Bamwini Zaki, bamakya Pɛtɛlɛ ka bhɔlɔkɔ
12
1 Ko ngbingo yi nɨnɔ, ngama Ɛlɔdhɨ apʉnga ndɨ kaugyogyiso bambanzʉ bemoti-bemoti ba kanisa. 2 Akpamya ndɨ bɛ bamwɨ Zaki nɨnɔ mamakɨ Yuani na dhʉkpa. 3 Nɨyɔ ɨna ndɨ bɛ Bayudha bokogwo magyagya ko bhulyo ya lɨkpʉmʉka li nɨlɔ, agwisiso ndɨ gɔnɨ Pɛtɛlɛ. A ndɨ ko ngbingo wa yɨnga nɨyɔ balyaga mino mukati bikofulu. 4 Nɨyɔ agwi Pɛtɛlɛ, amakya ka bhɔlɔkɔ, obhiso ndɨ magbʉta makwanganya dhidhidhi ma basʉdha bakwanganya-bakwanganya kabuulyogo. A ndɨ kapa kasombiso kumbuso wa yɨnga wa Pasɨka. 5 Ba kʉwa ndɨ kabuulyogo Pɛtɛlɛ ka bhɔlɔkɔ aka kʉ, nɨ kanisa idukufini bigubu kalʉmbɨlya.Pɛtɛlɛ opupini ka bhɔlɔkɔ
6 Ɛlɔdhɨ a kʉwa ndɨ kapa kasombiso na bʉgala bi, no bhiti yi nɨyɔ, Pɛtɛlɛ a ndɨ wakanga lugo ka basʉdha baba mʉkanda na baselegeni bayɨba kanɨ bazamʉ banobuulyo mupumi ma bhɔlɔkɔ. 7 Malaika bemoti ka Mombukwono-dhosu opuponoku ndɨ bigbututu, ndabʉ yi nɨyɔ a ndɨ mino yɔ obubo ndɨ bitu. Malaika azʉkʉla ndɨ Pɛtɛlɛ, azuzukiso, abɨkya bɛ : « Wamaga bɨgala-gala ! » Kʉwa wa, baselegeni nɨbayɔ bakanda ndɨ na ibu mabɔkʉ atɨnɨkaga ndɨ. 8 Malaika aka ndɨ na ɨyɨ bɛ : « Wɨkandɨla mʉkaba, wɨkandɨlaga bɛkpakʉ. » Agya ndɨ bɛyɔ aka yɔ. Malaika abɨkya bata ndɨ bɛ : « Wimokisyo koti kakʉ, webyeku. » 9 Pɛtɛlɛ opupo ndɨ ka bhɔlɔkɔ nɨ anabɨbya malaika. Luki limoti, kɛgʉ ndɨ kaibho bɛ nɨlɔ malaika a ndɨ kagya a lɨngʉnʉ. A ndɨ kasɨma bɛ nziki. 10 Ngbingo yi nɨnɔ bakɨtaga ndɨ mino lɨgbʉta la mambwa ka basʉdha, kumbuso yi nɨlɔ la mɨba, bosilo kʉwa ndɨ ka mupumi nɨmɔ bagya ndɨ na bangwɛyɨ, nɨmɔ babyɛgɛ ndɨ mino kaɨnda ka gʉdʉ. Mupumi mɔ oukwikono ndɨ ni imu aka kambwa kabʉ, bopupo ndɨ. Bisisilogo ko pisi yimoti bɛnɛ, malaika alimikyo ndɨ bɨpɛlɛ.
11 Niyɔ Pɛtɛlɛ imibho, ɨyɨ aka ndɨ bɛ : « Nibhini sɛ kʉwa mbɨya wanʉ ambɛ Mombukwono-dhosu atikiku malaika kakɨ kɛkʉlaga ka mabɔkʉ Ɛlɔdhɨ, na ka masɨ nɨbɔ Bayudha bo bi kapa kɛgya. »
12 Ngbingo yi nɨnɔ ibho mino lɨkpʉmʉka li nɨlɔ bɛyɔ, aga ndɨ ka Malia, amakɨ Yuani nɨnɔ bamakaga ndɨ gɔnɨ bɛ Malɨkɔ. Bambanzʉ budhingi ba ndɨ bʉmʉmʉkana kʉ bɛyɔ kalʉmba. 13 Pɛtɛlɛ oipo ndɨ holi ka mupumi ma kunzi. Mʉgya-ligubho muko yi nɨnɔ ina ndɨ bɛ Lɔdha akpudoku ndɨ, kaʉkanɨlya. 14 Ibho ndɨ lɨyʉ ka Pɛtɛlɛ, ogwo magyagya kʉgbɛ, kanɨ koukwo mupumi. Ɨga ndɨ mbangʉ kaʉbɨkya batʉ bagɔgɔ bɛ Pɛtɛlɛ a kunzi kʉ. 15 Ɨbʉ aka ndɨ na ɨyɨ bɛ : « Wa na ibhikyasʉ ! » Luki limoti, otiolyo ndɨ kabɨkya bɛ a lɨngʉnʉ. Babɨkya kʉwa bɛ : « A nɛkɨ malaika kakɨ ! » 16 Luki limoti, Pɛtɛlɛ a ndɨ asɨ koipo aka holi. Nɨyɔ boukwo kʉwa ndɨ mupumi, bamɨna, bombomboyo ndɨ kʉgbɛ. 17 Udhokiso ndɨ na mabɔkʉ, ʉtʉmbʉlyaga bɛyɔ Mombukwono-dhosu apupisi mino ka bhɔlɔkɔ. Ubikyoku bata bɛ : « Mibikyonikuto gɔnɨ Zaki na bakilisito bagɔgɔ. » Kumbuso yi, opupo ndɨ, aga ka pa yagɔgɔ.
18 Nɨyɔ lɨsyɛ asyɛ, basʉdha bapʉnga ndɨ ɨpʉmbʉ lugo kabʉ, banuusono bɛ : « Pɛtɛlɛ a yanɨ ? » 19 Ɛlɔdhɨ apá mʉtʉʉ bɛ bakɨsɨ bɨvaka-vaka, luki limoti nɨ bakaminigʉ. Usombiso ndɨ basʉdha nɨbɔ ba ndɨ kabuulyogo, akpamya bɛ bulumwisogi. Kumbuso yi, atʉkya ndɨ ka Yudhɛya, aga ka Kaisalia, agya ndɨ mino masyɛ kʉ bɛyɔ.
Kukwakʉ ka Ɛlɔdhɨ
20 Ɛlɔdhɨ ikogo ndɨ no yoko yapʉ na batʉ ba mugi ma Tilo na Sidhɔna. Batʉ bi nɨbɔ bʉkanana ndɨ kaɨnda kamɨna. Bapʉnga mbɛyɨ ndɨ kaʉkanana na Bhalasɨtɔ, nɨnɔ obuulyogo ndɨ ndabʉ ka ngama, kumbuso yi, baga ndɨ kaɨtatanaga na Ɛlodhɨ kyɛ malɨlɨ nɨmɔ balyaga ndɨ otukyogoku ndɨ kʉ kakɨ. 21 Ka lɨsyɛ nɨlɔ bʉkanana ndɨ mino, Ɛlɔdhɨ imokisyogo botu ba ya bʉngama, iko ka pa yangba, apʉnga kanzɨna kambwa ka bambanzʉ. 22 Bambanzʉ bapʉnga ndɨ kapamɨkanaga, banabɨkya bɛ : « Kɛgʉ bata mʉmbanzʉ nɔ akanzɨna, a kʉwa lɨyʉ ko kunzi. » 23 Ko ngbingo yi nɨnɔ aka nɔ, malaika bemoti ka Mombukwono-dhosu agyogyiso ndɨ kyɛ kapágʉ ndɨ Kunzi ɨbhɨbha, ugwo ndɨ bodhuu wakamaga, okwo.