Babɛl cɔ gbã mɩr \ref Khɩ 33.10-11; Lu 1.51; Dǝt 32.8; Thtt 2.1-11; 17-26
11
1 Ca thɩmɩɩ bɩɛl tɩbɩla fɛw thɩɩra n kɔɔ mɩɩ na thɩmɩɩ ƴɛ bɩɛl. 2 Dɩ wɩ the kɩrɔ dɩ wa n jal a yɩ ɓɛlɛ̃ pɩɛ Sɩnear dɩɩra a tooro. 3 Dɩ wɩ mɩɩrɛ kha ayɩ: «Nɩ dɔ sɩ mɩ birki sɩ hɩ dɔɔra». Mɛ̃ wɩ gba birki hɩnanɛɛle dɩɩ ho war bokana sa gba bʋ̃ɔ dɩ ho war sɩmã. 4 Agɩpɩ wɩ mɩɩrɛ kha: «Sɩ kuro dɩɩ, a mɛ cɔ cõcoolna ɔɔ yʋ n jʋʋn gɩ thʋ ƴũu, sɩ the ire, gɩ do nɔɔ dakha sa bɩ̃bɩlã dɩɩdɩɩ thɩɩra ga.» 5 Dɩ Thãgba Kɔ̃tɩn gbũ a hɩɩn dɩɩra, na cɔ cõcoolnaale tɩbɩlaale n mɩnɩ. 6 Sa so: «Hã! Ca bɩɛl wɛr fɛw do, dɩ wa n mɩɩ ca thɩmɩɩ bɩɛl, gɛr hɩna dɩ wa n cʋʋ gele. A wɩ fʋ thale, thɩ̃ɛ na hale nɛnɛ̃ dɩ wa ti kpɩɛrɛ a na cʋʋ na thʋnɔa'. 7 Sɩ gbuno a ɲaɲaanɛ wɩ thɩmɩara le, wa n nɩɛ kha thɩmɩa bã'». 8 Dɩ Thãgba Kɔ̃tɩn bɩ̃bɩlã wɩ le dɩɩdɩɩ paar fɛw thɩɩraakɛ dɩ wɩ faa dɩ mɩr. 9 Gɛr dɔ nɔɔ wɩ 'laanɩ ireele Babɛl gɩdonɩ liir Thãgba Kɔ̃tɩn ɲaɲaan tibil caar fɛw thɩraa ca thɩmɩɩ, dɩ liirǝ a bɩ̃bɩlã wɩ dɩ wɩ gba thɩɩkɛ fɛw.Yɛkɛ Sɛm na ɔɔ mǝlsɔ a dana Abɩram.
10 Yɛkɛ Sɛmɩ mǝlsɔ: Yɛna tamaa (100) Sɛm hana sa kɔ̃ Arpakɩsaadɩ. Thɩ kʋɛ ɲʋɔn karɔrɛ dɩɩ cʋʋ yɛna ɲeɲɔ. 11 Sɛm kɔnɩ Arpakɩsaadɩ, yɛna taamɔy (500) a cʋʋ a bir kɔ̃ kuuminǝ na kheminǝ.
12 Dɩ Arpakɩsaadɩ hana yɛna kpelẽ yʋɔr yemɔy sa kɔ̃ Sela. 13 Arpakɩsaadɩ kɔnɩ Sela, yɛna taanã na yẽther (403) a cʋʋ, a bir kɔ̃ kuuminǝ na kheminǝ.
14 Dɩ Sela hana yɛna kpelẽ yʋɔr sa kɔ̃ Ebɛɛr. 15 Sela kɔnɩ Ebɛɛr, yɛna taanã na yẽther (403) a cʋʋ, a bir kɔ̃ kuuminǝ na kheminǝ.
16 Ebɛɛr hananɛ yɛna kpelẽ yʋɔr yenã sa kɔ̃ Pelɛɛgɩ. 17 Ebɛɛr kɔnɩ Pelɛɛgɩ, yɛna taanã na kpelẽ yʋɔr (430) a cʋʋ, a bir kɔ̃ kuuminǝ na kheminǝ.
18 Pelɛɛgɩ hananɛ yɛna kpelẽ yʋɔr sa kɔ̃ Rehu. 19 Pelɛɛgɩ kɔnɩ Rehu, yɛna taaɲɔ na yʋɔr phebire (209) a cʋʋ, a bir kɔ̃ kuuminǝ na kheminǝ.
20 Rehu hananɛ yɛna kpelẽ yʋɔr yeɲɔ sa kɔ̃ Seruugi. 21 Rehu kɔnɩ Seruugi pɩ, yɛna taaɲɔ na makoɲɔ(207) a cʋʋ, a bir kɔ̃ kuuminǝ na kheminǝ.
22 Seruugi hananɛ yɛna kpelẽ yʋɔr sa kɔ̃ Nakɔɔr. 23 Seruugi kɔnɩ Nakɔɔr pɩ, yɛna taaɲɔ (200) a cʋʋ, a bir kɔ̃ kuuminǝ na kheminǝ.
24 Nakɔɔr hananɛ yɛna kpelẽ yʋɔr phe bire sa kɔ̃ Terakɩ. 25 Nakɔɔr kɔnɩ Terakɩ pɩ, yɛna tamaa na kpelẽ phe bire (119) a cʋʋ, a kɔ̃ kuuminǝ na kheminǝ.
26 Terakɩ hananɛ yɛna kpalãther yʋɔr sa kɔ̃ Abɩram, na Nakɔɔr na Arã.
Yɛkɛ Terakɩ na Abɩraham thɩmɩɩr
27 Yɛkɛ Terakɩɩ mǝlsɔ: Terakɩ kɔna Abɩram, Nakɔɔr, na Arã. Dɩ Arã kɔ̃ Lɔtɩ. 28 Arã kɔɔ khire ɔɔ dʋɔɔkɛ wɩ kʋɔnɩ: Ur, Kalde dɩɩra, sa faa ɔɔ thɩ Terakɩ. 29 Dɩ Abɩram na Nakɔɔr her khɛra. Abɩramɩ khɛr n dʋɔn Sarayɩ, sɩ Nakɔɔrɩ khɛr na n do Mɩlka, Arã bikhɛr gɩ. Arã kɔna Mɩlka na Jɩsɩka. 30 Sarayɩ kɔɔ dor kɔ̃bʋʋ, a n kɔ̃ bǝ'. 31 Dɩ Terakɩ ɩɩrna Abɩram, na ɔɔ bikuunii bi, Lɔtɩɩkɛ dɔnɩ Arã bikuun, na Sarayɩ, ɔɔ bikuun Abɩramɩ khɛr, a thena fɛw Ur, Kalde dɩɩra da n jal Kanãa. Dɩ wɩ dãa Karã a too le.
32 Terakɩ hananɛ yɛna taaɲɔ na yemɔy (205); agɩpɩ a khire le Karã dɩɩ.