Noe lʋʋn bato kɔ̃tɩɩna \ref Jǝn 6.8-22; Mat 24.37-39
7
1 Dɩ Thãgba Kɔ̃tɩn so Noera: «Lona bato kɔ̃tɩɩna, fɛrɛ na afɩ cɔdara fɛw. Gɩdonɩ ɩ̃ ƴɛbʋrɔ, fɛr mɩ yɩ dɩ fɩ telẽ afɩ bɔɔ tibilsɔɔ thɩ̃thɩɩn. 2 Nʋmaakɛ dɔnɩ nʋ̃ phuua, kpa dakʋʋr na dakhɛr makoɲɔ makoɲɔ, sɩ nʋmaakɛ na dɔnɩ nʋ̃ phuuǝ', kpa dakʋʋr na dakhɛr bɩɛlbɩɛl dɩbara, 3 'lominǝ dakha, kpa dakʋʋr na dakhɛr makoɲɔ makoɲɔ wɩ ha kha na fɛrɛ. Dɩ mɛ̃ awɩ mǝl na bir na ler a na ha thɩɩra paar fɛw. 4 Kɩɛr na wire makoɲɔ, ma cʋʋrɛ dɩ thãgba ɲʋɔn na dã thɩɩra dɩwɩlʋ na dɩtɩnɛ fɛw a na cʋʋna wire kpalaɲɔ. Ma bũburone thɩ̃ ye fɛʋʋkɛ mɩ tini dɩ wɩ ha thɩɩra.» 5 Dɩ Noe cʋʋrɛ thɩ̃ɛ fɛʋʋkɛ Thãgba Kɔ̃tɩn sʋʋranɩ a cʋɛ.6 Yɛna taamaadõ (600) Noe hana bɔɔkɛ thɩ kʋɛ ɲʋɔn danɩ thɩɩra.
7 Dɩ Noe lʋʋn bato kɔ̃tɩɩna na ɔɔ bikũusɔ na ɔɔ khɛr na ɔɔ bikonaa khɛrsɔ a fuu thɩ kʋɛ ɲʋɔna. 8 Dɩ nʋ̃ phuusɔɔ na nʋmaakɛ na phona', na 'lominǝ na nʋmaakɛ n haalɛnɩ na bɩ̃bãa, 9 wɩ lʋʋn bato kɔ̃tɩɩna na Noe, dakʋʋr na dakhɛr mɔna Thãgba kɔɔ sonɩ.
10 A wire makoɲɔ ka pɩ, thɩ kʋɛ ɲʋɔn mar dɩ ga n dã thɩɩ. 11 Noe na hananɩ yɛna taamaadõ (600), ɔɔ balaɲɔ sɩporɩɩ wire yʋɔr makoɲɔ wirǝ, gɛr tɩɛr ɲɔbuka kɔ̃tɩna khɛrrɔ. Dɩ ƴũu ɲɔ toopaarsɔ khɛr fɛw hǝ̃hǝ̃ǝ. 12 Dɩ thãgba ɲʋɔn kɔɔ dãa thɩɩra dɩwɩlʋ na dɩtɩnɛ fɛw a cʋʋna wire kpalaɲɔ (40). 13 Ga wiilera Noe na ɔɔ bikũusɔ: Sɛm, Kam na Jafɛtɩ na ɔɔ khɛr na ɔɔ bikonaa khɛrsɔ yẽther kɔɔ lõ bato kɔ̃tɩɩna. 14 Wɩ kɔɔ lʋʋn na hɔ̃ nʋma fɛw, cʋɔr nʋma na nʋmaakɛ n haalɛnɩ na bɩ̃bãa na 'lomĩ caarsɔ fɛw, dayɩra na dakɔ̃tɩna, na gbɛl thɩ̃ caar fɛw, mɔ̃kɛ awɩ casɔ hanɩ dɩɩdɩɩ. 15 Dɩ thɩ̃ yeekɛ hananɩ fesue dɩ wɩ fena, wɛr fɛw kɔɔ lʋʋn bato kɔ̃tɩɩna yeɲɔ yeɲɔ nakha Noe. 16 Thɩ̃ yi caarsɔɔle fɛw, dakʋʋr na dakhɛr kɔɔ lʋʋn bato kɔ̃tɩɩna mɔna Thãgba kɔɔ sonɩ Noera. Agɩpɩ Thãgba khãa loo a pɛ Noera.
17 Dɩ thɩ kʋɛ ɲʋɔn daan a cʋʋna wire kpalaɲɔ. Ɲʋɔn jʋʋnɛ a khǝi bato kɔ̃tɩ̃ɩ dɩ ga n jʋʋna ƴũu. 18 Ɲʋɔn bʋnɛ jɔɔ ka dɩ bato kɔ̃tɩɩn na n phe le ɲʋɔna ƴũu. 19 Dɩ ɲʋɔn dɛbɩrɔrɛ dɩ ga n pɛr thɩɩraakɛ. Gɔ̃gɔ̃ gbana fɛw pɩɩrɛ. 20 Ɲʋɔn kɔɔ jʋʋnɛ a pɩɩr gɔ̃gɔna, sa bir jʋʋn a dã mɛtɛrɛ makoɲɔ. 21 Dɩ thɩ̃ɛ wo thɩ̃ɛɛkɛ hananɩ yire thɩɩra khiire fɛw: 'lominǝ, a gbana cʋɔr nʋma na hɔ̃ nʋma na nʋ̃ caar dɩɩdɩɩ, wɩrɛɛkɛ n kpanɩ dɩ wa n kpaar thɩɩra, a gbana tɩbɩla fɛw. 22 Thɩ̃ɛ wo thɩ̃ɛɛkɛ hananɩ fesue thɩɩra dɩ wɩ fena kɔɔ khiire ɓibi. 23 Thale Thãgba bũburõ thɩ̃ ye fɛʋʋkɛ hanɩ kɛ thɩɩra a faa; a fʋna tɩbɩla a gbana nʋma fɛw na thɩ̃ yeekɛ n haalɛnɩ na bɩ̃bãa na 'lominǝ jɩɛra fɛw, wele ɓibi kɔɔ bũburone. Noe na ɔɔ cɔdara dɩbara sɛ, na gɩrɛ hanaanɩ kha le bato kɔ̃tɩɩna. 24 Dɩ ɲʋɔn kɔɔ bʋnɛ thɩɩra a too a dana wire tamaa na kpalaɲɔ yʋɔr (150).