Timotɛɔ bogoni pa imoti na Bapɔlɔ ɨbʉ na Sila
16
1 Pɔlɔ osilo kʉwa ndɨ ka Dhelibhe, kumbuso yi, ka Lusetula. Kʉ bɛyɔ, a ndɨ na mʉbɨbya bemoti nɨnɔ ina ndɨ bɛ Timotɛɔ. Amakɨ a ndɨ Wabayudha, na a ndɨ nɨ abinikyonini Kunzi, luki limoti, abhakɨ a ndɨ ɨyɨ Mugiliki. 2 Bakilisito nɨbɔ bikogo ndɨ ka Lusetula na ka Ikonio babhɨbhaga ndɨ Timotɛɔ kʉgbɛ. 3 Pɔlɔ a ndɨ kapa bɛ biki kakpanyanaga na Timotɛɔ. Akusiso kʉwa ndɨ kyɛ Bayudha bikogo ndɨ ka iwili yi nɨyɔ. A bɛyɔ, batʉ basɨ bibhogotʉ ndɨ bɛ abhakɨ a Mugiliki. 4 Ka bagʉdʉ basɨ nɨbɔ bakɨtaga ndɨ mino, bikogo ndɨ kaʉbɨkyaga babɨbya mʉtʉʉ nɨmɔ ɨpá ndɨ na batʉtʉmbwa na bazɛɛ ba kanisa ya Yelusalɛma. Bʉbɨkyaga ndɨ bɛ babyɨ mʉtʉʉ mi nɨmɔ. 5 Makanisa isisilogo kʉwa ndɨ kangata ka bhaya, babɨbya bonobhwo masyɛ masɨ.Bamokini Pɔlɔ ka Makedhonia
6 Pɔlɔ na batʉ nɨbɔ bɨnda ndɨ kabhiso, bakɨtanaga ndɨ pisi aka ko giyo ya Fuligia na Galatia, kyɛ Lɨmbɛngɨ Lotu ʉpakya ndɨ kabɨkyaga Mongoni Manza ko Kunzi ka iwili ya Azia. 7 Nɨyɔ bosilo buwobhi na Misia, bakɨngɨla kaaga ka iwili ya Bhitinia, luki limoti, Lɨmbɛngɨ ka Yeso ʉpakya. 8 Kinili, bakɨtanaga kʉwa ndɨ pisi ka Misia, bosyo ka Tɔlɔasɨ. 9 No bhiti, Pɔlɔ alʉtaga ndɨ nziki. Amɨna ndɨ Mʉmakedhonia bemoti wakamaga kambwa kakɨ, anɨtatanaga na ɨyɨ, anabɨkya bɛ : « Kikiliki, tisingyokuto gɔnɨ kʉnʉ ka Makedhonia ! » 10 Kumbuso wo nziki yi nɨyɔ, takɨsa ndɨ kaaga bɨgala ka Makedhonia. A bɛyɔ, ta kʉwa ndɨ nɨ tibhini bɛ Kunzi nɔ atimoki kaɨnda kabɨkyaga Mongoni Manza kʉ bɛyɔ.
Ludhia abinikyonini Mombukwono-dhosu
11 Kʉwa wa, tadaka ndɨ ka bhato, tatʉkya ka Tɔlɔasɨ wa, taga ngbingbili ko uzu wa Samotilake. Bʉgala bi, tosilo ndɨ ka Nɛapoli. 12 Katʉkya kʉ, taga ndɨ ka Filipi nɨnɔ gʉdʉ wa mambwa ka iwili ya Makedhonia. Balʉma bɔ bandaga ndɨ gʉdʉ yi nɨnɔ. Tagya ndɨ mino masyɛ kʉ bɛyɔ. 13 Ka lɨsyɛ la kimumbiso, topupo ndɨ kunzi wa gʉdʉ, taga ka mutili mo libo. A bɛyɔ, ta ndɨ kasɨma ambɛ tatakanyatʉ pa ya malʉmba. Tikonono kʉwa ndɨ, tapʉnga kanzɨna na boko bi nɨbɔ ba ndɨ bʉmʉmʉkana kʉ bɛyɔ. 14 Lugo ko boko bi nɨbɔ, bemoti a ndɨ Wabatuatela, ina ndɨ bɛ Ludhia. Agabhaga ndɨ botu ba yangbʉngbʉ ba ya lɨgabhʉ lapʉ, anabanga Kunzi. Muko yi nɨnɔ atɨmʉkanagatʉ ndɨ, Mombukwono-dhosu aukwo ndɨ lɨmbɛngɨ bikpo kaʉkana bɨnza lɨkpʉmʉka nɨlɔ Pɔlɔ abɨkyaga ndɨ. 15 Kumbuso yi, ibotisiso ndɨ na ndabʉ kakɨ. Atitikisyo, ɨyɨ aka bɛ : « Makɨna bɛ nabinikyonini Mombukwono-dhosu ka lɨngʉnʉ, dhoniku kaiko kʉ kamɨ. » Otiwolyo ndɨ bɨndɔndɔlɔndɔ.
Bugwini Bapɔlɔ ɨbʉ na Sila ka bhɔlɔkɔ
16 Lɨsyɛ limoti, ngbingo yi nɨnɔ ta ndɨ mino kaɨnda ka malʉmba, mʉgya-ligubho bemoti muko yi atikpudoku ndɨ. Mʉgya-ligubho yi nɨnɔ a ndɨ na lɨlɨmba nɨlɔ awonisilogo ndɨ kabɨkyaga makpʉmʉka nɨmɔ kanigyonosigʉ. Bʉgyalandʉ bi nɨbɔ ʉpága ndɨ bambʉkwakɨ buyi budhingi. 17 Apʉnga ndɨ katɨbɨbya ibusu na Pɔlɔ, anapamɨkanaga bɛ : « Batʉ nɨbana ba bagya-ligubho ko Kunzi nɨnɔ Kʉgʉ-Kʉgbɛ. Bakamʉwanya pisi nɨyɔ makwanana mino kainisono na muukuso. » 18 Kʉsɔ wa masyɛ makpʉ, agyaga kʉwa ndɨ bɛyɔ aka yɔ. Ka mulibo, lɨmbɛngɨ akundumono ndɨ Pɔlɔ, oikono, ɨyɨ aka na lɨlɨmba bɛ : « Nakaʉbɨkya ko lino ka Yeso-Kilisito ambɛ pupo ka muko yi nɨmʉ ! » Ko ngbingo yi nɨnɔ aka nɔ, lɨlɨmba aka ndɨ bindede. 19 Nɨyɔ bamombukwono muko yi nɨnɔ bɨna bɛ ɨzangɨya kabʉ osyini, bugwi kʉwa ndɨ Bapɔlɔ ɨbʉ na Sila, bupupiso ka pa yangba kambwa ka bangama. 20 Busiliso ndɨ kambwa ka bazozi ka Balʉma, ɨbʉ aka bɛ : « Batʉ bi nɨba ba Bayudha, baputini gʉdʉ kusu. 21 Bakowoniso yɨgya yi nɨyɔ ibusu Balʉma takobingisyogigʉ ikanɨ kagya yi. »
22 Kʉwa wa, mambɛngɨ ʉkandɨkanaga ndɨ batʉ nɨbɔ ba ndɨ kʉsɔ wa ambaza wa bɨkpɛkɨ-kpɛkɨ ko bhulyo ka Pɔlɔ ɨbʉ na Sila. Bazozi bakpamya ndɨ bɛ bʉnyɔ ndumbu, bʉtɨnɨ fimbo. 23 Nɨyɔ bupo kaʉkʉba, bʉdɨkɨta ka bhɔlɔkɔ, bakpamya zamʉ bɛ ubuulyogi bɨnza. 24 Ngbingo yi nɨnɔ bakpamya ndɨ mino zamʉ bɛyɔ, ʉmakya ndɨ ka kasɔ ka pa yakpwɔ, ʉmakyaga magʉ ka kpʉkpʉ.
25 Lugo wo bhiti, Pɔlɔ ɨbʉ na Sila ba ndɨ kalʉmba, banɨmbɨla kabhibhiso Kunzi nɨ batʉ ba bhɔlɔkɔ bagɔgɔ banʉmʉkana. 26 Ko ngbingo bemoti aka, azigizo wapʉ azʉkʉla ndɨ mubumbe ma ndabʉ ya bhɔlɔkɔ. Wa aka wa, pumi yasɨ oukwikonogo ndɨ, baselegeni ka batʉ basɨ ba bhɔlɔkɔ batɨnɨkaga ndɨ bitututu. 27 Nɨyɔ zamʉ ozuzuko, ɨna ndɨ pumi bikpokpo, anyɔ kʉwa sabhɨ kakɨ bɛkyɛ ɨmwɨ kyɛ a ndɨ kasɨma bɛ batʉ ba bhɔlɔkɔ bokyogini. 28 Luki limoti, Pɔlɔ apamɨkana ndɨ bɛ : « Wakimwonitɔgʉ, ta basɨ wa aka wa ! »
29 Kʉwa wa, zamʉ nɔ akʉnga ndɨ tala, ogulyo bɨgala-gala ka ndabʉ ya bhɔlɔkɔ, ogwo ndɨ kambwa ka Pɔlɔ na Sila nɨ nzʉyɨ anatwa bɨkyakyakya. 30 Kumbuso yi, upupiso ndɨ, umuuso bɛ : « Ibunu babhabha, okwononi bɛ nagyɨ bʉnɨ kainisono na muukuso ? » 31 Basikisyo ndɨ bɛ : « Mʉbɨnɨkyana Mombukwono-dhosu Yeso, winisono na muukuso, ɨwɛ pa imoti na ndabʉ kakʉ. » 32 Kʉwa wa, babɨkyaga ndɨ Mongoni Manza ka Mombukwono-dhosu pa imoti na batʉ ba ndabʉ kakɨ basɨ. 33 Ko ngbingo yi nɨnɔ aka nɔ wo bhiti nɔ, zamʉ ʉva ndɨ, ʉsʉkʉsa bapwayɨ bɨngɔ. Wa aka wa, babotiso ndɨ, ɨyɨ pa imoti na ndabʉ kakɨ basɨ. 34 Kumbuso yi, aga ndɨ na Pɔlɔ ɨbʉ na Sila kʉ kakɨ, ʉpá malɨlɨ. Alʉkʉ nɔ pa imoti na ndabʉ kakɨ yasɨ bogwo ndɨ magyagya, kyɛ ba ndɨ nɨ babinikyonini Kunzi.
35 Nɨyɔ lɨsyɛ asyɛ, bangama ka bazozi bʉtɨka ndɨ bambanzʉ kabɨkyoku zamʉ bɛ usisi. 36 Zamʉ atʉmbʉlyaga ndɨ Pɔlɔ mongoni mi nɨmɔ bɛ : « Bazozi botikiku mayʉ bɛ namusisi. Mbɨya wanʉ, makwanana kʉwa kopupo, maga na mazɨyɔ. » 37 Luki limoti, Pɔlɔ ʉbɨkya ndɨ batʉ nɨbɔ butikoku ndɨ bɔ bɛ : « Batitinisisi bi fimbo ka pa yangba nɨ bakatisombosigʉ, batɨmakya ka bhɔlɔkɔ. Wɨna sɛ ta bomikya Balʉma. Mbɨya wanʉ, ko bhulyo ɨkɨ yɔ bakapa katipupiso bɨpɛlɛ ? Kigyonosigʉ ! Bodhukunɔ nɨ ɨbʉ aka bamombukwana-dhabʉ bi katipupiso yi ! »
38 Batʉ bi nɨbɔ bɨga ndɨ, bʉtʉmbʉlyaga bangama lɨkpʉmʉka li nɨlɔ. Nɨyɔ bʉkana bɛ Pɔlɔ na Sila ba bomikya Balʉma, babanga ndɨ bɨnyɛ. 39 Kʉwa wa, bodhoku ndɨ, bɨtatanaga na ɨbʉ, busiso. Kumbuso yi, bʉbɨkya ndɨ bɛ bopupi ka gʉdʉ yi nɨnɔ. 40 Ngbingo yi nɨnɔ Pɔlɔ na Sila bopupo ndɨ mino ka bhɔlɔkɔ, bɨnda ka ma Ludhia. Kʉ bɛyɔ, bɨnanana ndɨ na bakilisito, butumiso mambɛngɨ, kumbuso yi, baga ndɨ ɨbʉ.