Bambanzʉ bakagya bodongoso ko bhulyo sɨmʉɨsɔ
15
1 Batʉ bemoti-bemoti botukyoku ndɨ ka Yudhɛa, bosyo ka Atiokia. Kʉ bɛyɔ, bapʉnga ndɨ kaʉtɨwa batʉ nɨbɔ babhaya ndɨ bɛ : « Makikusisi mʉdɔngɔnɨ bɛyɔ mʉtʉʉ ka Musa abɨkya mino, makakwananɨgʉ kainisono na muukuso. » 2 Lɨkpʉmʉka atʉkya ndɨ ka bakpɨba, Pɔlɔ na Bhalanabha bapʉnga ndɨ kasaana na batʉ bi nɨbɔ. Bʉkanana kʉwa ndɨ bɛ Pɔlɔ, Bhalanabha pa imoti na batʉ bagɔgɔ lugo kabʉ badakɨ ka Yelusalɛma kainzinzinyoku pa imoti na batʉtʉmbwa na bazɛɛ ba kanisa ko bhulyo ya lɨkpʉmʉka li nɨlɔ.3 Ka lɨgʉndʉ li nɨlɔ, kanisa ʉpá ndɨ makpʉmʉka nɨmɔ okwononi kabhɨnɨka buti kabʉ. Bakɨtanaga ndɨ ko giyo ya Fenisia na Samalia, banatʉmbʉlaga bɛyɔ batʉ nɨbɔ bakɛgʉ ndɨ Bayudha babhaya ndɨ mino Kunzi. Mongoni mi nɨmɔ ʉpá ndɨ bakilisito magyagya kʉgbɛ. 4 Nɨyɔ bosilo ka Yelusalɛma, kanisa, batʉtʉmbwa pa imoti na bazɛɛ ba kanisa bʉtɨlya ndɨ. Kʉwa wa, bʉtʉmbʉlyaga ndɨ masɨ nɨmɔ Kunzi ʉgyɨlya ndɨ. 5 Luki limoti, Bafalɨsayɔ bemoti-bemoti nɨbɔ babhaya ndɨ, bamaga ndɨ, babɨkya bɛ : « Okwononi bɛ batʉ nɨbɔ babhaya nɨ bakɛgʉ Bayudha bikusisi, bʉkpamya kagya mʉtʉʉ ka Musa. »
6 Kʉwa wa, batʉtʉmbwa pa imoti na bazɛɛ ba kanisa bamʉmʉkana ndɨ kakpɨma lɨkpʉmʉka li nɨlɔ. 7 Nɨyɔ bagya bodongoso bɨndɨ, Pɛtɛlɛ amaga ndɨ, ɨyɨ aka ndɨ na ɨbʉ bɛ : « Bomika-mama, makaibho bɛ Kunzi epunogoni ndɨ ndɛlɨ aka lugo kunu kabɨkyaga Mongoni Manza ka batʉ nɨbɔ bakɛgʉ Bayudha, bɛ kyɛ bʉkanɨ, babhaɨlya. 8 Kunzi nɨnɔ ibhogo mambɛngɨ ka bambanzʉ, owoniso bɛ uukwilyoni ndɨ batʉ bi nɨbɔ bakɛgʉ Bayudha pisi kaʉpá Lɨmbɛngɨ Lotu, mʉdɔngɔnɨ bɛyɔ atɨpá ndɨ mino gɔnɨ ibusu. 9 Ɨyɨ kamakyagʉ ndɨ lɨbhabha lugo kusu na ɨbʉ, obubiso ndɨ mambɛngɨ kabʉ bitu kyɛ babhoilyoni. 10 Mbɨya wanʉ, ko bhulyo ɨkɨ yɔ makɛgʉ mino kabanga Kunzi ? Makapa kaubhinikiso babɨbya buti ba likumbogi nɨlɔ iki batɨtosu, iki ibusu bamombukwono-dhosu takakwananɨgʉ ndɨ kabhɨnɨka ? 11 A bɛyɔ, ta na bhaya ambɛ tinisono na muukuso pisi ka ɨzɨyɔ ka Mombukwono-dhosu Yeso mʉdɔngɔnɨ abhɛ ɨbʉ.
12 Kʉwa wa, batʉ basɨ nɨbɔ ba ndɨ wa badhakyana ndɨ biwo. Bapʉnga ndɨ kaʉmʉkana Bapɔlɔ ɨbʉ na Bhalanabha bɛyɔ ba ndɨ mino katʉmbʉlaga mokingyosi masɨ na makpʉmʉka mʉmbanga-mbanga nɨmɔ bagya ndɨ ko ngu ko Kunzi ka batʉ nɨbɔ bakɛgʉ Bayudha. 13 Nɨyɔ bama kanzɨna, Zaki aka ndɨ bɛ : « Bomika-mama, imukononi mbɛyɨ ! 14 Simoni atitumbulyogini bɛyɔ Kunzi ubuulyogo ndɨ mino batʉ nɨbɔ bakɛgʉ ndɨ Bayudha katʉkya ka bʉndɛlɨ, kyɛ ɨpʉnɨlyagɨ lɨvananza limoti lugo kabʉ. 15 Lɨkpʉmʉka li nɨlɔ a mʉdɔngɔnɨ na mʉnzɨna ka bogyalandʉ bɛyɔ ikpikogo mino kʉsɔ wa Mobiso Motu bɛ :
16 ‹ Kumbuso wa lɨkpʉmʉka li nɨlɔ, nigokuto ndɛkɛ,
nomoso ndɛkɛ bata ndabʉ ka Dhaudi nɨyɔ odukono ndɨ,
nopikotʉ ndɛkɛ bata,
nomoso bɨgbʉ,
17 kyɛ batʉ bagɔgɔ basɨ bamɨgɨlyɨku Mombukwono-dhosu,
iyo, batʉ ba mabhabha masɨ nɨmɔ nɨpʉnɨlyaga ndɨ, biki batʉ kamɨ bɨkpɛ.
18 Mombukwono-dhosu abɨkya bɛyɔ, \q1 obikyoni ndɨ lɨkpʉmʉka li nɨlɔ ndɛlɨ. › »
19 Zaki idhukulogo ndɨ kanzɨna bɛ : « Kinili, ɨmɨ, na na mʉtamanagɨ ambɛ kokwononigʉ kaubukutisilyo makpʉmʉka nganga batʉ nɨbɔ bamigilyoku Kunzi nɨ bakɛgʉ Bayudha. 20 Luki limoti, okwononi tukpikilyi bɛ : bakulyonitɔgʉ banyama bi nɨbɔ bʉpága ka bokunzi, basɨ bɨlya, bakulyonitɔgʉ banyama bi nɨbɔ bʉmwɔgɔ kanɨ budhulini basɔngʉ ikanɨ kalya bangʉ+\fr 15.20 \ft Wanda gɔnɨ kʉsɔ wa Balawi 17.10-16, 18.6-18. 21 A bɛyɔ, katʉkya ka bʉndɛlɨ, bambanzʉ bopungoni ndɨ kabɨkyaga Mʉtʉʉ ka Musa ka bagʉdʉ basɨ. Ka masyɛ masɨ ma kimumbiso, bikogo ndɨ katangʉlaga gɔnɨ Mʉtʉʉ mi nɨmɔ ka bandabʉ ba ya likungoni ka bayudha.
Butikilyini bakilisito ba Atiokia bhalʉwa
22 Kʉwa wa, batʉtʉmbwa, bazɛɛ ba kanisa na kanisa wasɨ bʉkanana ndɨ kaʉpʉnaga bambanzʉ lugo kabʉ, na kaʉtɨka pa imoti na Bapɔlɔ ɨbʉ na Bhalanabha ka Atiokia. Bapʉnaga ndɨ Yudha nɨnɔ ɨna ndɨ gɔnɨ bɛ Bhalisabha na Sila. Balʉkʉ baba bi nɨbɔ ba ndɨ batʉ ba kinisono lugo ka bakilisito. 23 Bʉtɨka kʉwa ndɨ na bhalʉa yi nɨmʉ :
« Ibusu batʉtʉmbwa na bazɛɛ ba kanisa tamumuusogitɔ ibunu bomomosu kʉsɔ wa bhaya nɨbɔ bakɛgʉ Bayudha kʉ ka Atiokia, ka Sulia na ka Kilikia. 24 Tukoni bi bɛ batʉ bemoti-bemoti botukyi bi kʉnʉ nɨ takukpomyigʉ, bɨnda bi kamugbomiso na kamunzingimoso bamʉ na mʉnzɨna kabʉ. 25 Kinili, tukononi bi pa imoti kaʉpʉnaga bambanzʉ na kamʉtɨkɨlya. Batʉ bi nɨbɔ bakpakyana pa imoti na bomomosu ba lɨmbɛngɨ bɛyɔ ka Bhalanabha na Pɔlɔ, 26 ɨbʉ bapóni ɔbɨlɨ kabʉ kagugubyo Mombukwono-dhosu Yeso-Kilisito. 27 Tamutikilyito gɔnɨ Yudha na Sila. Ɨbʉ bɔ bamʉtʉmbʉlyaga bɨngbanganya mongoni mi nɨmɔ tamukpikilyi mɔ. 28 A bɛyɔ, Lɨmbɛngɨ Lotu pa imoti na ibusu tini bi bɨnza bɛ takamubhinikisoni bata likumbogi lagɔgɔ. Luki limoti, mokwononi kagya bɛ : 29 Makolyonitɔgʉ makɔlɔ ka banyama nɨbɔ bʉpága abhɛ apɛpɛ ka bokunzi, makolyonitɔgʉ bangʉ, makulyonitɔgʉ banyama bi nɨbɔ bʉmwɔgɔ kanɨ budhulini basɔngʉ, wosoni bɨlya. Makagya bɛyɔ, ibha mogyini bɨnza. Tamumuusogito bata. »
30 Ka mulibo, Pɔlɔ, Bhalanabha, Yudha pa imoti na Sila batʉkya ndɨ, baga ka Atiokia. Kʉ bɛyɔ, bʉmʉmʉla ndɨ bakilisito basɨ, bʉpá bhalʉa yi nɨnɔ. 31 Nɨyɔ batangʉlaga ndɨ, bogwo magyagya, mambɛngɨ utumo. 32 Yudha na Sila nɨbɔ ba ndɨ bamombukwono-dhabʉ bi bogyalandʉ, butumiso ndɨ bakilisito mambɛngɨ na bumomoso ka bhaya pisi ka mʉnzɨna dhidhidhi. 33 Bagya mbɛyɨ bata ndɨ mino masyɛ kʉ bɛyɔ. Kumbuso yi, bakilisito bʉpá ndɨ lɨgʉndʉ kʉsɔ wa mazɨyɔ kaɨga ka batʉ nɨbɔ butikoku ndɨ. [ 34 Luki limoti, Sila ɨna ndɨ bɨnza kotigolo kʉ bɛyɔ. ]
35 Pɔlɔ na Bhalanabha basyɛsyɛ ndɨ mbɛyɨ bata mino ka Atiokia kʉ. Kʉ bɛyɔ, bikogo ndɨ kowonisilo na kabɨkyaga pa imoti na batʉ bagɔgɔ budhingi lɨkpʉmʉka ka Mombukwono-dhosu.
Pɔlɔ bosononini na Bhalanabha
36 Kumbuso wa masyɛ makɛdɛ, Pɔlɔ abɨkya ndɨ Bhalanabha bɛ : « Tɨgɨ kaʉndaga bakilisito ka bagʉdʉ basɨ kʉ tabɨkyaga ndɨ mino mongoni ko Mombukwono-dhosu, tiniku mbɛyɨ bɛ ba bʉ. » 37 Bhalanabha a ndɨ wakɨtʉlya bɛ baga pa imoti na Bayuani-Malɨkɔ. 38 Luki limoti, Pɔlɔ akya ndɨ lɨmbɛngɨ limoti, kyɛ ɨyɨ Yuani ʉsa ndɨ bɨgbʉ ka Pamufilia, akya ndɨ kaɨnda pa imoti na ɨbʉ ka ligubho. 39 Pɔlɔ na Bhalanabha badhwanana ndɨ kadhwɛ kʉ kwa kʉ basanana ndɨ mino. Bhalanabha ava kʉwa ndɨ Malɨkɔ, badaka ka bhato, baga ko uzu wa Kipulo. 40 Nɨyɔ bakilisito bʉlʉmbɨlya, Pɔlɔ ava kʉwa ndɨ ɨyɨ Sila, baga. 41 Bakɨtanaga ndɨ lugo wa iwili ya Sulia na nɨyɔ ya Kilikia. Kʉ bɛyɔ, Pɔlɔ utumiso ndɨ batʉ ba makanisa mambɛngɨ.