Abɩraham ther thɩɩ a dʋrɔ ɔɔ khɛr \ref Jǝn 25:7-10; 49:29-32; 2 Sam 24.20-24; Jer 32.8-12
23
1 Saraa yɛ fɛʋʋkɛ a cʋʋnɩ sa khi har: yɛna tamaa na kpelẽ makoɲɔ. 2 Sara khire Kɩrɩyatɩ-Arba dɩɩra kɛ dɔnɩ Ebʋrɔ̃, Kanãa dɩɩra. Dɩ Abɩraham cʋʋrɛ Saraa be, a bɩɩ na sobɔr. 3 Agɩpɩ, Abɩraham faa khire sa ɩɩr a jal mɩɩna Hɛtɩɩ mǝlsɔ a yɩ 4 «Kpakpal ha mɩ dɩ̃ too anɩ thɩ̃thɩɩn; nɩ ha mɩ thɩɩ anɩ pa, ɩ̃ puno ɩ̃ hɛl ɩ̃ khi ɩ̃ dʋ.» 5 Dɩ wɩ birsee ayɩ: 6 «Thãgba thɩnɛ fɩ dɩ fɩ do nũfe asɩ thɩ̃thɩɩn. Ka ʋrɛ dãa farnɩ asɩ kasɔɔra, phire a dɔrɔ afɩ khɛr. Tibil na hakɛ asɩ thɩ̃thɩɩn a na tɔ̃ fɩ ɔɔ ka fa n dʋrɔ afɩ khɛr khenaa ga.» 7 Dɩ Abɩraham sʋr sa fʋɔr na sobɔr Hɛtɩɩ mǝlsɔɔle kɛ dɔnɩ dɩdara. 8 Dɩ a mɩɩna wɛr ayɩ: «Ado ha bʋɔ nɩ tunǝ ɩ̃ hɛlla ɩ̃ khɛr a dɔ, mɩ n bɩɛl nɛr dɩ na phʋʋr Efʋrɔ̃kɛ dɔnɩ Sohaar bikuun, 9 dɩ a na ha mɩ ɔɔ thɩɩkɛ hanɩ Makɩpela na boka kaarɩkɛ hanɩ le. A dolone mar yemɔ̃ ɔɔ thenɔ hanɩ gɩ do ɩ̃ khi dʋ pa anɩ thɩ̃thɩɩn.» 10 Efʋrɔ̃ɔkɛ dɔnɩ Hɛtɩɩ mǝl kɔɔ hale ɔɔ too na dɩdara fɛʋʋ thɩ̃thɩɩn a too dɩ lõfonʋɔra. Dɩ birse Abɩraham awɩ ƴɛra: 11 «Ɩ̃ kɔ̃tɩn waa, mɛ̃ ga, pɛ nũu: mɩ n ha fɛr thɩɩra na boka kaarɩkɛ harɔnɩ. Mɩ n ha fɛr ɩ̃ tookɛɛ ƴɛra fɛw. Dɔrɔ afɩ khɛr.» 12 Dɩ Abɩraham sʋr dɩdaralee ƴɛra wo sa fʋɔr wɩ. 13 Dɩ bir so Efʋrɔ̃na, dʋɔdara fɛʋʋ ƴɛra ayɩ: «Mɩ n bɩɛl fɛr dɩ fa pɛ mɩ nũu dakha: To ɩ̃ ha fɩ thɩɩ the nɔ sɩ ɩ̃ dʋrɔ ɩ̃ khɛr.» 14 Sɩ Efʋrɔ̃ birse Abɩraham aa: 15 «Ɩ̃ kɔ̃tɩ̃ waa, warbe taanã thɩɩ gɩ, sɩ aɲe gele do fɛrɛ na mɛrɛra? Dɔ afɩ khɛr!» 16 Dɩ Abɩraham tu Efʋrɔ̃ɔda, a mɩɛ war nʋɔkɛra a wenɩ a haa ɔɔ too Hɛtɩɩ mǝlsɔɔ ƴɛra. Yabɩ hʋɛra, warbe taanã gɩ mɔ̃kɛ ƴaƴabaa war mɩɛ hanɩ. 17 Mɛ̃ Efʋrɔ̃ɔ thɩɩkɛ hanɩ Makɩpela Mamire khʋra na boka kaarɩkɛa hanɩle lɔɔ na thɩra fɛʋʋkɛ hanɩ lɛ bɩnɔ, 18 debi a do Abɩrahamɩda. Hɛtɩɩ mǝlsɔ, kɛ dɔnɩ wɩrɛ fɛʋʋkɛ kɔɔ hanɩ le dɩ lõfonʋɔra kɔɔ yɩɛrɛ na yire. 19 A gele pɩ Abɩraham dʋrɛ ɔɔ khɛr Sara boka kaarakɛ hanɩ Makɩpela Efʋrɔ̃ɔ thɩra, Mamire khʋra, kɛ dɔnɩ Ebʋrɔ̃, Kanãa dɩɩra. 20 Mɛ̃ thɩɩle Abɩraham thenɩ Hɛtɩɩ mǝlsɔɔra na boka kaarɩkɛ harɔnɩ too a do ɔɔ khi dʋ pa.