Pompakita nantesaki ampa binata nikita i Daniel
7
1-2 Da sampae i Belsyazar a najadi magau ri Babel, naria sambongi yaku i Daniel nangipi, naria anu nipopakita ka yaku riara mpangipiku. Pangipi haitu nitulisiku ivei:Bongi haitu nikitaku poiri rimboso neburu dako ri sulapa pata njulapa. Poiri haitu nompakabalumba tasi luo. 3 Pade naria ampa binata mbaso neumba dako rantasi. Binata-binata gahaitu ledo ria nasimbayu, simbo ntanina polenjena.b 4 Binata paratama nolenje mpo singa, tapi ia nokapi mpo tonji mbasoc. Tempo da nikanotosiku, sampesanika nalelakamo kapina, bo ia neangga ronggada mpo manusia ri bavo ntana. Ia nidekeika pompekiri mpo manusia.d
5 Binata karanduana nolenje mpo beruang. Ia neangga nompake kada purina, e. Niparibagana talu mpeka buku nu usu. Niepeku suara nanguli ka ia, “Anumo! Kande pakaoge-ogemo bau!”
6 Pade nikitaku, neumba vai binata ntanina. Binata haitu nolenje mpo macan tutulf. Ri bovatena naria patanggapi kapi ntonji, bo nobalengga ampa. Ia nipakakuasa momparenta.
7 Da nangganotosi pompakita bongi haitu, nikitaku neumbamo binata kaampanag. Binata haitu naroso mpuu bo nompakaviora rara. Ngisi asena nambaso bo nakaa nokamoya bo nompamasi balina, labina nijeje-jejesina. Ia nosisala ante binata pamulana bo ia notandu sapulu. 8 Tempo yaku da nomparantaika tanduna, sampesanika netumbumo tandu ntanina nakodi ri olo ntandu haitu. Tandu kodi nombaaso tandu-tandu haitu sampe napongga tatalu tanduna koluna. Tandu nakodi haitu nomata mpo manusia bo sumbana notesa nasodo bo najampa.
Pompakita nantesaki Ia anu natuvu sampe ri kasae-saena
9 Tempo yaku da nangganotosi, bara sakoangu ponturo ntopotangara nidika, bo nonturomo Ia Anu Natuvu Sampe ri Kasae-saena. PakeaNa naputi mpo kapa bo buluaNa nagasa mpo bulu bimba. PonturoNa bo roda-roda nu ponturoNa dako ri vaya nu apu novonda-vonda;h 10 bo vaya nu apu nendele ri ngayoNa eva uve binangga noili. Nonjobu-njobu tonai nasadia raparentaNa, bo nojuta-juta tona neangga ri ngayoNa nompopea anu rauliNa ka ira. Pade nipamulamo potangara, bo nibukamo Buku-buku.j k
11 Nikanotosiku njuu apa nasodo potesa nu tandu kodi. Nikanotosiku njuu sampe binata haitu nipatesi, karona nirogosi bo nipalabusi. 12 Binata-binata ntanina nialasimo kakuasana, tapi da nipaloga ira matuvu sampe magana tempo nipakatantu.
13 Riara pompakita nikitaku bongi haitu, neumba saito eva manusial. Ia nakava nibungusi nu kulimu, pade hau nanggaparai Ia anu Natuvu Sampe ri Kasae-saena bo nikeni hau ri ngayoNa.m 14 Ia nidekeika pebila bo kakuasa majadi magau, ala todea dako ri njumangu ngata, valaa-valaa ngata, bo mpengaya basa matundu nte ia. Kakuasana batena sampe ri kasae-saena, poparentana ledo magero.n
Pompakita Ampa Binata nitentei
15 Yaku i Daniel naingu bo nasesa raraku nanggita pompakita nikitaku haitu. 16 Pade nikaparaiku saito topeangga ri sia bo nipekutanaku berimba kakanana pura-pura haitu. Nesana ia, 17 “Binata mbaso pata mbaa haitu batuana ampa kamagaua meumba ri dunia. 18 Tapi todea nu Alatala ToNalangapa NturoNa manggava kakuasa moparenta, bo ira batena moparenta sampe ri kasae-saena.”
19 Pade yaku madota mangisani nuapa batuana binata kaampana haitu, anu nosinjala nte binata ntanina, anu nompakaviora rara, ngisi asena nangandesi balina bo kanduku tambagana nombarupusi bo kadana nombajeje-jejesi labina. 20 Bo muni yaku madota mangisani nuapa batuana sapulu tandu ri balenggana, bo muni tandu kodi ntanina neumba nggapurina bo nombaokatakasi talu ntadu neumba nokolu haitu. Tandu kodi haitu nomata bo sumbana nombatesa dava bo anu nadaa. Tandu haitu neumba nompakakoto tatalu tandu mbaso ntanina. Ia nambasopa bo narosopa pade tandu-tandu ntanina.
21 Nikitaku tandu haitu, nosievamo ante todea nu Alatala bo tandu haitu padagi. 22 Pade nakavamo Ia anu Natuvu Sampe ri Kasae-saena, [haitumo Ia anu nompajadi dunia bo isina]. Alatala ToNalangapa NturoNa notangara bo nibotusiNa todeaNa nakana. Nakavamo tempona ira mantarima kuasa momparenta.
23 Pade topeangga ri sia nompapola tesana ka yaku ivei, “Batuana binata kaampana haitu iamo kamagaua kaampana meumba ri dunia, bo mosisala nte kamagaua-kamagaua ntanina. Kamagaua haitu mompakagero njumangu dunia bo mombajeje-jejesi labina. 24 Sapulu tandu haitu, iamo sapulu magau moparenta kamagaua haitu. Pade meumba saito magau ntanina; ia ledo nasimbayu nte magau-magau pamulana, bo ia mombadagi tatalu magau ntanina. 25 Ia motesa mangeva Alatala ToNalangapa NturoNa bo mompandasa todea nu Alatala. Ia mompasimbuku mombabaliki huku bo posusa agama ntodea nu Alatala, bo ira rakuasaina talu mpae kasaena. 26 Maliu haitu potangara nu suruga motangara bo mangalasi kakuasana bo mompakaropu ia sampe domo maria. 27 Kakuasa bo pura-pura kaoge nu kamagaua ri dunia radekei ka todea nu Alatala ToNalangapa NturoNa. Kuasara moparenta ledo maria kaupu-upuna bo pura-pura tokuasa ri dunia matundu bo mokarajaa ka ira.
28 Ivesiamo tesa pompakita nipopakita ka yaku. Yaku i Daniel, nasesa mpuu raraku sampe navai lenjeku, anu niposesa raraku haitu niboliku riara ntaiku.”