Kokaꞌ-kokaꞌna hi Yusuf nolou mehili kina korompihana
43
1 Kobilora i Kanaꞌa pedeꞌ monono, 2 hei kina to rohili ka Masiri ukomo roꞌoka hi Akoꞌ hampotinoahi, horiana notiꞌi hi Akoꞌ pe anaꞌnahi “Nolouwomokei pe Masiri mehili kina hingkeꞌna uwaꞌ womo toꞌoka.”3 Katoꞌo hi Yehuda mantiꞌi pe umoꞌna, “Gubenuruꞌ i woiꞌ Masiri mampowute pepakaꞌingaꞌi pe ingka hawaꞌka wadi mehinaro ane hawaꞌi kikomi hineeꞌkio. 4 Ane umoꞌ mampoliuꞌi hineeꞌki kipoꞌawa, hiniꞌluka nolou mehili pangkata, 5 angkana ane hawaꞌi ipoliu hi Benami metuntu, ingka hawaꞌka woꞌo hiniꞌ nolou, alaꞌ gubenuruꞌ tiꞌo mantiꞌi, ‘Hawaꞌkei wadi mehinaro ane hineeꞌmi hawaꞌi metuntu.’”
6 Hi Akoꞌ mantiꞌi, “Mahamporeꞌi hinaꞌ ipomasusaꞌakei hante mampetiꞌiki pe toaꞌ tiꞌo koꞌuwaꞌnalu tene hineeꞌmio?” 7 Mehoniꞌhi, “Toaꞌ tiꞌo nopekuleleꞌ nturusi pohalaliante notiꞌi, tuwuꞌlu tene umoꞌmio? Uwaꞌlu tene kokaꞌmio ba hineeꞌmi to ntaniꞌna? Iomo horiana kihoniꞌ lekiꞌna hapo-hapo peꞌitanone pe ingka. Hawaꞌi kibahaꞌ tungkaihane, hantaro io mampetiꞌiki hingkeꞌna kipoꞌawaꞌi hineeꞌki tiꞌo.”
8 Katoꞌo notiꞌi hi Yehuda pe umoꞌna, “Poliukimoka anaꞌ tiꞌo nolou kipoꞌawa, kupangakuꞌlu kotuwuꞌne anaꞌ tiꞌo hingkeꞌna kinoloumo hantaro romoꞌi uwaꞌ ka ingkiꞌ mahi alaꞌ bilora. 9 Kupohorungalu umoꞌ, hawaꞌi mahampo ituntuꞌ huliꞌ ane hineeꞌku hawaꞌi mahuliꞌ salamaꞌ wute i ingko, kupohorunga hukua tiꞌo i kotuwuꞌku. 10 Ane keꞌipoliumoꞌi hineeꞌki, waheꞌe kerompihamoka nolou.”
11 Notiꞌi umoꞌre, “Ane umbiꞌ watoꞌoꞌi mangkomikei luma to moromiꞌ mpololeke ikahikei i lali karuꞌmi ka peꞌohaꞌa hieꞌe mewali pedodupaꞌ pe gubenuruꞌ tiꞌo, hibali uwai koniuꞌ, dupaꞌ, damaꞌ, rampa-rampa to masuliꞌ, biau hante wuaꞌ badam. 12 Hangangaa mangkomikei woꞌo doiꞌ merompiha lipaꞌ, alaꞌ doiꞌ to ihuakei i lali karuꞌmi tiꞌo hangangaa ipopahuliꞌkei. Wora intu tiꞌo kohalaꞌ pangkahiralu. 13 Ikomimokei hineeꞌmi hei hohiꞌkei nolou! 14 Woi-woina Pueꞌ Ala to makuasaꞌ mepaꞌani pampekiri to moromiꞌ pe gubenuruꞌ, hingkeꞌna io marima pe ingkei, io mampopahuliꞌ hi Benami hante hi Simeo pe ingkei. Ane nokomoholiimoꞌa anaꞌku, hingkeꞌna woꞌo kupohumboꞌi.”
15 Katoꞌo halalinahi hi Yusuf mangkomi pedodupaꞌ tiꞌo hante doiꞌ rompiha lipaꞌ koworiꞌne, honiꞌhi molai pe Masiri mampoꞌawa hi Benami. Ikohupaꞌralu inoꞌo, akohi mangkohidupaꞌki hi Yusuf. 16 Ikonoꞌokiꞌnalu hi Yusuf hi Benamino hante kokaꞌ-kokaꞌnehi, io mowiharo pe topeꞌohaꞌna hei mantiꞌi, “Ipoꞌawahi toaꞌ tiꞌohio pe tambingku hei morereꞌko hambaꞌa pinatuwuꞌ, iohi hingkiꞌ mangkahi moꞌawa hante aku pohoꞌando hieꞌe.” 17 Topeꞌohaꞌ tiꞌo nolou motuntuni to nihowoꞌikiꞌi, hei nopoꞌawahi pe lali ntambina gubenuruꞌ.
18 Katoꞌo motehuꞌhi hei mampekirihi, “Nikomiki iseꞌe, alaꞌ doiꞌ to tohua i lali karuꞌta ikohumeinta to liu. Nihohongkoꞌiki nipangku, hingkeꞌna roroaꞌi kalidente hante rowaliki hawiꞌra.” 19 Dodungku tambina hi Yusuf, mololitahi hante topoꞌatoroꞌ tambina hi Yusuf. 20 “Mosangadiaka tua, ingka hieꞌe ka mehupaꞌmoka woꞌo i hieꞌe mehili kopongkona. 21-22 I patengkaꞌki mahuliꞌ, i kohaminiangki, kiwungkela karuꞌkio hawaꞌi kibahaꞌ-bahaꞌ, lekiꞌna doiꞌ pobaiaringki kina uwaꞌ i womboꞌna kina. Hawaꞌi kibahaꞌ ba himoꞌi to mampopekahi doiꞌ tiꞌo. Hinewowoꞌena kikomimo mahuliꞌ pe tua, ntaniꞌna ka tiꞌo kikomilu woꞌo doiꞌ to hingkiꞌ kipopehili womo pangkaki.”
23 Topeꞌohaꞌ tiꞌo mantiꞌi, “Hakei motehuꞌ hei komomaꞌa. Pueꞌmi, iomo Pueꞌ Ala to nopokodeꞌ hei nopenombai umoꞌmi, Io to mampopekahi doiꞌ tiꞌo pe lali karuꞌmi. Ka kutorimomo hiline kina tiꞌo.”
Katoꞌo nikomikimohi hi Simeo pe iohi, 24 honiꞌhi niwonamohi pe lali ntambi. Io mampaꞌanihi uwai ropopowaheꞌ kapuꞌra hante mampopopangka kalidera. 25 Uko tiꞌo roꞌuaꞌmo pedodupaꞌre to hingkiꞌ nipaꞌaniki hi Yusuf ane hupaꞌmoꞌi pohoꞌando, alaꞌ nitiꞌikimohi kohingkiꞌ mangkare moꞌawa hante io.
26 Kohupaꞌnalu hi Yusuf i tambina, ropeweimo pedodupaꞌre tiꞌo pe hi Yusuf hante melingkotuꞌhi menomba pe io. 27 Hi Yusuf meꞌitano hohumbo karebare hei nopeꞌitanoki woꞌo hohumbo umoꞌre notiꞌi, “Hampiha ilolitakimoꞌakei noniuꞌ umoꞌmi to motodimo tiꞌo. Mahampoꞌiwae powotane? Moromiꞌ-romiꞌlu?”
28 Iohi mehoniꞌ, “Ioꞌ moromiꞌ-romiꞌlu kotuwuꞌne.” Katoꞌo melingkotuꞌhi i hinarona hei menomba.
29 Konoꞌokiꞌnalu hi Yusuf, hi Benami hineeꞌ hampemomolone, io mantiꞌi, “Hieꞌemoto, hineeꞌmio tohinoneeꞌ, to poko itiꞌi-tiꞌikei pe aku? Woi-woina Pueꞌ Ala mobarakatiko, anaꞌku.” 30 Hantouꞌ-touꞌ molai hi Yusuf katoꞌo, alaꞌ lalina mangkopundai mpololeke hineeꞌna tiꞌo, honiꞌi nopaliꞌ pewuniane ako meꞌola, io mekahi pe kamaraꞌ meꞌola itoꞌo.
31 Ukoꞌ tiꞌo hi Yusuf memporouꞌ, honiꞌi tolou womo pe iohi, hei morii lalina, io morumbaꞌ topeꞌohaꞌna mampotimomo pangka. 32 Hi Yusuf mangka i meja haꞌanuna, halali-halalina mangka i meja ntaniꞌ. Toaꞌ toMasiri to uwaꞌ itoꞌo iohi mangka i meja to haꞌanuna woꞌo, alaꞌ toMasiri hawaꞌhi masipatoꞌ mangka moꞌawa-awa hante toIbarani alaꞌ waliara tiꞌo mekododokui motuntuni adaꞌ toMasiri. 33 Halali-halalina hi Yusuf mahurahi i hinarona, nidedehi mahura mepongka ka to kokokaꞌ wute tohinoneeꞌ iohi momeꞌele-elehi hei ropolomomenia. 34 Iohi nipaꞌanihi pangka ka mejana hi Yusuf, angkana hi Benami nipaꞌani limo mpiha koworiꞌne ka halalinahi. Honiꞌi mangkamohi hei maꞌinu hante hi Yusuf i komotanaꞌ-tanaꞌa.