Abɩram kǝǝre jamanasɔra \ref 1 Sam 30; Jer 41.11
14
1 Ɔbɔɔkɛ Amɩrafɛl donɩ jamana Sɩnear dɩɩra, Arɩɔkɩ do jamana Elasar dɩɩra, dɩ Kɛdɔrlaɔmɛr do jamana Elam dɩɩra, sɩ Tidal do jamana Goyim dɩɩra; 2 Wɩ ɩɩrnanɛ kʋʋr dɩ wa n kena Bera, kɛ donɩ jamana Sodɔm dɩɩra, na Bɩrsa, kɛ dɔnɩ jamana Gomɔɔr dɩɩra, na Sɩnabɩ, kɛ dɔnɩ jamana Adɩma dɩɩra, na Semebɛr, kɛ dɔnɩ jamana Sɛbɔɩm dɩɩra, na jamanaakɛ hanɩ Bela dɩɩra, Belala wɩ n we Soar. 3 Jamanasɔɔlera fɛw 'lire kha nɔ bɩɛl sa kpa jɛ Sɩdɩm laɲɔ̃ ɓɛlɛnɔ, kɛ wɩ n wenɩ nĩkɛ laɲɔ̃ khire*. 4 Wɩ kɔɔ wurre Kɛdɔrlaɔmɛɛra a cʋʋna yɛna yʋɔr yeɲɔ, sɩ yɛna yʋɔr yẽthera dɩ wɩ ɩɩrna lãʋ. 5 Dɩ yɛna yʋɔr yenã yɩɛra Kɛdɔrlaɔmɛr na jamanasɔɔkɛ wɩ 'linanɩ nɔ bɩɛl ɩɩrna wɛr kʋʋr a puno Refaɩm, caarɩkɛ hanɩ Asetarɔtɩ-Karnɩm, na Jujisɔ, caarɩkɛ hanɩ Am bǝǝnǝ, a punona Emɩ̃dara, caaɩkɛ hanɩ Kɩrɩataɩm bǝǝnǝ, 6 na Hɔɔrɩsɔ, kɛ hanɩ awɩ pa Seyɩɩr gɔ̃gʋɔna, a weele wɩ jalna dana Parãa sɛn thɩrʋ, kɛ wɔrɔnanɩ bǝ̃ kpara. 7 Agɩpɩ dɩ wɩ kɛr bir a dã Ã-Misepa, kɛ wɩ n wenɩ Kadɛsɩ, a puno Amalɛkɩsɔ na awɩ dɩ khudara ɓibi, a punona dakha Amɔɔr məlsɔɔkɛ hanɩ Hasasɔ̃-Tamar bǝǝnnǝ. 8 Le jamanaakɛ hanɩ Sodɔm dɩɩra, na ʋrɛɛkɛ hanɩ Gomɔɔr dɩɩra, na ʋrɛɛkɛ hanɩ Adɩra, na ʋrɛɛkɛ hanɩ Sɛbɔɩm dɩɩra, na ʋrɛɛkɛ hanɩ Bela dɩɩra, Belala wɩ n we Soar. Wɩ ther na awɩ sɔrasɩsɔ a caan Sɩdɩm ɓɛlɛnɔ , 9 wɩ kena: Kɛdɔrlaɔmɛr Elam jamana, na Tɩdal Goyim jamana, na Amɩrafɛl, Sɩnear jamana, na Arɩɔkɩ, Elasar jamana. Jamanasɔ yenã gɩ dɩ wa n kena yemɔy. 10 Biresɔɔkɛ phananɩ thɩɩra dɩka khaa kɔɔ karɛ Sɩdɩm ɓɛlɛnɔ, dɩ mɔ̃ Sodɔm dɩɩ jamana na Gomɔɔr dɩɩ jamana n caalɛnɩ dɩɩ do wɩ jiirore sɩ wɩrɛ sɛnɩ fuule jʋʋn gɔ̃gʋɔna. 11 Dɩ kǝkǝǝdara khɩɩrɛ sodɔmdara, na gomɔɔrdaraa lẽle thɩ̃ fɛw, a khɩɩna awɩ dikosɔ ɓibi a jalna. 12 Dɩ wɩ fʋrɛ dakha Lɔtɩ, kɛ dɔnɩ Abɩram õkuuni bikuun, kɛ tɔɔnɩ Sodɔm, a khɩɩna ɔɔ thɩ̃sɔ fɛw a jalna. 13 Sɩ tibil bɩɛl kɔɔ forre a ca jal so Abɩramna, kɛ dɔnɩ Ebirǝ. Ga bɔɔle Abɩram kɔɔ too Mamireekɛ dɔnɩ Amɔɔr məlɩ Sɛn thɩrsɔɔ kɩrɔ. Mamiree õkũusɔ haan Ɛsɩkɔl na Anɛɛr. Wɛr yẽther kɔɔ ʋlfɛnɛ nɔ bɩɛl ʋlfɛrɛ na Abɩram. 14 Ɔbɔɔkɛ Abɩram nɩɛnɩ dɩ wɩ so wɩ fʋrɛ ɔɔ õkuuni bikuun a jalna, a ɩɩrɛ dapaara na ɔɔ thɔ̃dara tãather na yʋɔr makõther, kɛ dɔnɩ kũun khena, kɛ wɩ kɔnɩ ɔɔ cɔ, a gba koke thɩ̃ɛsɔ a wee jamanasɔɔle a kpãa 'li wɩ Dã. 15 Dɩ a tɩnɛnɛ ɔɔ thɔ̃daraale dɩɩdɩɩ a kena jamanasɔɔle dɩtɩnɔ; a puno wɩ a weele wɩ a dana Ɔba, kɛ hanɩ Damasɩ ɲɔ̃bɔɔra. 16 Dɩ a tagɩrɛ lẽle thɩ̃sɔɔlera fɛw a taana Lɔtɩ ɔɔ õkuuni bikuun na ɔɔ lẽle thɩ̃sɔ, na khɛra, na wɩ̃ɩ khaɩdasɔ fɛw a birnǝ.Abɩram na Mɛlkɩsɛdɛk
17 Ɔbɔɔkɛ Abɩram kɔɔ punoni Kɛdɔrlaɔmɛr, na jamanasɔɔkɛ kɔɔ hanɩ kha na Kɛdɔrlaɔmɛr sa kɛr da n bir, Sodɔm jamana kɔɔ ther da n caanʋʋ Save ɓɛlɛnɔ, kɛ dʋɔnɩ jamanaɩ ɓɛlɛ̃. 18 Dɩ Mɛlkɩsɛdɛkɩɩkɛ kɔɔ dɔnɩ Salɛm jamana, a dona Thãgba Ƴũu Pǝrdaarɩ* bonɩ jidaar,* caanɛ Abɩram, na dikor, na dɩvɛ̃. 19 Dɩ a bɔnanɛ Abɩram ayɩ: «Thãgba Ƴũu Pǝrdaarɩkɛ tenɩ ƴũu, na thɩɩ n bɔna Abɩram. 20 Thãgba Ƴũu Pǝrdaar hɩna khɩɩrɛ, ɔrkɛ gbaanɩ afɩ lãlaardara a to afɩ ɲɔ̃kɔɔ». Dɩ Abɩram tire bɩɛl yʋɔra lẽle thɩɛnaale fɛw a haa.
21 Sodɔm jamana so Abɩramna: «ha mɩ tɩbɩla sa hɩna lẽle thɩ̃ɛ». 22 Sɩ Abɩram birse Sodɔm jamanaale: «Mɩ sor nʋɔ Thãgba Kɔ̃tɩnna, kɛ dʋɔnɩ Thãgba Ƴũ Pǝrdaar, a dona Thãgba Kɔ̃tɩn, le thãgbara ƴũu na kɛ thɩɩra, 23 ma thar afɩ thɩ̃ birǝ fɩʋ, dɩ kẽkẽ wiir gɩ dɩ Sabara pɔ̃ɔ ga. Gɩ do nɔɔ fɩ sona: «Mɛr lɛ Abɩrama'». 24 Ma n ƴaal ɩ̃ thar dɩkhara ga, gɩrɛɛkɛ ɩ̃ daɓolbisɔ khonɩ, gɩ dãa. Anɛɛr na Ɛsɩkɔl na Mamire, kɛ kɔɔ jalana mɩnɩ, wer hananɛ hʋɛ na gba awɩda».