Mɔ̃ gɩ danɩ sɩ Agaar kɔ̃ Ɩsɩmayɛl \ref Jǝn 30.1-9; Jɔb 4.8; Jǝn 21.9-21 Khɩ 10.14; Mis 7.7-9
16
1 Abɩram khɛr Sarayɩ na kɔɔ kɔ̃ bǝ'. Sɩ Sarayɩ kɔɔ hananɛ thɔ̃daar khɛr bɩɛllɩɩkɛ thɛnɩ Ejipiti dɩɩra wɩ n wenɩ Agaar. 2 Dɩ Sarayɩ so Abɩramna ayɩ: «Gɩdonɩ Thãgba Kɔ̃tɩn na ha mɩ bɩsaana', gba ɩ̃ dee khɛrɩkɛ, agakpaana' a na dor nɔɔ ɩ̃ 'lɛ bɩsaan». Dɩ Abɩram ture ɔɔ khɛrrɩɩ nɔ. 3 Dɩ Abɩram khɛr Sarayɩ gbaar ɔɔ dee khɛr Agaar, kɛ dɔnɩ Ejipitidaar a ha ɔɔ ko Abɩram dɩ dʋʋra khɛr. Ga bɔɔle, yɛna yʋɔr Abɩram kɔɔ cʋʋ Kanãa dɩɩra. 4 Dɩ Abɩram lʋʋn Agaara dɩ hana pɛmɛr. Mɔ̃ Agaar yɩɛnɩ dɩɩ do a hananɛ pɛmɛr, a mar da n beesi ɔɔ kɔ̃tɩ̃ Sarayɩ. 5 Dɩ Sarayɩ so Abɩramna ayɩ: «Ɩ̃ nɩɩrɩkɛra mɩ 'lɛnɩ afɩ yʋɔ gɩ heen. Mɛrɛ thɛthɛ hana fɩ ɩ̃ dee, dɩ ɩ̃ nɛnɛ̃ a na hana bɩnɛ dɩɩ do ma dʋʋraa thɩ̃ɛ bã, da n beesi mɩ. Thãgba Kɔ̃tɩn na gʋʋrɛ thɩmɩara fɛrɛ na mɛrɛra». 6 Dɩ Abɩram so Sarayɩra: «Mee afɩ dee gɩ, cʋgɛɛ mɔ̃ fɩ pɛrnɩ haar». Dɩ Sarayɩ gaarʋ dɩ ca jal bǝǝnnǝ.7 Sɩ Thãgba Kɔ̃tɩnɩ thɔ̃thɔ̃ thu yɩrɛ Agaar bǝǝnnǝ, ɲobuka nʋɔraakɛ hanɩ Suur dɩ hʋɛra. 8 A bulee: «Sarayɩ dee Agaar, ka fɩ the, dɩ fa n jal kana»? Dɩ Agaar birsee: «Ɩ̃ kɔ̃tɩ̃ Sarayɩ ƴɛra mɩ n ca». 9 Dɩ Thãgba Kɔ̃tɩnɩɩ thɔ̃thɔ̃ thui sʋʋraa: «Kɛrra birǝ afɩ Kɔ̃tɩ̃ Sarayɩra a wurro jʋɔraa». 10 Dɩ bir sʋʋraa: «Ma cʋʋrɛ afɩ mǝlsɔ dɩ wa ler na jɔr na ka, tibil na mar na ther wa'». 11 Dɩ a so Agaarra: «Thãgba Kɔ̃tɩn yɩ fɛr afɩ gaarraakɛra, bɩnɛɛkɛ fɩ hananɩ, kũubir fa kɔ̃ a na haa ire Ɩsɩmayɛl*. 12 A fɩ bikuuna na hor kũkǝ̃ jãjan, a na leere ɔɔ omɩsɔɔra a na too kǝli. A na n kenanɛ tɩbɩla ɓibi, mɛna tɩbɩla ɓibi na n kenaa dakha».
13 Dɩ Agaar so: «Sɩɩdo, Sobɔr mɩ yɩ ʋrɛɛkɛ yɛ mɩnɩ sa hana yire bɛ»! Dɩ mɛ̃ Agaar ha ʋrɛɛkɛra mɩanaanɩ ire ayɩ: «Fɛr dʋɔn Ata-Ɛl-Rʋaɩ, Thãgbaakɛ n yɛ mɩnɩ». 14 Gɛr dɔ kɩrʋ dɩ wa n we bireele hanɩ Kadɛsɩ na Bɛrɛdɩ thɩ̃thɩɩn Lahaɩ- Rʋaɩ*. 15 Dɩ Agaar kʋ̃ɔ kũubir, dɩ ɔɔ thɩ Abɩram haa ire Ɩsɩmayɛl. 16 Abɩram kɔɔ hananɛ yɛna kpalanã maadõ ɔbɔɔkɛ Agaar kʋɔnaanɩ Ɩsɩmayɛl.