Kareba Moromiꞌ To Noꞌukiꞌ Hi
Yohanes
Boona Pueꞌ Ala to mewali toaꞌ
1
1 Mepongka ka uluꞌ-uluꞌna handoaꞌi nipopewali duniaꞌ,Boo uwaꞌmo umbiꞌ.a
Boo tiꞌo, umbiꞌnamo uwaꞌ moꞌawa-awa hante Pueꞌ Ala,
hei Boo tiꞌo iomo Pueꞌ Ala.
2 Mepongka ka uluꞌ-uluꞌna Io moꞌawa-awa hante Pueꞌ Ala.
3 Pueꞌ Ala mowali hinangkana to uwaꞌ moliu i Boo.
Hawaꞌi uwaꞌ halangkaꞌ to Nopopewali ane hawaꞌi moliu Boo.
4 Ka Boo tiꞌo pepongkane kotuwuꞌ.
Hei kotuwuꞌ tiꞌo to mampomobaro lalina manusiaꞌ.
5 Wanta tiꞌo mewanta nturusi i lali duniaꞌ to mokorindi hieꞌe,
hei Io hawaꞌi howeꞌ hampiha nonani komokorindi.
6 Uwaꞌ haduo toaꞌ to norumbaꞌ Pueꞌ Ala, konaꞌna hi Yohanes. 7 Kohupaꞌna hi Yohanes, io mewali haduo sabiꞌ to mampowute noniuꞌ i pewanta tiꞌo hingkeꞌna lekiꞌ-lekiꞌna toaꞌ to pahori mepoꞌohihi i wanta tiꞌo. 8 Angkana hi Yohanes handoꞌio wanta tiꞌo. Io to humeilu mampowute noniuꞌ i wanta tiꞌo pe lekiꞌ-lekiꞌna toaꞌ.
9 Wanta tiꞌo to tuꞌu-tuꞌu,
to mampomobaro lalina lekiꞌ-lekiꞌna toaꞌ.
Iomo to mehupaꞌ i duniaꞌ.
10 Moliu i Boo, duniaꞌ Nopopewali.
Angkana i tempona uwaꞌ i duniaꞌ,
toaꞌ hawaꞌi pobahaꞌ kohihimoNa.
11 Io hupaꞌ pe woiꞌNa hadoduona,
angkana hawaꞌi rotorimo.
12 Angkana hihimolu to mantorimoꞌI hei mepoꞌohi pe Io,
Nopaꞌanihi komasipatoꞌ mewali Anaꞌna Pueꞌ Ala.
13 Hawaꞌhi mewali anaꞌna Pueꞌ Ala
alaꞌ kohamokona toaꞌ
ba nokomi peleira toaꞌ.
Bateꞌnalu Pueꞌ Ala to mampopewalihi anaꞌNa.
14 Boo tiꞌo mewalimo toaꞌ,
hei meꞌohaꞌ i lumbunta i duniaꞌ hieꞌe.
Kiꞌokiꞌmo komarohone kuasaꞌNa.
Kuasaꞌna tiꞌo Notorimo ka UmoꞌNa,
alaꞌ Iomo AnaꞌNe to Hadoduona.
Ka Io tobahaꞌi Pueꞌ Ala,
hei tohorikimo kopopuhiꞌne lalina Pueꞌ Ala i ingkiꞌ.
15 Hampiha tempo, hi Yohanes mampotongawa pe toaꞌ to woriꞌ kohihimona Boo tiꞌo. Io mololita nopokobue, notiꞌi, “Iomo hieꞌe to kupokonontokikei hampiha! Kutiꞌi: uwaꞌ to hingkiꞌ humei mehuntu ka aku, hei meliu komarohona kuasaꞌNa ka aku. Alaꞌ handoaꞌa tene nipoꞌanaꞌki, Io umbiꞌnamo uwaꞌ”b
16 Io buhaꞌ rima,
hei ka kopopuhiꞌna laliNa tiꞌo, Nobarakatiki lekiꞌ-lekiꞌna.
Pebarakati to tohua ka Io hawaꞌi mokoꞌukoa.
17 Hi Musa Aturalu to nopaꞌanikiki,
angkana hi Yesu Kerisitu mampomombahakiki,
kopopuhiꞌna laliNa Pueꞌ Ala,
hei moliu i poturuꞌNa to tuꞌu, tobahaꞌ kohihimona Pueꞌ Ala.
18 Hawaꞌi uwaꞌ howeꞌ haduo to pangkiꞌ Pueꞌ Ala,
ukonalu AnaꞌNa to Hadoduona
to uwaꞌ moꞌawa-awa hante Io.
Iomo to mampokonontokiki kohihimona Pueꞌ Ala.
Posobiꞌina hi Yohanes Toperiu
19 Hieꞌemo posobiꞌine hi Yohanes to mampowute kohihimona hi Yesu. Hampiha tempo, tadulakora toYahudi i Yerusale morumbaꞌmohi haꞌumbora duo tadulako mpenomba hei toLewic nolou pe hi Yohanes. Kowuteralu i hi Yohanes, ropeꞌitanoki, “Kotuꞌuana hihimoko? Ingkomo mpuꞌuto Datu to Mamposalamaꞌ?”
20 Mehoniꞌ hi Yohanes hante tuꞌu-tuꞌu, notiꞌi, “Aku, handoꞌioꞌa Datu To Mamposalamaꞌ.”
21 Meꞌitano womohi, “Ane hatoꞌoꞌi, hihimoko? Ba nabi Eliako.”d
Notiꞌi hi Yohanes, “Handoꞌio.”
Meꞌitano womohi, “Ba ingkomo nabi ngkodeꞌe to nidandi hampiha hingkiꞌ humei pe duniaꞌ?”
Notiꞌi hi Yohanes, “Handoꞌio woꞌo.”
22 Katoꞌo ropantiꞌiki, “Ane hatoꞌoꞌi, itiꞌikika ba hihimoko, hingkeꞌna uwaꞌ pehoniꞌki pe to morumbaꞌka humei. Hapo pehoniꞌma noniuꞌ i wotamu hadoduomu?”
23 Nohoniꞌ hi Yohanes hibali hante to noꞌukiꞌ nabi Yesaia hampiha:
“Akumo hieꞌe toaꞌ to moloaꞌ-loaꞌ i popada lori waheꞌe:
‘Pueꞌ hingkiꞌ hupaꞌmo.
Ipatimomokei lalaNe!’” \rq (Yes. 40:3)
24 I lumbura toaꞌ-toaꞌ to nirumbaꞌ tiꞌo, uwaꞌ haꞌumbora duo toParisi. 25 Rotiꞌi toParisi tiꞌo, “Ane handoꞌioko Datu To Mamposalamaꞌ, handoꞌioko nabi Elia, hei handoꞌioko woꞌo nabi ngkodeꞌ to nidandi, mahamporeꞌi hinaꞌ podehoꞌko moriu toaꞌ?”f
26 Notiꞌi hi Yohanes, “Aku moriu toaꞌ hante uwailu. Hinewowoꞌena uwaꞌmo haduo i lumbumi, angkana Io handoaꞌi tene ibahaꞌkei. 27 Iomo to hupaꞌ mehuntu ka aku. Howeꞌlu moꞌuweꞌ pehiluꞌ sanalaꞌNa, hawaꞌa masipatoꞌ.”
28 Lekiꞌ-lekiꞌna tiꞌo mewali i bolaꞌ Betania to tinaꞌ i motoꞌando uwai Yarade, i pebolaꞌana hi Yohanes meriu.
Hi Yesu iomo Anaꞌ Gimbana Pueꞌ Ala
29 Poꞌonina, hi Yohanes pangkiꞌ hi Yesu hupaꞌ pe io. Notiꞌi pe toaꞌ to woriꞌ, “Elekei! Hintumoꞌo humei toaꞌ to nipandiriꞌ hibali Anaꞌ Gimbag to mamposalamaꞌ toaꞌ i duniaꞌ ka dosa. 30 Iomo to kutiꞌi hampiha hingkiꞌ hupaꞌ mehuntu ka aku, angkana meliu komarohone kuasaꞌNa ka aku, alaꞌ mepongka handoaꞌa tene nipoꞌanaꞌki, Io umbiꞌna uwaꞌmo. 31 Uluꞌ-uluꞌna, handoaꞌi tene woꞌo kubahaꞌ kohihimoNa. Angkana hieꞌemo tungkaihangku: humeiꞌa moriuhi toSaraeli hante uwai, hingkeꞌna kupokonontokihi kohihimoNa.”
32-34 Uwaꞌ woꞌo posobiꞌine hi Yohanes hieꞌe, notiꞌi, “Uluꞌna handoaꞌi tene kubahaꞌ kohihimona hi Yesuno. Angkana Pueꞌ Ala morumbaꞌa moriu toaꞌ hante uwai. Notiꞌikiꞌa waheꞌe: ‘Ane iꞌokiꞌi Inohaꞌ Mangkolehi mengkohou hei meꞌohaꞌ i haduo toaꞌ, Iomo to hingkiꞌ mampomangkolehikei hante Inohaꞌ Mangkolehi.’ Katoꞌo, kuꞌokimo mpuꞌu Inohaꞌ Mangkolehi ka Suruga hibali pengkohouna tinti merpati pe hi Yesu. Iomo hinaꞌ kutiꞌi: hi Yesu iomo Anaꞌna Pueꞌ Ala.”
Hi Yesu mowowoi topeguruNa to uluꞌ-uluꞌna
35 Poꞌonina, hi Yohanes uwaꞌ woꞌo itoꞌo moꞌawa-awa hante roduo topeguruna. 36 Konoꞌokiꞌnalu hi Yesu moliu, notiꞌi, “Ele, ndiꞌomo Anaꞌ Gimbane Pueꞌ Ala!” 37 Korohorina lolitane hi Yohanes, noloumohi metuntu hi Yesu.
38 Nopehahiliꞌihi hi Yesu hei Noꞌele metuntuhi. Katoꞌo Noteneihi, “Hapo to ipaliꞌkei?”
Rotiꞌi “Guru, i imbo peꞌohaꞌaMa?”
39 Notiꞌi hi Yesu, “Humeimokei, iꞌokiꞌlukei hantudoꞌ.” Metuntumohi mpuꞌu pe Io nolou pe peꞌohaꞌaNa. Tempo tiꞌo tenteꞌ iba kononewa. I ando tiꞌo moꞌawa-awahi hante Io.
40 Iohi meroduo metuntuhi hi Yesu alaꞌ mampehoromuahi lolitana hi Yohanes Toperiu. Haduo, konaꞌna hi Andaria, hampemomolona hi Simo Peturuꞌ. 41 Kaliuꞌ nolou hi Andaria mampaliꞌ hi Simo, notiꞌiki, “Mohidupaꞌmoka hante Mesias,” (Mesias hibobali hante Kerisitu palaihane, Datu Topohompoꞌ.) 42 Uko tiꞌo, nokomi nolou pe hi Yesu.
Hi Yesu meꞌoꞌele pe hi Simo hei nopantiꞌiki, “Ingko Simo anaꞌna hi Yohanes. Mepongka hinewowoꞌena, hingkiꞌ niwowoiko Kepas.” (Palaihana “Kepas” i wiharora toYahudi, hibobali palaihane hante “Peturuꞌ” i wiharo Yunani. Palaihana: watu.)
Hi Yesu mowowoi hi Pilipu hante hi Natanael
43 Poꞌonina, hi Yesu hingkiꞌ nolou pe woiꞌ Galilea. Io mangkohidupaꞌki hi Pilipu hei nopantiꞌiki, “Metuntumoko i Aku!” 44 Hi Pilipu tiꞌo ka bolaꞌ Besaida, bolaꞌna hi Andaria hante hi Peturuꞌ.
45 Mepongka katoꞌo, noloumo woꞌo hi Pilipu mampaliꞌ awana to nikokeneꞌi hi Natanael. Nohuamo mpuꞌu honiꞌi notiꞌiki, “Kihuamo mpuꞌu, Toaꞌ to nitiꞌi i suraꞌna hi Musa hante i suraꞌna nabi-nabi hampiha! Iomo hi Yesu, anaꞌna hi Yusuf to ka Nasareꞌ.”
46 Mehoniꞌ hi Natanael, notiꞌi, “Uwaꞌreꞌi woꞌo to moromiꞌ to ka bolaꞌ Nasareꞌ?”
47 Notiꞌi hi Pilipu, “Metuntuko, hingkeꞌna iꞌokiꞌi!”
Noloumohi pe hi Yesu, konoꞌokiꞌna hi Yesu hi Natanael mehupaꞌ mampohidupaꞌkiꞌI, hi Yesu mantiꞌi pe hi Natanael, “Hieꞌemoꞌe to mehupaꞌ, hintotoꞌ nikokeneꞌi haduo toSaraeli to mononto hei moromiꞌ mpololeke laline.”
48 Notiꞌi hi Natanael, “Hohumboreꞌi hinaꞌ Ibahaꞌ mpololeke waliangka, Guru?”
Notiꞌi hi Yesu, “Handoaꞌko tene nowowoi hi Pilipu, Kuꞌokiꞌmoko mahura i luaꞌna loti ara.”
49 Notiꞌi hi Natanael, “Guru, AnaꞌnaKo mpuꞌu Pueꞌ Ala! Ingkomo mpuꞌu Datune toSaraeli!”
50 Notiꞌi hi Yesu, “Ba ipoꞌohiꞌi alaꞌ Kutiꞌi koKuꞌokiꞌma i luaꞌ loti ara? Hingkiꞌ iꞌokiꞌ womo tandaꞌ kuasaꞌ to meliu kokodeꞌne ka tiꞌo.” 51 Uko tiꞌo, notiꞌi womo hi Yesu, “Tuꞌu mpololeke lolitangka hieꞌe: hingkiꞌ iꞌokiꞌkei laniꞌ moweaꞌ hei malaꞌekana Pueꞌ Ala uwaꞌ to moneꞌ hei uwaꞌ to mengkohou pe Anaꞌ Manusiaꞌ.”