Pɛtɛlɛ akatʉmbʉlaga ka Yelusalɛma nɨlɔ igyonoso ndɨ
11
1 Batʉtʉmbwa pa imoti na batʉ ba bhaya nɨbɔ bikogo ndɨ ka Yudhɛya bʉkana ndɨ bɛ bɛvananza ba yagɔgɔ bobhoilyini gɔnɨ ɨbʉ lɨkpʉmʉka ko Kunzi. 2 Nɨyɔ Pɛtɛlɛ igoku ka Yelusalɛma, Bayudha bi nɨbɔ bʉkɔandɨ, bapʉnga na ɨbʉ bodongoso, 3 banabɨkya bɛ : « Wogulyi bi ka batʉ bi nɨbɔ bakɛgʉ bava-ku-kusu, malyalya bi pa yimoti na ɨbʉ ! » 4 Luki limoti, Pɛtɛlɛ apʉnga ndɨ kaʉtʉmbʉlyaga bɨnza-bɨnza makpʉmʉka masɨ nɨmɔ ogyonoso ndɨ. bɨkya bɛ : 5 « Ɨmɨ, na ndɨ kalʉmba ka Yɔpa. Kumbuso yi, nahʉmwana ndɨ, ɛgya abhɛ nakiko ko nziki, nɨna luki limoti anosyoku abhɛ kɨkwɛmbɛ yidhingi bogwigogini ka mondu mi masɨ makwanganya kadhwɛ buwobhi na ɨmɨ. 6 Nanda ndɨ kʉsɔ yi bɨngbangba, nʉmɨna banyama ba magʉ makwanganya, nɨbɔ botutu, nɨbɔ bakpakyanaga na bamʉma wasɨ na bombu. 7 Nʉkana ndɨ gɔnɨ lɨyʉ anɛbɨkya bɛ : ‹ Pɛtɛlɛ, wamaga. mwɔgɔ, ʉlya ! › 8 Luki limoti, nosikisyo ndɨ bɛ : ‹ « Kalɨ, Mombukwono-dhosu ! Nakonolyigʉ ndɛkɛ luki lanyɛ ikanɨ nɨlɔ la mʉsʉgʉ. » 9 Nukonoku bata ndɨ lɨyʉ ka nganga ya yɨba bɛ : « Luki nɨlɔ Kunzi obubisoni, wakoitisonitɔgʉ abhɛ kiko lanyɛ. » 10 Igyonosono ndɨ bɛyɔ nganga yɨsaa, kumbuso yi, luki li nɨlɔ ɨga ndɨ kʉgʉ wa lɨsyɛ. 11 Ko ngbingo yi nɨnɔ aka nɔ, batʉ basaa nɨbɔ butikoku ndɨ kɛmaka kotukyoku ka Kaisalia, bosiloku ka ndabʉ yi nɨyɔ ta ndɨ mino. 12 Lɨmbɛngɨ Lotu ɛbɨkya ndɨ bɛ taga na ɨbʉ nɨ nakɛgʉ na botumo. Bomika-mama nɨbana madɨya bana bebhisoku ndɨ, togulyo ka Kuneli. 13 Ɨyɨ atɨtʉmbʉlyaga ndɨ bɛyɔ malaika apuponilyo ndɨ mino ka ndabʉ kakɨ, abɨkya ndɨ bɛ : ‹ Mʉtɨka mʉmbanzʉ ka Yɔpa kamokoku Simoni, nɨnɔ bamakaga gɔnɨ bɛ Pɛtɛlɛ. 14 Ɨyɨ Simoni amʉbɨkyaga banʉ makpʉmʉka nɨmɔ amʉpá muukuso na batʉ ba ndabʉ kakʉ basɨ. › 15 Nɨyɔ napʉnga kanzɨna, Lɨmbɛngɨ Lotu usyilyo mʉdɔngɔnɨ bɛyɔ atisyilyo ndɨ mino ka mambwa. 16 Natamana kʉwa ndɨ lɨkpʉmʉka nɨlɔ Mombukwono-dhosu abɨkya ndɨ mino bɛ : ‹ Yuani obotiso ndɨ ko libo. Luki limoti, ibunu, bamubotiso ndɛkɛ ka Lɨmbɛngɨ Lotu. › 17 Kiko nɛkɨ nɨ Kunzi utikilyiniku ka ɨzɨyɔ Lɨmbɛngɨ Lotu li nɨlɔ gɔnɨ lɔ atitikilyoku ndɨ ibusu, ngbingo yi nɨnɔ tabɨnɨkyana ndɨ mino Mombukwono-dhosu Yeso Kilisito, ɨmɨ sɛ pɨyɛ kʉwa nɨ wanɨ kagya bodongoso no Kunzi ? »18 Nɨyɔ bʉkana bɛyɔ, mambɛngɨ ʉdhʉdhʉla ndɨ, bapʉnga kabhibhiso Kunzi, banabɨkya bɛ : « A nɛkɨ lɨngʉnʉ bɛ Kunzi uukwilyini gɔnɨ batʉ nɨbɔ bakɛgʉ Bayudha pisi kaikoso ɔbɨlɨ, na kainisono na ɔbɨlɨ wa lɨngʉnʉ. »
Mʉpʉnganagɨ ma kanisa ya Atiokia
19 Nɨyɔ Etieni okwo+\fr 11.19 \fq Nɨyɔ Etienne okwo\ft : Bidhukulogo ndɨ kaugyogyiso batʉ nɨbɔ babhaya ndɨ kakɨtaga byanga tɛkɛbɛ. Kinili, bomisikono ndɨ.,bapʉnga ndɨ kaugyogyiso batʉ nɨbɔ babhaya ndɨ, bomisikono kʉwa ndɨ bingbwi. Baga ndɨ, badhwɛ kʉ kwa kʉ ka mugi ma Foinikia, Kipulo na Atiokia. Kʉ bɛyɔ, ba ndɨ kaʉbɨkyaga Bayudha aka Mongoni Manza ko Kunzi. 20 Luki limoti, lugo kabʉ, bagɔgɔ nɨbɔ ba ndɨ batʉ ba Kipulo na Kulene, bosilo ndɨ ka Atiokia. Bapʉnga kʉwa ndɨ kanzɨna na batʉ bi nɨbɔ banzɨnaga ndɨ Ligiliki, na kaʉbɨkyaga Mongoni Manza ka Mombukwono-dhosu Yeso. 21 Kʉbɔkʉkɔ kwo ngu ka Mombukwono-dhosu a ndɨ pa yimoti na ɨbʉ. Kinili, bambanzʉ budhingi kʉgbɛ babɨnɨkyana ndɨ, bamɨgɨlya Mombukwono-dhosu.
22 Nɨyɔ batʉ ba kanisa ya Yelusalɛma bʉkana ndɨ mongoni mi nɨmɔ, batɨka kʉwa ndɨ Bhalanabha ka Atiokia. 23 Ngbingo yi nɨnɔ osilo mino, ɨna bɛyɔ Kunzi udukulyo ndɨ mino batʉ bi nɨbɔ babhaya ndɨ bʉbʉnga, ogwo magyagya. Utumiso ndɨ ɨbʉ basɨ mambɛngɨ kaigwinonogo na Mombukwono-dhosu lɨmbɛngɨ limoti. 24 A bɛyɔ, Bhalanabha a ndɨ mʉtʉ wongbingbili, mutumo na Lɨmbɛngɨ Lotu na bhaya bɨdɛ. Ambaza mudhingi ka bambanzʉ abɨnɨkyana ndɨ Mombukwono-dhosu.
25 Kʉwa wa, Bhalanabha aga ndɨ kakɨsa Saulo ka Talasɔ. 26 Nɨyɔ amɨna ndɨ, baga na ɨyɨ ka Atiokia. Kʉsɔ wa syangasʉ simoti iti, bamʉmʉkanaga ndɨ ka kanisa yi nɨyɔ kʉ, banʉtɨwa bambanzʉ bakpʉ. Bapʉnga ndɨ kaʉmaka babɨbya bɛ bakilisito ka nganga ya mambwa kʉ bɛyɔ.
27 Ka masyɛ mi nɨmɔ, bogyalandʉ botukyoku ndɨ ka Yelusalɛma bodhoku ka Atiokia. 28 Bemoti kabʉ nɨnɔ ina ndɨ bɛ Agabʉ, amaga ndɨ, Lɨmbɛngɨ Lotu akpamya kabɨkyaga bɛ ayʉndɨ wapʉ aumotʉ banʉ ɔbɨlɨ wasɨ. Igyonoso ndɨ bɛyɔ aka yɔ ko ngbingo nɨnɔ Kɔlɔdhɛ a ndɨ mino ngama mudhingi wa Lʉma. 29 Babɨbya bʉkanana ndɨ bɛ mʉtʉ wasɨ yɨkaka-yɨkaka kabyɛnɛnɛ no ngu kakɨ, apɨ́ luki, bʉtɨtɨkyɨ bamamabʉ nɨbɔ ba Yudhɛya. 30 Bagya ndɨ bɛyɔ aka yɔ. Bʉtɨkɨlya ndɨ bagʉgʉ ba Yudhɛya bangyɔ bi nɨbɔ na Babhalanabha ɨbʉ na Saulo.