Kunzi na batʉ nɨbɔ ʉpʉnaga ndɨ
9
1 Nakabɨkya lɨngʉnʉ kyɛ na kʉsɔ ka Kilisito, nakɛgʉ kamʉbɔ. Lɨyʉ kamɨ la kʉsɔ nɨlɔ Lɨmbɛngɨ Lotu okpokyonisogo, akemibhiso bɨngbanganya bɛ nakɛgʉ kabɨkya bɔngɔ. 2 Nakalya kumbu yidhingi pa imoti na yigyogyiso ka lɨmbɛngɨ nɨyɔ kɛgʉ na mulibo. 3 A bɛyɔ, ko bhulyo ya lɨvananza nɨlɔ nɨbʉkʉta mino, napatʉ bi ambɛ Kunzi ɛgbangɨ ɨmɨ, nɨgbanana na Yeso-Kilisito ka pa kabʉ. 4 Ɨbʉ nɨ Bɛzaleli. Kunzi uitiso ndɨ bomikakɨ, uwoniso ndɨ ɨbhɨbha kakɨ, akɔ ndɨ liwai na ɨbʉ, ʉpá ndɨ Mʉtʉʉ, uwoniso ndɨ bɛyɔ okwononi mino kabhibhiso na ʉpá ndɨ bagɔmɛ. 5 Ba kʉsɔ wa lɨvananza ka batitosu bɛyɔ ka Abhalama, Isaka na Yakɔbɔ. Kilisito ɨbʉkʉta ndɨ gɔnɨ pisi ka nzʉyɨ kʉsɔ wa lɨvananza li nɨlɔ gɔnɨ lɔ, ɨyɨ nɨnɔ a kʉgʉ wa masɨ, a Kunzi nɨnɔ wa ɨbhɨbha ka bɛnzɛ na bɛnzɛ ! A asɨ bɛyɔ aka yɔ. 6 Kɛgʉ bɛ kyɛ agʉmɛ ko Kunzi ogwo kʉwa ndɨ payaya. A bɛyɔ, kɛgʉ batʉ basɨ nɨbɔ bopupo ka lɨvananza ka Bɛzaleli bɔ ba Bɛzaleli ba lɨngʉnʉ, 7 batʉ nɨbɔ bopupo ka lɨvananza ka Abhalama bakɛgʉ basɨ bomikakɨ ba lɨngʉnʉ. A bɛyɔ, Kunzi abɨkya ndɨ Abhalama bɛ : « Nʉpá ndɛkɛ bomiki nɨbɔ nʉwanyaga ndɨ pisi ka Isaka. »+\fr 9:7 \ft Mʉpʉnganagɨ 21:12. 8 Isi yi bɛ, bomiko Kunzi ba lɨngʉnʉ kɛgʉ nɨbɔ bɨbʉkʉta ko pisi ya nzʉyɨ, luki limoti, a asɨ nɨbɔ aka bɔ bɨbʉkʉta pisi ka agɔmɛ. 9 A bɛyɔ, agɔmɛ yi a ndɨ bɛ : « Nodhoku ndɛkɛ ko ngbingo yi nɨmʉna gɔnɨ mʉ, Sala iko ndɛkɛ kanɨ abukutini miki mʉlʉkʉ yi. »+\fr 9:9 \ft Mʉpʉnganagɨ 18:10, 14. 10 Kɛgʉ asɨ nɨyɔ aka yɔ, Lɨbhɨka ʉbʉkʉta ndɨ bomiki balʉkʉ bi baba ɨbʉ na titosu bɛyɔ ka Isaka. 11-12 Bomiki bi nɨbɔ bakɛgʉ ndɨ mbɛyɨ bakɨbʉkʉta, kanɨ bakanogyigʉ gʉtʉgʉ bʉnza aka ikanɨ bʉnyɛ, Kunzi abɨkya ndɨ Lɨbhɛka ko ngbingo yi nɨnɔ aka nɔ bɛ : « Pʉta agugubhyogo ndɛkɛ miki. »+\fr 9:12 \ft Mʉpʉnganagɨ 25:23. Agya ndɨ bɛyɔ kyɛ otulyosi nɨlɔ a ndɨ nɨ obungusyogini kambwa. A bɛyɔ, Kunzi kʉpʉnagɨgʉ bambanzʉ kanda yɨgya kabʉ, luki limoti, lɨpʉpʉna kakɨ abyɛnɛnɛgɛ na molikoni kakɨ kʉ kabʉ. 13 Mʉdɔngɔnɨ bɛgɛyɔ ikpikogo mino bɛ :
« Napa ndɨ Yakɔbɔ, luki limoti namʉya Isau. »+\fr 9:13 \ft Malaki 1:2-3.
14 Tabɨkya sɛ kʉwa bata bʉnɨ ? Ambɛ Kunzi kɛgʉ wongbingbili ? A wongbingbili ! 15 A bɛyɔ, abɨkya ndɨ Musa bɛ: « Niko ndɛkɛ na kumbu ka mʉtʉ nɨnɔ napa kamɨnɨlya kumbu, nagyɨlya ndɛkɛ bʉnza nɨnɔ napa kagyɨlya bʉnza. »+\fr 9:15 \ft Pupo 33:19. 16 A bɛyɔ, bʉnza ko Kunzi kandagɨgʉ nɨlɔ mʉmbanzʉ apaga, ikanɨ kɛkɛlɛ kakɨ, luki limoti lɨkpʉmʉka li nɨlɔ andi asɨ Kunzi aka mombukwono kumbu. 17 Kʉsɔ wa Mobiso Motu, Kunzi abɨkya ndɨ ngama wa Misili bɛ : « Nʉpá ndɨ bʉngama kyɛ nowonisi ngu kamɨ pisi kʉ kakʉ na lɨtɔmbʉ lasɨ ibho lino kamɨ. »+\fr 9:17 \ft Pupo 9:16. 18 Kinili, Kunzi ikogo na kumbu ka nɨnɔ apaga kamɨnɨlya kumbu, otiwoso lɨmbɛngɨ ka nɨnɔ apaga katiwoso lɨmbɛngɨ.
Ngbʉta na kumbu ko Kunzi
19 Wɛbɨkyatʉ yagɔgɔ bɛ : « Kiko nɛkɨ nɨ a bɛyɔ, ko bhulyo tino yɔ Kunzi a mino kauyoyiso bambanzʉ ? A bɛyɔ, wanɨ nɔ akwanana kagya dongoso na nɨlɔ akapa ? » 20 Luki limoti, ɨwɛ mʉtʉ tino sɛ kʉwa nɔ wakwanana kagya dongoso na Kunzi ? Mbɨkɛ ya tʉkʉtɔ akwananatʉ kamuuso mʉlʉka-bambɨkɛ bɛ : « Wɛlʉka ndɨ bɛnɛ ko bhulyo ɨkɨ ? » 21 Mʉlʉka bambɨkɛ akwanana kagya na tʉkʉtɔ bɛyɔ aka yɔ opo mino : akwana kalʉka na mʉbʉngʉ ma tʉkʉtɔ mimoti, mbɨkɛ ya lɨgabhʉ lapʉ ikanɨ nɨyɔ ya lɨgabhʉ kusili.
22 A mʉdɔngɔnɨ bɛgɛyɔ ka nɨyɔ Kunzi agya ndɨ. Apa ndi kowoniso ngbʉta kakɨ na kaibhisikoso ngu kakɨ. Luki limoti, ʉbʉndɨlya ndɨ na lɨmbɛngɨ lɨnda, bambanzʉ nɨbɔ ngbʉta kakɨ akwanana ndɨ kauipo na nɨbɔ bakwanana ndɨ kogulyo ka mʉngɨmbɔ.
23 Apatʉ ndɨ gɔnɨ kowoniso ɨbhɨbha kakɨ yidhingi ka batʉ bagɔgɔ nɨbɔ a na ɨbʉ no kumbu. Ubungusyogo ndɨ batʉ bi nɨbɔ kambwa aka kogulyo ka ɨbhɨbha kakɨ. 24 Batʉ bi nɨbɔ nɨ ibusu. Katɨmakagagʉ ndɨ asɨ ibusu aka lugo ka Bayudha, luki limoti lugo ka batʉ bi nɨbɔ bakɛgʉ Bayudha gɔnɨ. 25 A nɨlɔ Kunzi abɨkya ndɨ mʉdɔngɔnɨ bɛyɔ ikpikogo mino kʉsɔ wa kɨtabʉ ka mugyalandʉ Ɔsɨa bɛ :
« Batʉ bi nɨbɔ bakɛgʉ ndɨ batʉ kamɨ,
nʉmaka ndɛkɛ ambɛ batʉ kamɨ,
batʉ nɨbɔ nakʉpagɨgʉ ndɨ,
nʉmaka kʉwa ndɛkɛ ambɛ batʉ kamɨ bʉpaka.+\fr 9:25 \ft Ɔsɨa 2:25.
26 Ka pa nɨyɔ bʉbɨkya ndɨ mino bɛ:
‹ Makɛgʉ batʉ kamɨ, ›
bʉmaka ndɛkɛ batʉ bi nɨbɔ bɛ bomiko Kunzi nɨnɔ apága ɔbɨlɨ. »+\fr 9:26 \ft Ɔsɨa 2:1.
27 Isaya apamɨkana ndɨ ko bhulyo bomikya Bɛzaleli: « Gʉtʉgʉ Bɛzaleli bakiko bi budhingi abhɛ mbumi kʉsɔ wo libo lidhingi, bakɛdɛ aka lugo kabʉ bɔ binisono ndɛkɛ na muukuso. 28 A bɛyɔ, Mombukwono-dhosu otulyoso ndɛkɛ ka ɔbɨlɨ, lasɨ nɨlɔ abɨkya ndɨ ni kolipyisigʉ. »+\fr 9:27-28 \ft Isaya 10:22-23 (Mobiso mandɛlɨ ma Kigili ). 29 Bɛgɛyɔ Isaya abɨkya ndɨ mino ka mambwa bɛ :
« Mombukwono-dhosu nɨnɔ a no ngu yasɨ katisili ndɨ bomiki,
ibha tiitoni kʉwa abhɛ gʉdʉ wa Sɔdhɔmɔ,
ibha ta mʉdɔngɔnɨ abhɛ gʉdʉ wa Gɔmɔlɨ. »+\fr 9:29\ft Isaya 1:9 Wanda kʉsɔ wa Mʉpʉnganagɨ 19.23-28.
Muukuso a pisi ka bhaya, kɛgʉ pisi ka Mʉtʉʉ
30 Tabɨkya sɛ kʉwa bʉnɨ ? Bɛvananza bayagɔgɔ bakɛgʉ ndɨ kakɨsa kaiko bongbingbili ko miso ko Kunzi. Wɨna sɛ, Kunzi uitisoni kʉwa bongbingbili pisi ka bhaya. 31 Luki limoti, Bɛzaleli ba ndɨ kapa kaɨɨta bongbingbili pisi ka Mʉtʉʉ, wɨna sɛ, bakadhwɛgʉ ndɨ mino. 32 Igyonoso ndɨ bɛyɔ ko bhulyo ya ɨkɨ ? Kyɛ bakɛgʉ ndɨ kakɨsa bungbingbili ko miso ko Kunzi pisi ka bhaya, luki limoti ba ndɨ kasɨma bɛ biko bongbingbili pisi ka yɨgyɨgyɨlya. Basakaga ka « lɨtalʉ nɨlɔ lisokisogo, » 33 bɛyɔ ikpikogo mino bɛ :
« Wɨkwɛ sɛ, nakobhiso kʉ ka gʉdʉ wa Sayuni lɨtalʉ lisokisogo,
lɨtalʉ la kugwisiso bambanzʉ.
Luki limoti, mʉtʉ nɨnɔ abhaɨlya lɨtalʉ nɨlɔ, kikigʉ ndɛkɛ no suni. »+\fr 9:33b \ft Isaya 8:14; 28:16, A gɔnɨ kʉsɔ wa Mobiso Mandɛlɨ ma Kigili.