Balʉma 7

Kaiko bʉkʉlɨkanaga ka busunzu ba Mʉtʉʉ

1 Bamamakɨ, makaibho bɨngbanganya nɨlɔ nakamʉbɨkya kyɛ mibhogotʉ Mʉtʉʉ, mʉmbanzʉ ikogo kusili wa Mʉtʉʉ ko ngbingo yi nɨnɔ aka nɔ a mbɛyɨ mino na ɔbɨlɨ. 2 Likingyosi a bɛ, muko wo vononi nɨnɔ ikogo wakɨkpɨkɨla na Mʉtʉʉ ka ɔbɨlɨ kakɨ na mbʉnyakɨ ko ngbingo yi nɨnɔ mʉlʉkʉ a mbɛyɨ mino ka mʉ aka. Luki limoti, mʉlʉkʉ kokwo, ibha muko okulikonogini ka Mʉtʉʉ mi nɨmɔ ikogo ndɨ mino wakɨkpɨla na ɨyɨ mɔ. 3 Kiko kanɨ muko ovyini bata nɨ mbʉnyakɨ a mbɛyɨ ka mʉ aka, babɨkya bɛ ogyi bɨlya. Luki limoti, mbʉnyakɨ kokwo ibha okulikonogini ka Mʉtʉʉ mi nɨmɔ a ndɨ mino wakɨkpɨkɨla. Kavyɛ, bakabɨkyɨgʉ bata bɛ ogyi bɨlya. 4 Bamamakɨ, a mʉdɔngɔnɨ bɛgɛyɔ ko bhulyo kunu, ibunu mokwoni ka nɨlɔ ondi Mʉtʉʉ pisi kamatɨkana na nzʉyɨ ka Kilisito. Kinili, ibunu ma kʉwa mukumbo ka mʉtʉ nagɔgɔ, nɨnɔ bapupiso ndɨ ka mbʉkʉ kyɛ tabʉkʉtɨlyɨ Kunzi masɔlɔ nɨmɔ okwononi. 5 A bɛyɔ, wa tikogo ndɨ mino tanabyɛ yɨgya ya nzʉyɨ, mʉsasa manyɛ nɨmɔ ikogo ndɨ pisi ka Mʉtʉʉ agyaga ndɨ ligubho kʉsɔ wa nzʉyɨ kusu yasɨ, anabʉkʉta masɔlɔ, masɔlɔ mi nɨmɔ atɨtɨka ka kukwakʉ. 6 Luki limoti, mbɨya wanʉ, tokulikonogoni kʉwa ka Mʉtʉʉ mi nɨmɔ. A bɛyɔ, tiitoni kʉwa abhɛ bamanda kabyɛnɛnɛ na lɨkpʉmʉka li nɨlɔ a ndɨ na ibusu lɨkpɨkɨla lɔ. Kinili, takwanana kʉwa kagugubhyo Kunzi na yɨgya ya mbɨya pisi ka Lɨmbɛngɨ Lotu, kanɨ kɛgʉ bata na yɨgya ya ndɛlɨ bɛyɔ ikpikogo mino ka Mʉtʉʉ.

Ligubho la Mʉtʉʉ

7 Tabɨkya sɛ kʉwa bʉnɨ ? Mʉtʉʉ nɨ bʉnyɛ ? Haaa ! Gʉtʉgʉ iki aka. Luki limoti, Mʉtʉʉ mɔ emibhiso ndɨ bɛ bʉnyɛ nɨ ɨkɨ. A bɛyɔ, nakakwananɨgʉ ndɨ kaibho ambɛ kaiko na mʉsasa ko luki ka bɛngɛnɨ nɨ ɨkɨ, kiko ndɨ kanɨ Mʉtʉʉ kabɨkyagʉ bɛ : « Wakikonitɔgʉ na mʉsasa ko luki ka bɛngɛnɨ. »+\fr 7:7 \ft Pupo 20:17; Ɨgɨlya Mʉtʉʉ 5:21. 8 Bʉnyɛ inisono ndɨ na ngala katʉkya ka mʉtʉʉ, abʉkʉta kʉwa mobhi masɨ ma mʉsasa manyɛ kʉsɔ ka ɨmɨ. A bɛyɔ, Mʉtʉʉ kiki, bʉnyɛ kikigʉ bɛgɛyɔ. 9 Ka bʉndɛlɨ ndɨ, wa Mʉtʉʉ kɛgʉ ndɨ mino, na ndɨ mubisi, luki limoti wa mʉtʉʉ odhoku mino, bʉnyɛ ipupiso, 10 ɨmɨ nokwo. Kinili, mʉtʉʉ nɨmɔ akwanana ndɨ kɛtɨka kaiko na ɔbɨlɨ, ɛtɨka kʉwa ndɨ ka kukwakʉ. 11 A bɛyɔ, bʉnyɛ inisono ndɨ no pisi katʉkya ka mʉtʉʉ, ɛbɔ, emwisiso.

12 Kinili, Mʉtʉʉ a imu motu, makpʉmʉka nɨmɔ atʉmbʉlaga a motu, mongbingbili na manza. 13 Kiko kʉwa bɛyɔ, luki lanza li nɨlɔ akwananatʉ bata kemwisiso ? Haaa ! Gʉtʉgʉ iki yi aka. Luki limoti, bʉnyɛ ava ndɨ luki lanza li nɨlɔ, ɛmwɔ. Ko pisi yi nɨyɔ, mʉtʉʉ ewoniso ndɨ bɨngbanganya bɛ bʉnyɛ kɛgʉ luki lanza. Kinili, bʉnyɛ ɨtɨkɨtɨlaga kʉwa ndɨ mino kaiko bʉnyɛ aka lɨngʉnʉ.

Bʉnyɛ ʉndʉngʉlyaga bambanzʉ

14 A bɛyɔ, tibhogotʉ ambɛ Mʉtʉʉ andaga ɔbɨlɨ wa lɨmbɛngɨ, luki limoti, ɨmɨ na na nzʉyɨ ya bʉpɔ, begobhoni abhɛ musunzu ka bʉnyɛ. 15 A lɨmbanga ! Nakɛgʉ kotombisyo nɨlɔ nakagya ! Nɨlɔ nakapa, nakɛgʉ kagya ilu, luki limoti, nɨlɔ nakamʉya, ilu lɔ nakagya. 16 Kiko kanɨ nakagya nɨlɔ nakɛgʉ kapa, isi yi bɛ nibhini ambɛ Mʉtʉʉ a manza. 17 Kinili, kɛgʉ bata ɨmɨ nɔ nakagya nɨlɔ, luki limoti a bʉnyɛ nɨbɔ a kʉsɔ kamɨ. 18 Nakaibho ambɛ lɨkpʉmʉka lanza kikogɨgʉ kʉsɔ kamɨ, ɨmɨ mʉtʉ wa nzʉyɨ ya bʉpɔ. A bɛyɔ, na na mʉsasa kagya bʉnza, luki limoti ngu yɨgya kɛgʉ. 19 A bɛyɔ, bʉnza nɨbɔ nakapa kagya, nakɛgʉ kagya, luki limoti bʉnyɛ nɨbɔ nakɛgʉ kapa kagya, ibu bɔ nakagya. 20 Nakiko kagya nɨlɔ nakɛgʉ kapa, kɛgʉ bata ɨmɨ nɔ nakagya bɛyɔ, luki limoti a bʉnyɛ nɨbɔ a kʉsɔ kamɨ.

21 Kinili, nondungi ambɛ igyonosogo na ɨmɨ bɛ : nɨyɔ napaga kagya bʉnza, asɨ bʉnyɛ aka bɔ ipupisogo kambwa kamɨ. 22 Kʉsɔ wa lɨmbɛngɨ kamɨ bɨkpɛ, nogwogo magyagya na Mʉtʉʉ ko Kunzi. 23 Luki limoti, na bata kaɨna ka nzʉyɨ kamɨ yasɨ mʉtʉʉ magɔgɔ nɨmɔ akabhʉmana na mʉtʉʉ nɨmɔ tamanaga kamɨ apaga. Mʉtʉʉ mi nɨmɔ ebhiso musunzu wa Mʉtʉʉ ma bʉnyɛ nɨmɔ a kʉsɔ kamɨ. 24 Hebee ! Ambɛ kumbu a yidhingi na ɨmɨ eee ! Wanɨ sɛ nɔ ɛkʉlaga ka nzʉyɨ yi nɨ yɨna akɛtɨka ka kukwakʉ yɨna ? 25 Kunzi avɨ ɨbhɨbha pisi ka Yeso-Kilisito nɨnɔ Muukuso kusu !

Kinili, na musunzu wa Mʉtʉʉ ko Kunzi ko pisi ya yimibho kamɨ, luki limoti, ko pisi ya nzʉyɨ ya bʉpɔ, na musunzu wa bʉnyɛ.