Thãgba ʋlfɛnanɛ Abɩram na ɔɔ mǝlsɔ. \ref Rɔm 4; Gal 3.6-9; Neh 9.6-9; Thtt 7.2-7
15
1 Mɔ̃ thɩ̃ɛsɔɔle kanɩ pɩ, Thãgba Kɔ̃tɩn nɩnanɛ ɔɔbara Abɩramna a sʋʋraa: «Fa n do maar n fʋ fa' Abɩram, gɩdonɩ mɛrɛ thɛthɛ dʋɔn afɩ tomɩ phida, fa 'lɛr bɔnanɛ dɩ ga kɔ̃tɩ̃ na ka». 2 Abɩram so: «Kɔ̃tɩn, Thãgba Kɔ̃tɩn, aɲe bɔ ca lẽle thɩ̃ɛɛkɛ fa ha mɩnɩ na taa mɩ ma hananɩ bɩsaana'? Eliejɛɛrɩkɛ thɛnɩ Damasɩ dɩɩra, ɔr na gbãa ɩ̃ thɩ̃». 3 Abɩram bir so: «Fa ha mɩnɩ mǝllǝ', ʋrɛɛkɛ wɩ kɔnɩ ɩ̃ cɔkara, ɔr na gbaan ɩ̃ thɩ̃». 4 Sɩ Thãgba Kɔ̃tɩn sʋʋraa: «Kpei! Eliejɛɛr na gba afɩ thã', sɩ afɩ bikɔnanɛ na gbaan afɩ thɩ̃». 5 Dɩ Thãgba Kɔ̃tɩn thena Abɩram phiilo a sʋʋra: «Hɩnɛ ƴũu, thera ƴepǝlǝ̃be ado fa punone». Dɩ bir so: «Thale afɩ mǝlsɔ na jɔr ƴepǝlǝ̃bee khaakɛ». 6 Abɩram pɛr Thãgba Kɔ̃tɩn haar, dɩ Thãgba Kɔ̃tɩn gbaa tɩɩ sarʋ.7 Dɩ a bire sʋʋraa: «Mɛr dʋɔn Thãgba Kɔ̃tɩn. Mɛr te fɩ Ur Kalde dɩɩra a ɩna, ɩ̃ ha fɩ dɩɩkɛ fɩ harɔnɩ gɩrɛ fɩ hɩ̃». 8 Sɩ Abɩram tu: «Kɔ̃tɩn, Thãgba Kɔ̃tɩn, aɲe ma jɩna mɛr na hɩna dɩɩra ger»? 9 Dɩ Thãgba Kɔ̃tɩn so Abɩramna: «Fɔ na phɩɩr bɩɛl na bʋ phɩɩr bɩɛl na banake bɩɛl, kɛ hananɩ yɛna yẽther yẽther, a fɔna puusɛ̃ ɓolʋ bɩɛl, na kʋlãpubi bɩɛl, a ɛna». 10 Dɩ Abɩram pɔna nʋmaalera fɛw, a kʋʋr a ɓɩɛl, a gba ʋ̃ʋ daɓɛl a thɩɩn dɩɩ telẽ na ɔɔ daɓɛl dẽdẽ, sɩ aa ɓɩɛl 'lominǝ wera'. 11 Dɩ nʋ̃ kho 'lominǝ na n ji nʋʋnaale dɩ Abɩram weele wɩ. 12 Wi lõ bɔɔ, daan fʋrɛ Abɩram jɔɔ na ma kɔ̃tɩ̃ɩ. Dɩ dabirǝ tĩtĩtĩ kɔɔ hale dakha.
13 Thãgba Kɔ̃tɩn so Abɩramna: «Jɛ gɩ do afɩ mǝlsɔ na toore kpakpal dɩɩrakɛ wa hɩna' a na do dea. Dʋɔdara na kpoo warɛ a na cʋʋna yɛna taanã (400). 14 Sɩ caarɩkɛra na cʋɛ wɩnɩ dɩ wa do dea, ma pɛ warɛ sor, agɩpɩ wa ther le na lẽle thɩ̃ɛ jɔɔ. 15 Fe wer fa pʋɔrɛ dɩɩra a na hi phi sɩ na khi na ha ɩɩ. Yʋsũu bulole wa dʋna fɩ. 16 Sɩ awɩ balanã məlle na kɛra na ɩ̃ kɩɛr ɔbɔɔkɛ Amɔɔr məlsɔɔ fɩl puu na dʋnɩ tue dɩphã».
17 Ɔbɔɔkɛ wire lonɩ pɩ, gɩ jɩɛ birǝ tĩtĩtĩ; dapaara dɔɔkɛ n bananɩ isiir na dɔ delẽbe kɔɔ 'lɔɔrɛ nʋ̃ ɓɛlaalee thɩ̃thɩɩn a ka the. 18 Ga wiile Thãgba Kɔ̃tɩn ʋlfɛna Abɩram nɔ bɩɛl ʋlfɛrɛ a sʋʋraa: «Afɩ mǝlsɔ ma ha dɩɩkɛ. A fʋna Ejipiti mɩɩr, foo a ba jalna dana mɩɩr kɔ̃tɩ̃ɩkɛ dɔnɩ Efɩratɩ a gbana: 19 Kenɩdara, na Kenɩjɩdara, na Kadɩmonɩdara, 20 na Hɛtɩɩ mǝlsɔɔ, na Perejɩdara, na Refayɩtɩsɔ, 21 na Amɔɔr məlsɔ, na Kanãadara, na Gɩrgasɩdara, na Jebusɩdaraa dʋɔ fɛw».