Mɔ̃ thɔ̃thɔ̃daar thusɔ jalnɩ a bũburõ Sodɔm na Gomɔɔr dɩɩ
Lotɩɩ thɩmɩɩr \ref Ebi 13.2; Jǝn 18; Eje 16.49-50; So.19
19
1 Thɔ̃thɔ̃ thui yeɲɔɔle daan Sodɔm dʋɔrɔ. Lɔtɩ kɔɔ hale a too Sodɔm dɩ lõfonʋɔra. Dɩ ɔbɔɔkɛ a yɩ wɩnɩ a ɩɩrɛ a cãa wɩ a sʋr thɩɩra. 2 Agɩpɩ dɩ so: «Ɩ̃ kɔ̃tɩ̃sɔ, mɩ n bɩɛl nɛr, nɩ ɩna mɛr anɩ thɔ̃daarɩ cɔ a cɔcɔɔnɛ nɛɛ, sa cɔ le, a dɩɩ wɩl duuro nɩ gba anɩ hʋ na n jal». Dɩ wɩ birsee: «Kpeɩ! Sa jaal a na cɔ jɩɛra.» 3 Sɩ Lɔtɩ fɛrɛ wɛr dɩ wɩ tha thʋnɔ sa kɛr bir ɔɔ cɔ. Dɩ a ti wer kpakpaalɛ. Dɩ wɩ cʋʋrɛ buruukɛ na hananɩ tabɩra', a ha wɩ dɩ wɩ kho.4 Wa phɩɩnakɛ pa', sɩ Sodɔmdara, kona dɩɩraale fɛw, dii cʋɔrra. Daɓola a gba kũu kpɛɛna ɓibi kɛ thɛnɩ dɩ seere dɩɩ dɩɩra. 5 Dɩ wɩ wer Lɔtɩ a bulee: «Kana konaakɛ lonanɩ afɩ cɔ dʋɔrɔɔkɛ ha? Te wɩ, wɩ thɩɩr sɩ phɩna wɩ.» 6 Dɩ a ther a jɩɩl lõfonʋɔra a khãa loo, 7 sa so war: «Ɩ̃ omɩsɔ, mɩ n bɩɛl nɛr na n cʋʋ puu caarrɩɩka'. 8 Mɩ n bɩɛl nɛr, mɩ hananɛ bikhɛna yeɲɔɔ, kɛ na jɛnɩ kuun pa', ma kpa wɛr na thena phiilo a na hanɩ dɩ na cʋʋna mɔ̃ daan narnɩ. Sɩ tɩbɩlaakɛ wer, na n tha wara, gɩdonɩ ɩ̃ cɔ wɩ ɩ̃.» 9 Dɩ tɩbɩlaale so: «Hala jalla pal». Sa bir so: «Ʋrɛɛkɛra ɩnanɩ a do kpakpal, ɔr n ƴaalɛ ado kɩɩldaar. Hei! Gɩrɛ sa cʋʋ fɩnɩ na puurore na ka na jɔ awɩda.» Agɩpɩ dɩ wɩ tʋɔr Lɔtɩ na fãga bɩɩ wa n jalna wɩ khana loo. 10 Dɩ Thɔ̃thɔ̃daar thusɔɔle 'laa ɲɔ̃ɔ a hal Lɔtɩ a lona awɩ pa cɔ bɩnɔ sa khãa loo. 11 Agɩpɩ wɩ cʋʋrɛ tɩbɩlaale kɔɔ hanɩ lõfonʋɔra dɩ wɩ yaar; bɩsã yɩra a gbana kɔ̃tɩna dɩ ga do ga punone na yɩ lõfonʋɔa'.
12 Dɩ konaale bule Lɔtɩ: «Afɩ too ɩkha ha kɩɛr wo ya? Thɛɛna, bikona, na bikhɛna, na thɩ̃ɛ wo thɩ̃ɛɛkɛ fɩ hananɩ kɛ dɩɩra, te wɩ fɛw paarɩkɛ. 13 Sa kʋɛrɛ paarɩkɛ, gɩdonɩ awɩ puu cʋʋra, wɩ n mɩɩnɩ thʋnɛ kɔ̃tɩ̃ ka Thãgba Kɔ̃tɩnɩ ƴɛra. Dɩ Thãgba Kɔ̃tɩn thɔ̃ sɛr sɩ kʋɛa dɩɩra.» 14 Dɩ Lɔtɩ ther a mɩɩna wɩrɛ teananɩ wɩ kɔɔ he ɔɔ bikhɛrsɔ ayɩ: «Nɩ ɩɩrɛ, nɩ thɛ paarɩkɛra gɩdonɩ Thãgba Kɔ̃tɩn na kʋɛrɛ dɩɩkɛra.» Sɩ ɔɔ thɛɛsɔɔle kpɩɛrɛ nɔ jɩ thɩmɩa gɩ.
15 Ɔbɔɔkɛ kɩrʋ n gbanɩ, Thɔ̃thɔ̃daar Thusɔɔle n wʋɔrɛ Lɔtɩ dɩ wa n sʋʋraa: «Ɩrɛ a kpa afɩ khɛr na afɩ bikhɛrsɔ yeɲɔɔkɛ hanɩ kɩɛr a fuo thɛ, gɩ do nɔɔ dɩɩkɛ sopuu lɩmɩ na n 'lini kha gaa dɛ!» 16 Dɩ mɔ̃ a toonɩ da n dĩdĩə, dɩ tɩbɩlaale fʋʋrɛ ɲɔ̃ɔ ɔr, na ɔɔ khɛr na ɔɔ bikhɛrsɔ yeɲɔɔle, a thena dɩ khuirǝ a faa, gɩdonɩ Thãgba Kɔ̃tɩn n ƴaalɛ a tagʋʋ. 17 Ɔbɔɔkɛ wɩ ti wɩnɩ dɩɩra a thena pɩ, thɔ̃thɔ̃ thui bɩɛl sor Lɔtɩra ayɩ: «Na yɩra a fuo na afɩ yʋ. Fa n kɩɩl hɩɩn khiroǝ'. Fa n jɩɩl dakha pobã bɩnɔɔle dɩkhãa paraka'. Fuo a jʋnɛ gɔ̃gʋɔnɔ ado fɩ n ƴaalɛ fɩ 'lɛ yire. 18 Dɩ Lɔtɩ so war: «Pha! Ma punoǝ'. Mɩ n bɩɛl fɛr yaa Kɔ̃tɩn. 19 Fɩ jɩ mɛr bʋɔra, fɩ nɩna mɛr afɩ ha bulo kɔ̃tɩ̃ mɔ̃ fɩ taa mɩnɩ dɩ̃ hana yire. Sɩ ma puno na fuu na dã gɔ̃gʋ̃ɔ sɩ gɩ do thɩlkɩɩr na 'limǝǝ ga, dɩ ma khire khaar. 20 Dɔ ɩ̃ ca ɩ̃ dã dɩ buukɛ wɔrɔnɛnɩ. Pha! Dɔ ɩ̃ ka ɩ̃ fuu ɩ̃ lõ le, ɩ̃ 'lɛ yire.» 21 Dɩ thɔ̃thɔ̃ thui sʋʋra aa: «Gɩdonɩ thɩ̃ɛ har thaa, fɛr ma kpɩɛrna sɩ na sɩrɔ dɩɩlera fɩ n mɩɩnɩ gɩrɛ. 22 Phana khǝ̃khǝ̃ a dana le ma puno na cʋʋ thɩ̃ɛ pa', foo fɩ dã le ɓo.» Gɛr dɔ kɩrʋ dɩ wɩ ha dɩɩle ire Soara. 23 Lɔtɩɩ n lonɩ dɩɩraale gɛr wire n phanɔ.
24 Le Thãgba Kɔ̃tɩn cʋʋ dɩ girbi na dɔɔ the ƴũu a jɛ Sodɔm na Gomɔɔr dɩɩra mɔ̃ thãgba ɲʋɔn n danɩ. 25 Dɩ Thãgba Kɔ̃tɩn thiire dɩɩsɔɔle na pobãa, fɛw na tɩbɩlaakɛ hanɩ dɩɩsɔɔraale ɓibi na thɩ̃ɛ fɛʋʋkɛ phonɩ thɩɩra. 26 Dɩ Lɔtɩɩ khɛr kɩɩlɛ a hɩɩn khiro a debi, ho lã kpire. 27 Dɩ Abɩraham mãa ɩɩrɛ duuro phiphi a jal paarɩkɛ a kɔɔ jɩɩlnɩ Thãgba Kɔ̃tɩnɩ ƴɛra. 28 Dɩ a hɩɩnɛ Sodɔm na Gomɔɔr dɩ khʋra na pobã dɩɩɔle fɛw a yɩ isiir dɩ ga n jʋʋn a ho dɔ kɔ̃tɩ̃ isiir. 29 Ɔbɔɔkɛ Thãgba n kʋɛnɩ pobã dɩɩsɔɔle kãkɛ Lɔtɩ kɔɔ hanɩ, a jɩnanɛ Abɩraham a taa Lɔtɩ dɩ the kʋɛ kɔ̃tɩɩna.
Lɔtɩɩ bikhɛrsɔ \ref Jǝn 30.11-30; Rɔm 3.8; 1 Kor 15.33; Sof 2.9
30 Dɩ Lɔtɩ the Soar na ɔɔ bikhɛrsɔ yeɲɔ a jʋʋn gɔ̃gʋɔna a too boka kaarab, gɩdonɩ maar fʋɔnɛɛ mɔ̃ a na toonɩ Soar. 31 Le õkhɛr kɔ̃tɩn so ɔɔ õkhɛr burǝ ayɩ: «Asɩ thɩ tɩnɛ sɩ kuun na hakɛ dɩɩra wo a na ɩ̃ sar mɔ̃kɛ tibil teenanɩ a cʋɛa'. 32 Ɩna sɩ cʋʋ asɩ thɩ a ɲɔ taan ga n kʋʋ, sɩ sɩ phɩnaa, gɩ do nɔɔ, sɩ puno sɩ 'lɛ mǝllǝ sɩ haa.» 33 Dɩ wɩ cʋʋ awɩ thɩ ga dɩtɩnɔɔlera dɩ ɲɔ taan dɩ ga n kʋʋ, sɩ õkhɛr kɔ̃tɩnɩle lõ a phɩnaa. Thɩrɛ na jɩrakɛ bɔɔkɛ a phɩnɩ na bɔɔkɛ a ɩɩrna'. 34 Ga dɩwɩlɔ dɩ õkhɛr kɔ̃tɩn so ɔɔ õkhɛr burǝ ayɩ: «De dɩtɩnɔ mɩ phɩnanɛ ɩ̃ thɩ. Sɩ cʋgɛɛ nĩkɛ wo, a ɲɔ taan dɩtɩnɔɔkɛ, sɩ fɩ jal fɩ phɩnaa gɩ do nɔɔ sɩ 'lɛ mǝllǝ sɩ haa. 35 Dɩ wɩ cʋʋ awɩ thɩ dɩ ɲɔ taan wo, ga dɩtɩnɔɔle, sɩ õkhɛr diine ɩɩr jal a phɩnaa. Thɩrɛ na jɩrakɛ bɔɔkɛ ɔɔ bikhɛr phɩnɩ na bɔɔkɛ a ɩɩrna'. 36 Dɩ Lɔtɩɩ bikhɛrsɔ yeɲɔɔle fɛw gbaar awɩ thɩɩ pɛmɛr. 37 Dɩ õkhɛr kɔ̃tɩnɩle kʋɔn kũubir a haa ire Moabɩ c . Ɔr dɔ thɩrɛ Moabɩdararaakɛ hanɩle gɩrɛ nĩ. 38 Dɩ õkhɛr diine kɔ̃ kũubir dakha a haa ire Bɛn-Amɩ d . Ɔr dɔ thɩrɛ Amɔ̃dararaakɛ hanɩ le gɩrɛ nĩ.