1
Hadi de Orgahi-Orha'a nnio'oni la' Yoel, Petuel a'nani.Makden Israel re ralamni rsusa yoma rieiki-wnio'ora la'a nhyi'a-tlunanni de kongoha ra'an dodioinia
2 Ama-yei miy re! Mitlino!
Makden Yehuda (Israel) hononmi, mimkek ee!
Miora miy upmi-tgarmi mliernan oleka wnieyata-wnianiawua
lului-nurnuhru mak emkadi me' edonna? Edonna toh?!
3 Mikot nohora hade la' upmi-a'nami,
totpena rwahaur nohora wnieyata-waniawua maka mimliernana re la' ir upni-a'nani.
Tuw muak kmai nieka de ratlin nan meman walia de,
totpena rakot nohor walia la' tuw li'iru-a'na gari mak kma nieka duratni-waitni wali.
4 De rakot nohora riwra kongoha wokni niutni-mdierna de ta'eni rwarekan nana liawanni,
rtai lia' nhyi'a-tlunni na'nama ra'an doinia rieki wnio'orni.
Hya' maka kongoha wokni id naltarga
de wokni mak ktawli'iru ra'an doinia.
5 Riy mak kma'wu miy re, mimat wa!
Riy mak ksukni la' niemn anggur miy re, mkio'a-mkiakur wa!
Yoma rwarui-rwate'la oleka anggur turnu warwuaru
pede ta'enniana miemun owa'an la!
6 Kongoha wokni niutni-mdierna pa rmai
emeknekama riy makodi keki-rautu mak kmai pia rwalerna it nohoni-raini.
Ir raruri-ra'orta me ta'eni trekan nana liawanni.
Nihini-ra'ani plokarni emeknekama ohpor rara nellu.
7 Ir ramolu-ramatia anggur onnia
me kara onni de, raltar tio’a onni-ga’arni.
Rakih dioinia onni ulatni
nhi'nande wo'rani mak wawahra nayamkeka.
8 Mkio'a-mkiakur wa emeknekama hararara
mak knairi kadu totpa nkakur nohora hawalli maka nsayn wenan de matmiatni.
La' ler ululu de rla' lir oleka totpa hota rmehlima mere edon rmehlim ma'ta de hawalli nmati.
9 Metma-wetra' lawna (gandum) me anggur turnu maka nhi'inde ir rala la Orgahi-Orha'a
rmolu olek la' Orgahi-Orha'a romni.
La' hade pede imam-imam mak kar rer lia' Orgahi-Orha'a romni de raluli-rahona.
10 La' dodo'ondi de nohanna-taniarta honona nkerna-nhau.
Nhyi'a-tlunni re rakleh oleka wo'oni.
Metma-wetra' lawna honona mana nkerna-nkaulu.
La'pa anggur turnu warwuaru me wu'ru saitun nekde nhor olek meman wa.
11 Mak kawuli-katniamin miy re! Miluli-mihonmi wa!
Mak kar lia' nhyi' anggur miy re, mkio'a-mkiakur wa!
Yoma metma-wetra' lawna nora jelai b
la'pa rieiki-wnio'ora honona rwatlien wa.
12 Orwo'a-auwo'a la' nhyi' ralma honona hadamon olek wa.
Yoma anggur me kara onni honona rkerna-rkaulu.
Delima, korma me apel onni nekde emkade wali.
Riy honona edonna rahe'i-rahepru olek wa.
Rakleha oleka niniha-malmialia.
13 Imam mak kamkek rer lia' katri'an (mesba) miy re!
Mlia' mniairia nainiairi kadu (lawra-raini yaluli-yahona) pa mkio'a-nkiakur wa.
Mlier la' Uplerlawna romni ralamni pa mkio'a-mkiakru la' mela plahwani,
yoma hoihoi-tantiani anggur turnu me metma-wetra' lawna maka nhi'inde ir rala la' Uplerlawanmi hadamon olek wa.
14 Mikot la' rira totpa ratahana ya'ana-yemnu.
Mpiolu-mpiaka o'ta-mata rora ama-yei,
totpa ir ror wutga makden Yehuda re honona,
totpena rmai lia' Orgahi-Orha'a Uplerlawanmi de romni, pa rwaka tniulan la' E'a.
15 Hota itmatie! Orgahi-Orha'a Lerni maka Nukmua rimormiori nrehgoru olek wa,
de la' lera Orgahi-Orha'a Makodi Plolli-Ktaryatnu
Nweyata-nwaniaga nohkerna wawannu.
16 Ya'ana-yemnu hadamon olek wa
pede riy edon rahe'i-rahepur olek la' it Uplerlawanni romni nayanni.
17 Wini-hgona ryat olek la tan kierna ralamni.
Metma-wetra' lawna hamon olek wa pa rhi'targa.
La' hade pede kliala (lumbung) maka rwatiernia yamanan geni rahgali pa ryata
nhi'nande ralu'wu-ra'anna.
18 Nhiuri-wnia'ana raploi-raplakra me rmeh'a ralala'a
me ralamni edon ramtemna.
Rla'-rmai pia rwahaka wewna totpa ra'ana mere edon rlernan eti.
Pipi-duma woka re nekane rakleha ya'ana-yemnu.
19 Awuaka tniulan la' O'a Matromlawnu nee,
yoma wewn mou maka kpenpuen niohora wewan ror wutga ora-au honona
rmutni-rki'ira me rkerna-rkaulu.
20 Pede hayori-orpau ohpora-ahdiawra la wo'ora-kawru wal pia
rpolu-rhaun pa rwaka tniulan la' O'a.
Ta'eni ratahan nana tier keranni
yoma gerlawna nekde honona rkerna-rhau.