Daniel 9

I Daniel nosambaya ka todea nu ngatana

1-2 I Darius toMedia, ana langgai i Ahasyweros, nanggeniaka kamagaua Babel. Mpae paratama poparentana haitu^a, yaku i Daniel, nombaca-baca buku noisi tesa nTUPU. Nitanondoakaku, apa nangoseaka tesa nTUPU ka Nabi Yeremia, ngata Yerusalem kana batena magero pitu pulu mpae kasaena^b. 3 Pade nosambayamo yaku ante mpuu-mpuu raraku nte TUPU Alatala, bo nerapi asi mataNa. Yaku nopuasa bo nompake baju nipovia lako ri karu notalimpuyu ri bavo nu avu, tandana nabuku raraku. 4 Nipangakukumo kami sangata nadosa pura ri ngayo nTUPU Alatala anu nisombaku.

Nangulimo yaku, “Pue Alatala, kami nombabila Komiu apa Komiu naoge mpuu. Komiu batena nompakadupa pojanjiMiu bo toveMiu ledo ria kaupu-upuna ka tona nompotove Komiu bo nangoseaka parentaMiu.

5 Nadosamo kami, kami novia anu nadaa, bo novia anu nasala. Kami nesapuaka bo nombaliunaka parentaMiu bo ledo nangoseaka atura-aturaMiu. 6 Kami ledo nompetalingai nabi-nabiMiu haitu, anu nanguli tesaMiu ka magau-magau kami, ka pakeni-pakeni, totua-totua kami nggaulu bo ka pura-pura todea ngata kami. 7 O Pue, poviaMiu batena nakana bo nanoa. Tapi kami pura-pura toponturo ri Yudea bo Yerusalem bo pura-pura sampesuvu kami [toIsrael] anu nikamburakaMiu ri ngata nakavao bo ngata napara sabana ira ledo natutu nangoseaka Komiu. Kami pura-pura nasaro nesapuaka bo aga nompakaeya karo kami mboto. 8 O Pue, magau-magau kami, pakeni-pakeni kami bo totua-totua kami nggaulu novia anu nepakaeya bo nadosamo nte Komiu. 9 Naupa kami nangeva Komiu, Komiu batena neampungi bo naasi mataMiu nanggita kami. 10 O PUE Alatala, kami ledo nompetalingai suaraMiu, bo ledo nangoseaka atura-aturaMiu, anu niuli nu nabi-nabiMiu ka kami. 11 Njumangu kami toIsrael nombaliunaka atura-aturaMiu bo nasalandala apa ledo nadota nangepe suaraMiu. Nadosamo kami nte Komiu, bo haitumo sabana pehuku bo pepindasi anu nitulisi riara Buku i Musa^c, batuaMiu, najadimo ri karo kami. 12 Komiu nompakadupa janjiMiu mombahuku kami, anu nipejanjikaMiu ka kami bo ka topanggeniaka kami. NihukuMiumo Yerusalem nantamopa pade ngata ntanina ri dunia hitu. 13 O PUE Alatala anu nisomba kami, mpengaya silaka nitulisi riara Buku i Musa najadimo ri karo kami. Tapi naupa ivesia, kana da nipoara kamipa movia anu mompakasana raraMiu. Kami batena dopa nadota nompalaisi dosa-dosa kami, bo ledo muni nipariara kami pepatudukiMiu. 14 O PUE, Komiu Alatala nisomba kami, nihukuMiumo kami ante silaka-silaka anu nipasadiaMiu ka kami. PompakadupaMiu janji mombahuku kami batena nakana bo nanoa, sabana kami ledo nompetalingai suaraMiu.

15 O Pue, Alatala nisomba kami, nipopakitaMiumo kuasa bo karosoMiu tempo nanggeni todeaMiu nesuvu dako ri tana Mesir, bo kuasaMiu haitu da batena nitora. Kami novia dosamo bo nokainggu nadaa. 16 Nantora asi mataMiu ka totua kami nggaulu, tumo marau vai ka toYerusalem, iamo ngataMiu ri Bulu Sion anu nipelisiMiu,^d sabana dosa kami bo kadaa ntotua kami nggaulu, sampe pura-pura tona ri sinjori kami nompoambemata ngata Yerusalem bo todeaMiu. 17 O Alatala nisomba kami, epemo posambaya bo perapiku. Popanjili batena BanuaMiu anu nageromo haitu. Pakabelosi ala rasani ntona pura Komiumo Alatala. 18 O Pue, epemo kami, peintamo kami bo porarantaikamo kasusa kami bo kagero nu kota nikasangai nte sangaMiu. Kami nosambaya nerapi nte Komiu ledo sabana kami tona nabelo, tapi sabana nambaso mpuu toveMiu. 19 Pue, epemo kami, ampungimo kami, porarantaikamo kami bo tulungimo masalisa! Nee masae gaga rapalambaMiu kami, ala rasani ntona pura Komiumo Alatala. Apa ngata Yerusalem bo todeaMiu najadi bagiaMiu anu nitaniaka ka Komiu mboto.”

I Gabriel nombatentei peboto

20 Yaku nosambaya nompangaku dosaku bo dosa ntodeaku Israel, bo nerapi nte TUPU Alatala anu nisombaku, rapakabeloNa mpanjili BanuaNa. 21 Tempo yaku da nosambaya, nakavamo malaeka Gabriel anu nikitaku riara pompakita ka yaku baipia. Ia nagasi, nevoro tumai nte yaku. Tempo haitu tona da ranja mpanggeni pesomba nggoviana. 22 Ia nanguli ka yaku, “Daniel, yaku nakava nombadekei noto ka iko ala musani batuana peboto haitu. 23 Tempo iko nompamula nosambaya nerapi nte Alatala, nesuvumo tesa nTupu. Yaku nakava mangulina sabana Ia nompotove iko. Jadi, epemo pakabelo-belo kutentei batuana pompakita nikitamu haitu.

24 Alatala nompakatantu pataatu siopulu mpae^e [490] ka todeaNa bo ngataNa Yerusalem. Maliu haitu, rapopenontoNa dosa bo pokainggu nadaa. Mpengaya dosa raampungi bo pomparenta manoa sampe ri kasae-saena. Pompakita bo peboto nu nabi rapakadupa, bo Banua nu Alatala rapakagasa ala mamala rapake mpanjili mombasomba Alatala. 25 Tulisimo bo porarantaikamo anu hitu: nompamula dako ri tempo nisuvuraka parenta mombabangu mpanjili ngata Yerusalem, sampe makava saito magau anu nipelisi nu Alatala^f, maria patapulu sio mpae^g [49] bo pataatu talupulu pata mpae [434]^h kasaena rabangu mpanjili tana lapa bo janja-janja Yerusalem, naupa tempo haitu ri tempo nggasusa. 26 Ri panggaupu pataatu talupulu pata mpae [434] haitu, magau nipelisi nu Alatala rapatesi, naupa ia ledo nasala. Maliu haitu meumba saito magau naroso bo tantara-tantarana mombagerosi ngata Yerusalem bo Banua nu Alatala. Kaupu nu dunia maria posieva bo posiropusi, nipakatantu nu Alatala mamimo. 27 Magau naroso haitu movia pojanji naroso ante todea pitu mpae kasaena. Manggava kabagi-duana tempo haitu, rapopetaanamo pedekei bo pesomba ka Alatala. Pade maria anu mompakaviora rara rapoponturona ri Banua nu Alatala. Anu haitu niuli ‘Tona nadaa mpuu anu nipovuu mata nu Alatala’ⁱ bo batena ri sia sampe topombadika haitu manggava silaka nipakatantu nu Alatala mamimo ka ia.”