Pompakita nikita i Daniel ri binangga Tigris
10
Mpae katataluna Magau Koresha nomparenta toPersia, TUPU notesa ka i Daniel anu nidae i Beltsazar. TesaNa haitu nakana, bo notesaki posieva mbaso. I Daniel nompasimbuku mangisani batuana bo Alatala nompopaisani ka ia riara pompakita.2 Yaku, i Daniel, talu minggu mpuu nosambaya nte buku rara. 3 Riara talu minggu haitu yaku ledo nangande anu narasa. Bau domo nikandeku, anggur domo niinuku, bo karoku domo nipasiayuku.
4 Ri eo karopulu ampana bula sangu mpae haitub, yaku neangga ri tinggi binangga Tigris.c 5 Yaku nantingoa laerava bo nikitaku saito tona nompake pakea nipovia dako ri kae linen bo pompou kopena d nipovia dako ri bulava dako ri Ufase. 6 Karona nenggila-nggila mpo vatu losaf, lenjena nevanta mpo kila, bo matana navaya mpo apu. Pale bo kadana nenggila mpo tambaga nisosoro, bo suarana eva suara ntona naroa.
7 Yaku i Daniel, aga yaku saitoku nanggita pompakita haitu. Tona nosinggani nte yaku ledoria nipeintara, tapi naeka mpuu ira bo nalai netabuni. 8 Nipalaikaramo yaku saitoku. Nanggita pompakita anu nipokumaaka haitu, naviora mpuu raraku bo domo naria roso nggaroku. 9 Niepekupa suarana, nadungga ntuobomo yaku bo domo nanoto raraku. 10 Tapi naria pale nanggangisi yaku, nantulungi yaku nembangu bo yaku nantaputu nanjuko ri tana.
11 Nangulimo malaeka haitu ka yaku, “Daniel, iko nipotove nu Alatala. Peanggamo, pariaramo tesa kuuli ka iko. Yaku hii nitudu tumai nte iko.” Niulinapa anu haitu, noletemo yaku neangga.
12 Pade niulina vai ka yaku, “Nee maeka, Daniel. Dako ri eo pamulana iko nonia mompakaede raramu ri ngayo nu Alatala ala musani batuana anu nitesaNa, niepe nu Alatalamo posambayamu. Yaku nakava sabana perapimu haitu. 13 Malaeka mpojaga gkamagaua Persia ropulu saeo nangeva yaku. I Mikhael saito pakeni nu malaeka, nakava nantulungi yaku bo nipalaisikumo ia ri sia mantingayo magau-magau ntoPersia. 14 Yaku nakava, ala musani anu majadi nte todea nu ngatamu ri eo nggapurina. Apa pompakita hitu mantesaki anu majadi ri eo-eo nggapurina muni.”
15 Niulinapa anu haitu ka yaku, notungga ri tanamo yaku bo domo namala notesa. 16 Malaeka anu eva manusia haitu nombauluraka palena bo nombatui sumbaku. Pade niulikuka ia, “Pua, pompakita hitu nompakaviora yaku, sampe domo naroso karoku nirasaiku. 17 Yaku eva batua neangga ri ngayo madikana. Berimba mamala yaku motesa ka i Pua? Domo naria roso nggaroku, bo napiimo poinosaku.”
18 Jadi nituina vai yaku, bo nipakarosona karoku, 19 bo niuliNa, “Hee iko nipotove nu Alatala, nee maeka, pakaroso raramu!”
Da ranja mpotesa ia, naroso mpanjili nirasaiku karoku bo niuliku vai Ia, “Potesamo, Pua, apa nidekeimiumo roso ka yaku.”
20-21 Pade nesana ia, “Nisanimu nuapa sabana yaku nakava nte iko? Patujuku tumai manguli ka iko nuapa nitulisi ri Buku Kakanana. Sampalaipa, hau vaimo yaku mangeva malaeka mpojaga kamagaua Persia. Maliu haitu, pade makava malaeka mpojaga kamagaua Yunani. Ledoria saitoa notulungi yaku mangeva ira, aga i Mikhael, malaeka mpojaga toIsrael, todeamu.