Orgahi-Orha'a Nhudi-npara noha-rai
3
Orgahi-Orha'a Niwra: “Mitlin ee! Hota la ler de meman pa A ghi'a Yerusalem nora Yehuda (Israel) honona re pa raruri owa'anaemeknekama la' ler ululu ne hota rler owa'ana kalwiedni-paitiotni.
2 Hota Auwoka makwatiawu noha-rai lodna-hairi re totpa Agetlia noha-rai honona niukum lawanni la' nhiudi-pniaraa lowanni (lembah).
Hota Aghudi-puar ir la' ir yatni-halli maka rhi' olek la A rimormio'ru riy Israel
yoma ir re'era-rhakr oleka Israel nohananni-taniaratni
me rhopliala A rimormio'ru la'a noha-rai la' meni-meni to'a.
3 Ir rwahedu patui pa rwahaka he' maka nlernana A rimormio'ru totpena rhi'a la ir atni-wa'arni.
Ra'olga tuwari-hararara re,
na'nama kupna-kai miak rlernana la tuwari welli re de rala la patke' yatyata totpena nora ranin wutu.
me kupna-kai maka rlernana la hararara re welli, rnairia pa ra rawelia tgo' arka.
4 La’pa makden Tirus me makden Sidon
me makden Filistin miy re,
hya’ ed maka Aghi’ oleka pa miwenan mai A’u?!
Yanpa mpiahla ralam mehrami la’ mai A’u?!
La’pa miy e mhi' emkade de hota hihi’imi-yapyapmi
ntuin owa’an la miy o’tami wawannu!
5 Miy mpiarui-mpiate'la nan oleka leli-maha,
ne re'a-tnia'ru la A roma krie'yu mak tulliawna-wel wierta re
miodia pa mlia mkienia la uplermi-upmatmi kniola tieru-niawur nehla genni re.
6 Mtioran nana riy Israel makden la Yerusalem
ror wut wualia riy Israel makwatiawu Yehuda uhunu-ewatni,
totpa miodia olietlet memna
nanpena mi’olu ir la’ noha-rai Yunani.
7 Mere, oh! Hota Aghi’ riy Israel totpena riwra rawali owa’ana.
A godgiot ir la’ geni-tien maka mi’olga re,
me hota Awuahla nana yatyatni-halalli mak mhi’ nana la’ ira.
8 Hota a’na pata-muanmi re er maka Aghi'a totpena arwalmi ra'ol targho’a la’ makden Yehuda,
pa hota ra’olu owa’ana la’ Syeba, noha-rai mak olietlet memna.
A’ di de, Orgahi-Orha’a. A li’ru-tu’nu edadi!
9 Ee! Mikot la’a lodna-hairi re honona
totpa rwahi’ pa ra’ara!
Mpiolga mak ka’ara makaruri-ka'orta re.
Mpiolga makodi keki-rautu honona pa rma rwaleran la’a ar ralma!
10 Mhiuri-mpiewla yopna maka mniairia la nhyi'a re pa mhi'a la wehla ara,
me mhi'a ta'wa maka ha mniairia pa mtiet nieka orwo'a-auwo'a re totpa rwalia la welhara.
Miy miak kakleh ruri, mikot wali miwra: “Alier walia la ar ralma emeknekama keki-rautu mak karuri-ka'orta!”
11 Noha-rai honona makden la noha Israel walli-walli, plet pa mmiai wiee!
Miwok la' nhiudi-pniara lowanni (lembah) makden hande.”
Orgahi-Orha'u nee! Mhuopna kekmu-rautmu rtopur la' ar ralma pa rwalerna ira!
12 Orgahi-Orha'a Nakot owa'ana Niwra: “Makden la noha-rai miy re!
Mpiahi' meman wa pa mlia'awa la' nhiudi-pniara lowanni (lembah).
La' hande hota Orgahi-Orha'a A'g edmaka khudi-kpara noha-rai honona
makden la A rimormio'ru Israel nohoni-raini re walli-walli.
13 Riy kaplihanmera ira!
Pede mtipna-mhiewra ira emeknekama ha rhi'a la metma-wetra' lawna mak gatna olek la' nhyi' ralma.
Mpiatei-mpiahapra ira pa emeknekama anggur wo'a mak kpenpuen lia anggur riahmi genni
na'nama rwatei-rwahapra nande turnu nriw dioin la.
14 Rimormiori riwnu-halli rla nhiudi-pniara lowanni (lembah).
Yoma Orgahi-Orha'a Lerni nrehgorga olekwa.
Hota E Netlia ir honona do'oni-halli niukamnu la' lowan de.
15 Lera me wolla hota rmelmela,
me wtiona re lipni-ka'mani hamon olek wa.”
Orgahi-Orha'a hota Nara'a-napalu E rimormiorni
16 Hota Orgahi-Orha'a Nhar lirni nwatiawu Sion (Yerusalem), E wo'orni.
E lirni hota nkukru-ngauru nwatiawu Yerusalem.
Nhi'nande lyanti me nohkerna rruru.
Mere Orgahi-Orha'a hota Nodniana me Naliwan reria Israel, E rimormiorni.
17 “Makden Israel miy ree! La' ler de hota miat niohor memna
de A' di de Orgahi-Orha'a miy Uplerlawanmi.
makdella Sion (Yerusalem), A wo'oru mak kmou-kwitna de.
Pede Yerusalem hota nwalia la let mak kmou-kwitna.
Do'ona-dakna hota ta'enniana rwalerna owa'ana.b
18 La' ler de hota wo'ora-kawru re rpenpuen lia' nhyi' anggur pa hota mliernan anggur turnu warwuaru harahu reh'i.
Nhiuri-wnia'ana hota ra'an wewna la' uhu-dari wawannu mak kpotpioti.
Ne, la' nhiuri-wnia'ana re hota mlernan susu harahu maka miy mhi'a la keju totpa mi'ina-miemnia.
Gera nekde penpuenu-nanahala meni-meni to'a.
Hota ger ormat ida nwatiawu Orgahi-Orha'a romni pa nwau,
pa nape'era-napah'ia Akasia lowanni (lembah).
19 Mere hota Mesir nwalia la gen miak kerna-khau,
me rimormiori edonna rholi-rlet la’ Edom yoma Edom nekde nkerkerna.
Yoma ir rodia wuhurni-tekalli pa rwalerna oleka makden Yehuda.
Rwunu-rwenna riy Yehuda mere rakleh hala.
20-21 Pa hota A tio'on memna riy mak kwunu-kwenna ira
ne Awuahla memna hare rarni.
Mere riy Yehuda (Israel) hota rden nek la ir letlawanni Yerusalem
me la’a Israel nohoni-raini de pa nodi liarni.
Hota duratni-waitni rden nek la hande pa tuwu-tuwu.
Ne Orgahi-Orha'a A'g ed makden rer lia' wo'ora Sion (Yerusalem) pa nodi liarni!”