Thãgba wer Abɩram a thɛ ɔɔ dʋɔ a jalla Kanãa dɩɩra. \ref Jǝn 11. 31-32; Thtt 7. 2-5; Ebi 11. 8-9
12
1 Dɩ Thãgba Kɔ̃tɩn so Abɩramna: «Thɛ afɩ dʋɔ, afɩ too na afɩ thɩɩ cɔ, a jalla dɩɩraakɛ ma nɩ farnɩ. 2 Ma cʋʋ fɛr dɩ fa do ca nɩ kɔ̃tɩ̃ɩ, ma bɔna fɛr. Ma cʋʋrɛ afɩ i dɩ ga the na sobɔr. Fɛr na dʋɔn bɔna 'lɛ paar ɩkhasɔɔra. 3 Ma bɔnanɛ wɩrɛɛkɛ n bɔna fɩnɩ, sɩ wɩrɛɛkɛ n sɔna fɩnɩ, ma sɔ̃ wɛr. Fɛr na dɔ nɔɔ dɩ caar fɛw thɩɩra na 'lɛ bɔnanɛ». 4 Dɩ Abɩram jaal mɔ̃kɛra Thãgba Kɔ̃tɩn kɔɔ sʋʋraanɩ. Abɩram kɔɔ hananɛ yɛna kpalãther yʋɔr yemɔy ɔbɔɔkɛ a thenɩ Karã dɩɩra. Lɔtɩ kɔɔ jaal kha na ɔr. 5 Dɩ Abɩram ɩɩrɛ na ɔɔ khɛr Sarayɩ, na Lɔtɩɩkɛ dʋɔnɩ ɔɔ õkuunɩ bi, na awɩ lẽle thɩ̃sɔ fɛʋʋkɛ wɩ hananɩ, na thɔ̃ dodaraakɛ wɩ 'lɛnɩ Karã. Mɛ̃ wɩ jal waa a dã Kanãa. 6 Abɩram fire Kanãa waa a ba jal dã Sɩsɛm dɩɩ, a jal dã sɛna thɩraakɛ hanɩ Moore bǝǝnǝ. Kanãadara kɔɔ hãale dɩɩra ga bɔɔle. 7 Dɩ Thãgba Kɔ̃tɩn nɩnanɛ ɔɔbara Abɩramna a sʋʋraa: «Afɩ mǝl ma ha Kanãa dɩɩ». Dɩ Abɩram mɩrɛ bonɩ ji paar Thãgba Kɔ̃tɩna kãkɛra a nɩnaanɩ ɔɔbara. 8 Dɩ Abɩram ther le a wɩɛr ɔɔ kẽkẽ wa a jal gɔ̃gʋɔna, Betɛl wɩ phã pa khʋra. Dɩ a dʋrɛ ɔɔ kẽkẽ wa Betɛl na Ayɩ thɩ̃thɩɩn: Betɛl dɩɩ ha wi lõ paar, sɩ Ayɩ dɩɩ ha wi phã paar. Dɩ a mɩrɛ bonɩ ji paar Thãgba Kɔ̃tɩɩna a we Thãgba Kɔ̃tɩnɩ i. 9 Abɩram toore gbegbegbe da n jalna Negɛvɩ bǝ̃ khʋra.Abɩram jaal Ejipiti. \ref Jen 20; 26.1-11; Khɩ105.13-15
10 Dɩ kɔmɛr kɔɔ jire Kanãa a khar ka dɩ Abɩram faa sa gbũ Ejipiti ɩnɩ n too gbe. 11 Ɔbɔɔkɛ aa n wɔrɔnɩ Ejipiti, a sor ɔɔ khɛr Sarayɩra ayɩ: «Mɩ jɩrɛ fɩ dor khɛr bʋɔ waa gel. 12 A Ejipitidara yɩ fɩ wa sor: Ɩ̃ khɛr ha fɩ. Dɩ wa kʋ mɛr sɩ na faa fɩ.» 13 Gɛr gɩ, sɔ war yɛ ɩ̃ õkhɛr ha fɩ, fɩ do nɔɔ wa n jɩɩ hɩɩn mɩ bɔɔbɔɔ, ɩ̃ 'lɛ yire gɩ do fɛr dɔ nɔɔ. 14 Ɔbɔɔkɛ Abɩram danɩ Ejipiti dɩɩra, Ejipitidara yɩrɛ mɔ̃kɛ ɔɔ khɛr Sarayɩ thʋnɩ bɔr. 15 Dɩ Faarɔ̃ɔ tibil kɔ̃tɩ̃sɔ dakha yɩrɛ mɔ̃kɛ Sarayɩ bɔrnɩ a jal dɩ wa n khɩsʋʋ awɩ kɔ̃tɩ̃ Faarɔ̃ɔ ƴɛra. Dɩ le wɩ kpa Sarayɩ a jalna jamanaa cɔ. 16 Dɩ Faarɔ̃ cʋʋrɛ Abɩram bɔɔ jɔɔ dɩɩ do Sarayɩ dɔ nɔɔ. Faarɔ̃ har Abɩram nʋ̃ yɩra na nʋ̃ kɔ̃tɩna, kũukǝnǝ, thɔ̃ dodara: kona na khɛra, na kũukǝ̃ khɛra, na ɲɔɔmɛ̃sɔɔ. 17 Sɩ Thãgba Kɔ̃tɩn kɔɔ ber Faarɔ̃ na ɔɔ cɔdara fɛw na thɩlke kɔ̃tɩ̃ɩ dɩɩ do Sarayɩɩkɛ dɔnɩ Abɩrahamɩ khɛrɩɩ thɩmɩɩ dɔ nɔɔ. 18 Dɩ Faarɔ̃ wer Abɩram a bulee: «Aɲe fɩ cʋʋmɩ thaa gɩ dɔ? Mɔ̃gɩdo, dɩ fa kɔɔ so mar casɩ ayɩ afɩ khɛr ga? 19 Mɔ̃gɩdo dɩ fɩ so: afɩ õkhɛr gɩ? Gɛr dɔ nɔɔ mɩ gbaanɩ a dɔ ɩ̃ khɛr. Nɛnɛ̃ɛkɛ, afɩ khɛrraakɛ, kpaa a jalla.» 20 Dɩ Faarɔ̃ 'laa hʋɛ ɔɔ thɔ̃ dodarara dɩ wɩ thɔɔ Abɩram na ɔɔ khɛr na thɩ̃ɛ fɛʋʋkɛ a hananɩ dɩ wɩ jal.