3
1 Sii kɔɔ dɔ fɩ̃fɩl a jɔ hɔ̃ nʋma fɛʋʋkɛ Thãgba Kɔ̃tɩn kɔɔ tini. A sor khɛrra: «Sɩɩ do Thãgba kɔɔ sɔ gel aa thɩraakɛ hanɩ nãkʋɔra fɛw na n kho thɩrbi bɩɛlakaa bɛ?» 2 Dɩ khɛr birsee: «Kpei, sɩ n khor thɩra fɛʋʋkɛ hanɩ nãkʋɔraa bi. 3 Sɩ ado thɩrʋʋkɛ hanɩ nãkʋɔr thɩ̃thɩɩnɩɩ bi gɩ, Thãgba kɔɔ sor: «Na n khoa', na n thaaraa ga, a nɩ bo sa cʋʋ na khire.» 4 Dɩ sii so khɛrra: «Na khi yuurəka' ! 5 Sɩ Thãgba jɩrɛ ga wiikɛ na khonɩ anɩ yi na khɛrrɛ dɩ na hʋʋ na n jɩ bɔɔ na puure.»6 Liir khɛr yɩɛ dɩɩ do thɩrʋlee bi bɔrɛ hɩɩnɛna na khora a na puno dakha na cʋʋ tibil a jɩ bɔɔ na puure; dɩ khʋ̃ thɩrʋʋlee bi a kho sa ha ɔɔ ko dakha, kɛ wɩ hananɩ kha dɩ kho.
7 Agɩpɩ wɛr yeɲɔɔ yi khɛr dɩ wɩ jɩ sãɓɔlɔ̃ wɩ kɔɔ hana. Dɩ wɩ car faa a saa. 8 Dɩ dʋɔrɔ mɔ̃ dʋɔ jɛ fɛlɛlɛ n phʋnɩ dɩ Thãgba Kɔ̃tɩn na n pɔ nãkʋɔra, dɩ wɩ nɩɛ helle, dɩ tibilile na ɔɔ khɛr wʋɔn Thãgba Kɔ̃tɩna, thɩr ballɔ. 9 Dɩ Thãgba Kɔ̃tɩn wer tibilile a bule: «Kana fɩ ha?» 10 Dɩ tu: «Afɩ hel mɩ nɩɛ dɩ maar fʋ mɩ, gɩdonɩ sãɓɔlɔ̃ mɩ hana gɛr gɩ dɩ̃ wɔ̃.»
11 Dɩ Thãgba Kɔ̃tɩn bulee: «Amɛ sɔ far sãɓɔlɔ̃ fɩ hana? Mɔ̃ hɔ thɩrʋʋ biikɛ mɩ kɔɔ pɩɛr fɩnɩ fa n khoa', fɩ kho?» 12 Dɩ so a yɩ: «Khɛrɩkɛ fɩ ha mɩnɩ a yɩ a tɔɔna mɩ, ɔr kɔɔ hana mɩ thɩrʋʋ biile dɩ̃ kho.» 13 Dɩ Thãgba Kɔ̃tɩn bule khɛr: «Aɲe fɩ cʋʋrɔ mɛna?» Dɩ khɛr tu: «Sii fɩlɛ mɩ dɩ̃ kho.» 14 Dɩ Thãgba Kɔ̃tɩn so siirǝ :
«Gɩdonɩ fɩ cʋʋrɛ thale
fɩ 'lɛr sʋɔn a jɔ nʋma fɛw,
bɩ̃bãa fa n halna,
fa n khona thɩlãkobe
wire fɛʋʋkɛ fɩ hananɩ yire;
15 Ma pɛrɛ laarɛ fɛrɛ na khɛrɩɩ thɩ̃thɩɩn,
afɩ mǝl na ɔɔ mǝlɩ thɩ̃thɩɩn.
Ɔɔ mǝl na n cʋɔrɛ fɩ yʋʋ,
sɩ fa n dʋ̃ɔ nɔtilə̃tirə.»
16 A so khɛrra a yɩ:
«Ma cʋʋrɛ afɩ bikɔ̃ dɩ ga khɩɩr,
nakha afɩ wal dɩ ga nɩ fɩ jɔɔ;
fa gaarɛ sɩ na kɔ̃ bɩsã,
afɩ kora fa ga yire sɩ ɔr na dʋɔn far kɔ̃tɩn.»
17 A so kuunna a yɩ:
«Gɩdonɩ afɩ khɛr fɩ pɛ nũu a kho thɩrʋʋ biikɛ,
mɩ kɔɔ pɩɛr fɩnɩ fa n khoa',
fɛr dɔ kɩrʋ dɩ ma sɔnɔ thɩɩ, gɩ khe far.
Fa vɔɔrɛ waa sɩ fa n yɩɩraa dɩkɔ
wire fɛʋʋkɛ fɩ hananɩ yire.
18 A na phu farɛ uu na pʋʋsãa,
lɛ thɩ̃ɛ fa n kho dakha.
19 Fa hʋ̃ʋsɛrɛ sɩ fa n 'lɛ dikor,
phaphapha fɩ kɛr fɩ lõ thɩɩraakɛ
fɩ kɔɔ theni.
Gɩdonɩ thɩlãkobe fɩ do,
thɩlãkoberara fa kɛr na bir.»
20 Dɩ kuunile dɔnɩ Adã, dʋ ɔɔ khɛr ire Ɛvɩ gɩdonɩ ɔr dʋɔn nɩrɛ tɩbɩlala fɛw. 21 Dɩ Thãgba Kɔ̃tɩn gba lʋʋ a cʋʋ todaa a ha Adã na ɔɔ khɛr dɩ wɩ to.
22 Dɩ Thãgba Kɔ̃tɩn so: «Nɛnɛ̃ɛkɛ tibil debire a ho sɩ da n jɩ bɔɔ na puure. Sɩ pɩɛrɛɛ a mɛ̃ ga a na 'laarɛ ɲɔ̃ɔ a na gba yi thɩrʋʋ bi na kho a na hana yire khor.» 23 Liir Thãgba Kɔ̃tɩn weguu dɩ the nãkʋɔrra a jal da n kʋʋl thɩɩkɛra wɩ kɔɔ gbanɩ a mɩɩ. 24 Ɔbɔɔkɛ Kɔ̃tɩn weeni Adã pɩ, a pɛrɛ le Edɛn nãkʋɔr wi phã paar, seribɛ̃sɔ* na khalgbã dɔlɩnanɛɛkɛ n khǝǝfǝnenɩ dɩ wa n bɛr hʋɛ yi thɩrʋʋ birǝ.