Kayɛ̃ na Abɛl \ref Ebi 11.4; 1 Jã 3.12, 15; 1 Sam 15.22
4
1 Dɩ Adã jɩ ɔɔ khɛr Ɛvɩ dɩ hana bɩnɛ a kɔ̃ kũubir a dʋʋ ire Kayɛ̃. Dɩ Ɛvɩ so: «Thãgba Kɔ̃tɩn bul mer dɩ̃ kɔ̃ bi». 2 Dɩ a bire kɔ̃ Abɛl, Kayɛ̃ õkuun bu. Dɩ Abɛl do nʋ̃ khe sɩ Kayɛ̃ do kokol. 3 Bɔ bɩɛlla Kayɛ̃ gbaar ɔɔ 'lɛ thɩ̃ a jinǝ bonɩɛ Thãgba Kɔ̃tɩnna. 4 Dɩ Abɛl dakha fʋlɛ ɔɔ caca nʋmaa bisɔɔkɛ khʋɔnɛnɩ a jinǝ bonɩɛ Thãgba Kɔ̃tɩnna. Dɩ Thãgba Kɔ̃tɩn tee Abɛlɩ bonɩ. 5 Sɩ aa tee Kayɛ̃ɛ bona'. Dɩ Kayɛ̃ɛ ha kʋɛ jɔɔ ka dɩ gbu ƴɩɛ. 6 Dɩ Thãgba Kɔ̃tɩn bulee: «Aɲe fɩ gbobiro a kʋɛna ƴɩɛ thaa? 7 Ado fɩ cʋʋ bɔɔbɔɔ, fa ɓar ƴɩɛ ƴũu. Sɩ ado fa cʋʋ bɔɔbɔa', sopuu phɩ̃ fɛr lõfonɔɔ si khaa da n hɩɩn fɩ, sɩ fɛrɛ, fa n do a puno fa'.» 8 Wi bɩɛl Kayɛ̃ sor ɔɔ õkuun Abɛlla: [Sɩ jalla lɔɔ]. Dɩ mɔ̃kɛ wɩ hanɩ lɔɔ, a wure ɔɔ õkuunna a kʋʋ.9 Dɩ Thãgba Kɔ̃tɩn bulee: «Kana afɩ õkuun ha?» Dɩ birsee: «Ma ja'. Mɛr dɔ ɩ̃ õkuunɩ bɛbɛr ya?» 10 Dɩ le Thãgba Kɔ̃tɩn bulee: «Aɲe fɩ cʋʋ thalera? Mɩ n nɩɛrɛ afɩ õkuunɩ tɔmɩ̃ɩ hulẽbi, kɛ thɛnɩ thɩɩra a jʋʋn dã mɩ. 11 Nɛnɛ̃ fa 'liri sʋɔn thɩɩrakɛra ɲʋɔnɩ afɩ õkuunɩ tɔmɩn, kɛ fɩ deernɩ. 12 A fɩ kʋʋlʋʋ mɔnakɛ sɩ fa yɩɩraa thɩ̃ɛa'. Fa dor kpãkpar na tõtol thɩɩra.» 13 Dɩ Kayɛ̃ so Thãgba Kɔ̃tɩnna: «Ɩ̃ sopuura thʋnɛ dʋbɩrɔ ka gbaara. 14 Fɩ n wee mer nĩ thɩ bʋɔraakɛ. Ma hʋnɔnanɛ afɩ ƴɛ, ɩ̃ do kpãkpar na tõtolʋ thɩɩra, dɩ hɩnɛ tibil wo tibiliikɛ na caana mɩnɩ, a na kʋ mɛr.» 15 Dɩ Thãgba Kɔ̃tɩn sʋʋraa: «A tibil kʋ Kayɛ̃, ɲɛ̃be makoɲɔ wa tiir ɔɔ hel.» Dɩ Thãgba Kɔ̃tɩn dʋʋraa jɩɩn gɩ do nɔɔ tibil wo tibiliikɛ na caanaanɩ a na n kʋa'. 16 Agɩpɩ Kayɛ̃ the le Thãgba Kɔ̃tɩɩnɩ ƴɛra a jal too Nɔdɩ dɩɩra, kɛ hanɩ Edɛn wi phã paar.
Kayɛ̃ɛ mǝlsɔɔ \ref Jǝn 2.24; Mat 19.4-9; Jǝn 5.3-8
17 Dɩ Kayɛ̃ jɩ ɔɔ khɛr dɩ hana bɩnɛ a kɔ̃ Enɔkɩ. Dɩ Kayɛ̃ kurre dɩɩ a gba ɔɔ bikuun Enɔkɩɩ irǝ a dʋʋ. 18 Enɔkɩ kɔna Ɩra. Dɩ Ɩra gba kɔ̃ Mehuyayɛl. Dɩ Mehuyayɛl gba kɔ̃ Metusayɛl. Dɩ Metusayɛl gba kɔ̃ Lemɛkɩ. 19 Lemɛkɩ he khɛra yeɲɔ: Ada na Sɩla. 20 Dɩ Ada kɔ̃ Yabal. Ɔr dɔ nʋ̃ bɛɛ thɩ kɔ̃tɩ̃. Wɛr dɔ wɩrɛ n cʋɔnɩ kẽkẽ waʋsɔ. 21 Ɔɔ õkuunɩ i n dʋɔn Yubal. Ɔr dʋɔn wɩrɛɛkɛ n bɩnanɩ kolõjʋ̃ʋ na wɩrɛ fɛʋʋkɛ n ʋnanɩ bellaa thɩ kɔ̃tɩ̃. 22 Dɩ Sɩla kɔ̃ Tubal-Kayɛ̃, kɛ dɔnɩ phube, da n be thɛ na the sɛna. Naama kɔɔ dʋɔn Tubal-Kayɛ̃ õkhɛr.
23 Lemɛkɩ sor ɔɔ khɛrsɔɔra:
«Ada na Sɩla
Nɩ pɛ nũu!
Nɩ jɩɛ pɛ ɩ̃ thɩmɩɩ nũu lee!
Nɛrkɛ dɔnɩ Lemɛkɩɩ khɛrsɔ.
Mɩ kʋrɛ kuun a tiirna helu ɩ̃ kho sɛra,
a kʋ bɩsaan ɩ̃ khora
24 Ɲɛ̃be makoɲɔ wa tiir Kayɛ̃ɛ hel. Sɩ Lemɛkɩɩ hel wer ɲɛ̃be kpalãther yʋɔr makoɲɔ wa tiir.