Hi Yesu mampololita atura pokaꞌa i lali kohamoko
19
1 Koꞌukona hi Yesu mampowute lekiꞌ-lekiꞌna tiꞌo, molaimohi ka woi Galilea nolou pe woiꞌ Yudea to tinaꞌ i hanupe uwai Yarade, hei metuntuhi topeguruNe. 2 Itoꞌo woriꞌ toaꞌ ntaniꞌna metuntuhi woꞌo pe Io, hei to mohakiꞌ Nopokoꞌoriꞌihi.3 Uwaꞌhi haꞌumbora toParisi to nolou woꞌo hingkeꞌna mampaliꞌluhi komonawuꞌana hi Yesu. Meꞌitanohi pe Io, rotiꞌi, “Motuntuni atura agamanta, ba wadireꞌi tomaꞌani mampokaꞌaki hantambina, kehapoꞌi hangkiuꞌlu pododuiꞌne?”
4 Nohoniꞌ hi Yesu, “Hawaꞌireꞌi ibasakei hapo to teꞌukiꞌ i lali Suraꞌ Mangkolehi? Uluꞌ-uluꞌna Pueꞌ Ala moteru haduo tomaꞌani hante haduo towoweꞌe. 5 Uko tiꞌo, mohawaꞌmo, Notiꞌi, ‘Tomaꞌani hangangaa mampolihi umoꞌna hante inoꞌna, horiana meꞌohaꞌ moꞌawa hante hantambina, hingkeꞌna to roduo tiꞌo mewalihi hawowota.’ 6 Mewaliꞌ, i peꞌelena Pueꞌ Ala, hamboaꞌmohi roduo angkana mewalihi hibali haduo. Iomo horiana Kutiꞌikikei: himo to nopohaꞌanu Pueꞌ Ala, hawaꞌi mpuꞌu wadi nokaꞌa toaꞌ.”
7 Meꞌitanohi huliꞌ toParisi, “Ane hatoꞌoꞌi, mahamporeꞌi hinaꞌ hi Musa mampokononto hingkeꞌna tomaꞌani to mangkodokoꞌi mampokaꞌaki hantambina hangangaa mowali suraꞌ mpokaꞌa?”
8 Nohoniꞌ hi Yesu, “Nokomi komorintodina lalimi horiana hi Musa mampoliu toaꞌ mokaꞌa. Angkana kotuꞌuana, mepongka ka uluꞌ-uluꞌna hawaꞌi hatoꞌo. 9 Hingkeꞌna ibahaꞌkei: Hihimo to mampokaꞌaki hantambina hantaro hantambine hawaꞌi mampelapiki maꞌanina hei mampohantambi towoweꞌe to ntaniꞌna, toaꞌ tiꞌo mebualosi.”
10 Katoꞌo, topeguruNahi mampatiꞌiki hi Yesu, “Ane hatoꞌoꞌi komadorine atura kohamoko, aginamo inioꞌki hamoko.”
11 Nohoniꞌ hi Yesu, “Hawaꞌi lekiꞌ-lekiꞌna toaꞌ to wadi mantorimo lolita hieꞌe. Angkana uwaꞌ toaꞌ to nopokononto Pueꞌ Ala hingkeꞌna hawaꞌhi hamoko. 12 Rapaꞌna, uwaꞌ toaꞌ to hawaꞌi hamoko alaꞌ hatoꞌomo powotane mepongka ka konipoꞌanaꞌkina. Uwaꞌ woꞌo to hawaꞌi hamoko nokomi waliana toaꞌ pe wotana. Uwaꞌ woꞌo to hawaꞌi hamoko alaꞌ peleihana hadoduona, hingkeꞌna uwaꞌ tempone mampopatengkaꞌ jamana Pueꞌ Ala i lali poparentaNa. Hihimo to wadi mantorimo poturuꞌ hieꞌe, moromiꞌ ane nopetuntuiꞌi.”
Hi Yesu mobarakati oꞌanaꞌ
13 Hampiha tempo, uwaꞌhi toaꞌ nolou mangkomi anaꞌra pe hi Yesu hingkeꞌna Notikohi hei Nopekokaekihi. Toaꞌ tiꞌohiꞌo nopowuriꞌihi topeguruNahi, 14 angkana notiꞌi hi Yesu, “Tedehiluiae oꞌanaꞌ humei pe Aku. Inioꞌ niꞌopihi, alaꞌ toaꞌ to hibalihi oꞌanaꞌ hieꞌe to hingkiꞌ mewali toaꞌna Pueꞌ Ala i lali PoparentaNa.” 15 Notikomohi oꞌanaꞌ tiꞌo, honiꞌi Nobarakatihi. Uko tiꞌo, molaimo katoꞌo.
Masusa toaꞌ tosugiꞌ mewali toaꞌna Pueꞌ Ala
16 Hampiha tempo, uwaꞌ haduo tomaꞌani to nolou pe hi Yesu meꞌitano, notiꞌi, “Guru, walia hapo to moromiꞌ to hangangaa kuwali hingkeꞌna wadiꞌa pahua kotuwuꞌ to wolaꞌ to hawaꞌi mokoꞌukoa?”
17 Notiꞌi hi Yesu, “Mahamporeꞌi hinaꞌ ipetanoki noniuꞌ i hapo to moromiꞌ? Hawaꞌi uwaꞌ ntaniꞌna to moromiꞌ, bateꞌnalu Pueꞌ Ala. Angkana hingkiꞌ Kuhoniꞌ peꞌitanoma. Ane mangkodokoꞌiko pahua kotuwuꞌ to wolaꞌ to hawaꞌi mokoꞌukoa, hangangaa ipetuntui hawaꞌne Pueꞌ Ala.”
18 Meꞌitano womo toaꞌ tiꞌo, “Hawaꞌ to imboꞌina?”
Nohoniꞌ hi Yesu, “Inioꞌ merorokoꞌ, inioꞌ mebualosi, inioꞌ manako, inioꞌ mantiꞌi sabiꞌ wuti. 19 Iꞌadaꞌimo inoꞌmu hante umoꞌmu, hei ipokarima hangko manusiaꞌma hibaliko mampokarima wotamu hadoduomu.”
20 Notiꞌi anaꞌntomaꞌani tiꞌo, “Lekiꞌ-lekiꞌna hawaꞌ tiꞌo, kupetuntuimo. Hapo tene to hangangaa kuwali?”
21 Nohoniꞌ hi Yesu, “Ane tuꞌu-tuꞌu mpuꞌu ka lalima mangkodokoꞌi mampetuntui lekiꞌ-lekiꞌne peleihana Pueꞌ Ala, noloumoko duluna mampobaluꞌ lumamu, hei doiꞌna idolaꞌ-dolaꞌkihi toaꞌ to merima-rima tuwuꞌra. Ane hatoꞌoꞌi to iwali, hingkiꞌ kodeꞌ howonine to ihua i lali suruga. Uko tiꞌo, metuntumoko pe Aku.”
22 Konohorinalu anaꞌntomaꞌani tiꞌo lolitane hi Yesu, masusa laline hei molaimo, alaꞌ woriꞌ lumane. 23 Iomo horiana notiꞌi hi Yesu pe topeguruNahi, “Tuꞌu mpololeke to Kutiꞌikikei: masusa mpololeke toaꞌ tosugiꞌ hingkiꞌ mewali toaꞌna Pueꞌ Ala i lali PoparentaNa. 24 Kutiꞌikikei womo: mololihaꞌ tene hambaꞌa unta mekahi pe woloꞌ daruꞌ hintina tosugiꞌ mewali toaꞌNa Pueꞌ Ala i lali PoparentaNa.”
25 Ikorohorinalu topegurunahi lolitane hi Yesu, ropohoko mpololeke alaꞌ ropekiri tosugiꞌ nobarakati Pueꞌ Ala. Iomo horiana rotiꞌi, “Heꞌ, ane hatoꞌoꞌi, himo romo to pahua kotuwuꞌ to wolaꞌ to hawaꞌi mokoꞌukoa?”
26 Hi Yesu meꞌele pe topeguruNahi hei Notiꞌi, “Ane manusiaꞌ, hawaꞌi nobiaꞌ mowali hapo-hapo hingkeꞌna ropahua kotuwuꞌ to wolaꞌ to hawaꞌi mokoꞌukoa. Angkana ane i Pueꞌ Ala, lekiꞌna wadi mewali alaꞌ hawaꞌi uwaꞌ to hawaꞌi Nobiaꞌ Nowali.”
27 Iomo horiana notiꞌi hi Peturuꞌ pe hi Yesu, “Hade ingka, hapomo to hingkiꞌ kihua?” Kipolihimo lekiꞌ-lekiꞌne hapongki hingkeꞌna metuntuka pe Ingko.
28 Nohoniꞌ hi Yesu, “Tuꞌu mpololeke to kutiꞌikikei: i tempona Pueꞌ Ala mowolaꞌi lekiꞌ-lekiꞌna to uwaꞌ, Anaꞌ Manusiaꞌ hingkiꞌ mahura i pahura kodatuaNa to manobaꞌ hei hingkiꞌ moparenta. I tempo tiꞌo, ingkei to metuntu pe Aku hingkiꞌ mahurakei woꞌo i pahura kodatua to hampuluꞌ roꞌonu, moparenta toSaraeli to hampuluꞌ merontino. 29 Hihimolu to mampolihi halalina, inoꞌna ba umoꞌna, anaꞌna ba tambina ba kineteꞌna nokomi petuntuna pe Aku, bateꞌna hingkiꞌ pahua howonina woriꞌ mpiha ka hapo to nopolihi, hei pahua woꞌo kotuwuꞌ to wolaꞌ to hawaꞌi mokoꞌukoa. 30 Angkana woriꞌ toaꞌ to himpodulumo, hingkiꞌ mewali kamuri i ando to hingkiꞌ hupaꞌ. Hei woriꞌ woꞌo toaꞌ to kamuri hingkiꞌ mewali himpodulu i ando to hingkiꞌ hupaꞌ.”