Ɩjakɩɩ kɔ̃da. \ref Ebi 13.2; Jǝn 21.1-7; 2 Fãg 4.12-17; Jã 14.23
18
1 Thãgba Kɔ̃tɩn nɩnanɛ ɔɔbara Abɩraham ɔbɔɔkɛ a toonɩ Mamiree Sɛn thɩrasɔɔ kɩrɔ. Wi ga khʋra gɩ, dɩ toole ɔɔ kẽkẽ wa lõfonɔɔ. 2 Mɔ̃ Abɩraham na hɩɩnɩ a yɩrɛ kona yẽther dɩ wɩ jɩɩl ɔɔ ƴɛbʋrɔ. Ɔbɔɔkɛ Abɩraham yɩ wɩnɩ a ɩɩrɛ ɔɔ kẽkẽ wa lõfonɔra a ca cãa wɩ a sʋr thɩɩra, 3 sa so: Ɩ̃ Kɔ̃tɩn, ado ɩ̃da da farɛ, mɩ n bɩɛl fɛr fa n kpãasɛ mɛr afɩ thɔ̃daarɩ pa ga. 4 Nɩ dɔ wɩ ɩna ɲʋɔn gbe wɩ cɔcɔɔ nɩ nɛɛ, sɩ nɩ too kɩɛr thɩr kɩrɔɔkɛ nɩ hɩɩr. 5 Ma ɩnanɛ dikor gbe na hanɩ nɩ kho, gɩ bulnɩ nɩ 'lɛ fãga; agɩpɩ nɩ jal, ga n do mɔlɔ nɩ jɩɩl anɩ thɔ̃daarɩ pa ga. Dɩ konaale birsee: Cʋɛ mɔna fɩ sonɩ.6 Dɩ Abɩraham phana khǝ̃khǝ̃ a jal kẽkẽ waw a so Sarara: Kpɛ mɩ̃ phuu ɲɔ̃kpõ nʋɔ yẽther a luure khǝ̃khə̃ a phɔ daƴʋ̃ɔ. 7 Agɩpɩ dɩ ca jal ɔɔ nʋ̃sɔra a fʋ na ɓol khʋ̃ɔ ɓɔrfɔrɔɔ a ha ɔɔ thɔ̃daar dɩ gbɛbɩ khǝ̃khǝ̃. 8 Dɩ Abɩraham gbaar naƴɩlɛ̃ cʋɔ, na naƴɩlɛ̃ na nʋʋnɩlera wɩ gbɛbɩnɩ a pɔna thɩɩn awɩ ƴɛra sa jɩɩl a bɛr war thɩr kɩrɔ dɩ wɩ kho.
9 Dɩ tɩbɩlaale bulee: «Kana afɩ khɛr Sara ha?» Dɩ birse wɩ: «A hale kẽkẽ waw». 10 Dɩ Tibil bɩɛl, tɩbɩla yẽtherraale so: Baalɛ na hala', kɩɛr na na yɩɛr wabɔɔkɛra ma bire na ɩ̃ afɩ pa, dɩ afɩ khɛr Sara na hananɛ bɩsã kũubir. Sara kɔɔ hale kẽkẽ wa lõfonɔ Abɩrahamɩ khiro da n pɛ nũu.
11 Sɩ Abɩraham na Sara kɔɔ tɩnɛ, a hana yɛna jɔɔ. Sara na ha bi kʋɔna 'lo bã. 12 Dɩ Sara maan sa so ɔɔ hara:«Nɛnɛ̃ɛkɛ mɩ sɛlɛnɩ pɩ, dɩ ɩ̃ kɔ̃tɩ̃ dakha tɩ̃, aɲee thu ca na fɔ mɩ 'lo?» 13 Dɩ Thãgba Kɔ̃tɩn so Abɩrahamɩna: Mɔ̃gɩdo dɩ Sara mã, aɲe dɔ kɩrʋ dɩ so: Ɩnɩ tɩnɛ ka, ɩna puno na kɔ̃ bǝ' ya? 14 Nɔ kpaa thɩ̃ɛ hale, Thãgba Kɔ̃tɩn n cʋʋnɩ dɩ thʋnɔ ya? Kɩɛr na nayɩɛr wabɔɔkɛra 'lɩm ma bire na ɩ̃ afɩ pa, dɩ Sara na hananɛ kũubir. 15 Sɩ maar fʋrɛ Sara da n bana aa: Ma mã ga. Sɩ Thãgba Kɔ̃tɩn sʋʋraa: Aɩ, fɩ maan.
16 Dɩ konaale ɩɩrɛ a ga ƴɩɛ Sodɔm khʋra. Dɩ wa n jal. Dɩ Abɩraham thɔɔ wɩ ɩnɩ n pɛ hʋɛra. 17 Sɩ Thãgba Kɔ̃tɩn sor ɔɔ hara: «Ma kerre Abɩrahamɩna gɩrɛɛkɛ ma cʋʋnɩ ya? 18 Abɩrahamɩna ca kɔ̃tɩ̃ɩ na the, kɛ na hananɩ punone. Ɔr na dɔ nɔɔ tibil caar fɛw thɩɩraakɛ n 'lɛ bɔnanɛ. 19 Gɩdonɩ mɛr Thãgba Kɔ̃tɩn phiiree, a 'laanɛ hʋɛ ɔɔ bisɔɔra na ɔɔ mǝlsɔɔraakɛ na kpaanɛnɩ wa n hɩnɛ Thãgba Kɔ̃tɩnɩ hʋ, a na cʋɛna fɩl sarʋ, na datelẽe, gɩ do nɔɔ Thãgba Kɔ̃tɩn n cʋʋ Abɩrahamɩna gɩrɛɛkɛra a kɔɔ sʋʋraanɩ gɩ dã oti. 20 Dɩ Thãgba Kɔ̃tɩn so Abɩrahamɩna: Sodɔm na gomɔɔrdaraa i wera thʋnɛ kɔ̃tɩ̃ ka, dɩ awɩ sopuu thʋ̃ puuro ga pɛ ƴɩɛa'. 21 Gɛr gɩ ma gbune na hɩɩn, ado mɔna mɩ n nɩɛnɩ dɩ wɩ mɩɩ na pɛ war, a mɛna wɩ n cʋʋ ger ɩ̃ jɩ, a ga ha mɛ̃ woa', ma jɩrɛ. 22 Dɩ kona yeɲɔ kona yẽtherraale gbaar liir dɩ wa n jal Sodɔm. Sɩ Abɩraham jɩɩl Thãgba Kɔ̃tɩnɩ ƴɛ thɩ̃thɩɩn. 23 Dɩ Abɩraham tɔr wɔrɔ̃ sa so Thãgba Kɔ̃tɩna: Fa kperene tɩɩ sarʋ na tɩɩ puu na bũburõ na faa ya? 24 Agakpaan dɩɩ do tɩɩ sara hale Sodɔm dɩɩra a dã kpalaɲɔ yʋɔr, fa kperẽ wer le na bũburõ dakha ya? Fa faa dɩɩlee sopuu gɩ do tɩɩ sara kpalaɲɔ yʋɔrɩle hanɩ dɩ bɩnɔ dɔ nɔaa? 25 Kɔ̃tɩn na cʋʋ thɩ̃ɛ thale kpɩɩa'. Dɩ fa kperẽ tɩɩ sarʋ na tɩɩ puu na kʋʋr , gɩ ho so ca bɩɛl 'le wɩ kha; ga ha mã'. Mee ʋrɛɛkɛ dʋɔnɩ tɩbɩla fɛw thɩɩraa kɩɩldaar, datelẽ haar a n cʋʋ bɛ?» 26 Dɩ Thãgba Kɔ̃tɩn so: «Ado mɩ yɩ Sodɔm dɩɩra tɩɩ sara kpalaɲɔ yʋɔr, ma faarɛ dɩɩle koo sopuu gɩ do tɩ saraale dɔ nɔɔ. 27 Dɩ Abɩraham bir so: Mɛrkɛ dɔnɩ thɩlãkobe na thoo thaa mɔlɔ mɩ 'lar a mɩɩna Kɔ̃tɩn. 28 Sɩ ado tɩɩ sara kpalaɲɔ yemɔy haan le yemɔɩlera phɛrɔnɩ na dor nɔɔ dɩ fa thii dɩɩle koo ya? Dɩ Thãgba Kɔ̃tɩn sʋʋraa: Ado mɩ taa yɩ tɩɩ sara kpalaɲɔ yemɔy, wɛr na dɔ nɔɔ ma thii dɩɩla'. 29 Dɩ bir yɩr da n mɩɩ a sʋʋraa: Sɩ ado kpalaɲɔ dɩbara hãale? Dɩ Thãgba Kɔ̃tɩn sʋʋraa: Ado kpalaɲɔrakɛ hale ma cʋʋ dɩɩle thɩ̃a'. 30 Dɩ Abɩraham so: A mɩ bir na dɛbɩ Thãgba Kɔ̃tɩn na n cɩ̃cɩma gaa lee: Sɩ ado tɩɩ sara dã kpelẽ yʋɔr? Dɩ Thãgba Kɔ̃tɩn so: Ado tɩɩ sara dã kpelẽ yʋɔr dɩɩraale, ma cʋʋrakɛ thɩ̃a'. 31 Dɩ Abɩraham so: Thãgba Kɔ̃tɩn n faa ɩ̃ yi khera ha mɩ mɩ n mɩɩnɩ thaa lee! Sɩ ado tɩɩ sara kpelẽ hale? Dɩ Thãgba Kɔ̃tɩn so: Tɩɩ sara kpelẽelera na dɔ nɔɔ ma thii dɩɩla'. 32 Dɩ Abɩraham bir so: Thãgba Kɔ̃tɩn na n cɩ̃cɩma gaa lee, a mɩ mɩɩ gɩrɛ ma bir na dɛbɩ yuu bã'. Sɩ ado tɩɩ sara yʋɔr hãale? Dɩ Thãgba Kɔ̃tɩn so: Ado tɩɩ sara yʋɔr hale, yʋɔrɩlera na dɔ nɔɔ ma thii dɩɩla'. 33 Ɔbɔɔkɛ Thãgba Kɔ̃tɩn mɩɩnanɩ Abɩraham pɩ, a jaal sɩ Abɩraham kɛr bir ɔɔ pa.