ wɛ. Ʋ do kɔ̃tɩ̃ ɔɔ mǝllǝ na ɔɔ dɩ kpulõbirǝ na ɔɔ dɩ gbulona, dɩ wɩ gbaar awɩ i a ha awɩ dɩsɔ. 17 Ɩsɩmayɛlɩ yɛ fɛʋʋkɛ a cʋʋnɩ sa khi har yɛna tamaa na kpelẽ yʋɔr makoɲɔ (137). Agɩpɩ dɩ gbũ ɔɔ thɩ kɔ̃tɩ̃sɔraakɛ kɔɔ khiireni. 18 Ɩsɩmayɛlɩ mǝlsɔ toore Havɩla bǝǝnnǝ a jalna dana Suur bǝǝnnǝ, kɛ hanɩ ka Ejipiti dɩɩ pɛnɩ ƴɩɛ, mɔ̃ fa n jalnɩ Asiri. Wɩ leere awɩ omɩsɔɔra kpɩɩ a too kǝli.
Yɛkɛ Ɩjakɩɩ mǝlsɔ \ref Rɔm 9. 10-13; Jǝn 38.27-30; Ebi 12.16-17
19 Yɛkɛ Ɩjakɩɩkɛ dɔnɩ Abɩrahamɩ bikuunɩ mǝlsɔ. Abɩraham kɔna Ɩjakɩ. 20 Yɛna kpalaɲɔ Ɩjakɩ kɔɔ hana sa he Rebeka, Labãa õkhɛr. Betʋɛlɩkɛ dɔnɩ Aramɛ̃daar, kɛ thɛnɩ Padã-Aram, ɔɔ bikhɛr gɩ. 21 Ɩjakɩɩ khɛr Rebeka kɔɔ dor kɔ̃bʋʋ, dɩ Ɩjakɩ bɩɛl Thãgba Kɔ̃tɩn a bullo ɩnɩɩ khɛr. Dɩ Thãgba Kɔ̃tɩn pɛr Ɩjakɩɩ bɩɛl nũu, dɩ ɔɔ khɛr Rebeka hana pɛmɛr. 22 Dɩ bɩsana na n thʋʋr kha awɩ nɩɩ bɩnɔ. Dɩ Rebeka so: «Aɲe n cʋɛ mɩ thaa ya fɛ?» Dɩ a jaal a bule Thãgba Kɔ̃tɩn. 23 Dɩ Thãgba Kɔ̃tɩn sʋʋraa:
«Caar yeɲɔ hãa afɩ bɩnɔ.
Caar yeɲɔ na leere kha awɩ kɔ̃ bɔɔ.
Ca bɩɛl na hananɛ fãga a na jɔ bɩɛl.
Ʋrɛɛkɛ dɔnɩ kɔ̃tɩn na fien na do diinee dee.»
24 Mɔ̃ Rebekaa bi kɔ̃ bɔ danɩ, dɩɩ do biƴɔna gɩ. 25 Dɩ cacadaar ther a sɩɛr kpakpakpa, sa hana suune mɛmɛmɛ a ho sũu kẽkɩɩn; gɛr dɔ kɩrʋ dɩ wɩ haa ire Ejayu. 26 Dɩ ɔɔ õkuun bu kpaan dɩ ɔɔ ɲɔ̃ ha Ejayuu nɔtilə̃tirə dɩ fʋ fʋrɔ; gɛr dɔ kɩrʋ dɩ wɩ haa ire Jakɔbɩ. Yɛna kpalãther Ɩjakɩ kɔɔ hana awɩ kɔ̃ bɔɔ.
Ejayu na Jakɔbɩ \ref Ebi 12.16
27 Dɩ bɩsanana ɩ̃ a khɔ̃. Dɩ Ejayu do cɔ̃cɔl kpɩɛ, da n kpaar hɔ̃ haar. Sɩ Jakɔbɩ wer ha sʋmʋmʋ da n too cʋɔrɔ. 28 Ɩjakɩ kɔɔ nar Ejayu jɔɔ ka, gɩdonɩ a nar nʋʋn. Sɩ Rebeka na Jakɔbɩ.
29 Wi bɩɛl Jakɔbɩ kɔɔ har bi ƴɔ̃ cʋʋrɔ dɩ Ejayu the hɔ̃ kpaar paar a ɩ̃, a vɔɔ dɩɩ kaaraa. 30 Dɩ a sor Jakɔbɩra: «Sɛ mar ɩ̃ kho afɩ diko sɛ khǝ̃ǝkhǝǝnǝ gbe gɩdonɩ ma n bɔra'.» Gɛr dɔ kɩrʋ wɩ hanɩ Ejayu ire Edɔ̃; kɩrʋ dʋɔn: dasɩɛ. 31 Dɩ Jakɔbɩ birsee: «Kɔɔ dolone mar nĩikɛ afɩ caca bikuunɩ hʋ hana ɓo.» 32 Dɩ Ejayu tu: «Aɲee bɔ caca bikuun hʋ hananɛ na taa mɩ na kɔmɛr n lɩɛrɛ mɩnɩ?» 33 Dɩ Jakɔbɩ bir so: «Ʋlfɛnɛna mɩ ɓo.» Dɩ Ejayu ʋlfɛ, a debɩna ɔɔ caca bikuun hʋ hana Jakɔbɩra. 34 Le Jakɔbɩ ha Ejayu buru na bi ƴɔ̃ɔkɛ a cʋʋnɩ na thɩ̃ɛkɛ hɔnɩ hɛ. Dɩ kho a ɲɔna sa ɩɩr jal, sɩ aa therna ɔɔ caca bikuun hʋ hana dɩɩ dʋʋraa thɩ̃a'.