Rakot nohora Orgahi-Orha'a Lerni-Melli mak kmai nieka
2
Mieuga noknoka la' Orgahi-Orha'a Nhiol genni la'a wo'ora Sion amak kmou-kwitna.Makden Yehud miy ree, mdiwra-mdia'al wa!
Yoma Orgahi-Orha'a Lerni-Melli nrehgoru olek wa
pa nmai mieman di wa.
2 La ler de de itamkek memna kakma maka nmetmetma me kpauga me mel'uta-maliena.
Emeknekama yawyawar ma'ta na'nama lera matni npah'a pa yeher to'ama lera nhita-nrepra la' wo'or hananni,
de emkade walia la' ler de itamkeka la wo'ora hananni de mak ka'arab harahu rehi'i ropur pa rmai rodia kekni-rautnu mak klipa-ka'ma.
Edonna ramkek ma'ta mak emkade la ululu memna,
me la'pa nodia la tuwu-tuwu hohoni mana edonna ramkek nan walia.
3 Tamkeka ai lairni la wo'or hananni, na'nama mak kodi keki-rautu re rala'a pa rhar lia wo'ora wuranni.
La' ir to'orni nekde ai die na'an doinia wewna pa nlomar doin momuoga.
La'pa edon rmai mia'ta de nohanna-taniarta mak kawuli-kawe'el de emeknekama Eden lowanni,
ne la'awa honi de emeknekama wo'or mdurdurna mak kerkerna.
Hya' id mana edonna raltarga, id mana edona nlewan la' ira wnialeranni.
4 Ir yamkekni emeknekama kuda,
ne rawlari emeknekama kuda mak kler la ar ralma.
5 Ir rwape'tu la'a wo'ora tutnu, yetni-warna emeknekama keret ya'ara re yetanni la' ara ralamni,
me tatlin emeknekama ai miormiori mak klomra wewan kerna.
Keki-rautu makaruri-ka'orta re rwahi'pa rler la' ar ralma.
6 La' lera rwaleran de riy honona ramta'ata,
pa ir honona gaini rlakputputi.
7 Ir rwalerna de emeknekama maka'ara mak karuri-ka'orta,
me rafia'ata lutur (tembok) lawna emeknekama makodi keki-rautu.
Ir ratniatra plele'er la' gaini,
edon rapal lia' walli-walli onde rwir dioinia yala'ani.
8 Ir rala'ala ir talanni pede ir edonna rpakdie'da.
Ir arwalli rhi' hya' to'a totpa ta'enniana rala' pa rodi liarni.
Mere emkade ho'mana maka'ara re, rwalidan pa rala' to'owa.
9 Ir rwaleran la' leta ralamni, me rawlar lia' lutur lawna hananni.
Ir rler meman la' roma re ralamni.
Ir rler la' rialam de rlola folla
emeknekama riy mak kamnelu-kamna'a.
10 La'pa ir rwaleran de nohkerna nruru,
me lyanti ndiwdiwra.
Dewade lera me wolla melmela,
me wtiona re lipni-ka'mani ha molga.
11 Orgahi-Orha'a Nala'ulu e kekni-rautnu,
ne lirni nkukru-ngauru.
Kekni-rautnu re harahu reh'ia!
Keki-rautu mak khi'a hya' mak E Nhopna re de raruri-ra'orta!
Orgahi-Orha'a Lerni-Melli nhi' it pa tmat'ira.
Riy id mana ta'eni ntahan nana.
12 Orgahi-Orha'a Niwra: “Mere la' dodo'ondi mial ralammi tetema pa miwal mieman la' mai A'u, yana prei-pre'eta.
De mitahana ya'ana-yemnu, miluli-mihona me mkio'a-mkiakru.
13 Yana mlihira-mniaiya naniair no’ inonmi
totpa mtiut to’ inonmi emeknekama riy maka ralamni nmawal doin la onnila do’oni-halli.”
Plol toto’ pa ralammi nmawla pa mhiopliala do'omi-halmi.
Mipallia’ Orgahi-Orha’a miy Uplerlawanmi.
Yoma sniayni onni-ga'arni E’a.
E ralamni sukni to'ola Ntutga ralam kalwiedni la rimormiori,
pa edon pleta-plet pa Nawenna,
pede ler dom de Nherun doinia hya’ maka Neti olek la wa pa edonna Nukmua owa’an ira.
14 Yanpa hota miy Uplerlawanmi Nhernia wniarorni
pa hota Nolin doin miy lia niukum lawani di ne Nara’a-Napal nian miy,
totpena hota mliernan owa'ana anggur turnu me metma-wetra' lawna
pa hota mial owa’an hoihoi-tantiani anggur turnu
me metma-wetra’ lawna la’ Orgahi-Orha’a miy Uplerlawanmi E'a.
15 Mieuga noknoka la' Sion, Orgahi-Orha'a wo'orni,
de mikot la' riy makden Yerusalem pa ratahan lara.
Mpiolu-mpiaka o'ta-mata me la' walia lima-rora Yehuda re honona,
totpena rmai lia' Orgahi-Orha'a romni pa rwaka tniulan la' E'a.
16 Miwoka-mile'ga lima-rora totpa rhi' krei lia Uplerlawna.
Mhiopna ina-ama, tuwari-hararara, upa-a'na re totpa rwahi' inonni pa rmai.
Keke'enku'a rora papay lokmera nekde rod wial lia.
Mak na'nama kmehlim miy re, mtio'or doinia miy yaningenmi pa mmiai ee!
17 Mhiopna imam mak rkar lia' Orgahi-Orha'a romni re totpa rko'a-rkakru
la'a katri'ana me Uplerlawna roma kreini nhieunu (teras rumah) de rletni,
rwak la Uplerlawna pa riwra: “Matromlawnu nee, Mtiulla-msiayn nan O rimormior ami e!
Yana Muolin doinia rimormiormu am lia pa mler la molmola-mama'a,
yoma makden la noha-rai re rahe'i-ramali ami pa riwra:c
Uplerlawan mamni etla meni?!”
Orgahi-Orha'a Nhi'a tan kierna pa npoti-nkadwu owa'ana
18 Orgahi-Orha'a ralamni nal nana E nohoni-raini, me Nsaynia E rimormiorni
19 pede Orgahi-Orha'a Nwahla nan E rimormiorni sniumbaini pa Nakot la ira Niwra:
“La' dodo'ondi de Agala metma-wetra' lawna, anggur turnu warwuaru me wu'ru saitun la' miy hononmi
pa mi'ina-miemnia, totpena miy hononmi mpiehera-mpiah'a.
Hota A'g edona golin doin miy totpa lodna-hairi re rapolu-raliel owa'an miy wia.
20 Hota Aghokar doinia mak ka'arad mak kwatiawu ra'i re, totpa rawlar pia rla' meman la wo'or kerna wawannu.
Mak ka'ara makden la lidanni gaini de A dieh'a doinia totpa rla' meman la Laut Mati.
Ne maka'ara makden la lidanni to'orni de Agotil doinia pa rla' meman la' Laut Tengah.
Hota rmat miemna noma inonni re rgehpa pa rahuwu-rawoini.
Mimkek memna totpa miatga! Plol toto' pa Orgahi-Orha'a Nhi' hihi'a-yapyapi mak kamehi-kayona la' miy.
21 Oi! Makden Yehuda (Israel) nohananni-taniaratni, yan mimta’ata,
mimuki-muhepur toto’ memna!
Mhioratnana Orgahi-Orha'a hihi’ini-yapyapni lawan reh'ia la’ miy!
22 Hayori-orpau kuda-laidiarmi yana ralammi rmadokla.
Yoma la' dodo'ondi de wo'ora-kawru re rpotpioti olek wa.
Ora-au re rwerat nohora wo'oni,
de anggur wo'a rora kar wo'a raniutni-ramdierna.
23 Makden Sion (Yerusalem) miy re, mimuki-mihepur nohora Orgahi-Orha'a miy Uplerlawanmi de, yoma Nhi' kalwiedwed miy emeknekama E Nakot olek wa.
De E' ed mak kala otna ntur die emeknekama la' ler ululu.
24 Pede hota rtamni owa'ana metma wetra' lawna la nhyi' ralma
nhi'nande la rieiki lerni de rlernana metma wetra' lawna niutni-niutni
nhor diewade rodia la gen miaka nhi’inde rataiya wetra’ lawna harni.
Emkade walia anggur turnu me wu'ru saitun la'a geni re maka rnairia pa ralgot doinia turnu-gerni hota riwgernia.
25 Hota A gala ra'a-pa'lu harahu pa A gherun doinia prehenmi-maumi mak kmolu olek wa
la' anni-anni maka kongoha wokni niutni-mdierna rweyata-rwaniaw dodioinia yawulli-yatniamanmi,
de de maka'ara maka A ghopna rwaleran miy.
26 Hota mliernana ya'ana-yemnu lawna pa mpieher wa.
Pa hota mi'uli-miwedia A'u yoma ghi'a hihi'a-yapyapi mak kamehi-kayona harahu la' miy.
A' di de Orgahi-Orha'a, miy Uplerlawanmi!
Ne hota A rimormio'ru edonna rlernan owa'ana yahe'i-yamali yapolu-yaliella!
27 Emkade pede Israel miy die miat niohora de A'g etla miy letgarmi,
me A' di de Orgahi-Orha'a miy Uplerlawanmi.
A' muemueh'a to'a, uplera id mana edonna nodi plolli.
Ne hota A rimormio'ru makden Israel edonna rlernana yamola-yama' olek wa!”
Orgahi-Orha'a Lerni
28 “La' hade pa nhorwua dewade A ghur rernia A Nhiw Lulu'lu la' riy honona.
La' hade pede miy a'nami pata-muanu hota rakot nohora A nnio'u.
Ina-ama la' miy letgarmi, hota Agala pa rmi'a-rlo'a
me hota tuwari-laweru re, Aghi'a
pa rdarat nana.
29 La'a ata-wa'ara pata-muanu mak khima-kre' A'u nekde
hota Aghurniernia A Nhiw Lulu'lu la' ir wawannu.
30 Hota Aghi'a hya'a maka riy ramkeka de rheduma, nden la lyanti me hya'a-hya' maka taken niana riy rwaror nana la' noha wawannu.
Hota rara naktiowru, ne itamkeka ai mormiori me mokla-mahu liawna la' nohkerna wawannu.
31 Lera hota edonna nhita me wolla nmermer emeknekama rara.
na'nama Orgahi-Orha'a Lerni-Melli ntutu-nte'ewa,
de ler mak khi' kmati'ira riy honona, maka E Nhudi npara la watghudi liokarni.
32 Mere he' maka kwaka yamori-yalewna la' Orgahi-Orha'a
de hota nlernana yamori-yalewna.
Yoma makden la' Yerusalem la wo'or Sion de hota Orgahi-Orha'a Nalewan nana
emekto'ama Nakottarg oleka, Niwra: Rimormior Yerusalem maka A wualiri-watioh nana re hota rlewna.”