Balʉma 8

Kaiko na ɔbɨlɨ pisi ka Lɨmbɛngɨ ko Kunzi

1 Kʉwa wagɔwa, mʉngɨmbɔ kɛgʉ bata kʉgʉ ka batʉ nɨbɔ ba bʉmatɨkana na Yeso-Kilisito. 2 A bɛyɔ, mʉtʉʉ ma Lɨmbɛngɨ Lotu nɨmɔ apága ɔbɨlɨ ka mʉtʉ nɨnɔ amatɨkana na Yeso-Kilisito, ukulogoni ka mʉtʉʉ ma bʉnyɛ na kukwakʉ. 3 Kunzi otulyoso ndɨ nɨlɔ Mʉtʉʉ kakwananɨgʉ ndɨ kagya kyɛ bʉpɔ ba nzʉyɨ odhukusoku ndɨ Mʉtʉʉ mi nɨmɔ bipoli. Ko bhulyo yɨtʉmba bʉnyɛ, Kunzi akɔ ndɨ ngbanga wa bʉnyɛ nɨbɔ ikogo kʉsɔ wa nzʉyɨ pisi katikoku Mikakɨ bɨkpɛ. Miki yi nɨnɔ ɨbʉkʉta ndɨ na nzʉyɨ abhɛ nzʉyɨ ka batʉ ba bʉnyɛ. 4 Kunzi agya ndɨ bɛyɔ kyɛ ɔbɨlɨ kusu iki mʉdɔngɔnɨ bɛyɔ Mʉtʉʉ abɨkyaga mino. Kʉwa wagɔwa, kɛgʉ bata yɨgya ya nzʉyɨ yɔ iko katikpokyoniso, luki limoti nɨyɔ ya Lɨmbɛngɨ Lotu. 5 A bɛyɔ, batʉ nɨbɔ babyɛgɛ mʉsasa ma nzʉyɨ, tamanaga kabʉ ikogo ka lɨkpʉmʉka li nɨlɔ aka lɔ. Luki limoti, nɨbɔ babyɛgɛ mʉsasa ma Lɨmbɛngɨ Lotu, tamanaga kabʉ ikogo gɔnɨ ka lɨkpʉmʉka li nɨlɔ aka lɔ. 6 Wɨna sɛ, tamanaga ya mʉsasa ma nzʉyɨ atɨkaga ka kukwakʉ, luki limoti, nɨyɔ ya Lɨmbɛngɨ Lotu atɨkaga ka ɔbɨlɨ na mazɨyɔ. 7 Batʉ nɨbɔ basyɛ lɨmbɛngɨ ka mʉsasa ma nzʉyɨ ba bomuyoniso ko Kunzi. Bakagyagɨgʉ bata mʉtʉʉ ko Kunzi, bakakwananɨgʉ gʉtʉgʉ kagya yi aka. 8 Batʉ nɨbɔ babyɛgɛ mʉsasa ma nzʉyɨ bakakwananɨgʉ kaponoso Kunzi.

9 Wɨna sɛ, ibunu makabyɛgɨgʉ bata mʉsasa ma nzʉyɨ, luki limoti, mabyɛgɛ kʉwa mʉsasa ma Lɨmbɛngɨ Lotu, kyɛ Lɨmbɛngɨ ko Kunzi a kʉsɔ kunu. Mʉmbanzʉ kiki na Lɨmbɛngɨ ka Kilisito, ibha kɛgʉ mʉtʉ kakɨ. 10 Kiko kanɨ Kilisito a kʉsɔ kunu, gʉtʉgʉ nzʉyɨ kunu kokwo ko bhulyo ya lɨkpʉmʉka la bʉnyɛ, Lɨmbɛngɨ Lotu amʉpátʉ ɔbɨlɨ, kyɛ Kunzi amuitisoni bongbingbili. 11 Kiko kanɨ Lɨmbɛngɨ ko Kunzi nɨnɔ apupiso ndɨ Yeso ka mbʉkʉ a kʉsɔ kunu, Kunzi nɨnɔ apupiso ndɨ Kilisito ka mbʉkʉ, amʉpátʉ gɔnɨ ɔbɨlɨ ka nzʉyɨ kunu ya kukwakʉ. Amʉpá ɔbɨlɨ yi nɨnɔ pisi ka Lɨmbɛngɨ kakɨ nɨlɔ ikogo kʉsɔ kunu.

12 Kinili, bamamakɨ, ta na lobu, luki limoti kɛgʉ lubu wa nzʉyɨ bɛ kyɛ tiki kagya mʉsasa mi. 13 A bɛyɔ, makiko kabyɛ lɨkpʉmʉka la nzʉyɨ, mokwotʉ. Luki limoti, makamwɔ yɨgya yanyɛ ya nzʉyɨ pisi ka Lɨmbɛngɨ-Lotu, mikotʉ na ɔbɨlɨ. 14 Batʉ basɨ nɨbɔ Lɨmbɛngɨ ko Kunzi ukpokyonisogo, ba bomiko Kunzi. 15 A bɛyɔ, Lɨmbɛngɨ nɨlɔ miniso nolu, kɛgʉ lɨmbɛngɨ la busunzu, kamutumiso bata na kʉbangakʉ. Luki limoti, a Lɨmbɛngɨ-Lotu nɨlɔ amuitiso bomiko Kunzi, atɨkpamya kamaka Kunzi na lɨyʉ lapʉ bɛ : « Abha ! Bhabha ! » 16 Lɨmbɛngɨ ko Kunzi akatimibhiso bɨngbanganya ka mambɛngɨ kusu bɛ ta bomiko Kunzi. 17 Kiko kanɨ ta bomikakɨ, takwanana kʉwa ndɛkɛ kalya lisimo nɨlɔ ʉwanyaga ndɨ batʉ kakɨ. Talya ndɛkɛ lisimo li nɨlɔ pa imoti na Kilisito. A bɛyɔ, takiko kaigyogyiso pa imoti na ɨbʉ, togulyo ndɛkɛ ka ɨbhɨbha pa imoti na ɨbʉ gɔnɨ. nɨyɔ a ndɛkɛ kodhoku

18 Nakaɨna ambɛ takakwananɨgʉ kokingyoso ɨbhɨbha yi nɨyɔ a ndɛkɛ kodhoku na kumbu nɨyɔ takalya mbɨya wanʉ. 19 Makpʉmʉka masɨ nɨmɔ Kunzi agya ndɨ, akabʉndaga na mʉsasa kʉgbɛ ngbingo nɨnɔ Kunzi uwoniso ndɛkɛ mino bomikakɨ bɨngbanganya. 20 A bɛyɔ, makpʉmaka masɨ nɨmɔ Kunzi agya ndɨ ogulyoni kusili wa mʉtʉʉ ma makpʉmʉka ma payaya. Kɛgʉ makpʉmʉka mi nɨmɔ mɔ apa ndɨ, luki limoti Kunzi nɔ obhiso ndɨ kusili wa mʉtʉʉ mi nɨmɔ. Wɨna sɛ, mʉtamanagɨ a bɛ : 21 lɨsyɛ limoti, Kunzi akʉlagatʉ ndɛkɛ makpʉmʉka masɨ nɨmɔ agya ndɨ ka busunzu ba mʉtʉʉ mi nɨmɔ apʉtaga masɨ, kyɛ ogulyi kʉwa kʉsɔ wa kʉlɨkanaga ya ɨbhɨbha nɨyɔ ka bomiko Kunzi. 22 A bɛyɔ, takaibho ambɛ kadhwɛ mɔnɨ na bʉbwanʉ, makpʉmʉka masɨ nɨmɔ Kunzi agya ndɨ akaigomisogo, anɨmʉkana mʉzʉzʉla abhɛ muko yi nɨnɔ mʉma ikogo kalya. 23 Luki limoti, kɛgʉ asɨ makpʉmʉka mi nɨmɔ aka mɔ. Gʉtʉgʉ ibusu aka nɨbɔ tiniso ndɨ na Lɨmbɛngɨ Lotu abhɛ talʉ-talʉ wa apɛpɛ ko Kunzi, tikogo gɔnɨ kaigomisogo kʉsɔ wa mambɛngɨ kusu. Tikogo kabʉndɨla na mʉsasa ambɛ Kunzi atiitisi bomikakɨ, atɨkʉlaga ka busunzu. 24 A bɛyɔ, toukoni, luki limoti pisi ka mʉtamanagɨ aka. Wakiko kaɨna nɨlɔ wakatamanaga, ibha kɛgʉ bata mʉtamanagɨ mɔ. Mʉtʉ tino nɔ obhisogo mʉtamanagɨ ko luki nɨlɔ a kʉwa kaɨna ? 25 Luki limoti, takiko na mʉtamanagɨ ko luki nɨlɔ takɛgʉ kaɨna, isi yi bɛ takabʉndɨlaga na lɨmbɛngɨ lɨnda.

26 A mʉdɔngɔnɨ bɛgɛyɔ Lɨmbɛngɨ Lotu atisingyogo mino kʉsɔ wa bʉpɔ. A bɛyɔ, takibhigʉ kalʉmba bɛyɔ okwononi mino. Luki limoti, Lɨmbɛngɨ Lotu bɨkpɛ lɔ atɨlʉmbɨlyaga kʉsɔ wa yɨgama nɨyɔ mʉmbanzʉ kakwananɨgʉ kozukogo pisi ka mʉnzɨna. 27 Kunzi nɨnɔ ibhogo kʉsɔ wa mambɛngɨ ka bambanzʉ, ibhogotʉ nɨlɔ Lɨmbɛngɨ-Lotu ikogo kapa kakʉnga. A bɛyɔ, Lɨmbɛngɨ-Lotu ʉlʉmbɨlyaga batʉ ko Kunzi bɛyɔ Kunzi apaga mino.

28 Takaibho binza ambɛ ka makpʉmuka masɨ, Kunzi ʉgyɨlyaga bʉnza batʉ bi nɨbɔ bapaga. A batʉ bi nɨbɔ ʉmakaga ndɨ kabyɛnɛnɛ bɛyɔ osisilyo ndɨ mino. 29 A bɛyɔ, batʉ nɨbɔ Kunzi ʉpʉnaga ndɨ kambwa aka, ubhiso gɔnɨ ndɨ dhi kaiko abhɛ Mikakɨ. Kʉwa wagɔwa, Mikakɨ iko ndɛkɛ pʉta lugo ka bamamakɨ budhingi. 30 Batʉ bi nɨbɔ Kunzi ʉpʉnaga ndɨ kambwa aka bɔ, ʉmakaga ndɨ nɨ ɨyɨ gɔnɨ. Nɨbɔ ʉmakaga ndɨ, uitiso ndɨ nɨ ɨyɨ gɔnɨ bongbingbili. Na nɨbɔ uitiso ndɨ bongbingbili, ʉpá ndɨ nɨ ɨyɨ gɔnɨ ɨbhɨbha kakɨ.

Budhingi ba sɨpananɨsɔ ko Kunzi

31 Kabyɛnɛnɛ na likpumuka li nɨli, tabɨkya kʉwa bata bʉnɨ ? Kunzi kiko ka mutili kusu, wanɨ kʉwa bata nɔ akwanana katiikyonilyo ? 32 Ɨyɨ, kakyagʉ ndɨ kapá Mikakɨ, luki limoti asʉta ndɨ ka kukwakʉ ko bhulyo kusu basɨ. Atimimyo kʉwa bata lɨkɨ makpʉmʉka masɨ pa imoti na Mikakɨ ? 33 Wanɨ nɔ akwanana kaʉsʉngʉlya batʉ nɨbɔ Kunzi ʉpʉnaga ? Gʉtʉgʉ mʉtʉ bemoti aka ! A bɛyɔ, Kunzi nɔ uitiso batʉ bongbingbili. 34 Wanɨ kʉwa nɔ akwanana kaubhiso na mʉngɨmbɔ ? Gʉtʉgʉ mʉtʉ bemoti aka ! A bɛyɔ, Kilisito-Yeso okwo ndɨ, na bata opupo ka mbʉkʉ; ikogo wakiko ka kʉmbanzɨkanɨkɔ ko Kunzi katɨlʉmbɨlya. 35 Luki tino lɔ akwanana katigbonoso na sɨpananɨsɔ ko Kunzi ? Iko sɛ kumbu, ombombo, yigyogyiso, nza, yangya, lʉnga ikanɨ kukwakʉ ? 36 Mʉdɔngɔnɨ bɛyɔ ikpikogo mino kʉsɔ wa Mobiso ko Kunzi bɛ :

« Bikogo kakɨsa masyɛ masɨ katɨmwɔ ko bhulyo kakʉ,

banatɨgya abhɛ bakondɔlɔ nɨbɔ bikogo kaɨnda kaʉkɔ bingo. »+\fr 8:36 \ft Mambʉ 44:22.

37 Luki limoti, kʉsɔ wa masɨ nɨmɔ ikogo katɨgya mɔ, tikogo botutungyo kʉgbɛ pisi ka nɨnɔ atɨpa ndɨ. 38 A bɛyɔ, nakaibho bɨnza ambɛ lɨkpʉmʉka gʉtʉgʉ limoti aka, kakwananɨgʉ katigbonoso na sɨpananɨsɔ ko Kunzi : iki kukwakʉ, ɔbɨlɨ, bamalaika, bangama, ngu, lɨkpʉmʉka la masyɛ mi nɨma ikanɨ lɨkpʉmʉka nɨlɔ okodhoku, 39 iki ngu ya kʉgʉ ikanɨ nɨyɔ ya kusili, gʉtʉgʉ luki limoti aka nɨlɔ Kunzi agya ndɨ. Lɨkpʉmʉka gʉtʉgʉ limoti aka kakwananɨgʉ katigbonoso na sɨpananɨsɔ nɨsɔ Kunzi atiwoniso ndɨ kʉsɔ ka Yeso-Kilisito Mombukwono-dhosu.