Abɩraham jaal a too Negɛvɩ bǝǝnnǝ gbe. \ref Jǝn 12.10-22; 26.1-11; Khɩ 105.12-15
20
1 Dɩ Abɩraham ther le a jal Negɛvɩ bǝǝnnǝ, a too Kadɛsɩ na Suur thɩ̃thɩɩn. Agɩpɩ dɩ gba jal too Gera dɩɩra gbe. 2 Abɩraham n kɔɔ mɩɩrɛ aa, ɩnɩ õkhɛr ha Sara. Dɩ Abɩmelɛkɩɩkɛ dɔnɩ Gera jamana thɔ̃ a tee Sara. 3 Le Thãgba nɩna ɔɔbara Abɩmelɛkɩra dǝǝlela dɩtɩnɔ a sʋʋraa: Fa khire gɩdonɩ khɛrɩkɛ fɩ teenɩ, kũudaar gɩ. 4 Abɩmelɛkɩ na kɔɔ dã Sara kpɩɩraka'. Dɩ Abɩmelɛkɩ so: «Fa kʋrɛ tibiliikɛ na cʋɛnɩnakɛ puurǝǝ bɛɛ Kɔ̃tɩnɩ? 5 Abɩrahamɩ thɛthɛ na so mar ayɩ ɩnɩ õkhɛr gɩ dɩ Sara dakha so, ɩnɩ õkuun gaa? Ha bʋɔ mɩ cʋʋna ga do ɩ̃ dɩpa ga.» 6 Dɩ Thãgba birsee dǝǝlelala ayɩ: «Mɛrɛ dakha, mɩ jɩrɛ bɔɔbɔɔ dɩ ha bʋɔ fɩ cʋʋna, gɛrra dɔ kɩrʋ mɛrɛ thɛthɛ pɩɛr fɩnɩ fa n cʋʋ mar puurǝ', gɛr gɩ dɩ ma sɩ far dɩ fɩ thaaraa ga. 7 Nɛnɛ̃kɛ, 'laanɛ kuuni khɛra hanaa gɩdonɩ Thãgbaa mɩmɩɩ gɩ, a na bɩɛlɛ Thãgba na pɛ far dɩ fa le. Sɩ a fa 'laa khɛra', jɛna fɛrɛ na afɩ cɔka na thɩ̃ɛ fɛʋʋkɛ fɩ hananɩ na khiire.» 8 Dɩ Abɩmelɛkɩ ɩɩrɛ duuro phiphiphi a we ɔɔ thɔ̃dara, a mɩɛ wɩ thɩ̃ɛɛlera fɛw. Dɩ ma kɔ̃tɩ̃ɩ fʋlɛ tɩbɩlaale jɔɔ ka. 9 Dɩ Abɩmelɛkɩ wer Abɩraham dakha a bulee: «Aɲe fɩ cʋʋ sɩ thaa gɩ dɔ? Aɲee puu ca mɩ cʋʋ fɩrakɛ dɩ fa n to mɩ mɛrɛ na ɩ̃ fãga dɩ fɛw sopuu kʋkʋʋraakɛ? Cʋʋ pa caarrɩkɛ fɩ cʋʋnɩ, wa n do mã dɛ!» 10 Dɩ bir bulee wo: «Aɲee kpɩɛr ca wer fɩ hana sa cʋʋ thɩɛna thakɛ?» 11 Dɩ Abɩraham birsee: «Ɩ̃ kpɩɛr dʋɔn: Thãgba maar na hakɛ paarɩkɛ fɩɩʋraka'. Dɩ wa kʋ mɛr gɩ do ɩ̃ khɛr dɔ nɔɔ.» 12 Sɩ kho bɩɛl wo, ɩ̃ õkhɛr gɩ sobɔr; gɩdonɩ thɩ bɩɛl kɔna sɩ, sɩ nɛ hãa dɩɩdɩɩ, dɩ̃ gbaa a he. 13 Ɔbɔɔkɛ Thãgba ti mɩnɩ ɩ̃ thɩɩ cɔ dɩ ma n kpaar gɛr mɩ sʋʋraa ayɩ: «Bɔ bɩɛl dɩbara mɩ n ƴaal fɩ cʋɛ mar, gɛr dʋɔn paar wo paarɩkɛ sɩ n jalnɩ, sɔ yɛ afɩ õkuun ha mɩ.» 14 Dɩ Abɩmelɛkɩ ha Abɩraham nʋ̃ yɩra na nʋ̃ kɔ̃tɩna, thɔ̃daar kona na thɔ̃daar khɛra, a hanaa dakha ɔɔ khɛr Sara. 15 Abɩmelɛkɩ so Abɩrahamɩna: «Hɩnɛ, ɩ̃ dɩra ha ʋrɛ fɩ yɩnɩ, tɔɔ kãkɛ dãa farnɩ.» 16 Agɩpɩ dɩ so Sarara: «Mɩ n har afɩ õkuun dɛ bulo be gbɩlanɩ, gɛr dɔ jɩɩnɩɩkɛ na nɛnanɩ tɩbɩla fɛʋʋkɛ hana fɩnɩ kha dɩ fa hana dɩɩ thɩmɩɩraakɛ wɩ kʋɛ fɩ irǝ'. 17 Dɩ Abɩraham bɩɛl Thãgba dɩ kpɛɛ Abɩmelɛkɩ na ɔɔ khɛr na ɔɔ thɔ̃daar khɛrsɔ dɩ wɩ puno a bir kɔ̃ bɩsana. 18 Abɩrahamɩ khɛr Saraada kɔɔ dor nɔɔ dɩ Thãgba Kɔ̃tɩn gba kõbore a bena Abɩmelɛkɩɩ cɔdara fɛw.