Abɩram bire jʋʋn Kanãa dɩɩra. Ɔɔ leekha na Lɔtɩ \ref Khɩ 112.1-3; Mat 5.9; Jã 3.17-18
13
1 Dɩ Abɩram ther Ejipiti dɩɩra a kɛr da n jʋʋn Kanãa, ɔr na ɔɔ khɛr, na thɩ̃ɛ fɛʋʋkɛ a hananɩ. Lɔtɩ kɔɔ har kha na wɛr, dɩ wɩ jaal a dã Negɛvɩ bǝǝnnǝ. 2 Abɩram kɔɔ ler na sobɔr, a hananɛ nʋma, na war na dɛ. 3 Dɩ a ther Negɛvɩ a too da n jalna gbe gbe gbe, a jal dã Betɛl, paarɩkɛ a kɔɔ dʋnɩ ɔɔ kẽkẽ wa cacara, Betɛl na Ayɩ thɩ̃thɩɩn. 4 Le bonɩ ji paarɩkɛ a kɔɔ mɩnɩ cacara kɔɔ ha; dɩ liir a fʋɔr Thãgba Kɔ̃tɩn.5 Lɔtɩɩkɛ hananɩ kha Abɩram kɔɔ hananɛ dakha nʋ̃ yɩra, na nʋ̃ kɔ̃tɩna, a hanana dakha kẽkẽ waasɔ jɔɔ. 6 Thɩɩ na n dã wɩ dɩ wa puno na gbɛbɩ na toa', gɩdonɩ wɩ hananɛ thɩ̃ɛ jɔɔ ka. 7 Dɩ sʋʋ ɩɩr Abɩramɩ nʋ̃ khedarara, na Lɔtɩɩ nʋ̃ khedarara dɩ wa n ke. Ga bɔɔlera, Kanãadara na Perejɩdara kɔɔ hãale dɩɩra. 8 Abɩram so Lɔtɩra, ga bɔr sʋʋn n ha mɛrɛ na fɛrɛ, agɩbo ɩ̃ nʋ̃ khedara na afɩ nʋ̃ khedaraa thɩ̃thɩna', gɩdonɩ tɩɩ bɩɛl sɩ do. 9 Thɩɩra ha ʋrɛ phɩnanɩ afɩ ƴɛbʋrɔ, dɔ sɩ lee, ado ɲɔ̃bɩlã fɩ n jalna ma n jalna ɲɔ̃bɔɔ, a ɲɔ̃bɔɔ fɩ n jalna ma n jalna ɲɔ̃bɩlã.
10 Dɩ Lɔtɩ hɩɩnɛ a yɩ mɔ̃kɛ Jʋrdɛ̃ pobãa fɛw donɩ ɲɔ haar a mɩ̃ ɓɔbɩ. Mɔ̃ Thãgba Kɔ̃tɩn na kɔɔ bũburoni Sodɔm na Gomɔɔr dɩɩ pa', paarɩɩle koo a jalna dana Soar kɔɔ hor Edɛn nãkʋɔr mɔ̃kɛ Ejipiti dɩɩ hanɩ. 11 Dɩ Lɔtɩ phiire Jʋrdɛ̃ pobãa da n jal kɩrɔ, dɩɩ do wɩ leere kha mɛ̃ na Abɩram. 12 Abɩram toore Kanãa; sɩ Lɔtɩ too dɩɩsɔɔraakɛ khonanɩ Jʋrdɛ̃ pobã nʋɔ, a dʋ ɔɔ kẽkẽ wasɔ da n jalna Sodɔm khʋra. 13 Sodɔmdara kɔɔ dor tɩɩ puunǝ na sobɔr, puu cʋʋdara wɛ na sobɔr Thãgba Kɔ̃tɩnɩ ƴɛra.
Thãgba Kɔ̃tɩnɩ ʋlfɛ na Abɩram \ref Jǝn 15.18-21; 17.1-8; Mat 5.3
14 Ɔbɔɔkɛ Lɔtɩ leenɩ pɩ, Thãgba Kɔ̃tɩn sor Abɩramna: «Jɩlɛ kana fɩ hanɩ sa hɩnɛ kana wire na n jalnɩ dɩ pɛ ɲɔ̃bɔɔ na ɲɔ̃bɩlã, a hɩnɛ wi phã paar na wi lõ paar. 15 Thɩɩkɛra fɩ yɩnɩ fɛw, fɛr ma ha na afɩ mǝlsɔ waa khor. 16 Ma cʋʋrɛ afɩ mǝlsɔ dɩ wa ler a na vǝ̃vɩ̃ǝ mɔ̃kɛ thɩlãkobe hanɩ thɩɩra. Mɔ̃kɛ tibil na punonɩ a na ther thɩlãkobe thɩɩra ga, mɛna gɩ, tibil na puno dakha afɩ mǝl a na therra'. 17 Ɩrɛ, kpaarɛ Kanãa dɩɩra fɛw a fe hɩnɛ gɩdonɩ fɛr ma ha ɓibi. 18 Dɩ Abɩram wɩɛr ɔɔ kẽkẽ wasɔ, a jalna dʋ Mamiree Sɛn thɩrasɔɔ kɩrɔ, Ebʋrɔ̃ khʋra a tooro. Dɩ a mɩrɛ liir bonɩ ji paar Thãgba Kɔ̃tɩnna.