Pompakita nantesaki bimba bo tovau nikita i Daniel
8
Ri mpae katataluna Magau Belsyazara nomparenta, yaku nanggava pompakita karongganina naliu pangipiku baipia.b 2 Riara pompakita ka yaku haitu, yaku hamai ri propinsi Elam, ri Bente Susan, ri tinggi binangga Ulai. 3 Nikitaku sangu bimba lakinac notandu randua bo nandate mpuu tanduna. Sangu tanduna nandatepa bo nangurapa pade tandu sangupa. 4 Nikitaku bimba haitu nombatandu hau ri mpanau, ri tasina bo ri puluna. Ledo ria sangua binata nompakule mantingayo ia bo ledo ria namala makabasaka lako ri kuasa bimba haitu. Damo dota-dotana novia anu nipodota rarana ante langa rarad.5 Tempo yaku da nangganoto-noto bimba haitu, nakavamo sambaa tovau lakinae dako ri sabingga mpanau. Nagasi mpuu ia bo kadana ledo nombajeje tana. Ri olo matana naria sangu tandu netumbu nompopokumaa rara. 6 Tovau lakina haitu nanggaparai bimba lakina ri tinggi binangga, bo nirutusina. 7 Nikitaku nasoa mpuu tovau haitu. Nirutusina bimba haitu sampe nakoto pura tanduna ntimali-mali bo nidungganakasina ri tana bo nijeje-jejesina. Ledo ria saitoa nompakule mantulungi bimba haitu.
8 Tovau lakina haitu nantambaimo kakuasana. Tempo ia nakuasa mpuu, nakotomo tandu mbasona haitu. Pade ri bela ntandu nakoto haitu neumba vai pata-ntandupa tandu anu nontani dako ri tandu ntanina. Tandu haitu simbo netumbu nangoseaka sulapa pata njulapa peburu mpoiri. 9 Sangu dako ri tandu-tandu haitu nikatuvu tandu kodi, anu najadi nambaso mpuu kakuasana, naluo hau ri bagia puluna, mpandakena bo hau ri bagia kasolo nu eo sampe ri Tana Nagayaf. 10 Tandu kodi haitu nantambai kambasona sampe nagana karosona mombasuu tantara nu suruga bo betue-betueg, sampe naria sanu nitedeakana ri tana bo nijeje-jejesina. 11 Ia muni madota mangeva Tadulako nu tantara surugah. Nitaamakana pesomba eo-eo anu nipalabu ka Tadulako haitu, bo nigerosina banua petupu nTadulako haitui. 12 Sabana haitu nadea tona nantuntuni ia bo domo nangoseaka Tupuj. Tona da nadota nangoseaka Tupu, nasusa apa domo nidekei mompalabu pesomba eo-eo [anu niparenta nTupu ka ira]. Jadi petupu kakanana nitaamakasi tandu kodi haitumo. Nuapa-nuapa nipoviana kana noasele.
13 Naupu haitu niepekumo saito malaeka nanguli ka roana, “Sampe sakuyapa kasaena anu riara pompakita hitu majadi? Sampe maipia dosa mbaso haitu manjambeiki pesomba eo-eo? Sampe maipia tantara suruga bo banua petupu haitu rajeje-jejesik?”
14 Niepeku nesana vai saito malaeka, “Sampe maliu ronjobu taluatu nggani mpadondona bo nggoviana,l pade rapegasa banua petupu ala mamala rapake mpanjili mombasomba Alatala.”
Malaeka Gabriel nombatentei batua nu pompakita haitu
15 Tempo yaku da nompekiri bo madota mangisani batuana anu nipopakita ka yaku haitu, sampesanika neumbamo saito eva manusia neangga ri ngayoku. 16 Pade niepeku suara ntona nongare napara binangga Ulai nanguli, “Gabriel, ulikamo batuana pompakita anu nikitana haitu!” 17 Malaeka Gabriel nantotoaka yaku. Tapi nakavapa ia, naekamo yaku, bo natikaja nadungga ntuobo ri tana. Nangulimo ia ka yaku, “Hee manusia, porarantaikamo! Pompakita anu nikitamu haitu kana majadi ri kaupu dunia ngena.”
18 Da ranja mpotesa ia nalipomo raraku, nadungga ri tanamo yaku. Tapi nikangisina bo nitulungina yaku meangga mpanjili. 19 Pade niulina ivei, “Kuuli ka iko anu majadi ri eo nggapurina sabana rau rara nu Alatala. Apa anu nipopakita ka iko pangane, majadi ri eo kaupu dunia.
20 Bimba lakina notandu randua nikitamu pangane, iamo kamagaua Media bo Persia. 21 Tovau lakina haitu iamo kamagaua Yunani bo tandu nambaso ri olo nu matana haitu iamo magauna paratamam. 22 Naliu tandu paratama nakoto, natuvu vai ampa tandu ntaninan. Batuana, kamagaua Yunani matebagi majadi ampa kamagaua. Tapi nau sangua ledo ria maroso mpo kamagaua paratama haitu.
23 Jadi manggava kaupu nu kamagaua haitu, tempo tona nadaa majadi-jadi mpuumo kadaara, meumbamo saito magau anu nakaa mpuu bagana, bo natau nebagiuo. 24 Ia majadi maroso mpuu, tapi ledo sabana kuasana mboto. Mavioramo tona manggita kadea anu ragerosina. Bo nuapa-nuapa rapodotana kana majadi. Ia mompakaropu tomaoge bo todea nu Alatala. 25 Matau mpuu ia moakala bo madea mpuu tona rabagiuna. Malanga mpuumo rarana. Rapakaropuna todea bo ledo rapaingana ntani ruru. Magau haitu mabia mangeva Alatala Magau Mbaso, tapi ia mboto raropusi bo ledo ante kuasa nu manusiap. 26 Pompakita pesomba nggoviana bo pesomba mpadondona anu nitentei ka iko haitu, nakana mpuu kana majadi. Tapi pura-pura haitu da majadi ri tempo makava anu da masaepa; jadi nee nutesa ka isema-sema.”
27 Naliu haitu nalentemo karoku nirasaiku bo yaku nadua bara sako eo kasaena. Naliu haitu naroso mpanjili karoku bo nituiku vaimo pokarajaa nu magau. Tapi nasesa raraku nompekirika anu nikitaku haitu bo ledo nipakuleku nombapahana.