Thɩ kʋɛ ɲʋɔn pɩpa. \ref Khɩ 104.5-9; Eja 54.9.
8
1 Thãgba jɩnanɛ Noe na nʋma fɛʋʋkɛ hanaanɩ kha le bato kɔ̃tɩɩna. Dɩ Thãgba phʋbɩrɛ jɩɛ ɲʋɔnna, dɩ ɲʋɔn wur dɩ ga n gbũ. 2 Dɩ tɩɛr ɲɔbuka kɔ̃tɩnasɔ na ƴũu ɲɔ toopaarsɔ khaanɛ fɛw, dɩ thãgba ɲʋɔn kur ga n dã bã. 3 Dɩ ɲʋɔn mar dɩ ga n ɩr thɩɩra, dɩ wire tamaa na kpalaɲɔ yʋɔrrɩ (150) pɩpɩɩ pa, ɲʋɔn kɔɔ hallɛ a gbũ. 4 Dɩ yɩɛrrɩ sɩpora makoɲɔra ɔɔ wire yʋɔr makoɲɔ wirǝ bato kɔ̃tɩ̃ɩ kɔɔ gbune a dɛ̃ɛ Arara gɔ̃gɔ̃ yʋɔ. 5 Ɲʋɔn n gbune gbegbegbe a dana pora yʋɔrsɔra, dɩ pora yʋɔrɩ caca wirǝ, gɛr gɔ̃gɔ̃ yʋʋsɔ yɩrrɔ. 6 Ɔbɔɔkɛ wire kpalaɲɔ kanɩ pɩ, Noe khɛrɛ fɛnɛtɩrɩɩkɛ a kɔɔ pɛrnɩ bato kɔ̃tɩɩna. 7 Dɩ a tire sɩkpaa a faa dɩ jal sa kɛr bir ɩ̃ balamɔ̃ balamɔ̃ dɩɩ dana bɔɔkɛ ɲʋɔn ɩrnɩ thɩɩra fɛw dɩphã. 8 Dɩ a tire kʋlãpubi dakha a faa dɩ jal, a puno a jɩ ado ɲʋɔn gbune a dã thɩɩ. 9 Sɩ kʋlãpubiile na kɔɔ yɩ thɩ̃ɛ na jiroǝ', gɩdonɩ ɲɔ haar thɩɩ kɔɔ do fɛw. Dɩ a bire kɛr bir Noera le boto kɔ̃tɩɩna, dɩ 'laa ɲɔ̃ɔ a fʋʋ lona. 10 Dɩ Noe kɔɔ bire pɩɛr ʋ̃ wire makoɲɔ wo, agɩpɩ dɩ bir faa kʋlãpubira dɩ the wo. 11 Dɩ kʋlãpubi bire na pʋɔraa dʋɔr khʋra, a hana ɔɔ nɔra olɩvɩ fa huukɛ a ɓɛlnɩ, dɩ mɛ̃ Noe jɩ dɩphã ɲʋɔn hallɛ thɩɩra. 12 Dɩ a bire fʋ haar a pɩɛr ʋ̃ wire makoɲɔ kpɩɩ wo sa bir faa kʋlãpubira dɩ jal. Sɩ aa bir a kɛr birraa bã. 13 Noee yɛna taamaadõ na yɛ bɩɛllɩ caca sɩporɩ caca wirǝ, ɲʋɔn kɔɔ ɩrɛ fɛw thɩɩra. Dɩ Noe phubi bato kɔ̃tɩ̃ thidaa sa hɩɩn dɩɩ do thɩɩ khɩrɛ fɛw. 14 Balaɲɔ sɩporɩ wire kpelẽ makoɲɔ (27) wirǝ, thɩɩ kɔɔ khɩrɛ phɩphɩphɩ.15 Le Thãgba mɩɩna Noe ayɩ: 16 «Thɛ, fɛrɛ na afɩ khɛr na afɩ bikũusɔ na afɩ bikonaa khɛrsɔ bato kɔ̃tɩɩna. 17 Te nʋ̃ caar dɩɩdɩɩkɛ hanɩ kha na fɛrɛ, wɩ thɩɩr fɛw, 'lominǝ a gbana nʋma fɛw, na thɩ̃ɛ fɛʋʋkɛ n haalɛnɩ na bɩ̃bãa. Wɩ bɩ̃bɩlanɛ thɩɩra a lerra he thɩɩ. 18 Dɩ Noe ther na ɔɔ bikũusɔ na ɔɔ khɛr na ɔɔ bikonaa khɛrsɔ. 19 Dɩ nʋma fɛw thɩɩrɛ bato kɔ̃tɩɩna: thɩ̃ɛ fɛʋʋkɛ n haalɛnɩ na bɩ̃bãa, na 'lominǝ fɛw, na thɩ̃ɛ wo thɩ̃ɛɛkɛ n haallɛnɩ thɩɩra awɩ cara dɩɩdɩɩ fɛw.
20 Dɩ Noe mɩrɛ bonɩ ji paar Thãgba Kɔ̃tɩna. Dɩ a fʋlɛlɛ nʋ̃ ɩkhasɔ nʋ̃ phuusɔɔra na 'lomɩ̃ ɩkhasɔ 'lomɩ̃ phuusɔra a jinǝ bonɩ thiinǝ bonɩ ji paarraale. 21 Dɩ bonɩ ji isiirile jʋʋnɛ a dã Thãgba Kɔ̃tɩn, a daaraa, dɩ a sor ɔɔ hara: « Ma bir na sɔ̃ thɩɩ kpɩɩrakɛ gɩ do tibil dɔ nɔa', gɩdonɩ tibilii ha puurore dɩɩ fʋna ɔɔ bɩsã bɔɔ. Dɩ ma bir na kʋʋr thɩ̃ɛɛkɛ hananɩ yire thɩɩra mɔ̃ mɩ cʋʋnɩ gɩrɛ 'lo bã. 22 Thɩɩ thɩ dookɛ a na donɩ ga n jalna, diir bɔɔ na kha bɔɔ, susu bɔɔ na ie bɔɔ, obulo na yʋʋr, dɩwɩllʋ na dɩtɩnɛ na hale, ga jɩɩl kpɩɩraka'».