Thãgbaa nɔ bɩɛl ʋlfɛ na Noe \ref Jǝn 1.26-29; Thɩɩ 21.12-14,20; The 35. 18-21, 31-33
9
1 Dɩ Thãgba bɔna Noe na ɔɔ bikũusɔ a so war: « Nɩ lera a jʋɔnɔ a he thɩɩ. 2 Nʋma fɛw thɩɩra, na 'lominǝ jɩɛra, na thɩ̃ ye fɛʋʋkɛ n haalɛnɩ na bɩ̃bãa, na thʋma fɛw laɲʋɔnna, na n ma nɛr. Anɩ ɲɔ̃kɔɔ wɩ ha. 3 Thɩ̃ɛ wo thɩ̃ɛɛkɛ n kpaarɛnɩ thɩɩra, kɛ hananɩ yire na dor anɩ diko. Mɩ ha nɛr wele fɛw mɔ̃ mɩ kɔɔ hanɩnɩ thɩ̃ phulole fɛw thɩɩra. 4 Sɩ thɩ̃ bɩɛl dʋɔn na n kho nʋmɩ na ɔɔ tɔmã'; gɩdonɩ tɔmɩn dʋɔn yire. 5 Sɩ dakha ma lʋʋrrɛ anɩ tɔmɩn, kɛ dɔnɩ yire. Nʋmɩ wo nʋmɩɩkɛ na kɔnɩ tibil agɩbo tibil wo tibiliikɛ na kɔnɩ ɔɔ alãkha tibil, ma lʋʋrraarɛ ntɛɛ tɔmɩn. 6 A tibil kʋ tibil, tibilǝ na kʋɔ dakha; gɩdonɩ Thãgba tire tibil dɩ hʋʋ. 7 Sɩ nɛrɛ, nɩ lera a jʋɔnɔ. Nɩ gba thɩɩ fɛw, a lerra hie phi». 8 Dɩ Thãgba bir mɩɩna Noe wo na ɔɔ bikũusɔ, ayɩ wɔɔ: 9 «Ado mɛr gɩ, mɩ ʋlfɛrɛ nɔ bɩɛl ʋlfɛrɛ gɩrɛ na nɛrɛ, na anɩ mǝlsɔɔkɛ na kpãa narnɩ, 10 a gbana thɩ̃ ye fɛʋʋkɛ hanɩ thɩɩra: 'lominǝ, na nʋma fɛʋʋkɛ hanɩ thɩɩra, kɛ dɔnɩ wɩrɛ thɛnɩ bato kɔ̃tɩɩna na fɛrɛ. 11 Nɔ bɩɛl ʋlfɛrɛ gɩ, dɩ̃ ʋlfɛna nɩ gɩrɛ ayɩ: «Ma bir na kʋɛ thɩ̃ yi bɩɛllakɛ kpɩɩ gɩrɛ na ɲʋɔn bã. Ɲʋɔn na bir na hale na kʋɛ thɩɩ bã». 12 Dɩ Thãgba bir so wo: «Gɩrɛ dʋɔnɩ nɔ bɩɛl ʋlfɛ jɩɩnɩkɛ mɩ pɛrnɩ dɩɩ ha mɛrɛ na nɛrɛɛ thɩ̃thɩɩn, na thɩ̃ ye fɛʋʋkɛ hana nɩnɩ kha thɩɩra, na thɩ kʋ̃ɔ wo thɩ kʋɔnaakɛ na kpaanɛnɩ, gɛr dʋɔn 13 thãgba khalʋʋkɛ mɩ pɛrnɩ ndɔlɔ̃paara. Dɩ ɔr na dʋɔn nɔ bɩɛl ʋlfɛ jɩɩn mɛrɛra na thɩɩra. 14 Ɔbɔɔkɛ ma kpanɩ ndɔlɔ̃pana ma n gbɛbɩrɩ le ƴũu, a nɩ yɩ le thãgba khalʋ, 15 ma jɩnanɛ ɩ̃ nɔ bɩɛl ʋlfɛ na nɛrɛ na thɩ̃ ye fɛw, dɩ ɲʋɔn na bir na dã thɩɩra a na kʋɛ thɩ̃ ye kpɩɩrakɛ bã. 16 Thãgba khalʋ na hale ndɔlɔ̃panana. Ɔr na n hɩɩn, ga n do nar jɩ̃jɩna thɩ̃ɛ ɩ̃ khor ʋlfɛraakɛ mɛr Thãgba ʋlfɛnɩ na thɩ̃ ye fɛʋʋkɛ hanɩ thɩɩra». 17 Dɩ Thãgba so Noera: «Gɛr dɔ nɔ bɩɛl ʋlfɛ jɩɩnɩɩkɛ mɩ pɛrnɩ dɩɩ ha mɛrɛ na thɩ̃ ye fɛʋraakɛ hanɩ thɩɩra».Noe na ɔɔ bikona yẽther \ref Sokp 20. 1; Ef 5.18; Thɩɩ20.12; Dǝt 27.16
18 Noee bikũusɔɔkɛra kɔɔ thɛnɩ bato kɔ̃tɩɩna ha wɩrɛ: Sɛm, Kam na Jafɛtɩ. Kamna kɔɔ dʋɔn Kanãa thɩ. 19 Noe bikona yẽtherrɩle lerra a hi thɩɩkɛ fɛw. 20 Dɩ Noe fʋrɛ a kʋʋl lɩɛ, a diir dɩvɛ̃ thɩra. 21 Dɩ a ɲɔr dɩvɛ̃ dɩ ga n kʋʋ dɩ phɩna sãɓɔlɔ̃ ɔɔ wa bɩnɔ. 22 Dɩ Kamɩɩkɛ dɔnɩ Kanãa thɩ yɩ ɔɔ thɩ na sãɓɔlɔ̃ a gba thena jɩɛra a mɩ ɔɔ õkona yeɲɔ. 23 Le Sɛm na Jafɛtɩ gba kẽkẽ nɩɩ a pɛ awɩ ɲɔ̃gbɛgbɛlla a pɔna na khirru a thi awɩ thɩɩ sãɓɔlɔna. Mɔ̃ wɩ kpʋʋganɩ ƴɩɛ wa yɩ awɩ thɩɩ sãɓɔlɔa'. 24 Ɔbɔɔkɛ taan cɩnɩ Noera dɩ jaa, a nɩɛrɛ gɩrɛɛkɛ ɔɔ bikuun dĩi cʋʋraanɩ. 25 Dɩ Noe so:
«Dɔ sʋ̃ɔ n 'li Kanãa.
A dɔ ɔɔ õkonaa
Deasɔɔ dee».
26 Agɩpɩ dɩ so:
«Thãgba Kɔ̃tɩnɩkɛ dɔnɩ Sɛmɩɩ Thãgba hɩna khɩɩrɛ.
Dɔ Kanãa n do awɩ dee.
27 Thãgba na n hana Jafɛtɩ bǝ̃ pɩɛ,
A toona ha ɩɩ Sɛmɩɩ kẽkẽ waʋsɔ;
Sɩ Kanãa n do awɩ dee».