Bhalʉwa wa mambwa ka Batesalonika
Yuuso
1
1 Ɨmɨ Pɔlɔ pa imoti na Silivano ɨbʉ na Timotiyo, tamumuusogito ibunu bamomosu ba Kanisa ya Tesalonika. Tamukpikilyi ibunu bhalʉwa yi nɨmʉ, Kanisa nɨyɔ ko Kunzi Obhosu na Mombukwono-dhosu Yeso-Kilisito. Bʉbʉnga na mazɨyɔ iki na ibunu !Yɨgya na bhaya ka Batesalonika
2 Tamigisilyogo Kunzi bongbingo basɨ ɨbhɨbha ko bhulyo kunu. Tamʉtwaga masyɛ masɨ wa tikogo mino kalʉmba. 3 Tamʉtamanaga bongbingo basɨ ka yɨgya kunu ko miso ko Kunzi Obhosu: iki ko pisi ya bhaya kunu ikanɨ ko pisi ya sɨpananɨsɔ bɛyɔ mo mino kagya ligubho na bɛyɔ mobhiso mino mʉtamanagɨ kunu ka Mombukwono-dhosu Yeso-Kilisito. 4 Bamamakɨ, takaibho bɛ Kunzi amuponi na amupunogoni ndɨ kaiko batʉ kakɨ. 5 A bɛyɔ, ngbingo yi nɨnɔ tabɨkyaga ndɨ mino Mongoni Manza ku kunu, takabɨkyagagʉ ndɨ na mʉnzɨna aka, luki limoti, a ndɨ ko ngu na ko pisi ya Lɨmbɛngɨ-Lotu, na ka lɨngʉnʉ. Mibhotʉ ndɨ bɛyɔ ɔbɨlɨ kusu a ndɨ mino lugo kunu, ko bhulyo ya ɨzangɨya kunu. 6 Mapʉnga ndɨ kabyɛ yɨgya kusu na nɨyɔ ka Mombukwono-dhosu, gʉtʉgʉ bɛyɔ ma ndɨ mino ka bʉkpɛkɨ-kpɛkɨ yɔ, pisi ka Lɨmbɛngɨ-Lotu, mabhayatʉ ndɨ lɨkpʉmʉka ko Kunzi na magyagya. 7 Kinili, miitoni kʉwa likingyosi lanza ka batʉ basɨ nɨbɔ babɨnɨkyana ndɨ ba iwili ya Makedhonia na ka nɨyɔ ya Akaya. 8 A bɛyɔ, lɨkpʉmʉka ka Mombukwono-dhosu apʉnga ndɨ kaɨgbata katʉkya ku kunu, adhwɛ ka Makedhonia na ka Akaya. Na gɔnɨ, mongoni ma bhaya kunu ko Kunzi itulyononi ndɨ ka bapa bayasɨ, gʉtʉgʉ ibusu aka takɛgʉ bata no luki nɨlɔ takwanana kamatɨla. 9 Bambanzʉ basɨ batʉmbʉlagatʉ ndɨ bɛyɔ matɨtɨlya ndɨ mino, ngbingo yi nɨnɔ taga ndɨ mino ku kunu. Batʉmbʉlaga gɔnɨ bɛyɔ mʉsa ndɨ mino bokunzi, mapʉnga kagugubyo Kunzi nɨnɔ a na ɔbɨlɨ na wa lɨngʉnʉ, 10 na bɛyɔ mikogo mino kabʉndaga Mikakɨ bɛyɔ ka Yeso nɨnɔ akotukyoku kʉgʉ wa lɨsyɛ. Ɨyɨ nɔ Kunzi abhililiso ndɨ lugo wa bamanda, kyɛ atɨkʉlagɨ ka ngbʉta ko Kunzi nɨyɔ akodhoku.