Nɔ bɩɛl ʋlfɛ jɩɩn khʋ̃ kurre do \ref Khɩ 105.8-11; Rɔm 4.11-13; Thtt 7-8; Jǝn 18.9-15; 21.1-7; Joj 5.2-9
17
1 Ɔbɔɔkɛ Abɩram hananɩ yɛna tamaa phe bire, Thãgba Kɔ̃tɩn nɩnaanɛ ɔɔbara a sʋʋraarɛ: Mɛr dʋɔn Thãgbaakɛ dʋɔnɩ Punone Fɛʋʋ Hɩ̃daar, na ɩrɛ na fɩl telẽe ɩ̃ ƴɛra. 2 Ma ʋlfɛna fɛr nɔ bɩɛl ʋlfɛrɛ, dɩ ma cʋʋrɛ afɩ mǝlsɔ dɩ wa jɔr na vǝ̃vɩ̃ǝ. 3 Dɩ Abɩram gburõkhu a fʋɔrʋʋ dɩ Thãgba sʋʋraa: 4 Ado mɛr gɩ, ɩ̃ ʋlfɛra mɩ ʋlfɛna fɩnɩ dʋɔn: Fa dor ca jɔjʋɔɔ thɩ. 5 Wa n we fɩ Abɩram bã, sɩ Abɩraham fa n do gɩdonɩ mɩ cʋʋ fɛr dɩ fɩ do ca jɔjʋɔɔ thɩ. 6 Ma cʋʋrɛ afɩ mǝlsɔ dɩ wa jɔr na vǝ̃vɩ̃ǝ. Caarsɔ, na jamanasɔ na ther afɩ mǝlsɔɔra. 7 Ma fʋrɛ ɩ̃ nɔ bɩɛl ʋlfɛɛkɛ mɩ ʋlfɛna fɩnɩ na afɩ mǝlsɔɔkɛ na kpaanɛnɩ thɩ kʋ̃ɔ wo thɩ kʋɔna: Khorr nɔ bɩɛl ʋlfɛrɛ ga do, kɛ na nɛnanɩ dɩ ma dor afɩ Thãgba na afɩ mǝlsɔɔkɛ na kpaanɛnɩɩ Thãgba. 8 Fɛrɛ na afɩ mǝlsɔɔkɛ na kpaanɛnɩ ma ha Kanãa dɩɩkɛra, fɩ tooronɩ gɩrɛ kpalkpal toguu. Ma ha wɛr dɩɩra fɛw dɩ wa hɩ̃ khor. Ma dor awɩ Thãgba.9 Dɩ bir sʋʋraa ayɩ: «Fɛrɛ, na jɩɛ hɩɩn ɩ̃ nɔ bɩɛl ʋlfɛɛkɛra, na afɩ thɩ mǝlsɔɔkɛ na kpaanɛnɩ thɩ kʋ̃ɔ wo thɩ kʋɔna fɛw. 10 Nɩ yɛkɛ mɔ̃ na n hɩɩnɩ ɩ̃ nɔ bɩɛl ʋlfɛɛkɛra mɩ ʋlfɛna nɩnɩ, fɛrɛ na afɩ mǝlsɔɔkɛ na kpaanɛnɩ, gɛr dʋɔn: Dɔ kona fɛw n kur khʋ̃ʋ. 11 Khʋ̃ kuureelera na dʋɔn nɔ bɩɛl ʋlfɛ jɩɩn nɛrɛ na mɛrɛɛra. 12 Anɩ thɩ kɔna fɛw, kuuminǝ fɛw teenanɛ wɩ kurro khʋ̃ʋ wɩ hananɩ wɩre makõther, na deaakɛ wɩ kɔnɩ afɩ cɔkara a gbana dee wɩrɛ fɩ thenɩ na war ca kpɩɩra kɛ na dʋɔnɩnakɛ afɩ ca bɩnɔa'. 13 Dee wɩrɛ wɩ kɔnɩ afɩ cɔkara na wɩrɛ fɩ thenɩ na war, wa kur wer khʋ̃ʋ dɩ ɩ̃ nɔ bɩɛl ʋlfɛ jẽ na ha anɩ tomɩra khor. 14 Kuun wo kuuniikɛ na kuroni khʋ̃a', wa hɛllʋʋlɛ ɔɔ too thɩ̃thɩɩn na faa a bonɩ ɩ̃ nɔ bɩɛl ʋlfɛ. 15 Dɩ sʋʋraa wo: Fa n we afɩ khɛr Sarayɩ bã, Sɩ na wɩɛ Sara. 16 Ma bɔnaanɛ da kɔ̃ kũubir a na ha fɩ. Ma bɔnaanɛ dɩ ca jɔjʋɔ na thɩɩraa. Ɔɔ mǝlsɔɔra ca jɔjʋɔɔ jamanasɔ, na the. 17 Dɩ Abɩraham gburõkhu a thi ƴɩɛ; a mã na bɩnɛ sa so ɔɔ hara: Mɛr kũu kɔ̃tɩ̃ɩ hananɩ yɛna tamaa dɩ Sara hana yɛna kpalanã yʋɔr sa punone nɛnɛ̃ na kɔ̃ bi 'loo? 18 Agɩpɩ dɩ Abɩraham so Thãgbara: Ma n 'lo dɩkha bã, hana Ɩsɩmayɛl yire, gɩ dãa. 19 Sɩ Thãgba sʋʋraa: Baalɛ na hala', afɩ khɛr Sara na kɔ̃ farɛ kũubir dɩ fa haa ire Ɩjakɩ. Ma fʋrɛ ɩ̃ nɔ bɩɛl ʋlfɛ na Ɩjakɩ khor, ɔr na ɔɔ mǝlsɔɔkɛ na kpaanɛnɩ. 20 Mɩ nɩɛrɛ bɩɛlɛɛkɛ fɩ bɩɛl mɩnɩ Ɩsɩmayɛlɩɩ dara: Ma bɔnaanɛ dakha, ma cʋʋrɛ ɔɔ mǝlsɔ dɩ wa ler na vǝ̃vɩ̃ǝ. Ɩsɩmayɛl na kʋ̃ɔ jamanasɔ yʋɔr yeɲɔ. Ma cʋʋrɛ dɩ ca kɔ̃tɩ̃ɩ na thɩɩraa. 21 Sɩ ado gɩrɛ dʋɔnɩ ɩ̃ nɔ bɩɛl ʋlfɛ gɩ, Ɩjakɩɩkɛ dʋɔnɩ biikɛ Sara na kɔ̃ farnɩ nayɩɛr wabɔɔkɛra, ɔr mɩ ʋlfɛna. 22 Ɔbɔɔkɛ Thãgba mɩɩnanɩ Abɩraham pɩ, a jal sa fagʋʋ.
23 Dɩ dawiilera Abɩraham kur Ɩsɩmayɛl khʋ̃ʋ, na dee wɩrɛ wɩ kɔnɩ ɔɔ cɔkara, na dee wɩrɛ a thenɩ na war, na kona fɛʋʋkɛ hanɩ ɔɔ cɔ mɔ̃kɛra Thãgba kɔɔ sʋʋraanɩ. 24 Yɛna tamaa phe bire Abɩraham kɔɔ hana dabɔɔlera sa kur khʋ̃ʋ, 25 sɩ ɔɔ bikuun Ɩsɩmayɛl hana yɛna yʋɔr yẽther sa kur khʋ̃ʋ. 26 Wi bɩɛlɩlera Abɩraham na ɔɔ bikuun Ɩsɩmayɛl kur khʋ̃ʋ. 27 Mɛna gɩ na kona fɛʋʋkɛ hanɩ ɔɔ cɔ, deaakɛ wɩ kɔnɩ ɔɔ cɔ na deaakɛ a thenɩ ca kpɩɩsɔɔra na war, wɩ gbɛbɩrɛ kur khʋ̃ʋ wɩ bɩɛlla fɛw na ɔr.