Tɩbɩla fɛʋ thɩɩra kʋɛrɛ koo. \ref Thɩɩ 34.15-16; 2 Kor 6.14-18; Khɩ 14.1-4; Rɔm 3.10-18
6
1 Ɔbɔɔkɛ tɩbɩla fʋnɩ dɩ wa n ler thɩɩra wa n pɛr dɩ wa n kɔ̃ khebinǝ, 2 ƴũudara yɩrɛ mɔ̃kɛ tɩbɩlaa bikhɛrsɔ bɔrnɩ, dɩ wɩ phiire ɩkhasɔ a gba wɩ dɩ wɩ do war khɛra.3 Le Thãgba Kɔ̃tɩn so: «Ɩ̃ Thu na too tibilǝ ƴɛrr 'lo bã, gɩdonɩ thɩ̃ khinǝne tibil do. Yɛna tamaa na kpelẽ (120) ɔɔ yɛ na n khu dɩphã. 4 Dagbã* khena kɔɔ har thɩɩra dabɔɔlera. Gɛr dɔ bɔɔkɛ Thãgbaa bikũusɔ* kɔɔ gbanɩ tɩbɩlaa bikhɛrsɔ a kɔ̃ war bɩsana. Wa tibil casɔɔlera kɔɔ dʋɔn tɩɩ khena mamaraale. 5 Dɩ Thãgba Kɔ̃tɩn yɩrɛ mɔ̃kɛ tɩbɩla n cʋʋnɩ puure thɩɩra dɩɩ thʋ̃ ka, dɩ wa n kpɩɛrna thɩ̃ kpɩɩ saagado puure gɩ dɩbara gaa ga. 6 Dɩ ɩɩ mɔ̃ a tini tibil dɩ ha thale. Dɩ gɩ puurǝəre haara a pho ka. 7 Dɩ mɛ̃ Thãgba Kɔ̃tɩn so: «Ma bũburone tibilikɛ mɩ tini dɩ ha thɩɩra na faa: tɩbɩla ma fʋna, ɩ̃ gbana nʋma na nʋmaakɛ n haalɛnɩ na bɩ̃bãa na 'lominǝ jɩɛra, gɩdonɩ ma jɩ gɩrɛ cãa mɩnɩ dɩ̃ ti wa'.» 8 Sɩ Noe wer, Thãgba Kɔ̃tɩn jɩɩrɛ bʋɔra.
Thɩ kʋɛ nyʋɔn \ref Ebi 11.7; 1 Pɩ 3.19-20; Jɔ 22.15-17
9 Yɛkɛ Noee mǝlsɔ. Noe dor tibiliikɛ saranɩ ɔɔ bɔɔ tibilsɔɔlee thɩ̃thɩɩn. A n ɩɩrɛ kha na Thãgba. 10 Bikona yẽther Noe kɔɔ kɔ̃: Sɛm na Kam na Jafɛtɩ. 11 Tɩbɩla thɩɩra kɔɔ hɩrɛ koo Thãgbaa ƴɛra. Paar fɛw, puu cʋʋrɛ kɔɔ he dɩbara. 12 Dɩ Thãgba hɩɩnɛ thɩɩ a yɩɛ dɩɩ do gɩ hɩrɛ koo. Tɩbɩla fɛw kɔɔ kʋɛrɛ awɩ ɩɩr para fɛw thɩɩraakɛ. 13 Dɩ Thãgba so Noera: «Mɩ tire kpɩɛrɛ dɩ thɩ̃ ye fɛʋʋ khu pa daan mɛ̃ ɩ̃ ƴɛra. Gɩdonɩ wɩ hire thɩɩ na puu cʋʋrɛ. Nɛnɛ̃, ma bũburõ wer fɛw na thɩɩra a na faa. 14 Sɩ fe wer, kpalanɛ bato kɔ̃tɩ̃ɩ na thɩr khɩɩ a vaarɛ duusɔ dɩɩdɩɩ a calla bɩnɔ na jɩɛra fɛw na thɩ̃ɛɛkɛ n hɔnɩ laaso. 15 Yɛkɛ mɔ̃ fa kpalanɩ batora da ha: gbãʋ na thɔɔrɛ mɛtɛrɛ tamaa na kpalaɲɔ yʋɔr (150), pɛw n thɔɔ mɛtɛrɛ kpelẽ yemɔy (25), ƴũu gbãʋ n thɔɔ mɛtɛrɛ yʋɔr yemɔy (15). 16 Pɩɛr fɛnɛtɩrɩ mɛtɛrɛ kuru ƴũu phɛbɩ, sa pɩɛr lõfonɔ bɩɛl gɛllɔ. Kpalanɛ batora etaajɩ kha duu yẽther: du bɩɛl tɩɛr, du bɩɛl thɩ̃thɩɩn, du bɩɛl ƴũu. 17 Sɩ mɛrɛ, ma thɔnanɛ thɩ kʋɛ ɲʋɔn a na bũburona thɩ̃ ye fɛʋʋkɛ hananɩ fesue. Dɩ thɩ̃ɛ wo thɩ̃ɛɛkɛ hanɩ thɩɩra na khire. 18 Sɩ fe wer, ma ʋlfɛna fɛr nɔ bɩɛl ʋlfɛrɛ. Fa lʋʋn batora, fɛrɛ na afɩ bikũusɔ na afɩ khɛr na afɩ bikũusɔ khɛrsɔ. 19 Fa kpar dakha nʋ̃ caar dɩɩdɩɩ fɛʋʋkɛ hananɩ yire yeɲɔ yeɲɔ, dakʋʋr na dakhɛr dɩ wa lõ, gɩ do nɔɔ wɩ hana yire nakha fɛrɛ. 20 'Lominǝ na nʋma na nʋmaakɛ n haalɛnɩ na bɩ̃bãa, awɩ cara dɩɩdɩɩ fɛw na ɩ̃ farɛ a na 'lɛ yire. 21 Gba diko caar fɛʋʋkɛ na haanɛ nɩnɩ gɩ jɔr a pɩɛr, gɩ do anɩ diko fɛrɛ na wɛr.
22 Dɩ thɩ̃ɛ wo thɩ̃ɛɛkɛ Thãgba sʋʋranɩ a cʋɛ, otirǝ Noe cʋʋ.